Na Karisito e dara na isala wavakavotona ka vakalialiai mai vei koya na sotia

Na Veivakalialiai i Karisito, mai vei Carl Heinrich Bloch

26 ni Sepiteba–2 ni Okotova

Aisea 50-57

“E Dina sa Colata ko Koya na Noda Rrarawa, ka Dreketa voli na Yaluma ni Lomada”

Vakasamataka vakatitobu na veivakararamataki mai na Aisea 50–57 e vukei iko mo toro voleka yani vua na iVakabula. Vola na veivakasama o ciqoma.

Vola na Nomu Veivakasama

Ena gauna taucoko ni nona veiqaravi vakalotu, a vosa o Aisea me baleta e dua na Dauveivueti qaqa (raica, me ivakaraitaki, Aisea 9:3–7). Na veiparofisai oqo era na rairai ka talei sara vei ira na Isireli ena vica na senitiuri mai ki muri ni ra a tiko vakavesu mai Papiloni. E dua e rawa ni vaqera na bai kei Papiloni e sa dua dina na tamata qaqa. Ia e sega ni mataqali Mesaia e vakamacalataka tiko o Aisea ena wase e 52–53: “sa beci koya ka biuta ko ira na tamata, sa tamata e daurarawa na lomana, ka sa daukila ka rarawa, ka sa vaka e dua eda sa tabonaka na matada mai vei koya.… Ia eda a vakalewa vua ni sa yaviti ka cudruvi mai vua na Kalou, ka vakararawataki “(Aisea 53:3–4). Ena nona tala mai e dua na dauveisereki sega ni namaki, sa vakavulici keda na Kalou me baleta na veisereki dina. Me vakabulai keda mai na veivakararawataki kei na rarawa, sa tala mai na Kalou e dua ka “sa vakasaurarataki, ka … vakararawataki. ” Ni ra namaka eso e dua na laione, sa qai tala mai o Koya e dua na Lami (raica na Aisea 53:7). Sa dina sara, na sala ni Kalou e sega ni noda sala (raica na Aisea 55:8–9). E vagalalataki keda o Jisu Karisito sega walega ena nona dolava na vale ni veivesu ia ena nona sosomitaki keda kina. E sereki keda mai na noda sinucodo ni rarawa kei na yaluma ena Nona colata sara ga o Koya (raica na Aisea 53:4–5,12). E sega ni vakabulai keda mai na dua na vanua yawa. E rarawa vata kei keda o koya, ena dua na ivalavala ni “loloma sa sega ni mudu” ka na “sega ni takali vei iko” (Aisea 54:8,10).

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Aisea 50-52

Sa ramase na veisiga ni mataka vei ira na tamata ni Turaga.

E dina ga ni ra dau tiko vakavesu na Isireli ena vuqa na yabaki—ka dina ga ni a vu na nodra tiko vakavesu oya mai na nodra digidigi cala—e vinakata na Turaga me ra rai ki na veisiga ni mataka ena inuidei. Na itukutuku nuitaki cava o raica ena Aisea 50–52? Na cava e vakavulica vei keda na Turaga me baleti koya ena veiwase oqo, ka cava na vuna e solia kina vei iko na inuinui oqo? (raica, me ivakaraitaki, Aisea 50:2, 5–9; 51:3–8, 15–16; 52:3, 9–10).

Sa rawa talega mo vola na veika kece ena wase 51–52 ka sureti ira kina na Isireli na Turaga me ra cakava me dina kina na inuinui oqo ena veisiga ni mataka. Na cava o vakila ni sa sureti iko tiko kina na Turaga mo cakava mai na veimalanivosa oqo? Me kena ivakaraitaki, na cava o nanuma ni kena ibalebale me da “yadra” ka “tokara na kaukauwa”? (Aisea 51:9; raica talega na Aisea 52:1; Vunau kei na Veiyalayalati 113:7–10). Na cava o nanuma kina ni veisureti ni “vakarorogo” (se “vakarorogo ki na inaki ni talairawarawa”) e dau tokaruataki wasoma? (Russell M. Nelson, “Rogoci Koya,” Liaona, Me 2020,89).

Raica talega na Mosaia 12:20–24; 15:13–18; 3 Nifai 20:29–46.

ivakatakaarakara ceuti i Karisito ni colata voli na kauveilatai

Ena Vuku ni Loloma, mai vei dauceuceu Angela Johnson

Aisea 53

Ko Jisu Karisito e tauca vei Koya na noqu ivalavala ca, kei na noqu yaluma.

E vica wale na wase ena ivolanikalou e vakamacalataka vakavinaka cake na veiqaravi veivueti i Jisu Karisito mai na Aisea 53. Taura na gauna mo vakasamataka vakatitobu na veivosa oqo. Ena veitikina yadua, tu vakadua mo vakasamataka na ka e sotava na iVakabula—na “rarawa,” “yaluma,” kei na “ivalavala ca” a colata—baleta na tamata kece sara ka vakabibi o iko. E rawa ni o vakaisosomitaka na vosa me vaka o “keda” kei na “noda” ena o “au” kei na “noqu” ni o wilika tiko. Na vakanananu se vakasama cava era vakauqeta vei iko na veitikina oqo? Sa rawa mo vola.

