Na Karisito ena icurucuru damudamu era vakavolivoliti Koya na tamata era tekiduru tu

Ena Tekiduru na Duru Vakaadua Ga, by J. Kirk Richards

22–28 ni Okosita

Same 102–103; 110; 116–119; 127–128; 135–139; 146–150

“Ia na Ka Kecega sa Tu Kina na iCegu ni Bula me Vakacaucautaka na Turaga”

NaSame 119:105 e vakavulica ni vosa ni Kalou sa “rarama ki na [nomu] sala.” Ni o wilika na Same, vola na veimalanivosa kei na vakasama eso e vakauqeti iko ka vukea me vakararamataki na nomu sala lesu vua na Tamada Vakalomalagi.

Vola na Veika o Vakauqeti Kina

Na yaca kilai vaka-Jiu me baleta na ivola ni Same e vosa vaka-Iperiu ka kena ibalebale na “vakacaucau.” Na vosa o ya, na Tehillim, e semati talega ki na ivakatakilakila “hallelujah” (kena ibalebale “dokai Jiova” se “vakacaucautaka na Turaga”). Kevaka mo digitaka e dua na vosa me soqoni vata kina na ulu ni itukutuku ena Same, ena vosa vinaka mo digitaka “na vakacaucau.” Eso na Same e tiko kina na veisureti dodonu me “vakacaucautaka na Turaga” (raica vakabibi na Same 146–50), ka rawa ni ra vakauqeta taucoko na Yalo ni sokalou kei na veivakacaucautaki. Na Same e sureti keda meda vakananuma na nona kaukauwa na Turaga, ena Nona loloma veivueti, kei na veika cecere sa vakayacora o Koya. Eda na sega ni rawa ni saumi Koya ena dua na ka oqo, ia eda rawa ni vakacaucautaki Koya kina. Na veivakacaucautaki o ya ena duatani na kena iwalewale vei ira na tamata duidui—e rawa ni okati kina na lagasere, masu, se wasei ni ivakadinadina. E dau veimuataki ki na dua na veidinadinati titobu cake vua na Turaga ka muria na Nona ivakavuvuli. Se cava ga na ibalebale ni “dou vakarokorokotaka na Turaga” ena nomu bula, sa rawa mo ni kunea eso tale na veivakauqeti mo ni cakava ena nomuni wilika ka vakasamataka vakatitobu na Same.

ivakatakilakila ni vuli ni tamata yadua

Vakasama ni Vuli iVolanikalou Vakatamata Yadua

Same 102–3; 116

E rawa ni vakacegui au na Turaga ena noqu rarawa.

Raica na kena vakamacalataki ena Same 102:1–11 na yalo ni lomaleqa kei na veivakatikitikitaki ka dau yaco mai ena gauna ni rarawa. O sa sotava oti beka na mataqali yalo vaqo ka vukei iko na ivakamacala oqo mo kila vakavinaka cake na veika o sa sotava. Se na veitikina oqo e rawa ni vukei iko mo kila na nodra nanuma o ira era vakaleqai tu.

Ni o wilika na Same 102:12–28; 103; 116, vakasaqara na veimalanivosa e solia vei iko na yalodei ni rawa mo “masuta na yaca ni Turaga” ena nomu vakatovolei (Same 116:13). O na gadreva beka mo makataka, cavuqaqataka, se wasea vei ira na tani na veimalanivosa e solia vei iko na inuinui.

Raica talega na Aisea 25:8; 2 Korinica 1:3–7; Iperiu 2:17–18; Alama 7:11–13; Evan A. Schmutz, “Na Kalou ena Tavoya Tani Kece na Wainimata,” Liaona, Nove. 2016, 116–18.

Veivakabulai o Jisu

Veivakabulai, mai vei J. Kirk Richards

Same 110; 118

Na Same e rawa ni dusia vei au na iVakabula.

Na Same e tu kina eso na malanivosa e dusia na bula kei na veiqaravi nei Jisu Karisito. Oqo e vica na ivakaraitaki.

• Same 110:1–4 (raica na Maciu 22:41–45; Iperiu 5:4–10; 6:20)

• Same 118:22 (raica na Maciu 21:42; Cakacaka 4:10–11; 1 Pita 2:7)

• Same 118:25–26 (raica na Maciu 21:9)

Na dina cava soti e vakavulica vei keda na ivakatakilakila eso oqo baleti Jisu Karisito? Ena vakalougatataki iko vakacava na nomu kila na dina oqo?

Ni o wilika na Same ena macawa oqo, mo vola tikoga na veimalanivosa tale eso e vakavulici iko me baleta na iVakabula. Sa rawa mo wilika talega se vakarorogo ki na so na nomu serenilotu taleitaki ka na vukei iko mo vakasamataki Koya.

Same 119

Na vosa ni Kalou ena maroroi au ena Nona sala.

