vosa tiko na parofita vei ira na turaga

Jeremaia, mai vei Walter Rane

10–16 ni Okotova

Jeremaia 1–3; 7; 16–18; 20

“Ni’u A Bera ni Buli Iko e na Kete, Ka’u sa Kilai Iko”

“Na nodra takete na qasenivuli ni kosipeli taucoko… sa ikoya na kena vakavulici na ivunau savasava ni kosipeli, ena Yalotabu, me rawa ni ra vukei kina na luve ni Kalou me ra tara cake na nodra vakabauta na iVakabula ka yaco me ra vakataki Koya vakalevu cake” (Veivakavulici ena iVakarau ni iVakabula, waqana e liu).

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vola ena veitiki ni pepa e vica na vosa bibi mai na vulici ni Jeremaia e na macawa oqo, me vaka na parofita, wai ni bula, na vakasoqoni vata, kei na tete. Biuta na pepa ena dua na koniteina, ka sureti ira na gone me ra digia e dua ka wasea na nodra nanuma me baleta na vosa era sa digitaka. Vukei ira me ra raica na kena semati na vosa ki na dua na ka a vakavulica o Jeremaia.

ivakatakilakila ni veivakavulici

Vakavulica na iVunau: Gone Sobu

Jeremaia 1:5

Sa kilai au na Tamada Vakalomalagi ni sa bera ni‘u a sucu mai.

Baleta ni da a bula vata kei na Kalou ni sa bera ni da lako mai ki vuravura, e kilai keda o koya, kevaka sara mada ga eda sega ni nanumi Koya. O na vukei ira vakacava na gone o vakavulica me ra kila na dina oqo?

iTaviqaravi e Rawa ni Caka

• Wilika vei ira na gone na Jeremaia 1:5, ka vakamacalataka ni sa kilai Jeremaia na parofita na Kalou ni bera ni sucu mai. Vakamacalataka vei ira na gone, vakayadua, ni sa kilai ira yadua talega na Tamada Vakalomalagi ni bera ni ra qai sucu mai ka sa talai keda mai eke me baleta e dua na inaki.

• Vakaraitaka vei ira na gone e dua na iyaloyalo ni dua na gone dramidrami, ka tarogi ira na gone kevaka era kila na vanua a tiko kina na gone oqo ni bera ni qai sucu mai. Lagata vata e dua na sere e vakavulica na noda bula taumada kei na Kalou, me vaka na “Au Luve ni Kalou” se “Mai Lomalagi Daru a Duabau Kina” (iVolanisere ni Gonelalai, 2,141). Veitalanoataka na veika vakayalo e vakavurea mai na sere. Wasea na nomu ivakadinadina ni da a bula vata kece kei Tamada Vakalomalagi ka sa talai keda mai ki vuravura o Koya.

Jeremaia 1:7

Era sa kacivi na parofita me ra vosataka na vosa ni Turaga.

Na veikacivi nei Jeremaia e vakaraitaka na veika e kerea na Turaga me ra vakayacora na parofita. Ena rawa vakacava ni o vukei ira na gone o vakavulica me ra vakaqaqacotaka na nodra gagadre me ra vakamuria na parofita bula?

iTaviqaravi e Rawa ni Caka

• Vakaraitaka vei ira na gone e dua na iyaloyalo ni noda parofita bula, ka sureti ira me ra wasea na veika era kila me baleti koya. Na cava era dau cakava na parofita? Wilika vei ira na gone na veika a tukuna na Turaga vua e dua tale na parofita, o Jeremaia, ena Jeremaia 1:7. Sureti ira na gone me ra taubale ga ena vanua era duri tu kina ni o wilika tiko na “lako vei ira kecega ka’u sa talai iko kina” ka me ra qai matanataka ni vaka era vosa tiko ni o wilika “na ka kece talega ka’u sa vakarota vei iko, ko na tukuna.” Wasea na nomu ivakadinadina ni ra dau vakayacora ka kaya na parofita na veika sa vakarota na Turaga.

