Sa Noqu iVakatawa ko Jiova, mai vei Yongsung Kim, havenlight.com

8–14 ni Okosita

Same 1–2; 8; 19–33; 40; 46

“Sa Noqu iVakatawa ko Jiova”

Kakua ni vakila na yalani ni ivola ni Same se na ivakavuvuli e vakaturi tiko ena ituvatuva oqo. Laiva na Yalo me tuberi iko ki na dina ka na vukei iko mo voleka sara vua na Turaga.

Vola na Veika o Vakauqeti Kina

Eda sega ni kila deivaki sara o cei dina e vola na Same. E so era sa vagolei vei Tevita na tui, ia e vuqa vei ira, era sa sega ni kilai o ira era vola. Ia ni da wilika oti na Same, eda rawa ni vakila na veika e tu e yaloi Daunisame, dina ga ni da sega ni kila na yacadra. Na ka ga eda kila ni Same sa dua na tiki bibi ni sokalou ena kedra maliwa na Isireli, ka da kila ni dau cavuti ira wasoma na iVakabula. Ena Same, sa rawa ni da irova kina na yalodra na tamata ni Kalou ena gauna makawa. Eda raica na nodra nanuma baleta na Kalou, na veika era dau lomaleqataka, kei na nodra kunea na vakacegu. Ni da sa tamata vakabauta nikua, e vuravura taucoko, eda se vakayagataka tikoga na vosa oqo ena noda qarava na Kalou. E vaka me ra a dau irova rawa na yaloda o ira era a vola na Same ka vaka me ra a kunea rawa e dua na sala me da vakamacalataka kina na noda nanuma me baleta na Kalou, na veika eda leqataka tiko, kei na ivakarau eda kunea kina na vakacegu.

Me laurai vakararaba na ivola ni Same, raica na “Psalms” ena Bible Dictionary.

Vakasama ni Vuli iVolanikalou ni Tamata Yadua

Same 1; 23; 26–28; 46

E vakavulici keda na Same me da nuitaka na Turaga.

E rawa ni o raica ni o wilika na Same na levu ni nodra dau tukuna o ira era volavola kina na rere, rarawa, se lomaleqa. Na yalo vakaoqori e sega ni ka vou, vei ira sara mada ga na tamata vakabauta. Ia na ka e veivakauqeti kina na Same sai koya na iwali era solia, oka kina na vakararavi vakadua vua na Turaga. Vakasamataka na itukutuku veivakauqeti eso oqo ni o wilika na Same 1; 23; 26–28; 46. Vakaraica na veika oqo, ka vola na veika o kunea:

• Veisureti me vakararavi vua na Turaga:

• Malanivosa ka vakamacalataki kina na Turaga:

• Na vosa e vakamacalataka na vakacegu, kaukauwa, kei na veivakalougatataki tale eso e vakarautaka o Koya:

• Na malanivosa ka vakamacalataki ira era vakararavi Vua:

Same 2; 22

Na Same e dusia na noda vakasama ki na bula kei na veiqaravi nei Jisu Karisito.

E vica na Same e dusia na bula vakayago nei Jisu Karisito. O ira na Lotu Vakarisito ena gauna ni veiyalayalati vou era sa raica talega na isema oqo—me kena ivakaraitaki, era kila ena Same 2 e dua na idusidusi ki na nona lewai ko Jisu mai vei rau na Tui o Eroti kei Ponitio Pailato (raica na Cakacaka 4:24–30). Sa rawa mo wilika na Same 2 kei na22 vata kei na Maciu 27:35–46; Luke 23:34–35; kei na Joni 19:23–24. Vakaraica na isema eso ena veimalanivosa ena Same oqo kei na nona bula na iVakabula, ka vakasaqara tikoga na isema vata ga o ya ni ko vulica tiko na ivola ni Same ena vica na macawa mai oqo.

Raitayaloyalotaka ni o a dua na Jiu ena gauna i Jisu ka kila vinaka tu na Same ka raica na isema ki na bula ni iVakabula. Ena rawa ni veivakalougatataki vakacava vei iko na kila ka oqo?

Raica talega na Same 31:5; 34:20; 41:9; Luke 24:44; Iperiu 2:9–12.

Same 8; 19; 33

“Sa sinai ko vuravura ena nona vinaka na Turaga.”

Wilika na Same 8; 19; kei na33 ena rawa ni vakauqeti iko mo vakasamataka na levu ni ibulibuli vakasakiti ni Turaga. Vakarorogo ki na nomu vakasama kei na lomamu ni o kitaka tiko vakakina. E vakaraitaka vakacava na ibulibuli ni Turaga na “vunautaka na lagilagi ni Kalou” vei ikoSame 19:1).

