Na Tagi nei Jeremaia na Parofita, mai na dua na ceuceu ni Nazarene School

17–23 ni Okotova

Jeremaia 30–33; 36; Na Lele1; 3

“Ia Au na Vukica na Nodra Tagi Me Ra Reki”

Ni o vola na veika o vakauqeti kina, vakasamataka na kena semati tiko na ivakavuvuli oqo i Jeremaia kei na Lele ki na veika tale eso o sa vulica ena Veiyalayalati Makawa.

Vola na Veika o Vakauqeti kina

Ena gauna a kacivi Jeremaia kina ena imatai ni gauna na Turaga me dua na parofita, a tukuna vua ni nona ilesilesi oya me na “cavuta laivi, ka basuka” (Jeremaia 1:10)—ia mai Jerusalemi, sa levu sara na ca me cavuta laivi ka basuka. Ia oqo a dua walega na tiki ni ilesilesi i Jeremaia—a kacivi talega “me tara, ka tea” (Jeremaia 1:10). Na cava e rawa ni tara se teivaki ena vanua vakarusai ena nona a veisaqasaqa o Isireli? Sa vakakina, ni sa biuta tu mai vakaca na noda bula na ivalavala ca se veika dredre, ena rawa vakacava me da tara cake tale ka teivaka vou? Na kena isau e tiko ena “Coke yalododonu” (Jeremaia 33:15), na Mesaia sa yalataki tu. Na Mesaia e kauta mai “e dua na veiyalayalati vou” (Jeremaia 31:31)—e dua ka gadrevi vakalevu cake mai na kena e vakarairai ga se na irairai vakayago ni yalodina. Na Nona lawa sa dodonu me tiko “e [lomada],” ka volai “ena [yaloda].” Oya na ibalebale dina ni Turaga e sa “sa [noda] Kalou” kei keda me da sa “[Nona] tamata” (Jeremaia 31:33). Oqo e dua na ivakarau ni bula taucoko, ka da na caka cala tikoga ka na tiko na gauna eda na yalo rarawa voli kina. Ia ni yaco vakakina, sa na tiko vei keda na yalayala oqo mai vua na Turaga: “Ia au na vukica na nodra tagi me ra reki” (Jeremaia 31:13).

Me baleta na railesuvi ni Lele, raica na “Lamentations,Bookof” ena iDusidusi ki na iVolanikalou (scriptures. ChurchofJesusChrist.org).

Vakasama Eso ni Vuli iVolanikalou ni Tamata Yadua

Jeremaia 30–31; 33

Na Turaga ena kauti ira tani na Isireli mai na veivakabobulataki ka vakasokumuni ira.

Ena Jeremaia 30–31; 33 a vakaraitaka na Turaga ni ra na “qoqolou, kei na tagi levu” (Jeremaia 31:15) o ira na Isireli ena nodra na kau vakavesu. Ia, a cavuta talega o Koya na vosa ni veivakacegui kei na inuinui. Na malanivosa cava ena iwase oqo o nanuma ni na solia beka vei ira na Isireli na vakacegu kei na inuinui? Na yalayala cava soti o kunea mai vua na Turaga kivei ira na nona tamata? Ena rawa vakacava me vakaibalebale talega vei iko na yalayala oqo?

Jeremaia 31:31–34; 32:37–42

“Ia kau na yaco meu nodra Kalou, ka ra na yaco ko ira me ra noqu tamata.”

E dina ga ni ra a voroka na Isireli na nodra veiyalayalati kei na Turaga, a parofisaitaka o Jeremaia ni na tauyavutaka tale na Turaga e dua na veiyalayalati “vou” ka “veiyalayalati tawamudu” vata kei ira na Nona tamata (Jeremaia 31:31; 32:40). Na veiyalayalati vou ka tawamudu sa ikoya na “taucoko ni kosipeli i Jisu Karisito [raica na Vunau kei na veiyalayalati 66:2]. E sa ka vou ena veigauna kece e vakatakilai vou kina ni oti e dua na gauna ni vukitani. E sa tawamudu ena kena vakasama ni sa veiyalayalati ni Kalou ka dau marautaki ena itabagauna yadua kece sara ni kosipeli ka ra a tu vakarau kina na tamata me ra ciqoma” (iDusidusi ki na iVolanikalou, “New and Everlasting Covenant,” scriptures.ChurchofJesusChrist.org; vakuri ena matanivola kala).

Ni o wilika na Jeremaia 31:31–34; 32:37–42, vakasamataka vakatitobu na kena ibalebale vei iko mo tiki ni tamata veiyalayalati ni Kalou. E vukea vakacava na vei tikina oqo na nomu raica na nomu veiwekani ni veiyalayalati kei na Kalou? Na cava na kena ibalebale me volai tu e yalomu na Nona lawa? (raica na Jeremaia 31:33).

Raica talega na Jeremaia 24:7; Iperiu 8:6–12.

Na ivolanikalou e rawa ni vakauqeti keda me da veivutuni ka gole ki vua na Turaga.

