Na Karisito ena icurucuru damudamu ka vakavolivoliti mai vei ira na tamata era tekiduru tiko

Ena Tekiduru Na Duru Kecega, mai vei J. Kirk Richards

22–28 ni Okosita

Same 102–103; 110; 116–119; 127–128; 135–139; 146–150

“Me Vakavinavinaka vei Jiova Na Ka Kecega Sa Cegu Rawa”

Kevaka o gadreva na ikuri ni vakasama ni ko vakavakarau mo veivakavulici, raica na “iKuri ni iVurevure ni Vakavulici ira na Gone” kei na “Sotavi nodra Gagadre na Gone Sobu” ena itekivu ni ivurevure oqo.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vakaraitaka eso na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra veitalanoataka na veika era raica ena iyaloyalo. Vukei ira me ra raica na isema eso ni vei iyaloyalo oqo kei na veika era sa vulica tiko ena ivola ni Same.

ivakatakilakila ni veivakavulici

Vakavulica na iVunau: Gone Sobu

Same 119:105

Na vosa ni Kalou e vaka e dua na rarama.

O ira na gone o vakavulica era sa tiko ena sala lesu vua na Tamada Vakalomalagi. Na vosa ni Kalou e rawa ni vukei ira mera tiko ga ena sala o ya edaidai kei na nodra bula taucoko.

iTaviqaravi e Rawa ni Caka

• Vakaraitaka na iyaloyalo ni veika e tukuni tiko ena Same 119:105, ka sureti ira na gone me ra biuta na iyaloyalo ena kedra ituvatuva dodonu ni o wiliwili tiko. Kerei ira na gone me ra cavuta vakavica vata kei iko na malanivosa mai na tikina, ni o dusia tiko na iyaloyalo.

• Sureti ira na gone me ra tukuna na veika era na vakila ke ra tiko ena vanua butobuto. Na veika cava soti e dau dredre me da cakava ena butobuto? E rawa ni o sureta e dua na gone me tovolea me cakava e dua na ka ni bobo na matana, me vaka na droinitaki ni dua na iyaloyalo. Na cava e rawarawa me caka kina na veika oqo ni tiko na rarama? Vukei ira na gone me ra kila na sala ena vakararamataka kina na noda sala lesu vei Tamada Vakalomalagi na vosa ni Kalou, me vaka e kunei ena ivolanikalou kei na nodra vosa na parofita bula.

Same 139:1–3, 23

Na Tamada Vakalomalagi kei Jisu Karisito e Rau kilai au ka lomani au.

Ena noda bula taucoko, sa dodonu me da vakananumi ni o Tamada Vakalomalagi kei Jisu erau kilai keda vakayadua. Same 139 e rawa ni vukei iko mo vakavulica vei ira na gone ni Rau kilai ira ka lomani ira.

iTaviqaravi e Rawa ni Caka

• Vola vakalekaleka na veika o kila tu me baleti ira na gone yadua. Ni o wilika yadudua na lisi, kerei ira na gone me ra kilakila se o cei o vakamacalataka tiko. Wilika na Same 139:1–3, ka vukei ira na gone me ra kila vinaka na vosa era na sega beka ni kila. Vakadinadinataka ni o Tamada Vakalomalagi kei Jisu erau sa kilai ira vakavinaka sara—e Rau kila na yacadra, na cava e dau vakavuna nodra marau kei na rarawa, kei na veika era dau cakava vakavinaka.

• Wilika na Same 139:23, ka sureti ira na gone me ra biuta na ligadra e utodra ni o cavuta na “lomaqu” ka tara na uludra ni o kaya “na nanuma.” Wasea e dua na gauna o a vakila kina ni kila na Kalou na lomamu kei na nomu nanuma.

Same 146:1, 5–9

Au rawa ni vakacaucautaka na Turaga.

Me da vakacaucautaka na Turaga sa kena ibalebale me da vakaraitaka na noda vakavinavinaka kei na noda loloma vei Koya. Vukei ira na gone me ra vulica ni da sa vakacaucautaki Koya tiko ni da cakava na veika eso me vaka na lagasere, masu, ka talairawarawa ki na Nona ivakavuvuli.

iTaviqaravi e Rawa ni Caka

• Sureti ira na gone me ra wasea na veika era sotava ni dua e vakacaucautaki ira se tukuna vei ira ni ra cakava e dua na cakacaka vinaka. Wasea eso na ka vinaka mai na Same 146:6–9 ka sa vakayacora na Turaga, ka sureti ira na gone me ra veivosakitaka na veika tale eso e cakava o Koya vei keda. Vukei ira mera vakasamataka na sala eso e rawa ni ra vakacaucautaki Koya kina ena vuku ni veika vaka o ya.

• Lagata vata e dua na sere ni veivakacaucautaki, me vaka na “Beauty Everywhere” (Children’s Songbook, 232). Vakamacalataka ni vei ira na Isireli ena gauna makawa, na Same a dau lagati me vaka na sere eda laga tu nikua me da sokalou ka vakacaucautaka kina na Kalou.

ivakatakilakila ni veivakavulici

Vakavulica na iVunau: Gone Qase Cake

Same 102:1–2; 103

Sa solia tu vei au na Turaga na vakacegu kei na inuinui.

Sa kila vinaka tu na Kalou na noda vakatovolei kei na noda rarawa, ka sa gadreva o koya me vakacegui keda ka vakayaloqaqataki keda. Vukei ira na gone me ra tara cake na nodra vakabauti Koya me rawa ni ra na golevi Koya ena gauna ni leqa.

