ceuceu kei Jeremaia na parofita

Na Tagi nei Jeremaia na Parofita, mai na dua na ceuceu mai na Koronivuli ni Nasareci

17–23 ni Okotova

Jeremaia 30–33; 36; Lele i Jeremaia 1; 3

“Ka’u na Vukica na Nodra Tagi Me Ra Reki”

Na iVola i Jeremaia kei na Lele i Jeremaia ena rairai dredre vei ira na gone me ra tauradei, ia na nomu kalasi e rawa ni na vulica na vei lesoni mai na ivakavuvuli e vakavulici ena vei ivola oqo. Na cava o sa vakauqeti kina mo wasea?

Vola na Veika o Vakauqeti Kina

ivakatakilakila ni veiwasei

Sureta na Veiwasei

Solia wavoki e dua na ilavelave ni iVola Tabu. Ni ra taura na ivola na gone, kerei ira me ra wasea e dua na ka era taleitaka me baleta na Veiyalayalati Makawa—e rairai dua beka na ivakavuvuli se dua na italanoa taleitaki era sa vulica mai kina mai vale se e valenilotu.

ivakatakilakila ni veivakavulici

Vakavulica na iVunau: Gone Sobu

Jeremaia 31:3

E Rau lomani au na Tamada Vakalomalagi kei Jisu.

Ni ra vakila na “loloma sa sega ni mudu” ni Tamada Vakalomalagi kei Jisu Karisito ena vukei ira na gone o vakavulica me ra toro voleka yani vei Rau.

iTaviqaravi e Rawa ni Caka

• Vakaraitaka vei ira na gone eso na iyaya (se iyaloyalo ni iyaya) ka rawa ni tu vakadede kei na so e sega, me vaka e dua na ilavo kaukamea kei na dua na tiki ni kakana vuanikau. Tarogi ira na gone se o cei ena dede na kena tu, ka veitalanoataka na vuna e dau rawa ni tu dede kina e so na ka mai na so tale. Wilika na Jeremaia 31:3, ka vukei ira na gone me ra kila ni loloma nei Tamada Vakalomalagi kei Jisu Karisito vei ira e “sa sega ni mudu.”

• Kerei ira na gone me ra wasea na sala e vakaraitaka kina na Tamada Vakalomalagi kei Jisu Karisito na Nodrau “vakadedetaka kina na loloma” vei ira (Jeremaia 31:3). Me soli vei ira na gone na vakasama eso, lagata e dua na sere me baleta na Nodrau loloma me baleti keda, me vaka na “Au Vakilai Koya” se “Rogoca na Sere ni Manumanu” (iVolanisere ni Gonelalai, 42,16). Kevaka e rawa, vakaraitaka na iyaloyalo ni veika e tukuni tiko ena sere. Na cava eda na vakila ni da vakasamataka na loloma nei Tamada Vakalomalagi kei Jisu Karisito?

e vulica tiko na ivolanikalou e dua na goneyalewa

Na ivolanikalou e rawa ni vakauqeti keda me da veivutuni ka gole ki vua na Turaga.

Jeremaia 36:1–4

Na ivolanikalou era sa vosa ni Kalou.

A kaya na Turaga vei Jeremaia me vola na Nona vosa, ka sa maroroi tu vei keda e na iVola i Jeremaia na volavola nei Jeremaia. Vukei ira na gone me ra vakatitobutaka na nodra taleitaka na ivolanikalou, na vanua eda kunea kina na vosa ni Kalou.

iTaviqaravi e Rawa ni Caka

• Sureta e dua na gone me vakatotomuri Jeremaia, kei ira na vo ni gone me ra vakatotomuri Peruki. Vukea na gone e vakatotomuri Jeremaia me tukuna eso na vosa mai na Jeremaia 36:3 me ra qai vakatotomuri Peruki o ira na vo ni gone ni ra matanataka ni ra vola tiko . Vakadinadinataka ni ivolanikalou nikua sa “vosa ni Turaga” (Jeremaia 36:4) ka A kerei ira na parofita me ra vola.

