e taura tiko na cina o Jisu

Maroroya na Ka Sa Yali, mai vei Michael T. Malm

15–21 ni Okosita

Same 49–51; 61–66; 69–72; 77–78; 85–86

“Au na Tukuna na Cava e Cakava o Koya ena Noqu Bula”

Na ituvatuva oqo e vakaraitaka tiko eso na ulutaga vakaivunau era tukuni tiko ena veisame oqo. Ena nomu vulica, eso na vosa, iyaloyalo, se vakasama e rawa ni vakaibalebale vei iko. Na cava o vakila ni saga tiko na Turaga me vakavulica vei iko?

Vola na Veika o Uqeti Kina

Era a wasea vakatitobu na Daunisame na veika era nanuma ena nodra veiserekali. Era vola me baleta na noodra yalolailai, rere, kei na yaluma. Ena so mada ga na gauna, era nanuma ni sa laivi ira na Kalou, ka so na same sa rogo mai kina na domo ni vuturi kei na nuiqawaqawa. Kevaka o sa bau vakila na veika vakaoqo, na wiliki ni Same ena rawa ni vukei iko mo kila ni sega ni o iko duadua ga. Ia o na raica talega na same ka na rawa ni vakayaloqaqataki iko ni o sotava na mataqali yalo vakaoya, baleta na daunisame a vakacaucautaka na Turaga ena Nona vinaka, qoroya na Nona qaqa, ka reki ena Nona loloma cecere. Era sa kila tu ni sa vakacolati ko vuravura ena ca kei na ivalavala ca, ia na Turaga sa “vinaka, ka sa vakarau tu me veivosoti” (Same 86:5). Era kila vakavinaka tu ni vakabauta na Turaga e sega ni kena ibalebale ni o na sega ni sotava na nuiqawaqawa, ivalavala ca, se rere. E kena ibalebale ni o ni kila o cei mo ni gole kina ena gauna e yaco mai kina.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Same; 62:5–12

Na veivueti e lako duadua ga mai vei Jisu Karisito.

NaSame 49 e tiko kina e dua na itukutuku baleti ira “na tamata wale kei na turaga, na vutuniyau kei na dravudravua” (tikina e 2). Na cava o na kaya me baleta na itukutuku oqo? Na cava o vakila ni vakuria na Same 62:5–12 ki na itukutuku oya?

Na wiliki ni same oqo ena rawa ni vakauqeti iko mo vakasamataka vakatitobu na sala eso era na vakararavi kina na tamata ki na dua tale na ka sega vua na Kalou me veivueti (raica na Same 49:6–7). E veivakauqeti vakacava ki na nomu bula na nomu ivakadinadina ni “sa vakabulai [iko] na Kalou mai na kaukauwa ni ibulubulu”? (tikina e 15).

Raica talega na Vosa Vakaibalebale 28:6; Alama 34:8–17.

Same 51; 85–86

Ena vuku i Jisu Karisito, sa rawa ni vosoti na noqu ivalavala ca.

Na vakamamasu ni loloma cecere ena Same 51 e vagolei vei Tevita na Tui, ka a cala ena nona veibutakoci kei na laba (raica na 2 Samuela 11). Ena gauna mada ga e sega ni rui bibi sara kina na nooda ivalavala ca, e rawa ni da semati keda ki na gagadre ni loloma veivueti ka vakamacalataki ena same oqo. E rawa talega ni da vulica e dua na ka me ibalebale ni veivutuni. Me ivakaraitaki, na vosa se malanivosa cava ena Same 51 e vakavulica vei iko me baleta na ivakarau eda gadreva me rawa ni da veivutuni kina? Na cava o vulica me baleta na veika e rawa ni vakayacora ki na nomu bula na Veisorovaki ni iVakabula?

Sa rawa mo taroga na taro vata ga ni o wilika na Same 85–86. Sa rawa mo raica talega na veimalanivosa e vakamacalataka na Turaga. E vaqaqacotaka vakacava na nomu vakabauta na veimalanivosa oqo ni na vosoti iko o Koya? (raica, me ivakaraitaki, Same 86:5, 13, 15).

Raica talega na Alama 36; Russell M. Nelson, “E Rawa ni da Caka Vinaka Cake ka Vinaka Cake,” Liaona, Me 2019, 67–69; Carole M. Stephens, “aVakabula na iVakavuvuli,” Liaona, Nove. 2016, 9–12.

Same 51:13–15; 66:16–17; 71:15–24

Na noqu ivakadinadina me baleti Jisu Karisito e rawa ni vukei ira na tani me ra lako mai Vua.

Vakasamataka vakatitobu na sala o a rawata kina na nomu ivakadinadina baleti Jisu Karisito kei na Nona kaukauwa ni veisorovaki. Oti, ni ko vulica na Same 51:13–15; 66:16–17; 71:15–24, vakasamataka na sala o rawa ni sureta kina eso mera “lako mai ka raica na cakacaka ni Kalou” (Same 66:5). Na cava na kena ibalebale vei iko mo “tukuna na [Nona] ivalavala dodonu ena siga taucoko”Same 71:24). O na tukuna vakacava vei ira na tani “na ka sa kitaka vei [iko] ko koya”Same 66:16).

