Veikau tabu, mai vei Brent Borup

12–18 ni Sepiteba

Aisea 13–14; 24–30;35

“E Dua na Cakacaka Vakurabui Vakaidina Sara”

Ni oti na nomu vulica ena masumasu na Aisea 13–14; 24–30;35, tuvanaka na itaviqaravi me vukea na nodra vuli na gone. Na veivakasama ni itaviqaravi e ra e rawa ni moici me ganita na vei yabaki ni bula.

Vola na Veika o Vakauqeti Kina

Sureta na Veiwasei

Sureti ira na gone me ra tucake kevaka era vinakata me ra wasea e dua na ka era se qai vulica walega me baleta na kosipeli e vale se ena Lotu. Solia ki na gone yadua na madigi me veiwasei.

Vakavulica na iVunau: Gone Sobu

Aisea 14:12–14

A yaco e dua na ivalu mai lomalagi.

Ni bera ni buli ko vuravura, sa digitaki Jisu Karisito na Tamada Vakalomalagi me noda iVakabula. Aisea 14:12–14 e vakamacalataka na dokadoka a vakaraitaka o Setani ena Matabose mai Lomalagi.

iTaviqaravi e Rawa ni Caka

• Vakayagataka na “iVakamacala Taumada: iTuvatuva nei Tamada Vakalomalagi” (ena iTalanoa ni Veiyalayalati Vou, 1–3) se na sere “I Lived in Heaven” (Children’s Songbook,4) me vakamacalataka vei ira na gone na iValu mai Lomalagi ni bera ni da sucu mai. (Ni o vakayacora vakakina, okata kina na malanivosa mai na Aisea 14:12–14 e vakamacalataki Setani.) Kerei ira na gone me ra veivukevuke ena kena tokaruataki lesu tale vei iko na italanoa. Vakabibitaka ni a muria o Jisu Karisito na ituvatuva nei Tamada Vakalomalagi ka yaco me noda iVakabula.

• Ena papa, droinitaka e dua na uto kei na vosa Setani kei na dua na mata rarawa e loma. Vakamacalataka ni a kaya o Setani e lomana, “ka’u na vakaceceretaka na noqui tikotiko me cecere ka lolovira na kalokalo ni Kalou” (Aisea 14:13), sa kena ibalebale ni vinakata o koya me vinaka cake mai vua na Tamada Vakalomalagi. Sureta e dua na gone me droinitaka e dua tale na uto, o koya oqo vata kei na vosa Jisu kei na dua na mata mamarau. Vukei ira na gone me ra kila ni a vinakata o Jisu me vakayacora na ka a kerea vua na Tamada Vakalomalagi me cakava (raica na Mosese 4:1–2). E rawa vakacava ni da vakamuria na Nona ivakaraitaki?

“Ena vakaotia sara na mate ko Koya” (Aisea 25:8).

Aisea 25:8

A tucaketale ko Jisu Karisito.

Sa rawa vei Jisu Karisito me solia na vakacegu ni rarawa eda vakila me baleta na mate. Me vaka ga ni sa qaqa mai na mate o Koya, eda na tucake talega oi keda kece.

iTaviqaravi e Rawa ni Caka

• Vakaraitaka na iyaloyalo kei Jisu Karisito ni Tucaketale, ka sureti ira na gone me ra wasea na ka era kila baleta na iyaloyalo. Kevaka e gadrevi, wasea vei ira na italanoa kei Jisu ni sa tucaketale (raica na “Sa Tucake ko Jisu,” ena iTalanoa ni Veiyalayalati Vou, 139–44). Qito se lagata e dua na sere me baleta na Tucaketale, me vaka na “Sa Tucake ko Jisu” (iVolanisere ni Gonelalai,44), ka sureti ira na gone me ra wasea na veika era vakila ena nodra kila ni o Jisu a tucake tale mai na mate.

