E veivakavulici tiko o Jisu e vanua ni sokalou

O Jisu ena valenilotu e Nasareci, mai vei Greg K. Olsen

3–9 ni Okotova

Aisea 58–66

“Ena Lako Mai ki Saioni Nai Vakabula”

Na inaki ni vei itaviqaravi ena ituvatuva oqo sa ikoa me vakauqeta na nomu dau bulika maqosa. E sega ni tukuni mo vakamuria vakamatailalai na itaviqaravi; mo vakamuria na veivakauqeti ni Yalo ni sa bera na lesoni kei na gauna ni lesoni.

Vola na Veika o Vakauqeti Kina

ivakatakilakila ni veiwasei

Sureta na Veiwasei

E vuqa na vosa nei Aisea era vakadinadinataka ka vakavulica na veika me baleta na iVakabula. Vakaraitaka na iyaloyalo kei Jisu, ka sureti ira na gone me ra wasea na veika era sa vulica me baleti Koya e na macawa oqo.

ivakatakilakila ni veivakavulici

Vakavulica na iVunau: Gone Sobu

Aisea 58:13–14

Na Siga tabu sa rawa ni ka e rekitaki vei au.

Na siga tabu sa gauna me da nanuma kina na Turaga ka vakacegu mai na noda itavi ni veimacawa. O rawa ni vukei ira vakacava na gone o vakavulica me ra rekitaka na Sigatabu?

iTaviqaravi e Rawa ni Caka

• Kerei ira na gone me ra cavuta vakavica vata na malanivosa “Ka sa vakatoka na Siga Tabu me ka e rekitaki, na siga tabu sa nei Jiova na siga me dokai” (Aisea 58:13). Vakamacalataka ni “rekitaki” e kena ibalebale na ka e kauta mai vei keda na marau. Sureti ira na gone me ra droinitaka na iyaloyalo eso ni veika e vakamarautaki ira. Vakadinadinataka ni a solia vei keda na Turaga na Siga ni Vakacecegu baleta ni vinakata o Koya me da reki. Tukuna vei ira na gone na vuna e sa vu ni reki kina vei iko na Siga Tabu.

• Wilika vei ira na gone na Aisea 58:14: “Ko na qai rekitaki Jiova.” Vakamacalataka vei ira na gone ni siga talei dina na siga ni Vakacecegu—na gauna eda rawa ni vakasamataka kina na veika a vakayacora o Tamada Vakalomalagi kei Jisu me vukea na noda bula marau. Vukei ira na gone me ra vakasamataka na veika e rawa ni ra cakava ena Siga Tabu me ra vakananuma kina na Tamada Vakalomalagi kei Jisu. Sureti ira me ra droinitaka na ka era nanuma ka wasea na nodra iyaloyalo vei ira vakayadua kei na nodra matavuvale.

e vakawaqaca na marama na cina qele vakawaiwai mai na cina e taura tu na tagane

“Ko Jiova ga, ena nomu rarama ka sega ni mudu” (Aisea 60:19). E Dua na iSolisoli ni Rarama, mai vei Eva Timothy

Aisea 60:1–3

Au rawa ni vakacaudreva na rarama ni iVakabula ki vei ira na tani.

A parofisaitaka o Aisea ni ena veisiga mai muri, era na vaka na rarama na tamata ni Turaga me ra nodra cina o ira era tiko ena butobuto. Vakasamataka na sala e rawa ni o vukei ira kina na gone me ra “tucake” ka “rarama mai.”

iTaviqaravi e Rawa ni Caka

• Sureti ira na gone me ra bobo ena gauna o wilika kina na Aisea 60:1–3. Kerei ira me ra dolava na matadra ni ra rogoca na vosa “rarama” ka me ra bobo ni ra rogoca na vosa “butobuto.” Vakamacalataka ni o Jisu Karisito kei na Nona kosipeli e sa vaka e dua na rarama ka na vukei keda meda raica na noda sala lesu ki vua na Tamada Vakalomalagi.

