Sa Vakadewataka o Taniela na iBalebale ni Tadra nei Nepukanesa, mai vei Grant Romney Clawson

31 ni Okotova–6 ni Noveba

Taniela 1–6

“E Sega ni Dua Tale na Kalou e Rawa ni Veivakabulai”

E vakamacalataka o Elder Richard G. Scott ni kena volai tiko na veivakauqeti “e ivakaraitaka ki vua na Kalou ni Nona itukutuku e sa ka tabu sara vei keda. Na kena volai ena vakaukauwataka talega na noda rawa ni vakalesuya mai na ivakatakila” (“Na Sala Mo Taura Kina na iVakatakila kei na Veivakauqeti ni Nomu Bula,” Ensign se Liaona, Me 2012, 46).

Vola na Veika o Vakauqeti kina

Ena rairai sega sara ni dua me na tauri iko ka viritaki iko ki na dua na lovo bukawaqa se dua na qara ni laione baleta na nomu vakabauti Jisu Karisito. Ia e sega ni dua vei keda e na lako curuma na bula oqo ka na sega ni na vakatovolei na nona vakabauta. Eda rawa ni kune vinaka mai na nodratou ivakaraitaki o Taniela, Setareki, Mesaki, kei Apeti-niko, e ratou a cauravou kau vakavesu mai ki na Matanitu o Papiloni (raica na 2 Tui 24:10–16). O iratou na itabagone oqo a vakavolivoliti ena dua na itovo sega ni matau ka duidui na kedra yaga, ka ratou a sotava na veitemaki levu me ratou biuta tani na nodra vakabauta kei na itovo dodonu. Ia eratou a dinata tikoga na nodratou veiyalayalati. Me vakataki Josefa e Ijipita kei Esiteri mai Perisia, e ratou a maroroya o Taniela kei iratou na nona itokani mai Papiloni na nodratou vakabauta na Kalou, a qai cakacaka mana kina na Kalou ka ra vakauqeti tikoga kina na tamata vakabauta me yacova mai na siga oqo.

E ratou a kunea vakacava na kaukauwa me ratou yalodina tikoga kina? E ratou a vakayacora na veika lalai ka rawarawa e kerea tiko na Kalou vei keda kece me da cakava—o ya na masumasu, lolo, digitaki ni itokani vinaka, nuitaka tiko na Kalou, ka vu ni rarama vei ira na tani. Ni da sa vakaqaqacotaki ena noda vakayacora na veika lalai ka rawarawa vaka oqo, eda na rawa ni sotava na laione kei na lovo bukawaqa ena noda bula ena vakabauta.

Me railesuvi na ivola i Taniela, raica na “Daniel, bookof” ena Bible Dictionary.

Vakasama ni Vuli iVolanikalou ni Tamata Yadua

Taniela1; 3; 6

Au rawa ni vakanuinui ki vua na Turaga ni vakatovolei na noqu vakabauta.

Ena dua na vakasama, eda sa bula kece tiko mai Papiloni. Na vuravura e voliti keda e vakasinaiti tu ena vuqa na veitemaki me da vakawalena kina na noda itutu ni bula ka lomatarotaka na noda vakabauti Jisu Karisito. Ni o wilika na Taniela1, 3, kei na 6, vola na sala eso e ratou a vakasaurarataki kina o Taniela, Setareki, Mesaki, kei Apeti-niko me ratou vakayacora na veika e ratou kila ni cala. O sa bau vakila beka na veivakasaurarataki mo vakawalena kina na nomu vakabauta? Na cava o sa vulica mai vei iratou na tamata oqo ka na rawa ni vukei iko mo nuitaka tikoga na Turaga ni ko sotava na veisaqasaqa?

Na ivola i Taniela kei na vuqa tale na ivolanikalou era vola na veika a sotavi a yaco kina na vakabauta cecere ka mua ki na veicaka mana levu. Ia vakacava ke sega ni muataki keda na noda vakabauta ki na cakamana eda vakasaqara tiko? (raica, me ivakaraitaki, Alama 14:8–13). Mai na veika o wilika ena Taniela 3:13–18, na cava beka na nomu nanuma ni ratou na sauma vakacava na taro oqo o Setareki, Mesaki, kei Apeti-niko? Ena vakayaco-ka vakacava na nodratou ivakaraitaki ena sala mo tadrava kina na vakatovolei ni nomu vakabauta? Me baleta na ikuri ni veitikina oqo, raica na itukutuku nei Elder Dennis E. Simmons “Ia Ke Sega…” (Ensign se Liaona, Me 2004, 73–75).

E vakaraitaka talega na ivola i Taniela ni digidigi dodonu ni tamata yadua ena rawa ni muataki ira tale eso me ra vakabauta vakalevu cake na Turaga. Na ivakaraitaki cava ni veika oqo o kunea ena wase1, 3, kei na6? Vakasamataka vakatitobu na revurevu ni nomu digidigi ena nodra bula eso tale (raica na Maciu 5:16).

Raica talega na Dieter F. Uchtdorf, “Kakua ni Yalolailai, Vakadinata Ga,” Ensign se Liaona, Nove. 2015, 76–79; David R. Stone, “O Saioni ena Maliwa kei Papiloni,” Ensign se Liaona, Me 2006, 90–93.

