Jisu ni vakabula tiko e dua na tagane mataboko

E Vakabula tiko na Tamata Mataboko o Jisu, mai vei Carl Heinrich Bloch

19–25 ni Sepiteba

Aisea 40–49

“Dou Vakacegui Ira na Noqu Tamata”

E vuqa na malanivosa ena Aisea 40–49 e rawa ni vukei ira na gone me ra vakalevutaka na nodra lomana na Turaga kei na nodra vakabauti Koya. Vakasaqara na veidusimaki ni Yalotabu mo raica na veitikina oqori ni ko vulica tiko.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Wilika na Aisea 40:9 vata kei ira na gone, ka sureti ira me ra matanataka ni ra kaba cake ki na “ulunivanua cecere” ka vakayadudua me ra qai laveta cake na domodra me ra wasea e dua na ka era vulica mai na ivolanikalou—e vale se ena Lotu.

ivakatakilakila ni veivakavulici

Vakavulica na iVunau: Gone Sobu

Aisea 43:10

Au rawa ni dua na ivakadinadina ni Turaga.

A vakananuma vei ira na Isireli na Turaga ni ra a vakadinadinataka e vuqa na vei ka lelevu e a cakava vei ira o Koya. E vinakata o Koya me ra (kei keda kece) Nona ivakadinadina, me vukei kina o ira na tani me ra kila na Nona kaukauwa kei na vinaka.

iTaviqaravi e Rawa ni Caka

• Tukuna vei ira na gone e dua na ka o sa vakadinadinataka. Vukei ira me ra vakasamataka na veika era sa sotava ka rawa ni ra wasea vakaira se me ra dua na “ivakadinadina” ni—me kena ivakaraitaki, e dua na kakana vinaka era a tovolea, na vanua era a sikova, se dua na tamata era kila. Wiliwili vei ira na gone mai na Aisea 43:10: “Sa kaya ko Jiova, sai kemudou na noqu dauvakadinadina, kei na noqu tamata ka’u sa digitaka.” Tukuna vei ira na gone ni gauna eda sa papitaiso kina eda sa yalataka me da sa dua na ivakadinadina i Jisu Karisito (raica na Mosaia 18:9). Na cava na kena ibalebale me da ivakadinadina ni Turaga?

• Kerei ira na gone me ra wasea na veika era kila me baleti Jisu Karisito kei na Nona kosipeli. Vakaraitaka vei ira na iyaloyalo me soli vakasama vei ira (me vakataka, na iyaloyalo ni nona Tucaketale na iVakabula, na iVola i Momani, na valetabu, kei na parofita bula). Sureti ira me ra veitalanoataka na veika e rawa ni ra wasea vata kei ira na tani me vaka ni ra ivakadinadina ni Turaga.

Aisea 43:11

“Sa sega tale nai Vakabula, koi au ga.”

O Jisu Karisito duadua ga e rawa ni vakabulai keda mai na ivalavala ca kei na mate. Vakasamataka vakatitobu na sala o na vakauqeti ira kina na gone me ra vakararavi ki Vua.

iTaviqaravi e Rawa ni Caka

• Sureti ira na gone me ra raitayaloyalotaka e dua na ituvaki ka ra gadreva kina na veivuke (me vaka na tauvimate se ni ra tao tu ena dua na cava). Vakaraitaka e vica na iyaya (se iyaloyalo ni iyaya), eso e rawa ni vukei ira ena ituvaki o ya ka so ena sega. Me kena ivakaraitaki, ena rawa ni veivuke beka e dua na iviu ena dua na cava, ia ena sega ni na vakakina e dua na bilo wai kei na dua na penikau. Kerei ira na gone me ra digia na iyaya ena veivuke ena ituvaki o ya. Vakaraitaka na iyaloyalo ni iVakabula me vukei ira na gone me ra tukuna na sala e vukei keda kina o Koya.

• Wilika vei ira na gone na Aisea 43:11, ka kerei ira me ra dusia e dua na iyaloyalo kei Jisu ni ra rogoca na vosa “ivakabula.” Vakadinadinataka ni baleta ga ni a vakararawataki ka mate o Jisu Karisito ena vukuda ka vakaturi cake tale, sa iKoya duadua ga e rawa ni vakabulai keda mai na noda ivalavala ca kei na mate.

ua ni wasawasa

E rawa ni na “vaka na ua ni wasawasa na nomu cakacaka dodonu” (Aisea 48:18).

Aisea 48:18

Na maroroi ni ivakaro ni Kalou ena kauta mai na vakacegu.

Na Turaga e yalataka na vakacegu me vaka na “uciwai” kei na cakacaka dodonu me vaka “na ua ni wasawasa” kivei ira era maroroya na Nona ivakaro.

iTaviqaravi e Rawa ni Caka

• Wilika vei ira na gone na Aisea 48:18. Sureti ira me ra yavalata na ligadra me vaka e dua na uciwai kei na ua. Vakamacalataka na kena sa vukei iko na nomu maroroya na ivakaro ni Kalou mo vakila kina na vakacegu me vaka e dua na uciwai se kaukauwa me vaka e dua na ua.

• Droinitaka e dua na uciwai ena papa. Vukei ira na gone me ra vakasamataka na ivakaro e sa solia vei keda na Kalou. Vola na ivakaro oqori ena tiki ni pepa (se droinitaka eso na kedra iyaloyalo rawarawa), ka me ra qai veivukevuke na gone ena vakabiri ni ivakaro ki na uciwai ena papa. Vukei ira na gone me ra vulica na kena kauta mai na vakacegu na muri ni ivakaro.

