vulica tiko e dua na turaga na ivolanikalou

29 ni Okosita–4 ni Sepiteba

Na Vosa Vakaibalebale 1–4; 15–16; 22; 31; Na Dauvunau 1–3; 11–12

“Na Rerevaki Jiova sa Vu ni Loma-Vuku”

Ni o vulica na Vosa Vakaibalebale kei na Dauvunau, vakasamataki ira na gone o vakavulica. Na itukutuku cava soti mai na ivolanikalou oqo e rawa ni vukei ira me ra vakavoleka taki ira ki vua na Tamada Vakalomalagi kei Jisu Karisito?

Vola na Veika o Vakauqeti Kina

ivakatakilakila ni veiwasei

Sureta na Veiwasei

Droini taka ena papa ni volavola na itaba ni veika era tukuni tiko ena ivola ni Vosa Vakaibalebale, me vaka na lomamu, dua na rarama, se dua na sala. Vukei ira na gone me ra wilika na Vosa Vakaibalebale 3:5; 4:18, 26, ka sureti ira me ra wasea e dua na ka era sa vulica me baleta na veika oqo mai na ivolanikalou.

ivakatakilakila ni veivakavulici

Vakavulica na iVunau: Gone Sobu

Na Vosa Vakaibalebale 3:5

Mo vakararavi vei Jiova e na vu ni yalomu.

Ni da vakararavi ki vua na Turaga ena yaloda taucoko, eda vakabauti Koya ka da kila ni na vukei keda o Koya.

iTaviqaravi e Rawa ni Vakayacori

• Me dua vei ira na gone me taura cake tu e dua na iyaloyalo ni iVakabula ni o wilika tiko na Vosa Vakaibalebale 3:5. Vakamacalataka vei ira na gone na cava na ibalebale ni vakararavi ki vua na Turaga vei iko. Sureti ira na gone me ra cakava na rairai ni uto e ligadra se biuta na ligadra ena dela ni utodra ni ra tokaruataka na malanivosa “mo vakararavi vei Jiova e na vu ni yalomu” vakavuqa na gauna.

• Droinitaka e dua na uto levu ena papa, ka vukei ira na gone me ra vakasamataka na veika e rawa ni ra cakava me ra vakaraitaka kina ni ra nuitaka na Turaga. Sureti ira me ra droinitaka na vei ka era nanuma ena loma ni uto se dua na tiki ni pepa. Vakayaloqaqataki ira me ra wasea na nodra vakasama ki vei ira na nodra matavuvale.

veitalanoa tiko e rua na gone

E rawa ni ra solia na gone na “vosa vakayalovinaka” ena nodra vakayagataka na vosa vinaka (Vosa Vakaibalebale 15:1).

Vosa Vakaibalebale 15:1,18

Au sa rawa ni vakayagataka na vosa vakayalovinaka.

Ena gauna ni yalokaukauwa se vakatuburarawa, eda rawa ni temaki me da sauma ena cudru. Na Vosa Vakaibalebale 15:1,18 e vakavulica vei keda na sala me da vakagolea tani kina na cudru.

iTaviqaravi e Rawa ni Caka

• Wilika na Vosa Vakaibalebale 15:1 ki vei ira na gone, ka vakamacalataka e dua na vosa se malanivosa e mani sega soti ni matata vei ira. Wasea e vica na ivakaraitaki ni ituvaki e vakila kina e dua na gone na cudru (me vaka na veiba vata kei na dua na tacina se ganena). Vukei ira me ra vakasamataka na “vosa vakayalovinaka,” se na vosa vinaka, e rawa ni ra vakayagataka mai na vosa vaka cudrucudru. Vukei ira me ra vakatovotovotaka na nodra cavuta vakamalua na veika oqo se ena domo malumu.

• Lagata e dua na sere me baleta na yalovinaka, me vaka na “Me Tekivu Vei Au” (iVolanisere ni Gonelalai,83). Na cava e vakatavulica vei keda na veitikina oqo me baleta na yalovinaka?

