e taura tiko na cina o Jisu

Vakabula na ka sa yali, mai vei Michael T. Malm

15–21 ni Okosita

Same 49–51; 61–66; 69–72; 77–78; 85–86

“Ka’u na Tukuna na Ka Sa Cakava ko Koya e na vuku ni Yaloqu”

Na nomu ivakaraitaki me vaka e dua na gonevuli ni kosipeli e rawa ni veivakayarayarataki kaukauwa vei ira na gone. Wasea vei ira na veika o sotava vakayalo ena nomu vulica na kosipeli.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Wasea vei ira na gone e dua na tikina mai na same, na serenilotu, se sere ni gonelalai e vukei iko mo vakila na loloma ni iVakabula. Solia vei ira yadua na gone e dua na gauna me ra vakayacora vakakina.

ivakatakilakila ni veivakavulici

Vakavulica na iVunau: Gone Sobu

Same 51:10

Ni’u cakava e dua na digidigi cala, sa rawa ni vukei au o Jisu Karisito meu veisau.

Vukei ira na gone me ra kila ni caka cala e tiki ni bula vakayago ka rawa ni da ciqoma na veivuke mai vei Jisu Karisito me uabaleta kina.

iTaviqaravi e Rawa ni Caka

• Wasea e dua na italanoa rawarawa, mai na nomu bula se mai na iTokani se Liaona, me baleta e dua na gone ka a digidigi cala ia a ciqoma na veivuke mai vua na iVakabula me vinaka cake (me ivakaraitaki, raica na vidio “The Shiny Bicycle” ena ChurchofJesusChrist.org). Wilika na Same 51:10, ka wasea na marau o vakila ni vukei iko na iVakabula me tiko na “yalo savasava” kei na “yalo sa dei tiko.”

• Vakaraitaka vei ira na gone na tabana ni itaviqaravi ni macawa oqo. Dusia na iyaloyalo yadua, ka kerei ira na gone me ra vakamacalataka na veika era raica. Wilika na ivakamacala ni iyaloyalo me vukei ira na gone me ra vulica me baleta na veivutuni kei na veivosoti.

Same 71:8

Au rawa ni tukuni Jisu Karisito vei ira na tani.

Na vosa ni dua na gone ka cavuti ena vakabauta e tiko kina na kaukauwa vakasakiti me tara na yalo. Vakadeitaka vei ira na gone ni nodra i vakadinadina baleti Jisu Karisito e na rawa ni vukei ira na tani.

rau dabe vata e rua na gonetagane ena idabedabe

E rawa ni da veivosaki kei ira tale eso me baleta na veika sa cakava o Jisu vei keda.

iTaviqaravi e Rawa ni Caka

• Wilika vei ira na gone na Same 71:8, ka droinitaka e dua na gusu levu ena papa. Kerei ira me ra vukei iko me “vakasinaiti” na gusu ena veika eda rawa ni tukuna vei ira eso me baleti Jisu Karisito.

• Solia wavoki e dua na iyaloyalo kei Jisu Karisito. Kerei ira na gone me ra veivukevuke ena kena tauri na iyaloyalo ka cavuta e dua na ka era kila me baleti Koya. Na cava e sa cakava oti o Koya vei keda? (Na iyaloyalo ena iVola ni iYaloyalo Vakosipeli e rawa ni vakavurea eso na vakasama.)

Same 86:7

Na Tamada Vakalomalagi sa dau rogoca ka sauma na noqu masu.

E vuqa na same era sa vaka na masu vua na Kalou me baleta na veivuke, veituberi, se veitaqomaki. Vakasamataka na sala e rawa ni o vukei ira kina na gone me ra tara cake nodra vakabauta ni dau rogoca ka sauma na Tamada Vakalomalagi na nodra masu.

iTaviqaravi e Rawa ni Caka

• Tarogi ira na gone se ra dau veivosaki vakacava kei ira na tamata era tiko veiyawaki. Vakaraitaka vei ira na veika e rawa ni da vakayagataka me da veitaratara kina, me vaka na talevoni se ivola. Wilika vei ira na Same 86:7. Eda “masuta” tiko beka vakacava na Tamada Vakalomalagi? E sauma tiko beka mai vakacava o Koya noda masu?

• Sureti ira na gone me ra matanataka na veika era dau cakava e veisiga, me vaka na yadra mai na moce, katalau, biubiu ki koronivuli, se davo me moce. Vukei ira me ra raica eso na gauna ena loma ni siga era rawa ni masu kina vei Tamada Vakalomalagi. Vakadinadinataka ni rawa ni da masu Vua ena dua ga na gauna, ka na dau rogoci keda o Koya.

• Lagata vata e dua na sere baleta na masu, me vaka na “Tamaqu mai Lagi” (iVolanisere ni Gonelalai, 6). Talanoataka e dua na gauna a sauma kina na nomu masu na Kalou.

Same 77:11

“Au na nanuma na cakacaka i Jiova”

Na ivolanikalou e rawa ni tara cake na noda vakabauti Jisu Karisito ena kena vukei keda me da nanuma na Nona “cakacaka mana mai liu.”

iTaviqaravi e Rawa ni Caka

• Wilika vei ira na gone na Same 77:11, ka tukuna vei ira na sala o tovolea kina mo “nanuma na cakacaka i Jiova,” oka kina na Nona cakacaka ena nomu bula. Sureti ira na gone me ra droinitaka na iyaloyalo me vukei ira me ra nanuma na veika cecere sa vakayacora oti o Koya.