• Vakaraitaka e dua na ivola ni gone kei na dua na ilavelave ni ivolanikalou, ka kerei ira na gone me ra veitalanoataka na duidui era kunea ena kedrau maliwa na ivola ruarua. Na cava e duatani kina na ivolanikalou? Vukei ira na gone me ra kila ni ivolanikalou e vosa ni Kalou era vola na parofita, me vaka ga na iVola i Jeremaia sa ikoya na ka a tukuna na Kalou vei Jeremaia me vola.

Jeremaia 36:4–10

Au rawa ni wasea na veika au sa vulica tiko mai na ivolanikalou.

Sa rawa vei ira na gone me ra veivakayarayarataki vinaka vei ira era tiko voliti ira. Me vakataki Peruki, e rawa ni ra wasea na veika era sa vulica tiko ena ivolanikalou vei ira tale eso.

iTaviqaravi e Rawa ni Caka

• Sureti ira na gone me ra matanataka na veika e salavata kei na vosa ni o wilika na (se vakalekalekataka) Jeremaia 36:4–10, me vaka beka me ra volavola tiko ena dua na ivola (raica na tikina e 4), qumia tiko na bai ni dua na valeniveivesu (raica na tikina e 5), ka wilika tiko na ivolanikalou vei ira na tamata (raica na tikina e 8,10). Vakabibitaka ni a yaloqaqa sara o Peruki me wilika na vosa nei Jeremaia vei ira na tamata e dina ga ni ra a sega ni vinakata na iliuliu mai Jerusalemi me vakayacora vakakina. Vukei ira na gone me ra nanuma e dua na ka era sa vulica mai na Veiyalayalati Makawa ka vakasamataka na sala eso e rawa ni ra wasea kina vei ira na tani.

• Lagata e dua na sere me baleta na ivolanikalou, me vaka na “Vaqaqara ka Masu” (iVolanisere ni Gonelalai, 66). Wasea na nomu ivakadinadina ni ivolanikalou, ka vakauqeti ira na gone me ra kitaka vakakina.

ivakatakilakila ni veivakavulici

Vakavulica na iVunau: Gone Qase Cake

Jeremaia 31:31–34; 32:38–41

Au rawa ni maroroya na noqu veiyalayalati vata kei na Kalou.

Na ivakavuvuli nei Jeremaia me baleta na veiyalayalati vou ka tawamudu ni Turaga e rawa ni vukei ira na gone o vakavulica me ra vakaqaqacotaka na nodra gagadre me ra maroroya na nodra veiyalayalati.

iTaviqaravi e Rawa ni Caka

• Droinitaka e dua na uto ena papa, ka sureta e veimama na gone me ra wilika na Jeremaia 31:31–34 kei na ikarua ni veimama me ra wilika na Jeremaia 32:38–41. Sureti ira na ilawalawa me ra vola e loma ni uto na veika era sa vulica mai na nodra dui tikina me baleta na noda veiyalayalati kei na Kalou. Ni volai tu e yaloda na lawa ni Kalou (raica na Jeremaia 31:33) e duidui vakacava mai na kena wiliki walega na ivolanikalou? Na cava eda vinakata kina me da veiyalayalati vata kei na Turaga? Na cava e vinakata kina o Koya me veiyalayalati vata kei keda?

• Me railesuvi na veiyalayalati eda cakava ena gauna eda papitaiso kina, sureti ira na gone me ra cakava e rua na iyatu ena dua na tiki ni pepa ka tiko kina na ulutaga ni Noqu Yalayala kei na Yalayala ni Kalou. Kerei ira me ra vakalewena na ivolakabi ena nodra vakayagataka na iwase ka kena ulutaga na “Na Veiyalayalati ni Papitaiso” ena Ulutaga Vakosipeli “Papitaiso” (topics.ChurchofJesusChrist.org) se Mosaia 18:10,13; Vunau kei na Veiyalayalati 20:37. Sureti ira na gone me ra vakabira na pepa e vale e na dua na vanua me laurai tiko me vakananuma vei ira me ra maroroya na nodra veiyalayalati.