• Me vukei ira na gone me ra kila na ibalebale ni “berabera ni cudru” (Vosa Vakaibalebale 15:18), talanoataka e dua na italanoa me baleta na gauna o (se dua o kila) a cudru voli kina ia o a qai digitaka mo yalovinaka. Sureti ira na gone me ra wasea na veika era dui sotava. Vukei ira na gone me ra vakasamataka na veika e rawa ni ra cakava me kauta ira tani mai na yalo ni cudru. Me kena ivakaraitaki, e rawa ni ra vakasamataki Jisu, kerea na Tamada Vakalomalagi me vukei ira, lagata e dua na sere ni Lalai, se, ke rawa, me ra gole tani.

Vosa Vakaibalebale 22:9

Au sa rawa ni wasea na veika sa tu vei au vei ira na tamata.

E rawa ni ra vulica na gone lalai na nodra vukei na tamata era vakaleqai tu. O na vakauqeti ira vakacava me ra wasea na veika sa tu vei ira ki vei ira na tani?

iTaviqaravi e Rawa ni Caka

• Vakaraitaka vei ira na gone e vica na iyaloyalo nodra e so tale era veiqaravi se vukei ira na tamata era vakaleqai tu, oka kina na iyaloyalo ni iVakabula (me vaka na iVola ni iYaloyalo Vakosipeli, naba. 42, 44,46). Kerei ira na gone me ra vakamacalataka na ka e yaco tiko ena iyaloyalo yadua. Wilika vei ira na gone na Vosa Vakaibalebale 22:9. Vakamacalataka ni dua na sala eda rawa ni veiqaravi kina o ya me da solia na “madrai me kedra na dravudravua,” ia e vuqa tale na sala e tiko me ra vukei kina o ira era vakaleqai tu. Sureti ira na gone me ra droinitaka e dua na kedra iyaloyalo ni ra vukea tiko e dua.

• Kauta mai ki na kalasi eso na ivakaraitaki e rawa ni wasei vei ira na gone, me vaka na iyaloyalo se kereioni. Ni ko sa solia e dua vei ira na gone yadua, kaya, “Au na wasea vata kei [yaca ni gone].” Me ra veivukevuke na gone me ra veiwasei vakai ira. Na cava eso tale na ka eda rawa ni wasea vei ira na tani?

• Lagata vata e dua na sere ni veiqaravi, me vaka na “‘Drodro,’ na Uciwai” (iVolanisere ni Gonelalai,116). Vakaraitaka na vidio “Gordon Hinckley: Lessons I Learned as a Boy” (ChurchofJesusChrist.org). Taroga vei ira na gone na veika era dau vakila ni ra vukei ira na tani.

ivakatakilakila ni veivakavulici

Vakavulica na iVunau: Gone Qase Cake

Vosa Vakaibalebale 1:7; 2:5; 15:33; 16:6; Na Dauvunau 12:13

Mo “rerevaka na Kalou” e kena ibalebale me da lomana ka talairawarawa ki Vua.

E dua vei ira na itukutuku bibi ena Vosa Vakaibalebale kei na Dauvunau sa ikoya “mo rerevaka na Kalou, ka muria na nona vunau” (Na Dauvunau 12:13). Vakasamataka na sala o na vukei ira kina na gone me ra kila na ibalebale ni rerevaka na Kalou.

iTaviqaravi e Rawa ni Caka

• Sureti ira na gone me ra vola eso na ka era rerevaka na tamata. Qai kerei ira me ra wilika na Vosa Vakaibalebale 1:7 kei na Na Dauvunau 12:13. Na cava na kena ibalebale mo rerevaka na Kalou? Me vukea na saumi ni taro oqo, kerea e dua na gone me wilika tale na tikina, vakaisosomitaka na vosa “rere” ena vosa “vakarokoroko.” Tokaruataka na itaviqaravi oqo ena vosa me vaka na “loloma,” “na talairawarawa,” se “talairawarawa.” E veisautaka vakacava na ka oqo na noda kila na ibalebale ni rerevaka na Kalou?