• Vakaraitaka na kedra iyaloyalo na parofita mai na ivolanikalou (raica na iVola ni iYaloyalo Vakosipeli, Mekasini ni Lotu, kei na Lako Mai, Mo Muri Au—Me Baleta na Tamata Yadua kei na Matavuvale). Sureti ira na gone me ra tukuna vei iko na veika era kila me baleti ira na vei parofita oqo. Vakamacalataka vakalekaleka vei ira na gone e dua na ka era dui cakava vakayadua me ra veivuke kina ena cakacaka ni Kalou. Wasea na nomu ivakadinadina ni ra sa kacivi mai vua na Kalou na parofita me ra tukuna na Nona vosa ka qaravi ira na Nona tamata.

Jeremaia 16:16

Au na rawa ni vukei ira na luvena na Tamada Vakalomalagi me ra lesu mai Vua.

Ni cavuti Jeremaia 16:16, o Peresitedi Russell M. Nelson e a kaya, “O ira na noda daukaulotu era sa vakasaqarai ira na Isireli era sa veiseyaki tu; era a vakasasataki ira ‘tani mai na qaravatu’; ka ra sa siwati ira me vaka ena veigauna makawa” (“Vakasoqoni o Isireli sa Veiseyaki, ” Ensign se Liaona, Nove. 2006,81).

iTaviqaravi e Rawa ni Caka

• Ni o wilika na Jeremaia 16:16, sureti ira na gone me ra matanataka na siwa se vakasasa. Vakamacalataka ni o ira na gonedau kei na dauvakasasa ena tikina oqo era matataki ira na daukaulotu. Kerei ira na gone me ra matanataki ira na daukaulotu. Na cava era dau vakayacora na daukaulotu? E rawa vakacava me da vukei ira?

• Bulia e dua na qito ni veivakasotari ena kena vakayagataki na tabana ni itaviqaravi ena macawa oqo. Ni kunea e dua na gone na iyaloyalo e veisotari, veitalanoataka na veika e vakaraitaka na iyaloyalo o ya eda rawa ni vakayacora me da vukei ira kina na luvena na Tamada Vakalomalagi me ra lesu tale ki Vua.

ivakatakilakila ni veivakavulici

Vakavulica na iVunau: Gone Qase Cake

Jeremaia 1:4–19

Era sa kacivi na parofita me ra vosataka na vosa ni Kalou.

O na vukei ira vakacava na gone me ra vakaqaqacotaka na nodra vakabauta kei na nodra kila na nodra itavi na parofita ena matanitu ni Kalou?

iTaviqaravi e Rawa ni Caka

• Digitaka e vica na tikina bibi mai na Jeremaia 1 e vakavuvulitaka na dina bibi me baleti ira na parofita, me vaka na tikina e 5, 7, 10, kei na 19. Sureti ira yadua na gone me ra digitaka e dua na tikina, wilika, ka wasea e dua na ka e vulica me baleti ira na parofita mai na tikina e digitaka. Sureta e vica na gone me ra wasea na nodra ivakadinadina ni ra vakamuria na parofita.

• Vakaraitaka e dua na kena iyaloyalo na parofita bula, ka lagata vata e dua na sere me baleti ira na parofita, me vaka na “We Listen to a Prophet’s Voice” (Hymns, no.22). Vukei ira na gone me ra cakava e dua na ituvatuva ni veika e kerea vei keda na parofita bula me da vakayacora. Digitaka e dua na itukutuku mai vua na parofita ka a vakaraitaka mai e na koniferedi ka se qai oti toka ga, ka vukei ira na gone me ra raica na ivakasala ena nona itukutuku. Eda sa vakamuria tiko vakacava na parofita? Veitalanoataka na sala e vukei keda kina na ivakasala mai vei ira na parofita me da muria vakavinaka cake kina na Tamada Vakalomalagi kei Jisu Karisito.