• Vakaraitaka na iyaloyalo mai na ivola oqo se mai na Lako Mai, Mo Muri Au—Baleta na Tamata Yadua kei na Matavuvale me vakananumi kina vei ira na gone na italanoa era sa vulica ena Veiyalayalati Makawa me baleta na veika lelevu sa vakayacora oti na Turaga vei ira na Nona tamata. Tarogi vei ira se italanoa cava vei ira oqo era taleitaka vakalevu ka cava e vuna.

ivakatakilakila ni veivakavulici

Vakavulica na iVunau: Gone Qase Cake

Same 51

Na veivutuni sai koya na veisau ni lomada.

Same 51 e tiko kina e vica na dina me baleta na veivutuni. O na vukei ira vakacava na gone me ra kunea na dina eso oqo?

iTaviqaravi e Rawa ni Caka

• Lesi ira yadua na gone mera wilika e dua na tiki ni ivolanikalou ka tiko ena tabana ni itaviqaravi ena macawa oqo. Kerei ira mera vakasaqara na vosa ka vakavulica vei ira e dua na ka me baleta na veivutuni. Vakatara vei ira mera vola na vosa ena papa. Ni oti kece na nodra veiwasei , tarogi ira na gone se ra na sauma vakacava e dua na itokani e taroga, “Na cava na kena ibalebale me da veivutuni?”

• Droinitaka e dua na uto lailai ena papa. Kerei ira na gone me ra tukuna eso na ivalavala ca e temaki keda kina o Setani me da vakayacora. Vola na ivalavala ca oqori e loma ni uto. Kerei ira na gone me ra vakasaqara na vosa lomaqu ena Same 51:10, 17. Na cava e vakavulica vei keda na veitikina oqo me baleta na veivutuni? (raica talega na tikina e 6). Vukei ira na gone me ra kila ni kevaka sara mada ga eda tarovi keda ni vakayacora nai ivalavala ca, e dodonu me veisau na lomada me rawa kina ni da veivutuni. Kerei ira na gone me ra bokoca na ivalavala ca ena loma ni uto ena vava ka vola na vosa vou ka vakamacalataka na veisau e lomada ni da veivutuni. Wasea na nomu ivakadinadina ni sa rawa vua na Kalou me “bulia [vei keda] na yalo e savasava” ni da veivutuni (tikina e 10).

Same 66:16; 77:11; 78:7

“Au na nanuma na cakacaka i Jiova”

Era a vakavulici ira na luvedra o ira na Isireli me baleta na mana ni veika a vakayacora vei ira na Kalou me rawa kina vei ira na gone me ra “vakararavi ga vei koya na Kalou” (Same 78:7).

iTaviqaravi e Rawa ni Caka

• Kerei ira na gone me ra wasea vei iko eso na nodra italanoa taleitaki mai na ivolanikalou (na iyaloyalo eso mai na iVola ni iYaloyalo Vakosipeli ena rawa ni vukei ira me ra vakasamataka eso na italanoa). Na cava era taleitaka kina na italanoa eso oqo? Na cava e vakavulica vei keda na italanoa eso oqo me baleta na Turaga? Wilika vata na Same 77:11; 78:7. Na cava na vuna e bibi kina me ra “nanuma na cakacaka i Jiova”?

• Kerei ira na gone me ra wilika na Same 66:16 ka vakasamataka se vola na isau ni taro “Na cava sa cakava ko Koya ena vuku ni yaloqu?” Me ra qai wasea na nodra isau ni taro, kevaka era vinakata. Na cava e rawa ni da cakava me da “dau nanuma tikoga” (Moronai 4:3; 5:2) na veika sa cakava vei keda na Turaga?

Same 86:5, 13, 15

Na Turaga e vinakata me veivosoti.

Ni da kitaka na ivalavala ca, sa vinakata o Setani meda nanuma ni na sega ni vosoti keda na Turaga. Vukei ira na gone me ra tara cake nodra vakabauta ni Turaga e “daulomadonu ka daulevu na nomuni loloma” (Same 86:5).

iTaviqaravi e Rawa ni Caka

• Vakaraitaka e dua na iyaloyalo ni iVakabula (me vakataka e dua ena Lako Mai, Mo Muri Au—Baleta na Tamata Yadua kei na Matavuvale), ka tarogi ira na gone se na vosa cava era na vakayagataka mera vakamacalataki Koya kina. Sureti ira me ra vakasaqara na vosa e vakamacalataki Koya ena Same 86:5, 13, 15. Kevaka e gadrevi, vukei ira me ra vakamacalataka na veivosa oqori. Na cava e rawa ni da tukuna vua e dua na itokani e nanuma ni Kalou e na cudruvi ira ni ra ivalavala ca?

• Lagata vata kei ira na gone e dua na sere o nanuma ni na vukei ira me ra kila na ituvaki ni veivosoti ni iVakabula, me vaka na “Loloma i Jisu” (Sere ni Lotu, naba. 110). Wasea na nomu ivakadinadina ni vinakata o Jisu Karisito me vosoti keda.

ivakatakilakila ni vuli

Vakauqeta na Vuli e Vale

Sureti ira yadua na gone me ra tukuna e dua na vuna era lomana kina na Tamada Vakalomalagi kei Jisu Karisito. Vakauqeti ira mera wasea na vuna oqori vua e dua e vale. Vakadinadinataka ni nodra vosa ena vakalougatataka na tamata oya.

Vakatorocaketaki ni Noda Veivakavulici

Vakaraitaka na yalodei. “Kevaka era vakila na [gone] ni o nuitaki ira, na nodra yalodei ena kedra ituvaki vakalou ena tubu. … Tukuna ena yalololoma ni o kila ni rawa me nodra itavi na nodra vuli vakai ira ”(Veivakavulici ena iVakarau ni iVakabula, 28).

tabana ni itaviqaravi: Ni’u cakava e dua na digidigi cala, sa rawa ni vukei au o Jisu Karisito meu veisau