29 ni Okosita–4 ni Sepiteba

Na Vosa Vakaibalebale 1–4; 15–16; 22; 31; Dauvunau 1–3; 11–12

“Na Rerevaka na Turaga sa iTekitekivu ni Yalomatua”

Vakasamataka na sala e rawa ni vukei iko kina na nomu vulica na Vosa Vakaibalebale kei na Dauvunau mo “vakatudaliga ki na vuku, ka vagoleya sara na lomamu ki na yalomatua” (Vosa Vakaibalebale 2:2).

Vola na Veika o Vakauqeti kina

Ena imatai ni wase ni ivola Na Vosa Vakaibalebale, eda kunea kina na veivosa oqo: “Na luvequ, mo vakarorogo ki na ivakavuvuli i tamamu, ka mo kakua ni biuta na ivunau i tinamu” (Vosa Vakaibalebale 1:8). Na Vosa Vakaibalebale e rawa ni laurai me dua na isokumuni ni vosa vakayalomatua mai vua e dua na itubutubu dauloloma, ka usutu ni nona itukutuku ni veivakalougatataki ni vakacegu kei na bula sautu ena yaco mai vei ira era vakasaqara na vuku—vakabibi na vuku sa mai vua na Kalou. Ia e tarava mai Na Vosa Vakaibalebale na ivola ni Dauvunau, ka vaka me kaya, “e sega ni ka rawarawa.” Na Dauvunau e cavuti nona vosa ena ivola ni Dauvunau e kaya ni a “solia [na yalona] me kila na ivalavala vuku” ia sa kunea ni “sa ka ni oca wale na ka talega oqo” ka “levu kina na rarawa” (Dauvunau 1:17–18). Ena veimataqali sala eso, e taroga kina na ivola, “E rawa beka ni vakaibalebale dina ena dua na vuravura e vaka me tawayaga, sega ni tudei, ka veilecayaki tu kina na veika kece?”

Ia, oqo e rua na ivola e duidui na rai me baleta na bula oqo, rau vakavulica na dina vata ga. E tukuna na Dauvunau: “Tou rogoca na itinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Na Dauvunau 12:13). Oqo na ivakavuvuli vata ga e kunei ena Vosa Vakaibalebale: “Mo vakararavi vei Jiova ena vu ni yalomu. … Mo kakua ni nanuma ni ko sa vuku: mo rerevaki Jiova” (Vosa Vakaibalebale 3:5,7). Se cava ga na ituvaki ni bula, ena gauna madaga e vaka me veilecayaki ka tawakilai, ena vinaka cake sara ni da vakararavi ga vua na Turaga o Jisu Karisito.

Me baleta na raici raraba ni ivola oqo, raica na “Vosa Vakaibalebale, Na” kei “Dauvunau” ena iDusidusi ki na iVolanikalou.

Vakasama ni Vuli iVolanikalou ni Tamata Yadua

Vosa Vakaibalebale 1–4; 15–16

“Vakatudaliga ki na vuku.”

Na ivola ni Vosa Vakaibalebale e vakasinaiti tu ena veivakararamataki me baleta na vuku. Navuca mo toqa na vosa “vuku” kei na vosa veisemati, me vaka na “kila ka” kei na “yalomatua,” ni o kunei ira ena wase 1–4 kei na 15–16. E vakayaco-ka vakacava na veitikina oqo ena nomu vakasamataka na vuku? Mai na veika o sa kunea, o na vakamacalataka vakacava na vuku e “sa solia na Turaga”? (Vosa Vakaibalebale 2:6). Vakasamataka na sala o vakasaqara tiko kina na veivuke ni Turaga mo “lomavuku” (Vosa Vakaibalebale 16:21). Na veivakalougatataki cava e kauta mai na vuku ni Kalou?

Raica talega Vosa Vakaibalebale 8–9; Maciu 7:24–27; 25:1–13.

Vosa Vakaibalebale 1:7; 2:5; 16:6; 31:30; Dauvunau 12:13

Na cava na “rerevaka na Turaga”?

Elder David A. Bednar e vakamacalataka: E sega ni vaka na rere vakavuravura ka dau vakavuna na taqaya kei na nuiqawaqawa, na rerevaka na Kalou e sa dua na ivurevure ni vakacegu, veivakadeitaki, kei na nuidei. … [Sa] umani tu kina na yalo ni vakarokoroko, veidokai, kei na qoroqoro vua na Turaga o Jisu Karisito; talairawarawa ki na Nona ivakaro; kei na nanamaki ki na iOtioti ni Veilewai kei na lewa dodonu e Ligana. … Na rerevaka na Kalou sai koya na noda lomana ka nuitaki Koya” (”Ia Era sa Vosota Na Nodra Rere, “ Liaona, Me 2015, 48–49).

Raica tale ga na Vosa Vakaibalebale 8:13.

Na Vosa Vakaibalebale 4

“Mo lewa deivaki na ilakolako ni yavamu.”

NaVosa Vakaibalebale 4 e vakamacalataka na vuku kei na ivalavala dodonu me vaka e dua na “gaunisala” se dua na “salatu” (raica talega na Vosa Vakaibalebale 3:5–6). Ni o wilika na wase oqo, o na kunea eso na malanivosa ka na vukei iko mo vakasamataka vakatitobu “na ilakolako ni yavamu” (tikina e 26) kei na sala era sa toro voleka tiko kina vua na Turaga na nomu ikalawa. Me kena ivakaraitaki, na cava e vakavulica na tikina e 11–12 kei na 18–19 me baleta na veivakalougatataki ni kena vakamuri na sala dodonu? Na cava na ibalebale ni tikina e 26 kei na 27 vei iko?