• Vakaraitaka na vidio “Why Do We Have Prophets?” (ChurchofJesusChrist.org), ka tarogi ira na gone se ra na vakamacalataka vakacava ki vua e dua na itokani na vuna e veivakalougatataki kina ni tiko e dua na parofita bula (raica na Yavu ni Vakabauta 1:6,9). Sureti ira na gone me ra wasea na nodra nanuma me baleta na parofita bula.

Jeremaia 16:14–15

Au sa rawa ni tiki ni vakasokomuni vata nei Isireli.

Na itukutuku me baleta na vakasoqoni vata nei Isireli e tiko ena Jeremaia 16:14–15 e rawa ni vakarautaka e dua na madigi cecere me vakaraitaki kina vei ira na gone na cakacaka ni kaulotu kei na tuva kawa. Oqo e dua na sala me da “tu ka vakadinadinataka na Kalou” (Mosaia 18:9).

iTaviqaravi e Rawa ni Caka

• Wilika vata na Jeremaia 16:14, ka kerei ira na gone me ra wasea na veika era nanuma me baleta na sala e a vakayacora “ko Jiova … ka kauti ira tani mai na Isireli mai na vanua ko Ijipita” (raica na Lako Yani 14). Sureti ira me ra wilika na Jeremaia 16:15 me ra kila na veika e a tukuna ko Jeremaia ni na yaco ka na vakananumi vakalevu cake sara mai na kena oqori. Vakamacalataka ni a veiseyaki tu o Isireli e vuravura taucoko, ia sa yalataka tu na Kalou ni na vakasoqoni ira lesu tale ki Vua kei na Nona Lotu. E vakatokai oqo me vakasokomuni kei Isireli. E tautauvata vakacava na ka oqo kei na nodra sereki na tamata mai na tiko vakavesu?

• Wasea na itukutuku oqo mai vei Peresitedi Russell M. Nelson: “Na gauna cava ga o cakava kina e dua na ka me na vukea e dua—ena yasa cava ga ni ilati—mo cavuta na ikalawa mo veiyalayalati kina kei na Kalou ka ciqoma na nodra cakacaka vakalotu bibi ni papitaiso kei na valetabu, o sa veivuke tiko ena vakasokumuni kei Isireli” (Russell M. Nelson kei Wendy W. Nelson “Hope of Israel” [worldwide youth devotional, June3, 2018], supplement to the New Era and Ensign, Aug. 2018,15, ChurchofJesusChrist.org). Eda na veivuke vakacava me da sokomuni Isireli?

• Lagata vata e dua na sere me baleta na cakacaka ni kaulotu, me vaka na ““Au Nuitaka Meu Sa Lako Tu” se “Kacivi mo Veiqaravi” (iVolanisere ni Gonelalai, 91,94), se vakaraitaka na vidio “Your Day for a Mission” (ChurchofJesusChrist.org). Tarogi ira na gone se cava era sa vulica mai na sere se na vidio me baleta na vuna e digitaka kina e dua me lako ikaulotu.

ivakatakilakila ni vuli

Vakauqeta na Vuli e Vale

Sureti ira na gone me ra kauta i vale e dua na ilavelave ni tabana ni itaviqaravi ni macawa oqo ka qitotaka na qito ni veivakasotari kei na nodra matavuvale. Vakayaloqaqataki ira me ra veitalanoa kei na nodra matavuvale na sala e sa vakalougatataki ira kina na cakacaka ni kaulotu.

Vakatoroicaketaki ni Noda Veivakavulici

Vukei ira na gone me ra kila ni sa tiko na Yalo. Na ivakatagi vakalou sa dau sureta na veivakauqeti ni Yalo Tabu. Ni o lagasere vata kei ira na gone, taura na gauna mo vukei ira me ra vakila na yalo vakayalo ka vakadeitaka na dina ni veika era sa vulica.

tabana ni itaviqaravi: Au rawa ni vukei ira na luvena na Tamada Vakalomalagi me ra lesu mai Vua