Droini kei Taniela kei iratou na nona itokani eratou sega ni via kania na kakana ni tui, mai vei Brian Call

Taniela2

Na Lotu i Jisu Karisito ni Yalododonu Edaidai sa matanitu ni Kalou e vuravura.

Mai na ivakatakila, a raica kina o Taniela ni tadra nei Nepukanesa sa tukuna tiko na veimatanitu vakavuravura ena gauna mai muri, ka vakakina na matanitu ni Kalou ena gauna mai muri, ka na “sega sara ni vakarusai rawa” (Taniela 2:44). “Na Lotu sa ikoya na matanitu vakalou edaidai a parofisaitaki mai,” a vakatavulica o Elder D. Todd Christofferson, “a sega ni bulia na tamata, ia a tara cake na Kalou ni lomalagi ka qiqi mai me vaka e dua na ‘vatu mai na ulunivanua sa sega ni ta ena liga‘ ka roboti vuravura” (“Na Vu ni Lotu,” Ensign se Liaona, Nove. 2015,111). Vakasamataka mada na matanitu ni Kalou ena gauna oqo ni o wilika na ivakamacala ni vatu ena Taniela 2:34–35, 44–45. Na veika cava soti o raica e tautauvata ena kedrau maliwa na vatu kei na matanitu? O kila vakacava ni matanitu ni Kalou e sa roboti vuravura tu nikua?

Raica talega na Gordon B Hinckley, “Na Vatu sa Kavida Mai ena Ulunivanua,” Ensign se Liaona, Nove. 2007, 83–86; L.Whitney Clayton, “Ena Yaco Mai Na Kena Gauna,” Ensign se Liaona, Nove. 2011, 11–13.

Taniela 3:19–28

Ena tokoni au na iVakabula ni‘u vakatovolei.

Na veivakararamataki cava e yaco mai vei iko ni o wilika na veika e baleta na ikava ni tamata ka a rairai mai ena lovo bukawaqa vata kei Setareki, Mesaki, kei Apeti-niko? Ena vukei iko vakacava na itukutuku oqo ena veivakatovolei o sotava? Ena rawa ni o kunea eso tale na ikuri ni veivakararamataki ena Mosaia 3:5–7; Alama 7:11–13; Vunau kei na Veiyalayalati 61:36–37; 121:5–8.

Vei Vakasama Me Baleta na Vuli iVolanikalou Vakamatavuvale kei na Lotu Vakamatavuvale

Taniela 1–2.Ni o wilika vata na Taniela1 kei na2 , sa rawa ni o vakasaqara na veivakalougatataki a ciqoma o Taniela kei iratou na nona itokani ena vuku ni nodratou a sega ni kania na kakana kei na waini ni tui. (Raica na vidio “God Gave Them Knowledge,” ChurchofJesusChrist.org.) Sa rawa mo vakatauvatana na veivakalougatataki oqori ki na yalayala ni Turaga vei keda ni da muria na Nona ivakaro, me vaka na Vosa ni Vuku (raica na Vunau kei na Veiyalayalati 89:18–21). Sa vakalougatataki keda vakacava na Turaga ni da bulataka na Vosa ni Vuku?

Taniela3.O na vukei iratou vakacava na nomu matavuvale me ratou vulica na italanoa ena Taniela3? ”NaSetareki, Mesaki, kei Apeti-niko” ena iTalanoa ni Veiyalayalati Makawa ena rawa ni veivuke. Na cava e vakauqeti keda me baleti Setareki, Mesaki, kei Apeti-niko? Na ituvaki ni bula cava eda na sotava ka na bolei kina na noda vakabauta ka na gadreva me da vakaraitaka kina ni da nuitaka na Kalou?

Taniela 6:1–23.Sa rawa ki na nomu matavuvale me ratou dramataka eso na tiki ni italanoa ena Taniela 6:1–23 (me vakataka ena, tikina e 10–12 se 16–23). Na cava eda sa vulica mai na ivakaraitaki nei Taniela? Na cava e rawa ni da vakayacora me da vakataki Koya vakalevu cake?

Taniela 6:25–27.Me vaka na veitikina oqo, a rawai vakacava o Tui Taraiase ni sa vakabulai Taniela na Turaga mai vei ira na laione? Sa rawa talega ni o wilika ena Taniela 2:47; 3:28–29 na sala a tarai kina o Tui Nepukanesa ena sala vata ga o ya. Na madigi cava beka e tiko vei keda me da vakauqeti ira kina eso tale? Veitalanoataka na ivakaraitaki o sa raica me baleta na nodra vakabauta eso tale na tamata, oka kina na lewe ni matavuvale, ka sa vakauqeti ira eso tale me ra vinaka.

Me baleta na ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Na sere vakaturi: “Meu Sa Bulataka Tu,” Nodra iVolanisere na Lalai,72.

Vakatoroicaketaki ni Noda Veivakavulici

Vakavulica na ivunau. E totoka tu na kosipeli ni Turaga ena kena rawarawa (raica na Vunau kei na Veiyalayalati 133:57). Na itaviqaravi rawarawa kei na veitalanoa e vakanamata ki na ivunau e rawa ni sureta na Yalo Tabu me biuta na itukutuku ni kosipeli ki na yalodratou na nomu matavuvale.

O Taniela ena Qara ni Laione, 1872. Rivière, Briton (1840–1920). iLoloma: Walker Art Gallery, National Museums Liverpool/Bridgeman Images