“12–18 ni Sepiteba. Aisea 13–14; 24–30; 35: ‘E Dua na Cakacaka Vakasakiti ka Veivakurabuitaki,’” Lako Mai, Mo Muri Au—Me Baleta na Tamata Yadua kei na Matavuvale: Veiyalayalati Makawa 2022 (2021)

“12–18 ni Sepiteba. Na Aisea 13–14; 24–30; 35,” Lako Mai, Mo Muri Au—Baleta na Tamata Yadua kei na Matavuvale: 2022

iVakatakilakila

Raica na Tamada Vakalomalagi kei Jisu Karisito o Josefa Simici ena Veikau Tabu

Veikau Tabu mai vei Brent Borup

12–18 ni Sepiteba

Aisea 13–14; 24–30;35

“A Cakacaka Vakasakiti ka Veivakurabuitaki”

Peresitedi Bonnie H. Cordon e vakavulica, “Na ivolanikalou e vakararamataka na noda vakasama, vakabulabulataka na yaloda, sauma na noda taro, vakalevutaka na noda vakararavi vua na Turaga, ka vukei keda me da tara cake na noda bula Vua” (“Vakararavi vua na Turaga ka Kakua ni Vakararavi Tani,” Ensign se Liaona, Me 2017,7).

Vola na Veika o Vakauqeti kina

E dua na ka e kerea na Turaga vei ira na parofita sai koya me ra veivakasalataki me baleta na isau ni ivalavala ca. Ena vukudra na parofita ni Veiyalayalati Makawa, oqo e kena ibalebale na kena tukuni vei ira na iliuliu qaqa ni veimatanitu ni dodonu me ra veivutuni se era na vakarusai. O ya e dua na cakacaka rerevaki, ia a sega ni rere o Aisea, a doudou ena nona veivakasalataki vei ira na veimatanitu ni nona gauna—oka kina o ira na Isireli, Juta, kei na veivanua vakavolivolita (raica na Aisea 13–23).

Ia, a tiko talega vei Aisea e dua na itukutuku ni vakanuinui. E dina ga ni a yaco mai na veivakarusai a parofisaitaki mai ena veimatanitu oqo, a raica kina o Aisea e dua na madigi me baleta na veivakalesuimai kei na veivakavoui. Ena sureti ira na nona tamata na Turaga me ra lesu tale Vua. Ena cakava o koya na “nuku kata me … drano, kei na qele mamaca me ivurevure ni wai” (Aisea 35:7). Ena vakayacora o koya “e dua na cakacaka vakasakiti ka veivakurabuitaki” (Aisea 29:14), ka vakalesuya vei Isireli na veivakalougatataki sa yalataka vei ira o Koya. A sega ni bula tiko o Aisea se dua vei ira na a bula tiko ena gauna oya me raica na cakacaka vakasakiti oqo. Ia eda sa raica tiko na kena sa yaco tiko nikua. Na ka dina, eda sa vakaitavi tiko kina!

iVakatakilakila

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Aisea 13:1–11, 19–22; 14:1–20

Era na bale na veimatanitu ca e vuravura kei ira na nodra iliuliu.

Aisea 13–14 e vakatokai “na icolacola ni” (dua na itukutuku vakaparofita me baleti) Papiloni (Aisea 13:1). A bau dua na matanitu qaqa ka vakailiuliu qaqa, ia ko Papiloni esa vakatokai tu ena gauna oqo me vakaitukutuku makawa. Ia na cava e bibi kina vei keda nikua na itukutuku me baleti Papiloni? Ena ivolanikalou, e vakatakarakarataka o Papiloni na viavialevu, na veika vakavuravura, kei na ivalavala ca, ia nikua eda sa vakavolivoliti ena veika kece oqo. Vakasamataka na ivakatakarakara oqo ni o wilika na Aisea 13:1–11, 19–22; 14:1–20. Sa rawa talega mo vakasamataka na taro vaka oqo:

E tautauvata vakacava na ivakaro nei Aisea vei Papiloni kei na parofisai eso me baleta na vuravura ni bera na iKarua ni Nona Lako mai na iVakabula? (raica na Aisea 13:1–11; Vunau kei na Veiyalayalati 45:26–42).
Na veika tautauvata cava soti o sa raica ena vuku ni viavialevu ni tui Papiloni kei na viavialevu nei Setani? (raica na Aisea 14:4–20; Mosese 4:1–4). Na ivakasala cava eso e rawa ni o raica e baleti iko ena veitikina oqo?
Ena vakarautaka vakacava na iVakabula na “vakacegu mai na nomu rarawa, kei na nomu rere”? (Aisea 14:3).

Esa Lesu Tale Mai me Me Lewa ka Veiliutaki, mai vei Mary R. Sauer

Aisea 24:21–23; 25:6–8; 26:19; 28:16

Na volavola nei Aisea e dusi au kivei Jisu Karisito.

Na ivakavuvuli nei Aisea e vuqa e vakaibalebaletaki ki na ilesilesi ni iVakabula, oka kina na Nona Veisorovaki, Tucaketale, kei na iKarua ni Lako Mai. Na gacagaca cava ni Nona veiqaravi vakalotu e votu mai ki na nomu vakasama ni o wilika na veitikina oqo: Aisea 24:21–23; 25:6–8; 26:19; 28:16? Na malanivosa cava tale o raica ni vakananuma vei iko me baleta na iVakabula?