• Solia vei ira yadua na gone na iyaloyalo ni dua na rarama (me vaka na matanisiga, dua na kadrala, se dua na matanicina). Vukei ira na gone me ra vakasamataka na sala eso e rawa ni ra wasea kina na rarama ni iVakabula vei ira na tani. Ni sa wasei na vakasama yadua, sureti ira me ra “tucake” ka “rarama mai” e na nodra taura cake na iyaloyalo ni rarama. Tukuna vei ira na gone na sala eso o sa raica ni ra wasea kina na rarama ni iVakabula.

• Lagata kei ira na gone e dua na sere me baleta na veiwaseitaki ni rarama, me vaka na “Cila, Cila” (iVolanisere ni Gonelalai,96). Vukei ira na gone me ra raica na vosa ena sere e vakaqaqacotaka na veika era vulica mai na Aisea 60:1–3.

Aisea 61:1–3

O Jisu Karisito sa Noqu iVakabula ka Dauveivueti.

Aisea 61:1–3 e solia e dua na ivakamacala momona me baleta na Nona ilesilesi ni veivakavulici kei na veivakabulai na iVakabula. Vakasaqara na sala eso mo vukei ira kina na gone me ra raica na sala e rawa ni vakavulici ira kina o Jisu Karisito ka vakabulai ira vakayadua.

iTaviqaravi e Rawa ni Caka

• Me ra taura cake na gone na iyaloyalo ni Nona veivakavulici tiko o Jisu, veivakabulai, kei na veivukei tiko vei ira na tamata ni o wilika na Aisea 61:1 (raica na iVola ni iYaloyalo Vakosipeli). Vakamacalataka ni Kalou a talai Jisu Karisito mai me mai vakayacora na veika oqo vei keda kece sara. Sureti ira na gone me ra wasea na nodra nanuma me baleti Jisu Karisito. Vakadinadinataka na nona loloma na iVakabula me baleti ira yadua na gone.

• Aisea 61:3 e vakamacalataki ira era vakarorogo ka talairawarawa vua na Turaga me vaka na “kau dauvuataka nai valavala dodonu.” Droinitaka e dua na vunikau ena papa, ka sureti ira na gone me ra vakasamataka na veika dodonu e rawa ni ra cakava. Ena veivakasama taucoko, sureti ira na gone me ra droinitaka e dua na draunikau ena vunikau.

ivakatakilakila ni veivakavulici

Vakavulica na iVunau: Gone Qase Cake

Aisea 58:6–11

Na lolo e vakalougatataki au kei ira tale eso era vakaleqai tu.

Eso na gone o vakavulica tiko era sa qase cake ka sa rawa ni ra lolo. Ia o ira sara mada ga era sega ni rawa ni lolo sa yaga me ra vulica na Nona lawa ni lolo na Turaga ka vakavakarau me ra lolo ni ra sa na rawa ni kitaka vakakina.

iTaviqaravi e Rawa ni Caka

• Vola ena papa ni volavola na Cava na vuna eda lolo kina? kei Eda dau lolo vakacava? Sureti ira na gone me ra vola na isau ni taro ena papa ni volavola. Vakayaloqaqataki ira me ra railesuva na “Lolo” ena iDusidusi ki na iVolanikalou (scriptures,ChurchofJesusChrist.org) kei na Aisea 58:6–11 me kunei kina eso tale na isau ni taro. Ena rawa ni vukei keda vakacava na Aisea 58:6–11 ena gauna e dredre kina na lolo?

• Wasea vei ira na gone e dua na ka o a sotava ena lolo, se wasea e dua na italanoa mai na dua na mekasini ni Lotu me baleta na lolo. Vakamatatataka na veivakalougatataki e vakasoburi mai ena lolo ka vakayacori ena dua na inaki vakayalo. Kevaka e dua vei ira na gone e sa lolo, sureti ira me ra wasea na veika era sotava. Vakayaloqaqataki ira na gone me ra vakamacalataka vei ira na nodra itubutubu ena Sigatabu ni lolo ka tarava na ibalebale ni lolo. Vukei ira me ra kila vakavinaka na ibalebale ni lolo ena dua na inaki dina kei na yalo masumasu.