Veivakabulai o Jisu

Veivakabulai, mai vei J. Kirk Richards

iTaviqaravi e Rawa ni Caka

• Kerea e dua vei ira na gone me wilika na Same 102:1–2. Ena vukei keda vakacava na Turaga ni da sotava na veivakatovolei? Eda na kerea vakacava na nona veivuke? Wasea e dua na gauna o a vakila kina ni sa rogoca na Kalou na nomu masu ena gauna e gadrevi kina, ka sureti ira na gone me ra wasea na veika era sa sotava kei na nodra ivakadinadina.

• Sureti ira na gone me ra vaqara na vosa ni veivakacegui kei na inuinui ena Same 103. Ena vukei ira vakacava na tamata era sotava tiko na bolebole na veivosa eso oqo? Vakauqeti ira na gone me ra vola na veimalanivosa era raica ni vakaibalebale me vakananumi vei ira ni na Turaga ena rawa ni vukei ira ni ra sotava na veivakatovolei.

Same 119:105

Na vosa ni Kalou e vukei au meu muria na nona sala.

E dina ni na buto beka na vuravura ena so na gauna, na vosa ni Kalou ena rawa ni vakararamataka na noda salatu ka vukei keda meda lesu yani Vua.

iTaviqaravi e Rawa ni Caka

• Droinitaka ena vava ni volavola e dua na iyaloyalo ni rarama (me vaka na cina) kei na iyaloyalo ni ivolanikalou. Sureti ira na gone me ra wilika na Same 119:105. E vukei keda vakacava na rarama? E vukei keda vakacava na vosa ni Kalou? Kerei ira na gone me ra vola na nodra isau ni taro ena papa ni volavola ena yasa ni iyaloyalo. E tautauvata vakacava kei na rarama na vosa ni Kalou? Ena vukei keda vakacava meda tiko ga ena salatu ka na muataki lesu vei Tamada Vakalomalagi?

• Wasei ira na gone me ra veisasa, ka solia vei ira e dua vei ira na tiki ni ivolanikalou oqo: Same 119:47–48; Same 119:105; 1 Nifai 11:25; 2 Nifai 31:20. Sureti ira mera wilika na malanivosa ka vakasaqara na veika sa solia vei keda na Tamada Vakalomalagi me vukei keda meda tiko ga ena sala lesu ki Vua. Sureti ira na gone me ra vakasamataka vakatitobu ka wasea na veika era sa vakauqeti mera cakava ena vuku ni veika era sa vulica.

• Lagata vata e dua na sere me baleta na muria na sala ni Kalou, me vaka na “I Will Walk with Jesus” (ChurchofJesusChrist.org). Na cava eda vulica mai na sere oqo me baleta na ivakarau me da tiko kina ena sala dodonu?

Same 139: 23–24

Sa rawa ni vukei au na Tamada Vakalomalagi kei Jisu Karisito meu kila na sala meu vakatorocaketaki kina.

Same 139 e vakavulica ni kila tu na Kalou na veika kece me baleti keda, oka kina na noda kaukauwa kei na noda malumalumu. Kevaka eda gole Vua, sa rawa ni vakavulica vei keda o Koya na veika e gadrevi meda cakava meda vakataki Koya vakalevu cake.

iTaviqaravi e Rawa ni Caka

• Vola na vosa ni Same 139:23–24 ena vava ni volavola, ka sureti ira na gone me ra toqa na vosa e vakamacalataka na veika e rawa ni cakava na Kalou vei keda. Na cava na vuna eda vinakata kina vua na Kalou me cakava na veika oqo? E rawa vakacava ni da sureti Koya me “tuberi [keda] ena sala ni bula tawamudu”?

• Vakauqeti ira na gone me ra “vakasaqara” na nodra dui bula ena sala e rawa ni ra vakatorocaketaki kina ena va na iwasewase ni vakanamata ena parokaramu ni Gone kei na iTabagone—na bula vakayalo, veimaliwai, bula vakayago, kei na vakasama. Vakananuma vei ira ni kila tu na Turaga na sala me ra torocake kina ena veitikina yadua oqo, ka vakayaloqaqataki ira me ra vakasaqara na Nona veidusimaki.

• Lagata e dua na sere me baleta na sala e rawa ni vukei keda kina na Tamada Vakalomalagi me da torocake, me vaka na ikarua ni qaqana ni “Ni Vukei Au Mai Noqu Kalou” (iVolanisere ni Gonelalai, 52). Wasea na sala a vukei iko kina na Tamada Vakalomalagi kei Jisu Karisito mo vinaka cake.

ivakatakilakila ni vuli

Vakauqeta na Vuli e Vale

Ena so na gauna, sa rawa mo sureta e dua vei ira na gone kei dua vei ira na lewe ni nona matavuvale me wasea ki na kalasi na ka era sa cakava tiko mera vulica kina na kosipeli e vale. Vakauqeti ira na vo ni gone me ra wasea na veivakasama oqo ki na nodra matavuvale.

Vakatorocaketaki Noda Veivakavulici

Vakayagataka na ivakatagi. Na sere ni lalai kei na sere ni lotu e rawa ni vukei ira na gone mera kila vakavinaka ka tugana na dina ni kosipeli ena dua na sala ena guilecavi dredre kina. Na lagasere sa rawa talega ni vakabulabulataka na nodra vuli-ka na gone . (Raica na Veivakavulici ena iVakarau ni iVakabula, 22.)

tabana ni itaviqaravi: Na vosa ni Kalou sa vaka e dua na rarama