Jeremaia 36

Na ivolanikalou era sa vosa ni Kalou.

Na itukutuku ena Jeremaia 36 e rawa ni vukei ira na gone me ra vuli mai na nodra ivakaraitaki na tamata era ciqoma na vosa ni Turaga ena ivolanikalou.

iTaviqaravi e Rawa ni Caka

• Vola na taro eso oqo ena papa: Cava na vuna? O cei e vakamareqeta na ivolanikalou? O cei e sega? Wilika vata na Jeremaia 36:1–3, ka tarogi ira na gone na vuna e vinakata kina na Turaga me vola o Jeremaia na Nona vosa. Qai kerei ira na gone me ra cakacaka vata vaka isasa ka wilika na Jeremaia 36:5–8, 20–25 ka vakaraitakase o cei era vakaraitaka ni ra vakamareqeta na ivolanikalou kei ira era sega. Vakamacalataka na vuna o dau vakamareqeta kina na ivolanikalou. Wasea e dua na malanivosa ni ivolanikalou se italanoa e vakaibalebale vakalevu vei iko. Sureti ira na gone me ra veiwasei talega.

• Sureti ira na gone me ra vakayagataka na tabana ni itaviqaravi ni macawa oqo me ra vakatovotovotaka kina na veiwasei vakai ira ena italanoa ena Jeremaia 36. Sureti ira me ra wasea na nodra ivakadinadina ni ivolanikalou ki na kalasi.

Na Lele i Jeremaia 1:1–2,16; 3:22–26

Na iVakabula e a vakavuna me‘u vosoti ena noqu ivalavala ca.

Me vaka e vakamacalataka na ivola ni Lele i Jeremaia vakaserekali, eda dau yalorarawa ni da ivalavala ca. Na veika oqo e rawa ni vakauqeti keda me da veisau ka kerea vua na Tamada Vakalomalagi na veivosoti.

iTaviqaravi e Rawa ni Caka

• Vakamacalataka vei ira na gone ni ena vuku ni nodra sega ni veivutuni na Isireli, sa vakarusai kina o Jerusalemi kei na valetabu. Kerei ira na gone me ra veitalanoataka na veika era na vakila ke ra a bula voli mai Jerusalemi ena gauna o ya. Wilika vata na Lele i Jeremaia 1:1–2,16. Na vosa kei na malanivosa cava ena veitikina oqo ena vukei keda me da kila na veika e rawa ni ra a vakila na Isireli? Ena rawa vakacava ni a solia vei ira na inuinui na itukutuku ena na Lele i Jeremaia 3:22–26?

• Kerei ira na gone me ra vakasamataka e dua na gauna era a rarawataka kina e dua na digidigi ca era a vakayacora. Na cava era kunea ena Lele i Jeremaia 3:22–26 e vukei ira me ra kila ni sa tu vakarau na Turaga me vosoti ira?

ivakatakilakila ni vuli

Vakauqeta na Vuli e Vale

Sureti ira na gone me ra kerei ira na lewe ni nodra matavuvale me ra wasea na veika e baleta na ivakavuvuli o vulica ena kalasi. Me ivakaraitaki, kevaka dou veitalanoataka na ivolanikalou, e rawa ni ra kerea na gone e dua na lewe ni matavuvale me wasea na sala e kila kina okoya ni dina na ivolanikalou.

Vakatoroicaketaki ni Noda Veivakavulici

Me ra vakarorogo na gone. Ena gadrevi beka mo vakasamataka eso na sala vinaka mo vakaitavitaki ira kina na gone sobu. Me ivakaraitaki, vakayagataka na iyaloyalo, sere, qito, kei na itaviqaravi tale eso.

tabana ni itaviqaravi: Na ivolanikalou era sa vosa dina ni Kalou