Jeremaia, mai vei Walter Rane

10–16 ni Okotova

Jeremaia 1–3; 7; 16–18; 20

“Bera Niu Buli Iko ena Kete Au sa Kilai Iko”

O Elder David A. Bednar a kaya: “E dua vei ira na sala au rogoca kina [na Turaga] sa ikoya ena ivolanikalou. Na ivolanikalou sa ikoya na domo katoni ni Turaga (“‘Mo Rogoci Koya’ e Yalomu kei na Nomu Vakasama,” ChurchofJesusChrist.org).

Vola na Veika o Vakauqeti kina

Taumada, a nanuma o Jeremaia ni na sega ni parofita vinaka. “Raica, ka’u sa sega ni kila vosa,” a kudruvaka ni sa kacivi koya ena imatai ni gauna na Turaga (Jeremaia 1:6). Sa qai vakadeitaka vua na Turaga, “Ka’u sa tauca na noqu vosa ki na gusumu” (tikina 9). A nanuma o Jeremaia ni o koya e dua na “gone” tawakila-ka (tikina6), ia a vakamacalataka na Turaga ni sa vakarau vaka vinaka sara tu ga o koya dina ga ni sega ni nanuma vakakina—e a tabaki ena veikacivi oqo ni sa bera ni sucu mai (raica na tikina e5). Sa qai biuta vakatikitiki o Jeremaia na nona rere ka ciqoma na veikacivi. A vakasalataki ira na tui kei na bete i Jerusalemi ni na sega ni vakabulai ira mai na veivakarusai na nodra savasava vakarairai. Na “gone” ka a nanuma ni sega ni rawa ni vosa sa mai vakila na vosa ni Kalou “e [lomana] me vaka na bukawaqa” ka sega ni rawa me galu (Jeremaia 20:9).

Na italanoa kei Jeremaia sa noda italanoa talega. A kilai keda talega na Kalou, ni bera ni da sucu mai ka vakarautaki keda me da vakayacora na Nona cakacaka e vuravura. Ena maliwa ni veika tale eso, na cakacaka o ya e oka kina e dua na ka a raica taumada o Jeremaia: na nodra vakasokomuni na tamata ni Kalou, vakayadudua, me na “kauti [ira] mai ki Saioni” (Jeremaia 3:14). Kevaka mada ga eda sega ni kila vinaka na ka me da cakava se tukuna, e dodonu me da “kakua ni rere…; ni’u sa tiko vata kei iko, sa kaya ko Jiova ”(Jeremaia 1:8, 19).

Me railesuvi na ivola i Jeremaia, raica na “Jeremiah” ena Bible Dictionary.

Vakasama ni Vuli iVolanikalou ni Tamata Yadua

Jeremaia 1:4–19; 7:1–7; 20:8–10

Era kacivi na parofita me ra vosataka na vosa ni Turaga.

Ni o wilika na Jeremaia 1:4–19 me baleta na nona kacivi o Jeremaia me parofita, vakasamataka vakatitobu na nodra ilesilesi na parofita ki na nomu bula. Na cava o vulica me baleti ira na parofita mai na vosa ni Turaga vei Jeremaia? (raica talega na Jeremaia 7:1–7). E vunau nei Jeremaia e a sega ni dau ciqomi vakawasoma (raica na Jeremaia 20:8,10). Na cava o sa vulica mai na vosa nei Jeremaia ena Jeremaia 20:9? Mo nanuma tiko na vakasama oqo ena gauna taucoko ni nomu vulica na ivakavuvuli nei Jeremaia. Na cava o raica ena veivakavuvuli oqo e vakauqeti iko mo muri ira na parofita e daidai?

Jeremaia 1:5

Sa kilai au tu na Kalou ni bera ni’u qai sucu mai.

Ni bera ni qai sucu mai o Jeremaia, a sa kilai koya tu na Kalou ka digitaki koya, se lesi koya, me qarava e dua na itavi bibi e vuravura (raica na Jeremaia 1:5). Na cava o nanuma ni bibi kina me kila o Jeremaia na veika oqo?

Sa kilai iko talega na Kalou ni bera ni o qai sucu mai ka sa digitaki ka tabaki iko me baleta na nomu itavi bibi (raica na Alama 13:1–4; Vunau kei na Veiyalayalati 138:53–56; Eparaama 3:22–23). Na duidui cava e rawa ni vakayacora na kilaka oqo ena nomu bula? Kevaka o sa ciqoma oti na nomu veivakalougatataki vakapeteriaki, sa rawa mo railesuva ena masumasu ka taroga vua na Kalou na sala me rawati kina na veika sa lesia oti tu vei iko mo vakayacora.

Raica talega na Ulutaga Vakosipeli, “Lesi Oti Tu,” “Bula Taumada,” topics.ChurchofJesusChrist.org.

Era a dau vakayagataka na tamata e Isireli ena gauna makawa na itoniwai me ra maroroi wai vakamareqeti kina.

Jeremaia2; 7

“Era sa biuti au na mataniwai bula.”

Ena vanua dravuisiga era vakaitikotiko kina na Isireli, era dau maroroya na tamata na wai talei e lomaniqele ena kedra qara e vakatokai na itoniwai. Na cava na vuna ena vinaka cake kina na tauri ni wai mai na dua na mataniwai mai na vakararavi ki na dua na itoniwai? Na cava na kena ibalebale me biuta “na mataniwai bula”? Na cava o nanuma e rawa ni vakatakarakarataka na “keliniwai kaca” e tukuni ena Jeremaia 2:13 ? Ni o wilika na Jeremaia2 kei na7, raica na sala era a biuta kina na tamata na wai bula ni Turaga, ka vakasamataka na sala o sa ciqoma tiko kina na wai bula ena nomu bula.