Raica talega na Mosaia 28:1–4; Alama 26.

rau veitalanoa tiko e rua na cauravou

E rawa ni da wasea vei ira tale eso na noda ivakadinadina me baleta na veika sa cakava vei keda na Turaga.

Same 63; 69; 77–78

Ena vukei au na Turaga ena noqu gauna ni gagadre bibi.

E vica na same e vakamacalataki, ena vosa matata, na cava e via vakila ni yawa mai vua na Kalou ka gadreva vakabibi na nona veivuke. Sa rawa mo raica na ivakamacala vakaoqo ena Same 63:1, 8; 69:1–8, 18–21; 77:1–9. Na cava o raica ena Same 63; 69; 77–78 ka solia na veivakadeitaki vei ira na daunisame oqo?

Ni ko sa rarawa, ena vukei iko vakacava mo “nanuma tiko na cakacaka ni Turaga” kei na nona “veika veivakurabuitaki e liu”? Same 77:11. Eso vei ira na veivakurabuitaki oqori era sa vakamacalataki tiko ena Same 78. Ni o wilika tiko na veika baleti ira, vakasamataka vakatitobu na cava e vukei iko mo “tuva [nomu] vakanuinui vua na Kalou” (tikina e 7). Na veika cava o sa sotava mai na nomu tuva kawa e vakauqeti iko?

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Same 51:6Vakasamataka na sala o rawa ni vakavulica kina na nomu matavuvale na ibalebale ni kena sa raramusumusu na yalo. Me kena ivakaraitaki, o ira na lewe ni matavuvale e rawa ni ra veivukevuke ena kena voroki e dua na ka e kaukauwa na qana. E dau tautauvata beka vakacava kei na qana oya na yaloda? E rawa vakacava ni da dolava na yaloda vua na Turaga? Na wiliki vata ni same 51 e rawa ni vakarautaka eso na vakasama.

Same 23:1–3E rawa ni ra taleitaka na lewe ni matavuvale me ra droinitaka na iyaloyalo ni ivakatakarakara ena veitikina oqo ka veivosakitaka na nona sa vaka e dua na vatu cecere o Jisu Karisito “vatu,” “e dua na ivakaruru baleti [keda],” kei na “dua na vale kaukauwa.”

Same 71:17; 78:5–7.Na cava e vinakata vei iko na Turaga mo “vakatakila vei ira na luvemu”? (Same 78:5). Me rawa ni ra wasea na lewe ni matavuvale yadua e dua na ivakaraitaki ni “cakacaka veivakurabuitaki,” me vaka e dua na italanoa vakaivolanikalou, dua na ka e sotavi, se dua na ivakadinadina yadua, me vukei ira me ra “vakotora na nodra vakanuinui vua na Kalou” (Same 71:17; 78:7).

Same 72.NaSame 72 a vola o Tevita me baleta na luvena o Solomoni, ia e vuqa vei ira sa rawa talega ni baleti Jisu Karisito. Ni wilika tiko na nomu matavuvale na same oqo, e rawa ni ra taura cake e dua na iyaloyalo ni iVakabula ni ra kunea na veitikina e vakavotuya vei ira o Jisu Karisito. E rawa vakacava ni da veivuke ena vakayacori ni gagadre “sa vakasinaiti ko vuravura ena nona lagilagi”Same 72:19raica talega na Vunau kei na Veiyalayalati 65:2

Same 85:11Na tikina oqo e rawa ni vakauqeta na veivosaki me baleta na veika a yaco ena Vakalesuimai ni kosipeli—na kena dina na iVola i Momani ni “[kau tani] mai loma ni qele” kei na nodra lako mai na italai vakalomalagi “mai lomalagi” (raica talega na Mosese 7:62). Na vakarautaki ni vidio “Preparation of Joseph Smith: Tutored by Heaven” (ChurchofJesusChrist.org) e vakaraitaka eso na veika a yaco oqo.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Au Rai vei Kemuni,” Sere ni Lotu, naba 51.

Vakatorocaketaki Noda Veivakavulici

Vakayagataka na iwalewale duidui eso. “Vakasaqara na sala me vakaisaluwakitaki kina na nomu sasaga mo vakavulica na kosipeli. Ni caka oqo ena vakuri kina na vutuniyau kei na totoka ni veika e sotavi. Vakasamataka na ivakarau e rawa ni sureta kina na Yalotabu na sere/ivakatagi, italanoa, iyaloyalo, kei na so tale na iwalewale ni cakacaka ni liga “(veivakavulici ena ivakarau ni iVakabula, 22).

sa tekiduru na tamata e matai Jisu

Tomasi, Kakua ni Vakatitiqa mai vei J. Kirk Richards