“19–25 ni Sepiteba. Aisea 40–49: ‘Vakacegui Ira na Noqu Tamata,’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Makawa 2022 (2021)

“19–25 ni Sepiteba. Aisea 40–49,” Lako Mai, Mo Muri Au—Baleta na Tamata Yadua kei na Matavuvale: 2022

iVakatakilakila

Vakabula o Jisu e dua na tamata mataboko

Vakabula na Tamata Mataboko, mai vei Carl Heinrich Bloch

19–25 ni Sepiteba

Aisea 40–49

“Vakacegui Ira na Noqu Tamata”

Dau vakayagataka wasoma o Aisea na vosa ivakatakarakara. Vakarorogo ki na vakasama kei na vakanananu e kauta mai ki na nomu vakanananu kei na yalomu na ivakatakarakara eso oqo. Oqo ena rawa ni vukei iko mo kila vakavinaka cake na veika a vakavulica o koya.

Vola na Veika o Vakauqeti kina

“Na vakacegu” sai koya na imatai ni vosa i Aisea wase e 40. E toqa na itekitekivu ni dua na rorogo duidui, ka dua na veivakadreti ka duidui ena nona itukutuku ni parofita. Na vanua e a vakasalataki ira kina o Isireli kei Juta na volavola taumada nei Aisea me baleta na veivakarusai kei na tiko vakavesu ka na yaco mai ena vuku ni nodra ivalavala ca, sa nakiti kina na veiparofisai emuri oqo me ra tiko vakacegu kina na Jiu ena 150 na yabaki mai muri—ni sa vakarusai oti ko Jerusalemi, sa vakacacani na valetabu, ka ra sa kau vakavesu na tamata ki Papiloni. Ia na parofisai oqo e yacova sara yani na veisiga ni mataka ka sega ni yaco walega vei ira na Isireli vakadrukai ka yalolailai. Era vosa vei keda, ka so na gauna eda dau vakadrukai, yalolailai, ka yali sara mada ga.

Na itukutuku nei Aisea vei ira vakakina vei keda e rawarawa sara: “Kakua ni rere” (Aisea 43:1). E sega ni sa yali na veika kece. E sega ni sa guilecavi iko na Turaga, ka sa tu vua na kaukauwa ena veika o sa sega ni lewa rawa. E sega beka ni o koya na Turaga “ko koya ka bulia na lomalagi, ka … o koya ka tevuka talega na vuravura, ka … ko koya sa solia vei ira na tamata e tiko kina na nodra icegu”? (Aisea 42:5). E sega beka ni kaukauwa cake o Koya mai vei Papiloni, mai na ivalavala ca, mai na veika kecega sa vesuki iko tu? “Mo ni lesu mai vei au,” e kerea o koya, “niu sa sereki kemuni” (Aisea 44:22). E rawa ni veivakabulai, vakalesuya mai, vaqaqacotaka, veivosoti, ka vakaceguya—se cava ga e gadrevi vei iko, me rawa ni o vueti.

Me vulica na sala erau vakatautauvatataka kina o Nifai kei Jekope na Aisea 48–49 vei ira na nodrau tamata, raica na 1 Nifai 22 kei na 2 Nifai 6.

iVakatakilakila

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Aisea 40–49

Sa rawa vei Jisu Karisito me vakacegui au ka solia vei au na inuinui.

A veivakayalolailaitaki, ka veivakacacani sara madaga, vei ira na Isireli me ra raica ni ra sa vakabobulataki tu mai Papiloni. E vuqa era na vakataroga beka kevaka era sa vakayalia vakadua na nodra itutu digitaki vakatamata ni veiyalayalati ni Kalou. Ni o wilika na Aisea 40–49, vakaraica na tikina eso e rawa ni solia na vakacegu kei na inuinui. Ena malanivosa yadua o kunea, vakasamataka vakatitobu ka vola na veika e rawa ni tukuna tiko vei iko na Turaga ena veitikina oqo. Oqo e vica na vakasama e rawa ni o tekivu kina:

O na wasea vakacava na itukutuku oqo kei na dua e gadreva tu na veivakayaloqaqataki se inuinui? (raica na Aisea 40:1–2).

Raica talega na Jeffrey R. Holland, “Na Rarama Uasivi ni Nuinui,” Ensign se Liaona, Me 2020, 81–84.

Ena noda talairawarawa vua na Turaga, e rawa ni “vaka na uciwai na noda vakacegu” (Aisea 48:18).

Aisea 40:3–8, 15–23; 42:15–16; 47:7–11

Na kaukauwa ni Kalou e cecere cake mai na kaukauwa vakavuravura.

E dau vakananumi ira wasoma na nona tamata o Aisea ena kaukauwa sega ni vakatauvatani rawa ni Kalou, ka vakatauvatani sara ki na veivakasaurarataki ni kaukauwa vakavuravura e vakavolivoliti ira. Vakaraica na itukutuku oqo ni o wilika na Aisea 40:3–8, 15–23; 42:15–16; kei na 47:7–11 (me kilai ni wase e 47 e vagolei vei ira na a tauri Isireli vakavesu, o Papiloni). Na cava e vakavulica vei iko na veika oqo me baleta na veika vakavuravura? Na cava beka e vakatavulica vei iko me baleta na Kalou? Vakasamataka vakatitobu na vuna e bibi kina na itukutuku oqo vei ira na Jiu era vakabobulataki tu. Na cava e yaga vakalevu kina vei iko?