• Sureti ira yadua na gone me ra digitaka e dua vei ira na tikina oqo me ra wilika, ka vakasaqara na vosa “rere”: Vosa Vakaibalebale 1:7; 2:5; 15:33; 16:6. Kerei ira na gone me ra wasea na cava e vakavulica na nodra tikina me baleta na veivakalougatataki e dau yaco mai ni da rerevaka na Kalou, ka kena ibalebale ni da dau rokova ka dokai Koya tikoga (raica talega na Vosa Vakaibalebale 14:26–27). Me da vakaraitaka vakacava vua na Kalou ni da dokai Koya?

Vosa Vakaibalebale 3:5–7

“Mo vakararavi vei Jiova e na vu ni yalomu.”

• Wilika vata na Vosa Vakaibalebale 3:5–7, ka sureti ira na gone me ra vola na veika era tukuna na veitikina oqo me da vakayacora kei koya e sega ni dodonu me da cakava. Tarogi ira se cava era nanuma me ibalebale ni veika oqo. Na ivakarau cava eda raica vei ira na tamata eda nuitaka? Na ivakarau cava e tiko vua na Kalou ka na vukei keda me da vakararavi ki Vua?

• Me vakaraitaka na ibalebale ni “mo kakua ni vakararavi ki na nomu yalomatua,” me ra tovolea na gone me ra vakaravia na kau se dua na penikau e na veimataqali iyaya, me vaka e dua na ivola se dua na tiki ni pepa. Na iyaya cava e cakacaka vinaka duadua? Na cava e bibi kina me da “vakararavi vei Jiova” ka kakua ni vakararavi ki na noda “yalomatua”?

Vosa Vakaibalebale 15:1,18; 16:32

“A vosa vakayalovinaka sai vakamalumu ni cudru.”

Na veivosaki e na cudru e dau vakalevutaka sara na leqa. Na veitikina oqo e vakavulica ni noda vosa kei na noda ivakarau e rawa ni vakagolea tani na katakata se cudru.

iTaviqaravi e Rawa ni Caka

• Vola na vosa cudru kei na veileti ena papa ni volavola, ka wasea e dua na ivakaraitaki ni dua na veiba e rawa ni tu vei ira na gone. Qai kerei ira na gone me ra wilika na Vosa Vakaibalebale 15:1,18; 16:32 ka raica na ivakasala e rawa ni ra solia vei ira na gone era dau veiba. Ena veigauna yadua era wasea kina na gone e dua na vakasama, sureti ira me ra bokoca e dua na tiki ni vosa ena papa ni volavola. Sureti ira me ra vakaisosomitaka na vosa oqori vata kei ira tale eso ka vakamacalataka na ivakarau Vakarisito e kauta mai na vakacegu.

• Vukei ira na gone me ra vakasamataka na itukutuku ena ivolanikalou ena gauna e vakaraitaka kina na iVakabula na veika e vakavuvulitaki ena Vosa Vakaibalebale 15:1,18; 16:32. Me baleta na vakasama eso, e rawa ni ra raica na Joni 8:1–11; 18:1–11. Lagata vata e dua na sere me baleta na ivakaraitaki ni iVakabula, me vaka na “Meu Na Muri Jisu Tu” (iVolanisere ni Gonelalai, 40). Eda na muria vakacava na ivakaraitaki i Jisu ni da veimaliwai kei ira na lewe ni matavuvale, itokani, kei ira tale eso?

ivakatakilakila ni vuli

Vakauqeta na Vuli e Vale

Vukei ira na gone me ra digia e dua na tikina era a wilika ena kalasi ka ra dau taleitaka. Vakayaloqaqataki ira me ra wasea na tikina oqori vata kei na nodra matavuvale ka tukuna vei ira na veika era sa vulica mai kina.

Vakatoroicaketaki na Noda Veivakavulici

Torocake me vaka e dua na qasenivuli sa Vakarisito. Mo vakananuma na sala e rawa ni vakalevutaki cake kina na nomu gugumatua mo rawa ni vukei ira kina na gone me ra tara cake na nodra vakabauta na Tamada Vakalomalagi kei Jisu Karisito. Na taro ni vakadidike yadudua ena tabana e 37 ni Veivakavulici ena iVakarau ni iVakabula e rawa ni veivuke.

tabana ni itaviqaravi: Au rawa ni vakayagataka na vosa yalovinaka