• Lagata vata e dua na sere ni ivakaro me vaka na “Talairawarawa ki na iVunau” (iVolanisere ni Gonelalai, 68). Na cava e vakavulica na sere oqo me baleta na maroroi ni ivakaro ni Kalou?

ivakatakilakila ni veivakavulici

Vakavulica na iVunau: Gone Qase Cake

Aisea 40:3–5

Au rawa ni veivuke ena kena vakarautaki na “sala i Jiova.”

Eda veivuke ena vakataucokotaki ni parofisai ena Aisea 40:3–5 ena nodra vukei na tamata me ra ciqoma na Turaga ki na nodra bula.

iTaviqaravi e Rawa ni Caka

• Kerea e dua na gone me wilika na Aisea 40:3 ka ra wilika na vo ni gone e dua vei ira na tikina oqo ka me ra qai vakasaqara na vosa kei na malanivosa e tautauvata: Marika 1:3–4 (Joni na Dauveipapitaisotaki); Alama 7:9 (Alama); Vunau kei na Veiyalayalati 33:10–11 (o ira na daukaulotu edaidai). Vukei ira me ra kila se o cei e vakarautaka tiko “na sala i Jiova” ena malanivosa yadua. Era vakarautaka vakacava na tamata oqo na sala ni Turaga? Na cava eda rawa ni cakava me da vakavakarau kina?

• Droinitaka e dua na sala ena papa, ka wilika vata kei ira na gone na Aisea 40:3–5. Kerei ira na gone me ra vola na veika dredre ena rawa ni tarovi ira na tamata mai na nodra muria na iVakabula, ka sureti ira me ra droinitaka na dredre ena salatu. Me ra bokoca laivi na veivakataotaki ni o veitalanoataka na sala eso eda rawa ni vukei ira kina na tamata me ra uabaleta kina.

Aisea 41:10; 43:1–5; 48:10

E dau tiko vata kei au na Turaga ena noqu gauna ni vakatovolei.

Ni da cakava na veiyalayalati kei na Turaga, e yalataka o koya ni na tiko vata kei keda—ena gauna mada ga ni noda vakatovolei. Vukei ira na gone me ra raici ira me vaka ni ra tiki ni nona tamata ni veiyalayalati na Turaga ka ra vakaivotavota ena Nona yalayala.

iTaviqaravi e Rawa ni Caka

• Vola ena papa ni volavola Au sa… kei na Au na… Sureti ira na gone me ra wilika na Aisea 41:10 kei na Aisea 43:1–5 me kilai kina se o cei e tukuna tiko na Turaga ni o Koya kei na veika e kaya o Koya ni na cakava. Na malanivosa cava tale era cavuti tiko ena veitikina oqo? Ena solia vakacava vei keda na vakacegu kei na inuinui na itukutuku oqo ena gauna ni dredre?

• Wilika vata na Aisea 48:10, ka veitalanoataka na cava na buka kei na duidui ni sala e vakayagataki kina. Vakamacalataka ni vakasavasavataki na kaukamea ena buka. Na cava e vakayagataki kina na buka me dua na sala vinaka ni vakamacalataki ni rarawa? Ena vakasavasavataki keda vakacava na noda vakararawataki? (raica na Alama 62:41).

Aisea 49:14–16

Na Turaga ena sega vakadua ni guilecavi au.

Ni da vakila na noda yawa mai vua na Turaga ena vuku ni ivalavala ca, veivakatovolei, se mai na dua tale na ka, na itukutuku ni Aisea 49:14–16 e rawa ni kauta mai na vakacegu.

iTaviqaravi e Rawa ni Caka

• Sureti ira na gone me ra wilika na Aisea 49:14. Na cava e rawa ni vakavuna me ra vakila na tamata ni ra sa guilecavi se biu tu? E rawa vakacava ni da vukei ira na tani me ra kila ni sega ni guilecavi ira na Turaga? Eda na kila vakacava ni sega ni guilecavi keda o Koya?

• Sureti ira na gone me ra wasea e dua era kila era na sega ni guilecava, me vaka e dua na lewe ni matavuvale se itokani. Veitalanoataka na nona dau lomani ira na luvena e dua na tina kei na Nona dau nanumi keda na Turaga. Qai kerei ira na gone me ra wilika na Aisea 49:15–16. Me vaka na veitikina oqo, na cava na vuna ena sega ni guilecavi keda kina na Turaga? Sureti ira na gone me ra wasea na nodra nanuma me baleti Jisu Karisito.

ivakatakilakila ni vuli

Vakauqeta na Vuli e Vale

Sureti ira na gone me ra vakasamataka e dua na ka era sa vulica nikua era vinakata me ra vulica vakalevu cake. Vukei ira me ra vola e dua na taro me baleta na tikina oya ka na rawa ni ra taroga kina e dua na itubutubu se lewe ni matavuvale tale eso.

Vakatoroicaketaki ni Noda Veivakavulici

Moica me ganita na nodra gagadre na gone. Kevaka o vakavulici ira na gone sobu ia ka o vakauqeti mo vakavulica vei ira e dua na ivakavuvuli e tiko ena ituvatuva oqo ena ruku ni “Gone Qase Cake” se veibasai, moica e dua na itaviqaravi vakaturi me sotavi kina na nodra gagadre kei na nodra rawa ka na gone o vakavulica.

tabana ni itaviqaravi: Au rawa ni dua na ivakadinadina ni Kalou