Same 19:7–11; 29

Sa kaukauwa sara na vosa ni Turaga, “reki ena yalo.”

Ena Same, na vosa me vakataka na ivakadinadina, na lawa, ivakaro, kei na veilewai e rawa ni dusia na vosa ni Turaga. Nanuma tiko oqo ni ko wilika na Same 19: 7–11 Na cava e vakatututaka vei iko na veitikina oqo me baleta na vosa ni Turaga? Na cava e vakavulica vei iko na Same 29 me baleta na Domona? Ena veika o sa sotava, sa veisotari vakacava kei na ivakamacala eso oqo na vosa se na domo ni Turaga?

Sa dodonu me da savasava vakayalo ka savavuka me da curuma na iserau ni Turaga.

Same 24; 26–27

Na noda curuma yani na iserau ni Turaga ena gadrevi kina na bula savavuka.

Baleta ni a tara na valetabu e Jerusalemi ena dua na delana, na malanivosa “Ulunivanua ni Turaga” (Same 24:3) e rawa ni dusia tiko na valetabu se na iserau ni Kalou. Na cava e kuria na ka oqo ki na nomu kila na Same 24? Na cava na kena ibalebale vei iko mo “liga savasava, ka yalosavasava”Same 24:4).

Na cava e vakavulica vei iko na Same 26 kei na27 me baleta na vale ni Turaga?

Raica talega na Same 15; David A. Bednar, “Liga Savasava ka Yalosavasava,” Liaona, Nove. 2007, 80–83.

Vakasama baleta na Vuli iVolanikalou Vakamatavuvale kei na Lotu Vakamatavuvale

Same 22.Ni wilika tiko e dua na lewe ni matavuvale na same oqo, e rawa ni ra raica eso na veika e tautauvata ena Maciu 27:35–46. Mera qai wasea na nodra nanuma baleti Jisu Karisito kei na Nona solibula baleti keda.

Same 23.NaSame 23 sai koya na veivakauqeti me baleta e vica na serenilotu, me vakana “My Shepherd” kei “The Lord My Pasture Will Prepare” (Hymns, naba. 108, 109). De na via lagata beka na nomu matavuvale e dua vei ira na serenilotu oqo ka raica na vosa ena same era a vakauqeta na qaqana. Se e rawa ni ra taleitaka me ra droinitaka na iyaloyalo ni dua na ka era kunea ena same se na serenilotu me ra vakilakila na lewe ni matavuvale na veitikina se na qaqana e salavata kei na iyaloyalo. Ena sala cava e vaka kina na ivakatawa vei keda na iVakabula?

Same 24:3–5.Me vakabibitaki na bibi ni savasava na liga kei na yalo savasava, sa rawa mo wilika na Same 24:3–5 ni ra savata tiko na lewe ni matavuvale na ligadra. Na cava beka e matataka tiko na liga ena same oqo? Na cava e matataka na yalo? Na cava e rawa ni da cakava me da vakasavasavataka kina na ligada ka vakasavasavataka na yaloda?

Same 30:5, 11.NaSame 30:5 e tu kina na yalayala ni “sa ia na tagi ena bogi, ia sa yaco ena mataka na marau.” Sa vukica vakacava na Turaga na noda rarawa ki na reki? Eso na lewe ni matavuvale e rawa me ra taleitaka me ra matanataka na veika e vakamacalataka na tikina 11 .

Same 33.Me kilai na levu ni gauna e vakayagataki kina na vosa taucoko ena same oqo. Na cava eda vulica me baleta na Turaga mai na tokaruataki ni kena vakayagataki na vosa oqo, vakabibi ena tikina e 13–15?

Same 46:10Sa rawa mo dou cakava vata e dua na ka e gadrevi kina vei ira na lewe ni matavuvale mera “tiko lo.” E rawa vakacava ni vukei keda me da kila na Kalou na noda dau tiko lo? Na madigi cava soti e tu vei keda me da tiko lo ka yaco me kila na Kalou?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Noqui Vakatawa,” Serenilotu, naba 60.

Vakatorocaketaki ni Vuli ni Tamata Yadudua

Dau maqosa. Na ivolanikalou me vaka Same e dau vakauqeti ira na tamata me ra vakacaucautaka na Turaga ena veisala vovou. Kevaka o vakila ni o vinakata mo vakaraitaka na nomu yalodina ena ivakatagi, serekali, droini, se so tale na sala, cakava na veika oqori. Vakasamataka mo wasea na veika o sa cakava mo vukei ira kina eso tale mera tara cake na nodra vakabauta na Tamada Vakalomalagi kei Jisu Karisito.

Na iVakatawa Vinaka, mai vei Del Parson