E liutaki ira na sipi o Jisu

Lako Mai, Mo Muri Au, mai vei Scott Sumner

24–30 ni Okotova

Isikeli 1–3; 33–34; 36–37; 47

“Au na Biuta e Lomamudou Na Yalo Vou”

A sureti o Isikeli me “kania” vakaitakarakara na vosa ni Kalou—me vakasinaiti koya kina (raica na Isikeli 2:9–3:3, 10). O na vakasinaiti iko vakacava ena vosa ni Kalou ena macawa oqo?

Vola na Veika o Vakauqeti kina

O Isikeli e a parofita ka a kau tani vakaukauwa mai na nona vanua. O koya kei ira eso tale na Isireli, era a vesu ka vakau ki Papiloni ni vo toka e vica na yabaki me qai vakarusai kina vakadua o Jerusalemi. Mai Jerusalemi, e na dua beka vei ira na bete veiqaravi ena valetabu o Isikeli. E Papiloni, e a dua vei “ira era bobula,” ka “tiko ena yasana era sa tiko kina” (Isikeli 3:15), e drau vakacaca na maile mai na valetabu ka sa lailai na inuinui ni na lesu tale ki na vale lomani ni Kalou. E na dua na siga a qai raivotu o Isikeli. A raica “na ukuuku i Jiova” (Isikeli 1:28)—a sega ni raica ena valetabu mai Jerusalemi ia e a raica saraga e Papiloni ena kedra maliwa na kau tani mai vakaukauwa mai na nodra vanua. Na ivalavala butobuto mai Jerusalemi, sa kila rawa o koya, e sa ca sara vakalevu ka sa yali mai kina na iserau ni Kalou (raica na Isikeli 8–11; 33:21).

E dua na itavi nei Isikeli o ya me vunauci ira na Isireli me baleta na veika era na sotava kevaka era na veisaqasaqa—na ivakaro a sega sara ga ni rogoci. Ia a sega ni o koya ga o ya na itukutuku nei Isikeli: a parofisaitaka, se vakacava sara na levu ni ca e yaco, sa tiko e dua na sala lesu. Kevaka era na ciqoma na tamata ni Kalou na veisureti me ra “rogoca na vosa i Jiova” (Isikeli 37:4), na veika a mate e liu era na vueti. Na “yalo vatu” ena rawa me sosomitaki ena “dua na yalo vou” (Isikeli 36:26). “[Au] na solia talega na yaloqu vei kemudou,” a kaya vei ira na Turaga, “ka dou na bula” (Isikeli 37:14). Ia ena iotioti ni gauna, ena tauyavutaka na Turaga e dua na valetabu vou kei na Jerusalemi Vou, “ia na yaca ni koro mai na siga ko ya, Sa Tiko mai Kina ko Jiova” (Isikeli 48:35).

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Isikeli 1–3

“Vosataka na noqu vosa.”

Na wiliki ni veikacivi vei Isikeli ki na cakacaka vakalotu ena Isikeli 1–3 ena rawa ni vakauqeti iko mo vakasamataka na veimadigi eso sa solia vei iko na Kalou mo “vosataka na [Nona] vosa” vei ira na tani (Isikeli 3:4). Ena Isikeli 2–3, o na raica kina na Nona vosa ni veivakayaloqaqataki kei na veidusimaki vei Isikeli. E dina ga ni ra sega ni dau veisaqasaqa na tamata o dau qarava me vakataki ira na tamata i Isikeli, raica na sala e tara kina na nomu veiqaravi ena Lotu, e vale, kei na veivanua tale eso na vosa ni Kalou vei Isikeli.

Raica talega na Isikeli 33:1–9; D. Todd Christofferson, “A Domo ni iVakasala,” Ensign se Liaona, Me 2017, 108–11.

Isikeli 33:10–19

Na Turaga e vinakata me veivosoti.

“Ia na noda … ivalavala ca sa saumi vei keda,” era sa vakataroga na Isireli era tiko bobula,“eda na qai bula tale vakaevei? ” (Isikeli 33:10). Me kena isau, a vakavulica na Turaga vei ira na dina bibi me baleta na veivutuni kei na veivosoti. Na taro eso oqo ena rawa ni vukei iko mo vakasamataka vakatitobu na dina oqori:

• Na cava o nanuma ni ibalebale ni “vakararavi ki na [nomu] ivalavala dodonu”? (raica na Isikeli 33:12–13).

• Na cava o na kaya vua e dua e nanuma ni tamata ivalavala dodonu kei na tamata ivalavala ca e vakamacalataki tiko ena Isikeli 33:12–19 era a sega ni qaravi vakadodonu? (raica talega na Maciu 21:28–31; Luke 18:9–14).

• Na malanivosa cava o raica ena veitikina oqo ena vukei iko mo kila vinaka na ibalebale ni veivutuni? Na ikuri ni veivakararamataki cava o raica ena Isikeli 36:26–27 kei na Alama 7:14–16?

Isikeli34

E veisureti na iVakabula me‘u vakani ira na Nona sipi.