• Vakamacala vei ira na gone me baleta e dua o kila ka sa mate. Na cava eda vakila ni sa mai mate e dua eda lomana? Sureti ira na gone me ra droinitaka na matana e dua ka tagi tiko. Qai wilika na Aisea 25:8 vei ira. Na cava ena vakayacora o Jisu ki na wainimatada ni da vakananuma e dua ka sa mate? Sureti ira na gone me ra droinitaka e dua na mata mamarau. Wasea na nomu ivakadinadina ni sa tucake tale o Jisu Karisito, eda na vakila na vakacegu ni dua e mate ka kila ni da na tucake taucoko ena dua na siga.

Aisea 29:12,14

Sa vakalesuya mai na Turaga na Nona Lotu mai vei Josefa Simici.

Na Veivakalesui mai ni kosipeli e sa “dua na cakacaka vakurabui vakaidina sara” (Aisea 29:14). Wasea vei ira na gone eso na veika vakurabui a cakava na Turaga—ka sa tomana tikoga—me vakalesui mai kina na Nona kosipeli ena noda gauna.

iTaviqaravi e Rawa ni Caka

• Kerei ira na gone me ra tukuna vei iko na veika era kila me baleti Josefa Simici. Kevaka e gadrevi, wasea vata kei ira na “iMatai ni Raivotu nei Josefa Simici” (ena iTalanoa ni Vunau kei na Veiyalayalati, 9–12). Wilika na Aisea 29:12, ka vakamacalataka ni dina ga ni o Josefa Simici a sega ni wiliki me tamata “vuli” mai vei ira e vuqa na tamata, sa vakayagataki koya o Jisu Karisito me vakalesuya mai na kosipeli.

• Wilika na Aisea 29:14 vei ira na gone, ka wasea vei ira na vosa tale eso ka kena ibalebale na “talei” kei na “veivakurabuitaki.” Vakaraitaka na veika eso e matataka tiko eso na cakacaka vakasakiti ni Turaga ena gauna edaidai, me vaka na iyaloyalo ni iMatai ni Raivotu se na nona ciqoma na matabete o Josefa Simici (raica na iVola ni Yaloyalo Vakosipeli, naba. 90, 93,94) se dua na ilavelave ni iVola i Momani. Sureti ira na gone me ra digitaka e dua na ka, ka qai wasea na vuna e veivakurabuitaki kina vei ira.

Vakavulica na iVunau: Gone Qase Cake

Aisea 24:3–5; 29:7–10; 30:8–14

Na Vukitani e kena ibalebale na gole tani mai vua na Turaga kei ira na Nona parofita.

Na wiliki ni ivakaro nei Aisea me baleta na rerevaki ni vukitani e rawa ni vukei ira na gone me ra navuca me ra dina tikoga ki vua na Turaga ka muri ira na Nona parofita.

iTaviqaravi e Rawa ni Caka

• Vola na vosa vukitani ena papa. Sureti ira na gone me ra raica e dua na ivakamacala ena “Vukitani” ena iDusidusi ki na iVolanikalou (scriptures.ChurchofJesusChrist.org). Sureti ira me ra wilika na Aisea 24:5; 30:9–11 ka biuta vata e dua na lisi ni veika era a cakava tiko na tamata ena gauna nei Aisea ka vakavuna me ra vukitani. Mo qai sureti ira na gone me ra veisautaka na ituvatuva ena lisi ki na veika e rawa ni da cakava me da dina tikoga vua na Turaga.

• Wasea me ra veisasa na lewe ni kalasi, ka lesi ira yadua me ra wilika e dua vei ira na tikina oqo: Aisea 24:3–5; Aisea 29:7–10; se Aisea 30:8–14. Sureti ira me ra droinitaka na iyaloyalo e matataka na veika era wilika. Ni ra wasea na nodra droini, vukei ira me ra veitalanoataka na veika e vakavulica na vosa nei Aisea me baleta na vuna me da dina tikoga kina vua na Turaga.

