eratou vosa e tolu na turaga vua e dua na tamata ena qele

The Judgments of Job, mai vei Joseph Brickey

1–7 ni Okosita

Jope 1–3; 12–14; 19; 21–24; 38–40; 42

“Ia Au na Vakararavi ga Vua”

Ni o wiliwili tiko me baleti Jope, ena tuberi iko na Yalo mo kila na veidina bibi. Vola na veika o kunea, ka vakasamataka vakatitobu ena yaga vakacava vei iko na dina oqo.

Vola na Veika o Vakauqeti Kina

E sega ni dua na ka kevaka eda vakataroga se cava e yaco kina na veika ca vei ira na tamata vinaka—se ena ka oqori, na vuna e yaco kina na veika vinaka vei ira na tamata ca. Na cava na vuna e vakatara kina na Kalou, o Koya sa dodonu ka savasava sara, me vakakina? Na taro vakaoqo e dau muria mai ni yaco na veika a sotava o Jope, e dua vei ira na tamata vinaka a yaco vua na veika ca. Ena vuku ni veivakatovolei nei Jope, era a vakataroga na nona itokani kevaka e tamata vinaka dina o koya. A vakadeitaka o Jope na nona ivalavala dodonu ka vakataroga e lomana ke Kalou dodonu dina na Kalou. Ia ena loma ni nona rarawa kei na lomatarotaro, a maroroya toka o Jope na veika e dokai kina kei na nona vakabauti Jisu Karisito. Ena ivola i Jope, e dau vakatarogi ka vakatovolei na vakabauta ia e sega vakadua ni biu laivi. E sega ni kena ibalebale ni ra sa saumi kece na taro. Ia e vakavulica na ivola i Jope me yacova na gauna erau na qai saumi kina, e rawa ni rau cici vata tiko mada na lomatarotaro kei na vakabauta, veitalia na cava ena yaco ena gauna oqo, e rawa ni da tukuna me baleta na noda Turaga, “Ia au na vakararavi ga vua” (Jope 13:15).

Me baleta na kena raici raraba na iVola i Jope, raica na “Jope” ena iDusidusi ki na iVolanikalou (ivolanikalou. ChurchofJesusChrist.org).

Learn More image

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Jope 1–3; 12–13

Na noqu vakararavi vua na Tamada Vakalomalagi kei Jisu Karisito e rawa ni vukei au meu yalodina tikoga ena ituvaki kecega.

Na veiwase taumada ni Jope e kedra inaki me vakabibitaka na itavi nei Setani vaka noda meca se dauveibeitaki, ka sega ni vakamacalataka na sala dina erau veimaliwai kina na Kalou kei Setani. Ni o wilika na veika e kaya o Setani me baleti Jope (raica na Jope 1:9–11; 2:4–5), o na vakasamataka beka kevaka e rawa ni tukuni me baleti iko. O na tarogi iko beka, na cava na vuna au dau yalodina tikoga kina vua na Kalou? Vakasamataka vakatitobu na veivakatovolei a caka vei Jope kei na kena isau (raica na Jope 1:20–22; 2:9–10). Na cava o vulica mai vua ka na rawa ni vukei iko mo sauma na nomu bolebole?

E dina ga ni tovolea tiko o Jope me yalodina tikoga, na nona veivakatovolei kei na nona vakararawataki a tomani tikoga (raica na nona lele ni lomana ena wase 3). Na ka dina, ni vaka me levu cake tikoga na nona vakararawataki, ka ra tukuna na nona itokani ni sa totogitaki koya tiko na Kalou (raica na Jope 4–5; 8; 11). Ni o wilika e dua na tiki ni taro nei Jope ena wase 12–13, vakasamataka na veika e kila o Jope me baleta na Kalou ka rawa kina vua me tomana tikoga na nona vakararavi, dina ni kune rarawa tu ka sega ni saumi nona lomatarotaro. Na cava o kila me baleta na Kalou ka na vukei iko mo sotava na bolebole? O sa mai kila vakacava na dina oqo, ka ra sa vaqaqacotaka vakacava na nomu vakabauta?

Jope 19

Sa noqu Dauveivueti o Jisu Karisito.

Ena so na gauna na dina bibi duadua e dau vakatakilai vei keda ena loma ni noda rarawa titobu. Vakasamataka vakatitobu na cakacaka ni veivakatovolei e vakamacalataki tiko ena Jope 19:1–22 kei na dina a cavuta ena Jope 19:23–27. Mo qai vakasamataka vakatitobu se o a kila vakacava ni bula tiko na nomu Dauveivueti. Na duidui cava e cakava na kila oqo ena gauna o sotava kina na veivakatovolei dredre?

Raica talega Vunau kei na Veiyalayalati 121:1–12; 122.

e rai cake na tamata

Job mai vei Gary L. Kapp.

Jope 21–24

“Ni sa vakatovolei au ko koya, au na qai lako mai me vaka na koula.”