Na same oqo e tiko kina e vuqa na malanivosa ka vakatauvatana na noda bula ki na dua na ilakolako lesu vua na Tamada Vakalomalagi. Ni o wiliwili, vakasaqara na vosa me vaka na taubale, sala, sala, yava, kei na lako sese. Vakasamataka vakatitobu na nomu ilakolako ni bula—na vanua o a tiko kina, na vanua o tiko kina ena gauna oqo, kei na sala cava o sa gole tiko kina. Na cava o vulica mai na same oqo baleta na nomu ilakolako lesu ki vale? Me vaka na same oqo, na cava sa vakarautaka tu na Kalou me vukei iko mo tiko ga ena sala dodonu?

O na rairai vinakata beka mo kila ni ena dua na vosa nei Iperiu, na imatai ni walu na tikina ena Same 119 e tekivu ena imatai ni ivola ena matanivola vaka-Iperiu. Na walu na tikina e tarava e tekivu ena ivola ka tarava, ka vaka tiko kina ki na mua ni matanivola.

Raica talega na Aisea 42:16; 2 Nifai 31:17–21; Alama 7:19–20.

Same 134–36

Sa kaukauwa cake na Turaga mai na matakau kecega.

Raica na vuna e ka lialia kina me da vakabauta na kalou lasu me vaka e tukuni tu ena Same 135:15–18 . Na cava o rawa ni temaki mo vakabauta kina ni tautauvata kei na matakau e vakamacalataki tiko ena veitikina oqo?

Sa rawa mo cakava e dua na lisi ni veika mana e rawa ni cakava na Turaga, me vaka e vakamacalataki ena Same 134–36. Na veika kaukauwa cava e sa cakava vei iko?

Same 146–50

“Dou vakacaucautaka na Turaga.”

Ni o wilika na iotioti ni Same ni veivakacaucautaki, vakasamataka na vuna mo vakacaucautaka kina na Turaga. Na cava na vuna e bibi kina me da vakacaucautaki Koya? Na sala cava soti e rawa ni o vakacaucautaki Koya kina?

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Same 119:105.De na rawa ni bulia na nomu matavuvale e dua na sala ka taubale kina ena butobuto, ka vakayagataka e dua na rarama me vakararamataka na sala ki liu. Ni ko lako tiko, sa rawa mo taroga “na cava ena noda bula e vaka na butobuto oqo?” se “e tautauvata vakacava kei na rarama na vosa ni Kalou?” Na lagati ni dua na sere me baleta na rarama ni Kalou, me vaka “Tuberi Au e Nona Loloma” (Nodra iVolanisere na Lalai,177), e rawa ni vukei iko mo vaqaqacotaka na ivakavuvuli e vakavulici ena Same 119:105.

Same 127–28.Na cava na ibalebale ni nona vukei keda na Turaga me da “tara na [noda] vale”? (Same 127:1). E rawa vakacava ni da vakaitavitaki koya vakavinaka ena noda sasaga meda bulia e dua na itikotiko ni buladodonu? Me vukea na nomu matavuvale ena saumi ni taro oqo, sa rawa mo droinitaka e dua na vale ena dua na tiki ni pepa ka kotikotiva me tiki ni iba. Ena daku ni veitikina yadua, sa rawa vei ira na lewe ni matavuvale mera vola se droinitaka na sala eso me rawa kina ni mai tiki ni nodra matavuvale na Turaga. Mo qai biuta vata na iba. Na cava tale eda raica ena same oqo ka vakauqeti keda meda lakova na sala ni Turaga?

Same 139.Ni wiliki oti na tikina e 1–4, me ra veivosakitaka na lewe ni matavuvale na sala era sa mai kila kina ni kilai ira vakaiira na Kalou (raica talega na tikina e 14–15, 23–24).

Same 146–50.Sa rawa mo sureta na nomu matavuvale mera wilika i cake e vica na tikina ni Same 146–50 ka tovolea tiko me vakaraitaka na veika e vakila o koya e vola tiko. E rawa vakacava ni da vakaraitaka na noda vakavinavinaka vua na Turaga? Sa rawa vei ira na lewe ni matavuvale mera taleitaka mera vola na nodra dui vakatataro ni veivakacaucautaki ka veiwaseitaka vakai ira.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Tuberi Au E Nona Loloma,” Nodra iiVolanisere na Lalai,177.

Vakatorocaketaki ni Noda Veivakavulici

Vakayagataka na katoni ni itukutuku e vakarogoci. Ni o vakavulica nai volanikalou ki na nomu vuvale, navuca mo rogoca nai volanikalou e katoni me vakarogoci, ena kune ena ChurchofJesusChrist.org se na Gospel Library app. Na vakarorogo ki na same e rawa ni kaukauwa sara baleta ni sa kena inaki me ra cavuqaqataki tu i cake.

sala ena loma ni veikau

“Mo ni kauti au ena sala ni nomuni ivakaro; Niu sa rekitaka”(Same 119:35).