NaJeremaia7 e tukuna tiko vei ira na curuma yani “na matamata ni koro ni vale i Jiova … me soro vei Jiova ” (Jeremaia 7:2). Ia e dina ga ni tu na irairai ni yalodina, era a cala vakalevu sara (raica na tikina e 2–11). Na itukutuku cava o nanuma ni sa tiko vua na Turaga me solia vei iko ena tikina e 21–23?

Jeremaia 3:14–18; 16:14–21

Na Turaga ena vakasokomuni ira na Nona tamata.

Ena gauna a parofisaitaka kina o Jeremaia na nodra vakasokomuni mai na Isireli ka ra sa veiseyaki tu, a kaya ni na levu cake sara na kena sasaga ni vakatauvatani ki na Lako Yani mai Ijipita (raica na Jeremaia 16:14–15). Ena yalo vata ga, a kaya kina o Peresitedi Russell M. Nelson: “O a talai mai ki vuravura ena gauna sara ga oqo … mo vukea na kena vakasokomuni o Isireli. E sega tale ni dua na ka e caka tiko ena vuravura ena gauna sara ga oqo me bibi cake mai na [vakasokomuni] oya. … Na sokomuni oqo e dodonu me vakaibalebaletaka na veika kece vei iko” (RussellM. Nelson kei WendyW. Nelson, “iNuinui kei Isireli” [lotu e vuravura raraba ni itabagone, Jiune3, 2018], ikuri ki na New Era kei na Ensign, Oko. 2018,12, ChurchofJesusChrist.org).

Ni o vulica na Jeremaia 3:14–18; 16:14–21, na cava e vakauqeti iko me baleta na vakasokomuni vata ni Isireli edaidai? Na cava e vakatututaka na veitikina oqo me baleta na kena yaco na vakasokomuni vata oqo? Na ikuri ni veivakararamataki cava o kunea ena vo ni itukutuku nei Peresitedi Nelson ka tukuni toka e cake?

Vei Vakasama Me Baleta na Vuli iVolanikalou Vakamatavuvale kei na Lotu Vakamatavuvale

Jeremaia 1:5.E rawa ni o vakayagataka na tikina oqo me veitalanoataki kina na noda bula vata kei na Tamada Vakalomalagi ni bera ni da sucu mai. Na ivurevure me vaka na “Mai Lomalagi Daru a Daubula Kina” (iVolanisere ni Gonelalai,4) kei na “iVakamacala Taumada: Na iTuvatuva nei Tamada Vakalomalagi” (ena iTalanoa ni Veiyalayalati Vou, 1–5) e rawa ni veivuke. Ena tara vakacava na ivakarau ni noda bula vakayago na noda kila na noda bula taumada?

Jeremaia 2:13; 17:13–14.Me vukei ira na lewe ni matavuvale me ra raitayalotaka na veitikina oqo, sa rawa mo vakaraitaka na ka ena yaco ni ko sa biuta na wai ena dua na koniteina e kaca se sa kavoro tu. Na cava e rawa ni matataka na “mataniwai bula” kei na “keliniwai kaca”? (Jeremaia 2:13). Eda na gunu vakacava mai na wai bula ni Turaga?

Jeremaia 16:16.E vakatauvatana o Peresitedi Russell M. Nelson o ira na gonedau kei na dauvakasasa ena tikina oqo kivei ira na daukaulotu edaidai (raica na “Vakasoqoni o Isireli sa Veiseyaki,” Ensign se Liaona, Nove. 2006, 81). Sa rawa vei ira na lewe ni matavuvale me ra “vakasaqara” na iyaya e tu e vale ka veitalanoataka na sala e rawa ni o vukea kina na kedra “siwati” ka “vakasasataki” o ira na Isireli era sa veiseyaki tu.

Jeremaia 18:1–6.Me vakadikevi na veitikina oqo, sa rawa me veitalanoataki se vakaraitaki na ivakarau ni tuli kuro. Na itukutuku cava e tu vua na Turaga me baleti Isireli ena Jeremaia 18:1–6? Na cava na kena ibalebale me da tete ena liga ni Turaga? (raica talega na Aisea 64:8). Me baleta e dua tale na italanoa e vakatauvatani keda ki na tete nei dautuli kuro, raica na vosa nei Elder Richard J. Maynes “Na Rekitaki ni Bula sa Va-Karisito” (Ensign se Liaona, Nove. 2015, 27–30).

Me ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Isireli Bau Rogoca,” Sere ni Lotu, naba 6.

Vakatoroicaketaki na Noda Veivakavulici

Vakayagataka na vei italanoa eso. E dau veivakavulici vakawasoma na iVakabula ena vakayagataki ni italanoa. Vakasamataka eso na italanoa mai na nomu bula ka na rawa ni vakabula mai e dua na ivakavuvuli ni kosipeli. (Raica na Veivakavulici ena iVakarau ni iVakabula, 22.)

“Raica me vaka na tete ena liga i koya na dautuli kuro, sa vakakina koi kemudou e na ligaqu, na mataqali i Isireli” (Jeremaia 18:6).