• Wilika vata na Aisea 58:6–7, ka vakamacalataka ni dua na sala eda “soli [keda] madrai vua sa viakana” ni da lolo sa ikoya na noda solia na ilavo me da a vakayagataka ena kakana me noda isolisoli ni lolo. Vakaraitaka vei ira na gone e dua na tikidua ni ikatini kei na isolisoli ni lolo, ka vakamacalataka na sala me vakatawani kina. Sureti ira na gone me ra wilika na Aisea 58:8–10, ka vakasaqara na veivakalougatataki e yalataki vei keda ni da lolo. E rawa vakacava ni vakalougatataki keda kei ira era vakaleqai tu na lolo?

Aisea 61:1–3

O Jisu Karisito sa Noqu iVakabula ka Dauveivueti.

Vakasamataka vakatitobu na sala e rawa ni o vakayagataka kina na vosa nei Aisea me vakaqaqacotaki kina na nodra ivakadinadina na gone me baleti Jisu Karisito me nodra iVakabula ka Dauveivueti.

iTaviqaravi e Rawa ni Caka

• Solia e vica na miniti vei ira na gone me ra wilika na Aisea 61:1–3 vakai ira. Qai sureti ira me ra vola ena dua na tiki ni pepa se ena dua na ivolaniveisiga na veika e vakavulica vei ira na veitikina oqo me baleti Jisu Karisito. Sureta e vica na gone me ra wasea na nodra nanuma.

• Sureti ira na gone me ra wasea e dua na malanivosa mai na veitikina oqo e vakaibalebale vakalevu cake vei ira ka me ra qai vakamacalataka na vuna. E vukei keda vakacava na veitikina oqo me da kila kina na veika a talai mai kina ki vuravura o Jisu Karisito me mai cakava?

Aisea 65:17–25

Na Mileniumi ena gauna ni sautu kei na reki.

A raica o Aisea e dua na gauna era na kune vakacegu ka reki kina na tamata ni Kalou. Ena vakayacori na parofisai oqo ena gauna e na lesu mai kina ki vuravura o Jisu Karisito ka veiliutaki me dua na udolu na yabaki—e dua na gauna e vakatokai me Mileniumi.

iTaviqaravi e Rawa ni Caka

• Aisea 65:17–25 e vakamacalataka na veika ena yaco ki vuravura ni sa lako tale mai na iVakabula. Wasei ira na gone ki na ilawalawa lalai, ka solia ki na ilawalawa yadua e vica na tikina oqo me ra wilika. Ni oti e vica na miniti, vola vata ena papa ni volavola na ivakarau ena duidui kina na bula ena “vuravura vou” ka vakamacalataki tiko ena veitikina oqo (tikina e 17). Na cava na vuna ena gauna kina ni “reki ka marau ka sega ni mudu”? (tikina e 18).

• Ni bera na kalasi, vakarautaka na tikinipepa ka tiko kina na vosa kei na malanivosa mai na ikatini ni yavu ni vakabauta. Sureta e dua na gone me cavuqaqataka na yavu ni vakabauta, ka kerei ira na gone me ra biuta vata na tikinipepa ena kena ituvatuva dodonu. Vukei ira na gone me ra kila na cava e vakavulica vei keda na yavu ni vakabauta oqo me baleta na Mileniumi.

ivakatakilakila ni vuli

Vakauqeta na Vuli e Vale

Sureti ira na gone me ra wasea e dua na ka era sa vulica nikua vata kei na nodra vuvale me baleta na iVakabula. Uqeti ira mera wilika vata na ivolanikalou kei na nodra matavuvale ena macawa oqo.

Vakatoroicaketaki ni Noda Veivakavulici

Taroga na taro eso e veivakauqeti. Taroga na taro e na vakavure vakasama vei ira na gone ka na lako sivita na veika dina sa kilai tu. Me ivakaraitaki, vakasamataka na taro e vakauqeti ira me ra wasea na nodra ivakadinadina kei na veika era sotava.

tabana ni itaviqaravi: Au rawa ni vakacaudreva na rarama ni iVakabula vei ira na tani