Jisu e salavata kei ira na sipi

Sa Noqu iVakatawa Ko Jiova, mai vei Yongsung Kim, havenlight.com

8–14 ni Okosita

Same 1–2; 8; 19–33; 40; 46

“Sa Noqu iVakatawa Ko Jiova”

Na ituvatuva oqo e vakatututaka tiko eso na veitikina totoka ena Same ka na vakalougatataki ira na gone, ia mo kakua ni yalani ki na veitikina oqo. Muria na veidusimaki ni Yalo.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Ni vo e vica na siga, sureta e vica na gone mera kauta mai ki na kalasi na droini ka matataka na veika era a wilika ena Same vata kei na nodra matavuvale ena macawa oqo, me vaka e dua na ivakatawa (raica na Same 23:1), e dua na bilo (raica na Same 23:5), se e dua na uto (raica na Same 24:4). Sureti ira me ra talanoataka na nodra droini kei na tikina mai na Same ka tukuni kina.

ivakatakilakila ni veivakavulici

Vakavulica na iVunau: Gone Sobu

Same 19:1; 33:5

“Sa tukuna na lagilagi ni Kalou ko lomalagi.”

Same 19 kei na33 e vakavulica ni rawa ni da raica na ivakadinadina ni lagilagi kei na vinaka ni Kalou ni wavoliti keda tu ena Nona ibulibuli totoka. Vukei ira na gone me ra vulica me ra raica na liga ni Kalou ena vuravura ka wavoliti ira tu.

iTaviqaravi e Rawa ni Caka

• Vakaraitaka vei ira na gone eso na iyaloyalo ni veika totoka sa bulia na Kalou, se mo ni rai vata ki tautuba ena dua na katubaleka me raici kina na veika oqo. Tarogi ira na gone se cava era taleitaka me baleta na ibulibuli nei Tamada Vakalomalagi. Wilika e na Same 19:1 se 33:5, ka taroga vei ira na gone na veika era vakila baleta na Tamada Vakalomalagi ni ra raica na Nona ibulibuli.

• Lagata e dua na sere baleta na ibulibuli ni Kalou, me vaka na “The World Is So Lovely” (Children’s Songbook, 233). Sureti ira na gone me ra digitaka e dua na ka e bulia na Kalou (me vaka e dua na ka e tukuni ena sere) ka droinitaka e dua na kena iyaloyalo me ra wasea vata kei na nodra matavuvale.

Same 23

“Sa Noqu iVakatawa Ko Jiova”

Kevaka e rawa ni ra vulica na gone ni ra se gone ni sa nodra ivakatawa na Turaga, era na rawa me ra na muri koya “ena salatu ni ivalavala dodonu.”

iTaviqaravi e Rawa ni Caka

• Solia vei ira yadua na gone e dua na ilavelave ni tabana ni itaviqaravi ni macawa oqo, se solia vei ira yadua e dua na iyaloyalo mai na tabana ni itaviqaravi. Sureti ira me ra vakarorogo ni o wilika na Same 23. Kerei ira mera dusia se taura cake e dua na iyaloyalo ni ra rogoca ni tukuni ena Same. Wasea na nomu ivakadinadina ni sa maroroi keda tiko o Jisu, me vaka ga e dua na ivakatawa ni sipi sa dau maroroi ira na nona sipi.

• Tukuna vei ira na gone eso na sala o kila ni lomani iko na iVakabula. Sureti ira na gone me ra tucake yadudua ka wasea eso na sala era kila ni lomani ira o Jisu. Lagata vata e dua na sere ka rawa ni vakavure vakasama, me vaka na “Au Vakilai Koya” (iVolanisere ni Gonelalai, 42).

Same 30:5

O Jisu Karisito e rawa ni vukei keda meda vakila na marau ena gauna ni rarawa.

Vakasamataka vakatitobu na sala o na vukei ira kina na gone me ra rawata vakataki ira na nodra ivakadinadina me baleta na reki e solia vei keda o Jisu Karisito ni da rarawa.

iTaviqaravi e Rawa ni Caka

• Sureti ira na gone me ra matanataka ni ra tagi tiko ni o wilika na Same 30:5, “Sa ia na tagi ena bogi.” Qai kerei ira mera marau ni ko wilika na, “Ia sa yaco ena mataka na marau.” Cavuta vakavica vata na malanivosa oqo, ka vakadinadinataka vei ira na gone ni ena vuku ga i Jisu Karisito, na rarawa eda vakila ena bula oqo ena rawa ni vakaisosomitaki ena marau.

• Vakaraitaka e dua na iyaloyalo ni iVakabula, ka tukuna vei ira na gone me baleta eso na ka sa cakava vei iko ka kauta mai vei iko na marau. Solia vei ira yadua na gone e dua na gauna me ra taura na iyaloyalo ka wasea na veika sa cakava o Jisu ka kauta mai vei ira na marau.

ivakatakilakila ni veivakavulici

Vakavulica na iVunau: Gone Qase Cake

Same 23; 27–28; 32; 46

Na Turaga e solia vei au na vakacegu, na kaukauwa, kei na veidusimaki.

E vuqa na Same era vakadinadinataka na veivakalougatataki ni Turaga ena noda bula. Sa rawa mo vakayagataka na Same mo vukei ira na gone mera vulica mera vakararavi ka gole vei Koya.

iTaviqaravi e Rawa ni Caka

• Vola ena papa NaTuraga e . Me ra digitaka na gone e dua se sivia na ivolanikalou oqo me ra wilika: Same 23:1; 27:1; 28:1; 28:7; 32:7; 46:1. Kerei ira me ra vakacavara na iyatuvosa ena papa ni ra vakayagataka na veika era vulica mai na nodra ivolanikalou. Vukei ira na gone me ra veivosakitaka na cava e vakavulica vei keda na ivakatakarakara eso oqo me baleta na Turaga.