Ena Isikeli34, sa vakatoka na Turaga vei ira na iliuliu ni Nona tamata me ra sa “ivakatawa.” Ni o wilika, vakasamataka na cava e tukuna tiko vei iko na ulutaga oqo me baleta na ibalebale ni dua na iliuliu. O cei na “sipi” e vinakata na Turaga mo vakania? O na muria vakacava na ivakaraitaki ni iVakabula ni sa noda ivakatawa? (raica na tikina e 11–31).

Raica talega na Joni 21:15–17.

na vanua dravuisiga kei na Wasawasa Mate

A raica ena raivotu o Isikeli e dua na uciwai ni drodro mai na valetabu ka vakabula na Wasawasa Mate.

Isikeli37

Sa vakasoqoni ira tiko na Nona tamata na Turaga ka solia vei ira na bula vou.

Na vakasokomuni nei Isireli e vakatakarakarataki tiko ena Isikeli37 ena rua na ivakatakilakila. Ni o wilika na kena imatai—era sa vakabulai na sui ni tamata mate (raica na tikina e 1–14) — vakasamataka vakatitobu na veika o vulica me baleta na vakasokomuni nei Isireli ena yasa ruarua ni ilati (raica talega na Isikeli 36:24–30).

Na ikarua ni ivakatakilakila (raica na tikina 15–28) e tiko kina e rua na kau, ka vuqa na kenadau era vakadewataka ni papa kau ni volavola e semati ena idji. Na ititoko nei Juta e rawa ni matataka na iVolatabu (me vaka ni voleka ni iVola Tabu taucoko era a vola na kawa i Juta), kei na ititoko nei Josefa e rawa ni matataka na iVola i Momani (me vaka ni matavuvale nei Liai era kawa nei Josefa mai Ijipita). Ena vakasama oqori, na cava e vakavulica vei iko na veitikina oqo me baleta na itavi ni ivolanikalou ena nodra vakasokomuni na Isireli? Na cava e vakuria ki na nomu kila na 2 Nifai 3:11–13? (e dua na parofisai me baleti Josefa Simici kei na iVola i Momani)

Raica talega na 2 Nifai 29:14; “The Book of Mormon Gathers Scattered Israel” (vidio, ChurchofJesusChrist.org).

ivakatakilakila ni vuli vakamatavuvale

Na Veivakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Isikeli 33:1–5.Me vakamatatataki na veitikina oqo, sa rawa vua e dua na lewe ni matavuvale me “ivakatawa” ena nona rai yani e katubaleka ka vakaraitaka ki na vo ni matavuvale na veika e yaco tiko e tautuba. E noda ivakatawa vakacava na noda parofita bula?

Isikeli 33:15–16.Na cava e vakavulica vei keda na veitikina oqo me baleta na veivosoti eda rawa ni ciqoma mai vei Jisu Karisito?

Isikeli 36:26–27.Vakaraitaka ki na nomu matavuvale eso na vatu ni dou veitalanoataka na ibalebale ni noda “yalo vatu.” Me ratou vakatura na vei vosa e vakamacalataka na “loma vou” kei na “yalo vou” sa solia vei keda na iVakabula (raica na Mosaia 3:19; 5:2).

Isikeli 37:15–28.Era rawa ni vakasaqara mai o iratou na lewe ni nomu vuvale e rua na ititoko ka vola ena dua Vei Juta (iVolatabu) kei na kena ikarua Vei Josefa (iVola i Momani) (raica na tikina e 16–19). Oti me ratou qai wasea na italanoa se ivolanikalou mai na iVola Tabu kei na iVola i Momani ka na vukei iratou me ratou vakila ni ratou sa voleka ki vua na iVakabula ka yaco me ratou “[Nona] tamata” (tikina23).

Isikeli 47:1–12.Na veitikina oqo e vakamacalataka na raivotu nei Isikeli me baleta na wai e drodro mai na valetabu ka vakabula na Wasawasa Mate—e dua na wasawasa tuituina sara ka sega ni rawa ni ra bula kina na ika kei na kau. Era na taleitaka beka na gone me ra droinitaka e dua na iyaloyalo ni raivotu oqo. Na cava e rawa ni vakatakarakarataka na wai e drodro mai na valetabu? (raica na vidio “And the River Will Grow,” ChurchofJesusChrist.org). E veivuke vakacava na valetabu me vakabulai keda? (raica na Isikeli 47:8–9, 11).

Me ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Talei Vua na i Vakatawa,” Sere ni Lotu, naba 130.

Vakatoroicaketaki Ni Noda Veivakavulici

Kakua ni saga mo qarava taucoko. O na sega ni na rawa ni dikeva taucoko na vei dina kece sara ena Isikeli kei na nomu matavuvale. Vakasaqara na veidusimaki vakayalo mo vakadeitaka na veika mo vakanamata kina. (Raica na Veivakavulici ena iVakarau ni iVakabula, 7.)

na iyaloyalo ni uciwai e drodro mai na valetabu

“Raica, sa dua na wai sa dave yani mai na ruku ni lago ni vale .… Ia ena yaco na ka kece sa bula ka lako voli ena tikina kece sa yaco kina na uciwai “(Isikeli 47:1, 9). Na iyaloyalo e vakayagataki ena laiseni mai na shutterstock.com.