Aisea 29:13–15, 18,24

Na Vakalesuimai ni kosipeli e sa dua na “cakacaka veivakurabuitaki.”

O na vukei ira vakacava na gone me ra kila ni ra sa tiki ni “cakacaka veivakurabuitaki” ni Turaga (Aisea 29:14) ni gauna oqo?

iTaviqaravi e Rawa ni Caka

• Vakaraitaka na iyaloyalo ni so na ka talei a yaco ena kena vakalesui mai na kosipeli (raica na iVola ni Yaloyalo Vakosipeli, naba. 90–95, se tabana ni itaviqaravi ni macawa oqo). Wilika vata na Aisea 29:14,18,24, ka sureti ira na gone me ra vakasaqara na vosa kei na malanivosa e semati ki na veika e yaco tiko ena iyaloyalo. Tarogi ira na gone ena sala e rawa ni ra veivuke kina ki na “cakacaka veivakurabuitaki” ni Turaga (tikina e 14).

• Wasea e dua na ka sotavi lekaleka me vukei ira na gone me ra kila vakavinaka na ibalebale ni veivakalesui mai. Me ivakaraitaki, vakamacalataka ni a yali e dua na ka kei na nomu a kunea rawa tale. Vukei ira na gone me ra vakatauvatana na ka oqo ki na Vakalesui mai ni kosipeli. Me vaka na Aisea 29:13–15, na cava eda gadreva kina na Veivakalesui mai? Na cakacaka veivakurabuitaki cava a cakava na Turaga me vakalesuya mai kina na Nona kosipeli?

Aisea 14:3; 25:8; 28:16

Na ivakavuvuli nei Aisea e dusimaki au vei Jisu Karisito.

Na ivakavuvuli nei Aisea e rawa ni dusimaki ira na gone o vakavulica ki vua na iVakabula ka vukei ira me ra nanuma tiko na veika sa vakayacora vei ira o Koya.

iTaviqaravi e Rawa ni Caka

• Vola na veitiki ni ivolanikalou oqo ena so na tiki ni pepa: Aisea 14:3; Aisea 25:8; Aisea 28:16; Maciu 11:28–30; 1Korinica 15:53–57; Ilamani 5:12. Solia na pepa vei ira na gone, ka sureti ira me ra vola ena pepa na dina era sa vulica mai na veitikina oqo ka cakacaka vata me veisotaritaki na veitikina e vakavulica na dina vata ga. Mai na veitikina oqo, na veika lelevu cava esa vakayacora vei keda na Turaga?

• Kerei ira na gone me ra digitaka e dua na malanivosa mai na Aisea 14:3; 25:8; se 28:16 e vakananumi Jisu Karisito vei ira. Sureti ira me ra vola na malanivosa ena dua na tiki ni pepa ka droinitaka e dua na iyaloyalo ni iVakabula e rawa me ra na vakaraitaka ena nodra itikotiko.

Vakauqeta na Vuli e Vale

Sureti ira na gone me ra vola e dua na ivakamacala me baleta se droinitaka e dua na iyaloyalo ni dua na ka era sa vulica ena kalasi ni kua. Vakayaloqaqataki ira me ra wasea ki na nodra matavuvale se ki vei ira na lewe ni kalasi era a sega ni tiko ena Lalai ni kua.

Vakatoroicaketaki na Noda Veivakavulici

Moica na itaviqaravi eso me okati ira na vakaleqai tu. Na moici lailai eso ni itaviqaravi e rawa ni vakadeitaka ni ra sa rawa ni vuli taucoko kina na gone. Dua na kena ivakaraitaki, ke sa vakaturi ena itaviqaravi me vakaraitaki e dua na iyaloyalo, sa rawa ni o lagata e dua na sere me sosomitaka me okati ira na gone e vakaleqai tu na nodra rai.