• Vakaraitaka vei ira na gone e dua na iyaloyalo ni lami. Kerei ira me ra cavuta eso na ka e gadreva e dua na Lami me taqomaki ka bulabula kina, ka vakauqeti ira me ra vakaraica ena Same 23:1–4 me baleta na vakasama eso. Vakaraitaka na iyaloyalo ni dua na gone. Na cava eda gadreva me da taqomaki ka bulabula kina vakayalo? Wilika vata na Same 23, ka taroga vei ira na gone na kena rawa ni vakatauvatani na veika e cakava na ivakatawa ena Same oqo ki na veika e cakava vei keda o Jisu Karisito.

Valetabu e Concepción Chile

E dodonu me da savasava ka sega ni tauvi duka vakayalo me da curu kina ki na iserau ni Turaga.

Same 24:3–4

Me da curuma na valetabu, eda na gadreva na “liga savasava, kei na yalosavasava.”

Ni ra sa nanamaki tiko na gone me ra curuma yani na valetabu ena dua na siga, vukei ira me ra kila ni sa rawa me ra vakavakarau ena nodra yaco me ra savasava vakayalo ena vuku ni Veisorovaki ni iVakabula.

iTaviqaravi e Rawa ni Caka

• Vakaraitaka vua e dua na gone na itaba ni dua na valetabu. Sureti ira me ra wilika na Same 24:3 ka vakaraica na vosa e vakananuma vei ira na valetabu. Qai wilika vata na tikina e 4 mo vulica se o cei e rawa ni curuma na valetabu (vakamacalataka eso na vosa sega ni matata). E rawa vakacava me duka vakayago na ligada? E yaco vakacava me duka vakayalo na ligada kei na yaloda? Eda na vakasavasavataka vakacava na ligada vakayago? E vukei keda vakacava na iVakabula me da vakasavasavataka na ligada kei na yaloda vakayalo? (Kevaka e veivuke, vakamacalataka ni “liga” ena tikina oqo e rawa ni matataka na noda ivalavala kei na “lomada” e rawa ni matataka na noda gagadre.)

• Railesuva vata kei ira na gone na veika e gadrevi me ciqomi kina e dua na ivolatara ni valetabu (raica na Russell M. Nelson, “iOtioti ni Vosa,” Liaona, Nove. 2019, 120–22; se sureta e dua na lewe ni matabisopi me veivosakitaka na veika ka gadrevi oqo kei na kalasi). Sureti ira na gone me ra digitaka e dua na ka era vakauqeti kina me ra cakava me ra vakavakarau me ra kilikili ni curu ki na valetabu.

Same 46:10

“Dou tiko lo, mo dou kila niu sa Kalou.”

Ena rawa ni vukei keda meda tara cake na noda ivakadinadina ni bula tiko na Kalou, na noda taura na gauna meda tiko vakarokoroko ka vakanomodi, dina ga ni tu wavoliti keda tu na osooso.

iTaviqaravi e Rawa ni Caka

• Vukei ira na gone me ra cavuqaqataka na imatai ni laini mai na Same 46:10: “Dou tiko lo, mo dou kila niu sa Kalou.” Veivosakitaka vata kei ira na cava e kena ibalebale mo “dou tiko lo,” vakayago ka vakavakasama. Wasea vei ira na gone e dua na ka o a sotava ena gauna o dau “tiko lo” kina ka a vakaukauwataka na nomu ivakadinadina me baleta na Tamada Vakalomalagi. Sureti ira na gone me ra wasea eso na veika era sa sotava oti. Na cava na vuna e se dua tikoga kina na sala bibi me da kila kina ni bula tiko na Kalou o ya na noda tiko vakanomodi?

• Sureti ira na gone me ra railesuva vata kei iko na veika era dau cakava ena loma ni dua na siga. Vukei ira me ra vakasamataka na veigauna eso ena loma ni siga e rawa ni ra tovolea kina me ra “tiko lo” ka vakila ni ra voleka vua na Tamada Vakalomalagi. Vakayaloqaqataki ira me ra cakava e dua na lalawa me ra vakayagataka na veigauna vakaoqori ena macawa ka tarava me vaqaqacotaki kina na nodra ivakadinadina baleti Tamada Vakalomalagi.

• Sureti ira na gone me ra vola eso na ka e rawa ni da cakava me da kila kina vakataki keda ni bula dina tiko na Tamada Vakalomalagi ka sa lomani keda o koya. Sureti ira mera digitaka e dua na ka mai na ituvatuva era via cakava.

ivakatakilakila ni vuli

Vakauqeta na Vuli e Vale

Sureti ira na gone me ra digitaka e dua na tikina mai na same, era sa veivosakitaka oti nikua ka ra taleitaka. Vakayaloqaqataki ira me ra wasea na tikina oqori ki vua e dua na lewe ni matavuvale se itokani.

Vakatorocaketaki ni Noda Veivakavulici

Vakanamata tiko ki na nodra gagadre na gone. Ni ko qasenivuli, o sa tiko ena dua na itutu digitaki mo kila na nodra gagadre o ira o vakavulica. Na veika o sotava, na nomu kilai ira vinaka na gone, kei na veidusimaki ni Yalo ena vukei iko mo kila na itaviqaravi ni vuli cava e rawa ni tara cake na nodra vakabauta na Tamada Vakalomalagi kei Jisu Karisito.

tabana ni itaviqaravi: “Sa Noqu iVakatawa ko Jiova”