Raica talega “Ni Tu ga vei Au!” Sere ni Lotu, naba 74.

Aisea 41:8–13; 42:1–7; 43:9–12; 44:21–28; 45:1–4; 48:10; 49:1–9

“O Iko na Noqu iTalai.”

Ena veigauna kece ena Aisea 40–49 e tukuna tiko na Turaga me baleta na Nona “italai” kei na Nona “ivakadinadina.” Ena so na malanivosa na vosa oqo e vaka me tukuni Jisu Karisito (raica na Aisea 42:1–7), eso tale era kaya vei ira na mataqali i Isireli (raica na Aisea 45:4), ka so tale era kaya vua na Tui ko Sairusi, ka a vakatarai ira na Jiu mera lesu ki Jerusalemi ka tara na valetabu (raica na 44:26–45:4). Ena veitikina yadua, e dina ni sa rawa mo ni vakasamataka na kena vakayagataki na veitikina oqo me vaka ni ko sa italai ka ivakadinadina ni Turaga. Me kena ivakaraitaki, vakasamataka vakatitobu na taro vakaoqo:

Aisea 41:8–13; 42:6; 44:21. Na cava e kacivi iko kina na Turaga mo cakava? Vakasamataka na veikacivi ni Lotu vakakina na veiitavi ni veiyalayalati me qaravi kina o Koya. Ena tokoni iko vakacava o Koya ka “taura matua na ligamu” (Aisea 42:6) ni o veiqaravi tiko? E sa “buli” iko vakacava o koya mo yaco me Nona italai? (raica talega na Aisea 48:10).

Aisea 43:9–12. Ena vakasama cava o sa ivakadinadina kina i Jisu Karisito? Na veika cava soti ena nomu bula e sa vakaraitaka vei iko ni o Koya na iVakabula?

Aisea 49:1–9. Na itukutuku cava o raica ena veitikina oqo ena rawa ni veivuke ni sa vaka me “mate wale, ka tawayaga” na nomu sasaga kei na veiqaravi? (tikina e 4).

Raica talega na Mosaia 18:9; Henry B. Eyring, “E Gone ka Tisaipeli,” Ensign se Liaona, Me 2003, 29–32.

iVakatakilakila

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Aisea 40:3–4.Me dikevi na ibalebale me “vakarautaki … na sala ni Turaga, ”sa rawa ki na nomu matavuvale me vakadodonutaki e dua na ka e veve, samaki e dua na buturara kabuwacara, se cakava e dua na sala matata ena qele veivatu. E rawa talega ni o vakaraitaka na iyaloyalo kei Joni na Dauveipapitaisotaki kei Josefa Simici (raica na Gospel Art Book, naba. 35, 87). Era vakarautaka vakacava na sala me lako mai kina na Turaga? (raica na Luke 3:2–18; Vunau kei na Veiyalayalati 135:3). Eda na veivuke vakacava ena kena vakarautaki na sala Vua? (me ivakaraitaki, raica na Vunau kei na Veiyalayalati 33:10).

Aisea 40:28; 43:14–15; 44:6.Na yaca se itutu cava i Jisu Karisito eda kunea ena veitikina oqo? Na cava e vakatavulica vei keda na yaca yadua me baleti Koya?

Aisea 41:10; 43:2–5; 46:4.Na veitikina oqo era vakavoqataki ena sere na “Na Yavu Tudei” (Sere ni Lotu, naba 43). Eratou na taleitaka beka na nomu matavuvale me ratou dau lagata vata na sere ni Lotu ka kunea eso na malanivosa e tautauvata kei na malanivosa ena veitikina oqo. Na cava e vakavulica vei keda na italanoa eso oqo me baleti Jisu Karisito?

Aisea 44:3–4; 45:8.Ni wiliki oti na veitikina oqo, ena rawa ni ratou vakasuasuataka na nomu lewe ni vuvale e dua na kautei ni dou veivosakitaka tiko na veivakalougatataki sa sovaraka mai vei ira na Turaga. Na cava e yaco ki na dua na itei ni da vakasuasuataka? Na cava e namaka vei keda na Turaga ni vakalougatataki keda?

Aisea 48:17–18.Vakasamataka mo vakaraitaka na iyaloyalo se vidio ni uciwai kei na ua ni wasawasa. Ena tautauvata beka vakacava e dua na uciwai kei na vakacegu? Ena rawa vakacava me vaka na ua na ivalavala dodonu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi “Na Yavu Tudei,” Sere ni Lotu, naba 43.

Vakavinakataki ni Vuli Yadudua

Vakamacalataka na vosa. Tovolea mo raica na ivakamacala ni vosa ena ivolanikalou o sega ni kila vakavinaka—kei na vosa mada ga o nanuma ni ko sa kila vinaka tu. Eso na gauna e rawa ni vukei iko na ivakamacala mo wilika e dua na tikina e duidui ka rawata na veivakararamataki vovou vakayalo.