Jeremaia36

Na ivolanikalou e tu kina na kaukauwa me vakagolei au tani mai na veika butobuto.

A vakaroti Jeremaia na Turaga me vola na nona parofisai ena “dua na ivola vivigi,” se ivola cowiri, a vakamacalataka ni kevaka era na rogoca na tamata na parofisai oqo, “era na rogoca beka … mera dui lesu kina ko ira yadua mai na nona sala ca; ia meu bokoca kina na nodra caka cala” (Jeremaia 36:2–3). Ni o wilika na Jeremaia36, raica kina na nodra nanuma o ira na tamata oqo me baleta na parofisai oqo:

Na Turaga:

Jeremaia:

Peruki:

Jiutai kei Tui Jioiakimi:

Elinecani, Tilaia, kei Kimaraia:

Vakasamataka vakatitobu na veika me baleta na ivolanikalou kei na kedra itavi ena nomu bula. Era sa vukei iko vakacava mo gole tani mai na ca?

Raica talega na Julie B. Beck, “Na Yaloqu sa Rekitaka na iVolanikalou,” Ensign se Liaona, Me 2004, 107–9.

Na Lele1; 3

Na Turaga e rawa ni kauta laivi na rarawa eda sotava ena vuku ni ivalavala ca.

Na ivola ni Lele sa ikoya na soqoni vata ni serekali a volai ni sa vakarusai oti o Jerusalemi kei na kena valetabu. Na cava na vuna o nanuma kina ni sa rui bibi na kena a maroroi na lele oqo ka okati ena Veiyalayalati Makawa? Raica na vosa vakaibalebale ena Lele1 kei na3 me vukei iko mo kila vinaka kina na rarawa levu a vakila o Isireli. Na itukutuku cava ni inuinui vei Karisito o kunea? (raica vakabibi na Lele 3:20–33; raica talega na Maciu 5:4; Jemesa 4:8–10; Alama 36:17–20).

Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Jeremaia 31:3E rau sa vakaraitaka vakacava na Tamada Vakalomalagi kei Jisu Karisito na Nodrau “loloma sa sega ni mudu” kivei keda? Na vakaraitaki ni iyaloyalo ni veika a bulia na Karisito vei keda se na veika a vakayacora ena Nona veiqaravi voli vaka tamata ena vukea na nomu matavuvale me dou vakila na Nona “yalololoma.”

Jeremaia 31:31–34; 32:38–41.Vakasamataka mo vola na veika eso ena vei tikina oqo e sa yalataka tu na Turaga ni da veiyalayalati vata kei Koya. Na cava era vakavulica vei keda na vei tikina oqo me baleta na bibi ni noda veiyalayalati?

E rawa talega ni ratou vola na lewe ni matavuvale (se droinitaka) ena pepa ka ivakatakarakarataka ni uto na veika e ratou nanuma me baleta na iVakabula. Na cava na kena ibalebale me volai tu e yaloda na Nona lawa? (raica na Jeremaia 31:33). Eda na vakaraitaka vakacava vua na Turaga ni da vinakata me da Nona tamata?

Jeremaia36.O na vakayagataka vakacava na Jeremaia36 me vukea na nomu matavuvale me ratou vulica na bibi ni ivolanikalou? (raica, me ivakaraitaki, tikina e 1–6, 10, 23–24, 27–28,32). Sa rawa mo kerea e dua na lewe ni matavuvale me wilika e dua na tikina mai na wase oqo ka me qai vola sara e dua tale na lewe ni matavuvale, me vaka a cakava o Peruki vei Jeremaia. Na cava na vuna eda vakavinavinakataka kina na nodra sasaga na tamata me vakataki Peruki, ka a maroroya na nodra vosa na parofita? Na cava eda na rawa ni cakava me da vakaraitaka kina vua na Turaga ni da sa dau vakamareqeta na Nona vosa ena ivolanikalou?

NaLele 3:1–17, 21–25, 31–32.Vakamatavuvale, sa rawa mo dou veitalanoataka na vei nanuma e tukuni tiko ena Lele 3:1–17 ka rawa ni semati ki na veika eda vakila ni da vakayaco ivalavala ca. E rawa vakacava me veivakauqeti ki na noda bula na itukutuku era tiko ena tikina e 21–25, 31–32 ?

Me ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere e vakaturi: “Au Vakilai Koya,” iVolanisere ni Gonelalai, 42–43.

Vakavinakataki ni Vuli ni Tamata Yadua

Vakasaqara na ivakatakila Ni ko vakasama vakatitobu ena siga taucoko, ena rawa ni o ciqoma eso tale na ikuri ni vakasama kei na nanuma eso me baleta na ivolanikalou o sa vulica. Mo kakua ni raica na vulici ni kosipeli me dua na ka mo solia kina na nomu gauna ia mo raica me vaka e dua na ka mo na dau cakava tikoga. (Raica na Veivakavulici ena iVakarau ni iVakabula, 12.)

E Lelevaka o Jeremaia na Vakarusai nei Jerusalemi, mai vei Rembrandt van Rijn