Raica talega na 2 Nifai 31:18–21.

Vosa Vakaibalebale 15:1–2, 4, 18,28; 16:24–32

“A vosa vakayalovinaka sa ivakamalumu ni cudru”

Eso na vosa vakaibalebale ena wase e 15 kei na16 ena vakauqeti iko mo vakavinakataka na ivakarau ni nomu veivosaki kei ira na tani, vakabibi o ira na daulomani. Me ivakaraitaki, vakasamataka mada e dua na gauna a rawa mo vakayagataka kina na “vosa vakayalovinaka” ka sega ni “vosa vakararawa” (Vosa Vakaibalebale 15:1). E vukei iko vakacava na ivakasala ena Vosa Vakaibalebale 16:24–32 mo nanuma na vosa o vakayagataka?

Vakasamataka na rai oqo mai vei Elder W. Craig Zwick: “E dua ‘na isaunitaro malumu’ e tiko kina e dua na malanivosa vakaibalebale—vosa lewai vakamatau mai na dua na yalo malumalumu. E sega ni kena ibalebale me da kua ni vosa vakadodonu se me da veisautaka na dina vakaivunau. Na vosa e qaqaco beka na kena itukutuku e rawa ni malumalumu vakayalo” (“Na Cava Nomu Nanuma?” Liaona, Me 2014,42).

O Cei sa Kunea Rawa na Yalewa sa Savasava Sara?II, mai vei Louise Parker

Vosa Vakaibalebale 31:10–31

“Na yalewa sa rerevaka na Turaga, ena vakacaucautaki.”

Vosa Vakaibalebale 31:10–31 e vakamacalataka e “dua na marama ivalavala dodonu,” se dua na marama cecere nona kaukauwa vakayalo, nona rawa ka, kei na veivakayarayarataki. Sa rawa mo tovolea ka vakalelekataka ena nomu vosa na veika era tukuna na veitikina yadua oqo me baleti koya. Na cava eso na nona itovo e rawa ni o vakatotomuria?

Dauvunau 1–3; 12

E sega ni tudei na bula oqo.

Na cava na vuna e yaga kina vei iko mo nanuma tiko ni levu sara na ka ena vuravura oqo, me vaka e vakadeitaka na Dauvunau 1–2 e “ka wale” (se sega ni tudei ka vuqa na gauna e sega ni ka bibi)? Na cava o kunea ena wase e 12 e solia na bula yaga tawamudu?

Vakasama baleta na Vuli iVolanikalou Vakamatavuvale kei na Lotu Vakamatavuvale

Vosa Vakaibalebale.Eratou na marautaka beka na nomu matavuvale me ratou cakava e dua na nomudou “ivola ni Vosa Vakaibalebale”—e dua na vakasokumuni ni ivakasala vuku mai na ivolanikalou kei ira na parofita edaidai.

Vosa Vakaibalebale 1:7; 2:5; 16:6; Dauvunau 12:13–14.Me vukei ira na lewe ni matavuvale me ra kila na Vosa Vakaibalebale 1:7; 2:5; 16:6; Dauvunau 12:13, e rawa ni veivuke me vakaisosomitaka na vosa rere ena vosa me vaka na vakarokoroko, loloma, se talairawarawa (raica talega na Iperiu 12:28). Ena vakayaco-ka vakacava na ka oqo ena ivakarau eda vakasamataka kina na veitikina oqo? Me da vakaraitaka vakacava ni da rerevaka na Turaga?

Na Vosa Vakaibalebale 3:5–7.Me vukei ira na lewe ni matavuvale mera raitayaloyalotaka na cava e vakavulica tiko na veitikina oqo, sa rawa mo sureti ira mera ravita e dua na ka kaukauwa ka tudei, me vaka na lalaga. Oti me ra qai tovolea me ra ravita e dua na ka e sega ni kaukauwa, me vaka e dua na itataviraki. Na cava na vuna meda “kakua kina ni vakararavi ki na [noda] yalomatua”? E rawa vakacava ni da vakaraitaka ni da vakabauti Jisu Karisito ena yaloda taucoko?

Vosa Vakaibalebale 15:1–2,18; 16:24,32.Ena vakayaco ka vakacava ki na yalo e noda loma ni noda itikotiko na noda vosa? Sa rawa ki na lewe ni vuvale me vakatovotovotaka me tau na “vosa vakayalovinaka” mai na “vosa ni rarawa” ka tovolea me vakayagataka na veika eda vulica ena noda tiko veimaliwai. E dua na sere me vaka na “Me Tekivu Vei Au” (iVolanisere ni Gonelalai, 83) e rawa ni veivuke ena kena vaqaqacotaki na ivakavuvuli oqo.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Loloma Talei Tu,” iVolanisere ni Gonelalai, 76.

Vakavinakataki ni Vuli Yadudua

Na vosa ni ivolanikalou e baleti keda kece. Eso na tiki ni ivolanikalou e tukuni walega vei ira na tagane se yalewa (me vaka na Vosa Vakaibalebale 3:13; 31:10). Ena vuqa na gauna, na ivakavuvuli ena veitikina oqo e baleti keda kece.

“Mo vakarogotaka vua na nomu sala kecega, ia ena vakadodonutaka na nomu ilakolako ko Koya.” (Vosa Vakaibalebale 3:6). E Liutaki Au, mai vei Yongsung Kim, havenlight.com