Raica talega na Aisea 22:22–25.

Aisea 24:1–12; 28:7–8; 29:7–10; 30:8–14

Na vukitani e kena ibalebale na gole tani mai vua na Turaga kei ira na Nona parofita.

Ni veivakasalataki me baleta na revurevu ni gole tani mai vua na Turaga ka cakitaki ira na Nona parofita, a vakayagataka o Aisea e vica na vosa vakaibalebale. Oqo e oka kina e dua na vuravura lala (Aisea 24:1–12), daumateni (Aisea 28:7–8), na viakana kei na viagunu (Aisea 29:7–10), kei na lalaga se bilo sa kavoro (Aisea 30:8–14). Mai na veika o wilika ena veitikina oqo, na cava e bibi kina me da maroroya na noda veiyalayalati? Vakasamataka na veika o sa cakava tiko mo dina tiko vua na Turaga kei ira na Nona italai.

Raica na M.Russell Ballard, “Tikoga ena Loma ni Boto ka Tautauri Toka!” Ensign se Liaona, Nove. 2014, 89–92; Ulutaga Vakosipeli, “Vukitani,” topics.ChurchofJesusChrist.org.

Aisea29; 30:18–26; 35

Sa rawa vua na Turaga me vakalesuya mai na veika e yali se voroki.

Ni ra gole tani mai vua na Turaga na tamata se na isoqosoqo, e vinakata o Setani me da nanuma ni kena isau ena sega ni rawa ni vakalesui tale. Ia, a vakamacalataka o Aisea eso na ka vakasakiti ena cakava na Turaga ni ra veivutuni na tamata ka vuki vua. Na cava o vulica mai na Aisea 29:13–24; 30:18–26; 35 me baleta na Turaga, Nona loloma, kei na Nona kaukauwa?

E dua na sala sa vakatakila mai kina na Turaga na Nona kaukauwa ena noda gauna oqo sai koya na kena Vakalesui mai na Nona kosipeli. Aisea 29 e tiko kina e vica na malanivosa ka tautauvata kei na veika a yaco ena Veivakalesuimai. Me kena ivakaraitaki:

Veidutaitaka na Aisea 29:11–12 kei na 2 Nifai 27:6–26 kei na Josefa Simici— Ai Tukutuku 1:63–65.
Vakatautauvatataka na Aisea 29:13–14 kei na Vunau kei na Veiyalayalati 4 kei na Josefa Simici—Ai Tukutuku 1:17–19.
Vakatautauvatataka na Aisea 29:18–24 kei na tabana ni ulutaga ni iVola i Momani.

Na vakasama se vakanananu cava e tu vei iko me baleta na Vakalesui mai ni kosipeli ni o wilika na veitikina oqo?

Raica talega “Na Vakalesui Mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura” (ChurchofJesusChrist.org).

iVakatakilakila

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Aisea 25:4–9.E sa bau sotava beka na nomu matavuvale na veivakalougatataki ni dua na vale ni vakaruru ena dua na cagilaba se veivunikau ena dua na siga katakata vinaka? (raica na tikina e 4). Veivosakitaka na veika oqo ni o wilika na veitikina oqo kei na ivakamacala tale eso ni Turaga e tiko ena Aisea 25:4–9. E tautauvata vakacava na Turaga kei na veika oqo?

Aisea 25:8–9; 26:19.Vakaraitaka na iyaloyalo ni iVakabula mai Kecisemani, ena kauveilatai, vakakina ni sa oti na Nona Tucaketale ena rawa ni vukea na nomu matavuvale me ra semasemata vata na veitikina oqo kei Jisu Karisito (raica na iVola ni Yaloyalo Vakosipeli, naba. 56, 57, 58,59). Sureta na nomu matavuvale mera wasea na vuna era “reki kina ena nona veivakabulai” (Aisea 25:9).

Aisea 29:11–18.Na veitikina oqo e rawa ni vukea nomu matavuvale me veivosakitaka na “cakacaka vakasakiti ka veivakurabuitaki” (tikina e 14) ni Vakalesuimai ni kosipeli kei na kena tadu mai na iVola i Momani. Na cava era vakasakiti ka veivakurabuitaki kina vei keda na veika oqo? Sureti ira na lewe ni matavuvale me ra raica eso na iyaya ena nomu vale ka matataka na veivakalougatataki vakasakiti ni Veivakalesuimai.

Aisea 35.Ena rawa ni marautaka na nomu matavuvale na droini iyaloyalo ena iwase ni ivola oqo ka na vukei keda me da kila na sala e tarai Saioni kina o Jisu Karisito ena noda gauna oqo. Na cava eda vulica mai na ivakaraitaki eso oqo? Na cava eda rawa ni cakava me da vukea kina na tarai cake kei Saioni?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Vulaitubutubu,” iVolanisere na Lalai, 57.

Vakatorocaketaki Noda Veivakavulici

Laivi ira na gone mera vakaraitaka na nodra dau bulibuli ka. “Ni ra bulia na gone e dua na ka e veisemati kei na ivakavuvuli ni kosipeli, ena vukei ira me ra kila vinaka cake nai vakavuvuli. Vakatarai ira me ra tara, droinitaka, rokataka, vola, ka cakava. (Raica na Veivakavulici ena iVakarau ni Vakabula,25.)