Vakabula tiko na Turaga Mataboko, mai vei Carl Heinrich Bloch

19–25 ni Sepiteba

Aisea 40–49

“Dou Vakacegui Ira Na Noqu Tamata”

Eso era na sega ni lomadra mera wasea na nodra nanuma ena kalasi baleta ni ra nanuma ni ra sega ni kila vinaka na ivolanikalou. O na vukei ira vakacava na lewe ni kalasi mera kila ni sa yaga na nodra rai vakayalo?

Vola na Veika o Vakauqeti Kina

Sureta na Veiwasei

Vakasamataka mo vola e dua na taro vakaoqo ena papa ni volavola: Na cava a vakavulica vei iko na Yalo ni o vulica na Aisea 40–49? Sa rawa vei ira na lewe ni kalasi mera vakasamataka vakatitobu na taro oqo ka vola na kena isau, ka vica e rawa mera wasea na nodra nanuma.

Vakavulica na iVunau

Aisea 40–49

Ko Jisu Karisito e rawa ni vakacegui keda ka solia vei keda na inuinui.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura mera raica na itukutuku ni veivakacegui kei na inuinui ena Aisea 40–49 ka vola eso na tikina me tekivutaki kina. E rawa ni o kerei ira na lewe ni kalasi me ra wasea e dua na itukutuku era sa kunea. Vakayaloqaqataki ira me ra veivosakitaka na vuna e rawa ni a vukei ira kina na Jiu na itukutuku oqo ena nodra tiko vakavesu kei na sala e rawa ni vukei keda kina nikua. E rawa talega ni o wasea na veitikina o kunea ena nomu vuli vakataki iko. Na cava e vinakata vei keda na Turaga me da kila me baleti Koya? Na sala cava e dau vakacegui keda kina o Koya? Sa rawa mo vakavotuya vei ira na lewe ni kalasi ni “na Turaga” ena veiyalayalati makawa e vakaibalebaletaki vei Jiova, se o Jisu Karisito.

• Na sere ni Lotu “Na Yavu Tudei” (Serenilotu, naba 43) e tauri mai na vosa nei Aisea ena Aisea 41:10; 43:2–5; 46:4. Ni oti na wiliki ni ivolanikalou oqo kei na lagasere, sa rawa vei ira na lewe ni kalasi mera veivosakitaka na gauna era a vakila ni tiko kina kei ira na Turaga kei na sala e vukei ira kina na veika era sotava mera “kakua ni rere.”

“Ena vakani ira na nona qele ni sipi me vaka na ivakatawa” (Aisea 40:11).

Aisea 40:1–3, 9–11; 43:8–13; 48:20–21; 49:1–9

“Sai kemodou na noqu dauvakadinadina.”

• Na cava na kena ibalebale meda dau ivakadinadina ni Turaga? Sa rawa vei ira na lewe ni kalasi mera vakasamataka vakatitobu na taro oqo ni ra wilika e dua se sivia na veitikina oqo: Aisea 40:1–3, 9–11; 48:20–21; 49:1–9. Na itukutuku ena “iKuri ni iVurevure” e rawa me sauma talega eso na taro. Na cava na “irogorogo vinaka” eda wasea ni da sai vakadinadina ni Turaga? Na cava eso na ka ena veitikina oqo e vukei keda meda “kakua ni rere” meda wasea na noda ivakadinadina? (Aisea 40:9). Sa rawa mera veivosakitaka na lewe ni kalasi na madigi eso e rawa me ra ivakadinadina kina ni Turaga kei na sala e rawa ni vakalougatataki ira kina na tani na nodra ivakadinadina.

• Me vukei ira na lewe ni kalasi mera bulataka na ivakavuvuli eso ena Aisea 43:8–13, sa rawa mo sureti ira mera raitayaloyalotaka ni ra sa kacivi me ra ivakadinadina ena dua na mataveilewai. Ena veilewai oqo, sa beitaki ko Jisu Karisito ni cavuta na veika e volai ena Aisea 43:11. Kevaka eda a kacivi me da ivakadinadina me tokona na ka e cavuta o Jisu (raica na tikina10), na ivakadinadina cava e rawa ni da solia? Na ivakadinadina cava mai na noda bula eda rawa ni vakaraitaka?

Aisea 48:10; 49:13–16

Na Turaga ena rawa ni vakavinakataki keda ena vei ka rarawa eda sotava.

• Sa rawa vei ira na lewe ni kalasi mera veivosakitaka na veimalanivosa oqo mai vei Elder Quentin L. Cook me da kila vakamatata kina na Aisea 48:10: “Na ivakarau ni bula kei na buladodonu e rawati mai na kuro qele ni veivakararawataki ena vakavinakataki keda ka vakasavasavataki keda” (“Sere ni Lomaqu,” Liaona, Nove. 2011,106). E rawa talega ni ra veivosakitaka na sala e sa veivuke kina na nodra “kuro qele ni veivakararawataki” me vakavinakataki ira vakayalo. E vukei keda vakacava na Aisea 49:13–16 ena gauna eda vakararawataki kina? Raica talega na vidio “The Refiner’s Fire” (ChurchofJesusChrist.org). 

iKuri ni iVurevure

Tu me ivakadinadina.

Peresitedi Margaret D. Nadauld e vakamacalataka na ibalebale meda “tu ka vakadinadinataka na Kalou ena veigauna kecega, kei na veika kecega, kei na veivanua kecega dou sa tiko kina” (Mosaia 18:9):

“Ni da tu me ivakadinadina ena veigauna kecega, eda yalataka me da lomana na Turaga, me da dokai Koya ena veigauna kece sara—siga kei na bogi, ena vulaikatakata kei na vulaibatabata, ena gauna vinaka kei na gauna ca—lomana na Turaga ka laiva meda vakaraitaki na loloma o ya ena ivakarau ni noda bula.…

“Mo tu ka ivakadinadina ena ka kecega e kena ibalebale na ka kecega —na veika lelevu, na veika lalai, ena veivosaki kece, ena veiwali, ena qito kei na ivola e dau wiliki kei na sere e vakarogoci, ena veitokoni ki na dua na sasaga, ena veiqaravi e soli, ena isulu e daramaki, ena veitokani eda cakava.…

“Kena itinitini, eda kaya ni da na tu me ivakadinadina ena veivanua kecega. E kena ibalebale me sega walega e matanalevu ia ena veivanua vakaitaukei, ena veivanua vuni, ena veivanua buto se rarama; e valenilotu, koronivuli, e vale, loma ni motoka; ena ulunivanua se ena baravi; ena gaunisala se ena vanua ni gade.…

“Ni da vakasamataka na vakasakiti ni nona isolisoli [na iVakabula] vei keda, na veika lailai cava eda rawa ni cakava Vua kei na Tamada Vakalomalagi ka a talai Koya mai? E rawa ni da tu ka vakadinadinataka na Nodrau loloma kei na ivakavuvuli ena veigauna kecega, ena veika kecega, kei na veivanua kecega” (“Stand as a Witness,” Ensign, May 2000, 93,95).

Vakatorocaketaki Noda Veivakavulici

Sureta na vuli gugumatua. “Sa nodra itavi na vuli me ra sasaga me vuli vakai ira. Vakasamataka na sala e rawa ni o vukei ira kina na vuli me ra ciqoma ka qarava na itavi oqo” (Veivakavulici ena iVakarau ni iVakabula,29).