Na Vakalialiai ni Karisito, mai vei Carl Heinrich Bloch

26 ni Sepiteba–2 ni Okotova

Aisea 50–57

“Sa Colata Ko Koya na Noda Rarawa, ka sa Colata na Rarawa ni Lomada”

Aisea 50–57 e tiko kina eso na ivosavosa totoka era na sega ni kila na gone o vakavulica. Ni o vakavakarau mo veivakavulici, vakasamataka vakatitobu na vei dina rawarawa oqo ka vakavulici tiko kei na sala mo vukei ira kina na gone me ra vulica.

Vola na Veika o Vakauqeti Kina

Sureta na Veiwasei

Vakayaloqaqataki ira yadua na gone me ra wasea se ra kila vakacava ni lomani ira o Jisu Karisito. Kerei ira me ra wasea na veika era sa cakava tiko me ra vakaraitaka kina ni ra sa lomani Jisu.

Vakavulica na iVunau: Gone Sobu

Aisea 53:4

A vakararawataki ena vukuqu o Jisu baleta ni lomani au.

Mai na nona solibula ni veisorovaki, sa vakararawataki kina o Jisu Karisito ena vuku ni noda ivalavala ca ka colata vakataki koya na “noda rarawa” kei na “rarawa ni lomada.” O na vakadinadinataka vakacava vei ira na gone na Veisorovaki ni iVakabula?

iTaviqaravi e Rawa ni Caka

• Vakaraitaka na iyaloyalo ni iVakabula ena nona sotava tiko na rarawa ena kauveilatai kei na Were o Kecisemani (raica na iVola ni Yaloyalo ni Kosipeli, naba. 56, 57, se wase 51–53 ena iTalanoa ni Veiyalayalati Vou). Kerei ira na gone me ra tukuna vei iko na veika era raica ena vei iyaloyalo yadua ka wasea na veika era kila me baleta na veika e yaco tiko. Na cava na vuna e vakararawataki kina ena vukuda o Jisu?

• Wilika vei ira na gone na Aisea 53:4: “Sa colata ko koya na noda rarawa, ka sa colata na rarawa ni lomada.” Vakaraitaka vei ira na gone e dua na iyaya bibi (se e dua na kena iyaloyalo ), ka sureti ira me ra matanataka ni ra laveta cake tiko e dua na ka bibi. Vakamacalataka ni “mosi” kei na “rarawa” (se lomabibi) e rawa ni vakilai na kena bibi kei na dredre ni kena colati. Vakadinadinataka ni na vukei keda o Jisu Karisito me colati na veika oqo baleta ni lomani keda o Koya.

Aisea 55:6

Au na rawa ni vakasaqarai Jiova ka masuti Koya.

Vakasamataka na sala e rawa ni o vukei ira kina na gone me ra kila na ibalebale ni “vakasaqarai” Jisu ena nodra bula taucoko.

iTaviqaravi e Rawa ni Caka

• Vunia e dua na iyaloyalo kei Jisu ena dua na vanua ena loma ni rumu, ka sureti ira na gone me ra vakasaqara. Wilika na vosa “Dou vakasaqarai Jiova ni sa kune rawa” mai na Aisea 55:6. Kerei ira na gone me ra tukuna eso na sala e rawa ni ra vakasaqara kina na Turaga—ka kena ibalebale ni ra tovolea vakaukauwa me ra vulica na veika baleti Koya ka toro voleka yani Vua. Ena veigauna yadua e solia kina e dua na gone na isau ni taro, vunia tale na iyaloyalo, ka sureta na gone o ya me “vakasaqara”.

• Vukei ira na gone me ra vulica na vosa ena sere “Me‘u na Vaqara na Turaga” (iVolanisere ni Gonelalai,67) se dua tale na sere me baleta na toro voleka yani ki vua na iVakabula. Vakayagataka na tabana ni itaviqaravi ni macawa oqo me vukei ira kina na gone me ra digitaka e dua na ka era na vakayacora me ra “vakasaqara … na Turaga.”

• Wilika na malanivosa “Dou masuti koya ni sa voleka tiko” mai na Aisea 55:6. Eda masuta beka vakacava na Tamada Vakalomalagi? Kerei ira na gone me ra veitalanoataka na ka era dau kaya e na nodra masu. Vakadinadinataka ni lomani ira na Tamada Vakalomalagi ka dau rogoci ira ni ra masu.

Vakavulica na iVunau: Gone Qase Cake

Aisea 51–52

E sureti au na Turaga me‘u “tokara na [noqu] kaukauwa.”

Ena Aisea 51 kei na 52, a vakayagataka na Turaga na malanivosa me vaka na “yadra,” “tucake,” ka “tokara na nomu kaukauwa” me vakauqeti ira na Nona tamata me ra sasaga ki na bula vakalou. Navuca na sala e rawa ni vakalougatataki ira kina na gone o vakavulica na ivakasala oqo.

iTaviqaravi e Rawa ni Caka

• Ni bera na kalasi, vola ena papa e vica na malanivosa mai na Aisea 51–52 ka vakaraitaki kina na itovo eso e vinakata na Turaga me ra vakayacora o ira na nona tamata, me vaka na “Ta cake mada ki lomalagi,” “Mo Yadra,” “Tu Cake,” “Ceburaka tani vei iko na kuvu ni soso,” kei na “Dou lagata mai na sere ni marau” (Aisea 51:6,17; 52:2,9). Me ra veivukevuke na gone ena matanataki ni dua vei ira na malanivosa oya me ra qai tovolea na vo ni kalasi me ra vakilakila na cava na itovo e matanataki tiko oya. Ni oti na vakaitavi yadua, vakaraitaka vei ira na gone na malanivosa ena ivolanikalou, ka veitalanoataka vata kei ira na ibalebale vakayalo ni malanivosa oya. Na cava e kerea vei keda na Turaga me da vakayacora? E rawa vakacava ni da vakayacora na veika vakayadua oqo?