Ni o wilika eso tale na ka mai na nodratou veivosaki o Jope kei ira na nona itokani me baleta na inaki ni nona vakararawataki o Jope, o na vakasamataka beka na nomu sauma na taro ena uto ni nodra veivosaki: Na cava era dau vakararawataki kina na ivalavala dodonu ka so na gauna era sega ni dau totogitaki na daucakaca? Vakasamataka na veika oqo ni dou wilika vata na Jope 21–24. Na cava o kila baleta na Tamada Vakalomalagi kei na Nona ituvatuva ka rawa ni veivuke ena kena rawati na isau ni taro? Raica, me ivakaraitaki, 2 Nifai 2:11–13; Mosaia 23:21–23; 24:10–16; Eparaama 3:22–26; Dallin H. Oaks, “Veibasai ni Ka Kecega,” Liaona, Me 2016, 114–17.

Raica talega na L. Todd Budge, “Tudei ka Dei Taucoko na Veivakabauti,” Liaona, Nove. 2019, 47–49.

Jope 38; 40; 42

Na rai ni Kalou e cecere cake mai na noqu.

Sevaka na nodra veibeitaki na nona itokani (raica na Jope 16:1– 5; 19:1–3), a tagi tikoga vua na Kalou o Jope ena nona vakasaqara e dua na ivakamacala ni nona vakararawataki (raica na Jope 19:6–7; 23:1–9; 31). E vakaraitaka o Elder Neal A. Maxwell ni “ena gauna sa rui lailai kina na noda rawa ni vosota na nona gauna na Kalou ka kila na ka kecega,” me vaka ni kena irairai ni a vakakina o Jope, “na ka dina eda tukuna tiko sai koya ni da kila na ka kecega. Duatani, se sega—o keda eda dau daramaka na kalokoniliga eda sa segata tiko meda tarogi Koya e lewa tu na gauna ni veivuravura kecega “(”iNuinui ena Veisorovaki i Jisu Karisito, “ Ensign, Nove. 1998, 63). Vakasamataka vakatitobu na veivosa oqo ni o wilika na nona vosa na Kalou vei Jope ena wase 38 kei na40. Na dina cava a vakavulica tiko o Koya vei Jope? Na cava e bibi kina vei keda na dina oqo me da kila ni da sotava na dredre kei na taro ena bula oqo? Na cava e vakauqeti iko me baleta na isau ni taro nei Jope ena Jope 42:1–6?

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Jope 1:20–22.Me vakilai vinaka se a vakacava na nanuma nei Jope, me vaka e vakamacalataki ena veitikina oqo, e rawa ni ra wilika na nomu matavuvale na “Jope” ena iTalanoa ni Veiyalayalati Makawa se matanataka na Jope 1:13–22. Na cava eda rawa ni vulica mai na ivakaraitaki i Jope?

Jope14:14Eda na sauma vakacava na taro nei Jope ena veitikina oqo? E rawa ni vukei keda vakacava na Alama 11:42–44 ? (Raica talega na vidio “E Bula Tiko o Koya—Marautaka na Siganimate Baleta ni Bula tiko o Jisu Karisito,” ChurchofJesusChrist.org.)

Jope 16:1–5.Eda sa vakataki ira tiko beka na itokani nei Jope, o ira era sa lewai ka vakalewai Jope ena gauna e gadreva kina na vakacegu? (raica na Jope 16:1– 4; raica talega na Joni 7:24). Ena vaqaqacotaki ira vakacava eso tale ena nodra rarawa na noda vosa? (raica na Jope 16:5).

Jope 19:23–27Ni wiliki oti na veitikina oqo, sa rawa vei ira na lewe ni matavuvale mera wasea na nodra kila ni bula tiko na noda Dauveivueti. Sa rawa mo ni cakacaka vata ka biuta na nomuni vosa ni ivakadinadina (se na nodra droini na gone me baleta na iVakabula) ena ivola, me vaka na ivolaniveisiga ni matavuvale (raica na tikina e 23). E rawa talega ni o lagata e dua na sere e vakadinadinataka na iVakabula, me vaka na “Au sa Kila ni Bula Tu” (Sere ni Lotu, naba 76), ka wasea na veimalanivosa e vaqaqacotaka na nomu vakabauti koya.

Jope 23:8–11Na cava na kena ibalebale me da “lako mai” na noda vakatovolei “me vaka na koula”? (raica talega na vidio “The Refiner’s Fire,” ChurchofJesusChrist.org). O cei eda kila ka sa cakava oti oqo? Era na taleitaka na gone me ra cakava e dua na ka ena vosa mai na tikina e 10 e volai toka kina. Sa rawa talega mo veivosakitaka na sala e vakadruka kina o Jisu Karisito na Nona veivakatovolei (raica na Luke 22:41–44; Vunau kei na Veiyalayalati 19:16–19).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Sa Bula Tiko na iVakabula,” Sere ni Lotu, naba 75.

Vakatorocaketaki ni Vuli ni Tamata Yadudua

Raitayalotaka! Na vakasama vakaibalebale e rawa ni yaco mai ni da tovolea meda biuti keda ki na ivolanikalou. Kena ivakaraitaki, o iko ena ituvaki ni bula nei Jope ena rawa ni vukei iko mo vakananuma vakatitobu na kemu isema vei Tamada Vakalomalagi kei Jisu Karisito.

era vosa na tagane vua e dua na tamata ena qele

Job and His Friends, mai vei Ilya Repin