O na vinakata beka mo railesuva na Mosiah 14; 15:1–13 mo raica na nona vakayagataka na parofita o Apinatai na vosa nei Aisea me vakavulica kina me baleta na iVakabula.

Aisea 54; 57:15–19

E vinakati au o Jisu Karisito meu lesu mai Vua.

E dau yaco mai vei keda kece na gauna eda yawa tani kina mai vua na Turaga ena vuku ni noda ivalavala ca se malumalumu. Eso sa sega na nodra inuinui ni ra na vosoti rawa mai Vua. Na Aisea 54 kei na 57 erau wase ni ivola cecere me da wilika me veivakadeitaki ka veivakayaloqaqataki ena gauna vakaoqo. Vakauasivi ena Aisea 54:4–10; 57:15–19, na cava o vulica me baleta na loloma veivueti ni iVakabula kei na Nona nanuma baleti iko? Na duidui cava e yaco ena nomu bula ena nomu kila na veika oqo me baleti Koya?

Ena yaga vakacava vei iko na veivakalougatataki e vakamacalataki ena Aisea 54:11–17?

Aisea 55-56

Na Turaga e sureti keda kece me da “taura matua na noqu veiyalayalati.”

Ena veitabatamata, era kilai kina na Isireli me ra tamata ni veiyalayalati ni Kalou. Ia, na ituvatuva ni Kalou sa dau okati kina e sivia na dua ga na matanitu, ni “o ira kecega sa viagunu” era sureti me ra “lako mai…ki na wai ”(Aisea 55:1). Mo nanuma tiko oqo ni ko wilika na Aisea 55 kei na 56, ka vakasamataka vakatitobu na kena ibalebale me da tamata ni Kalou. Na cava na nona itukutuku na Kalou vei ira era dau “tawase tani” mai vua? (Aisea 56:3). Navuca mo toqa na veitikina e vakamacalataka na ivakarau kei na ivalavala era dau “taura matua kina na noqu veiyalayalati” (raica na Aisea 56:4–7).

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Aisea 51–52.Ni o veivosakitaka na veisureti ni Turaga ena veiwase oqo, sa rawa mo sureti ira na lewe ni matavuvale me ra matanataka. Me vakataka, na cava na kena irairai mo “vagolea na matamu ki lomalagi,” “yadra, tucake,” se “kuretaki iko mai na kuvu-ni-soso”? (Aisea 51:6,17; 52:2). Na cava e vakavulica vei keda na veimalanivosa oqo me baleta na muri Jisu Karisito?

Aisea 52:9.Ni wiliki oti na tikina oqo, sa rawa ki na nomu matavuvale me “lagata vata” e dua na serenilotu se sere ni gone e kauta mai na reki. Na yalayala cava ena Aisea 52 e vakavuna me da “vakasinaiti ena reki”?

Aisea 52:11; 55:7.Na veitikina oqo e rawa ni vakavuna e dua na veivosaki me baleta na ibalebale ni malanivosa “Mo dou savasava.” Me tiki ni veivosaki oqo, sa rawa mo railesuva na ulutaga eso ena Me iSakisaki ni iTabagone (ivolalailai, 2011) se wilika na ivolanikalou me baleta na veivakalougatataki ni tiko savasava vakayalo (raica na 3 Nifai 12:8; Vunau kei na Veiyalayalati 121:45–46).

Aisea 53.Me vakaveikilaitaki na ivakamacala nei Aisea me baleta na iVakabula, e rawa ni ra veivosakitaka nomu matavuvale na kedra dau vakatayaloyalotaki na tamata qaqa era dau vueti ira na tamata ena italanoa, iyaloyalo, kei na so tale na tabana vakaitukutuku. E rawa ni o veidutaitaka vata na ivakaraitaki oqori kei na ivakamacala ni iVakabula o wilika ena Aisea 53. E rawa talega ni o sarava na vidio “Na Noqu Matanitu e Sega ni Vakavuravura” (ChurchofJesusChrist.org) ka veivosakitaka na sala a yaco kina na parofisai ena Aisea 53 . Na cava eso na rarawa kei na yaluma ni iVakabula e tu vei keda?

Aisea 55: 8–9.E duidui vakacava na irairai ni veika ni ko sa yawa mai na dela ni qele? Na cava na kena ibalebale vei iko ni ivakarau ni Kalou kei na vakanananu e cecere cake mai na noda?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Loloma i Jisu,” Sere ni Lotu, naba 110.

Vakavinakataki ni Vuli Yadudua

Vakayagataka na sere ivakatagi. Na serenilotu edau mana vakalevu ni vakavulica na ivakavuvuli ni kosipeli. Vakasamataka mo vakarogoca se wilika na sere ni sakaramede me vukei iko mo kila vakavinaka na dina baleta na Veisorovaki i Jisu Karisito ka vakavuvulitaki ena Aisea 53. (Raica na Veivakavulici ena iVakarau ni iVakabula, 22.)

itaba kei Jisu Karisito

Nona Rarama, mai vei Michael T. Malm