• Sureti ira na gone me ra wilika na Aisea 51:1, 4,7 ka vakatakila se vosa tiko vei cei na Turaga kei na cava e vinakata o Koya me ratou cakava. Na cava na kena ibalebale me da “dau rogoca” na Kalou? Me ivakaraitaki, kerea e dua vei ira na gone me soli ivakasala rawarawa me ra vakamuria na vo ni gone. Na cava e dau dredre kina ena so na gauna me da vakarorogo ka talairawarawa ki vua na Turaga? Eda na vakaraitaka vakacava vua na Turaga ni da na “rogoci” Koya?

Ena Vuku ni Loloma, mai vei dausivisivi Angela Johnson

Aisea 53:3–9

Ko Jisu Karisito e vakatauca vei Koya na noqu ivalavala ca, kei na rarawa.

O na vakayagataka vakacava na vosa nei Aisea me vukei ira na gone me ra kila vakatitobu cake na veika a vakayacora na iVakabula e na vukudra?

iTaviqaravi e Rawa ni Caka

• Biuta cake e vica na iyaloyalo ka vakatakarakarataki tiko kina na rarawa kei na mate nei Jisu Karisito (raica, me kena ivakaraitaki na, iVola ni iYaloyalo Vakosipeli, naba. 56, 57, 58). Wilika vata na Aisea 53:3–6,9, ka sureti ira na gone me ra vakaraica na malanivosa e vakamacalataka na veika e yaco tiko ena iyaloyalo. Vakadinadinataka ni bera tiko e vica na drau yabaki ni nona mai vakararawataki e na vukuda o Jisu Karisito, era a vakavulica tiko na parofita me vakataki Aisea na veika bibi oqo. Na cava na vuna e bibi kina me ra kila taumada na tamata na veika oqo ni vo e vica vata na yabaki me qai mai yaco? (raica na Alama 39:15–19).

• Sureti ira na gone me ra wilika na Aisea 53:4–7 ka raica na vosa e vakamacalataka na veivakararawataki e mai sotava na iVakabula e na vukuda. Sureta ira me ra vola na veivosa oqo ena papa. Na cava na vuna a colata kina o koya na noda “mosi,” “veivakararawataki,” kei na “ivalavala ca”? (raica talega na Alama 7:11–12). Wasea vei ira na gone na sala esa vukei iko kina na iVakabula me colati kina na nomu mosi kei na rarawa. Me ra wasea na nodra nanuma me baleta na iVakabula kei na veika esa vakayacora o Koya ena vukudra.

Aisea 55:7–9

Na sala ni Turaga e cecere cake mai na noqu sala.

Ni da sa kila deivaki ni Nona vakasama kei na Nona sala na Turaga e cecere cake mai na noda, sa na rawarawa kina me da vakararavi Vua.

iTaviqaravi e Rawa ni Caka

• Tarogi ira na gone se o cei era na lako kina ke ra sotava tiko e dua na leqa dredre, kei na vuna. Wilika vata kei ira na gone na Aisea 55:8–9, ka kerei ira me ra vakarogoca na vuna me da vakasaqara kina na veidusimaki ni Turaga ena gauna eda gadreva kina na veivuke.

• Droinitaka ena papa na lomalagi kei na qele, ka vakayacani rau me Lomalagi kei Vuravura. Mo qai sureti ira na gone me ra wilika na Aisea 55:9 me ra raica kina na veika e vakatauvatana kina na Turaga na lomalagi kei na vuravura, ka kerei ira me ra kuria na ivakatakilakila tale eso oqo ki na droini. Na cava na ibalebale ni nona sala kei na vakanananu ni Turaga sa “cecere cake” mai na noda? Na cava na vuna e bibi kina me da kila na ka oqo?

• Veitalanoataka kei ira na gone eso na sala ni Turaga ka cecere cake mai na noda sala. Me kena ivakaraitaki, na cava na Nona sala ena nodra qaravi na tamata ivalavala ca? (raica na Marika 2:15–17). Na cava na Nona sala ena nodra liutaki na tani? (raica na Maciu 20:25–28). E duidui vakacava na Nona sala mai na nodra sala eso tale? Vakaraitaka vei ira na gone na sala o sa vulica mo vakararavi kina ena sala cecere kei na vakanananu ni Turaga.

Vakauqeta na Vuli e Vale

Vakatura vei ira na gone me ra tuva e dua na takete ka na rawa ni vukei ira me ra toro voleka vei Jisu Karisito, ka yavutaki ena dua na ka era vulica ena kalasi nikua. Sureti ira me ra wasea na takete oqori vata kei na dua na lewe ni matavuvale.

Vakatorocaketaki ni Noda Veivakatavulici

Vukei ira na gone sobu me ra vuli mai na ivolanikalou. Mo vukei ira na gone sobu me ra vuli mai na ivolanikalou, vakanamata ki na dua ga na tikina se dua mada ga na malanivosa bibi. Ena so na gauna mo na wilika e dua na wase mai na ivolanikalou ka sureti ira na gone me ra tucake se laveta na ligadra ena gauna era rogoca kina vakatabakidua e dua na vosa se malanivosa o vinakata mo vakabibitaka.