Sa Vakadewataka o Taniela na Tadra nei Nebukanesa, mai vei Grant Romney Clawson

31 ni Okotova–6 ni Noveba

Taniela 1-6

“Sa Sega Ni Dua Tale Na Kalou Sa Rawata Me Ia Na Veivakabulai”

Ni o wilika na Taniela 1–6, vola na dina o vakauqeti kina mo vukei ira na gone me ra raica.

Vola na Veika o Vakauqeti Kina

Sureta na Veiwasei

Vakaraitaka na iyaloyalo ni veika a yaco ena Taniela 1–6 (raica na ituvatuva ni macawa oqo ena Lako Mai, Mo Muri Au—Baleti Ira na Tamata Yadua kei na Matavuvale se iVola ni iYaloyalo Vakosipeli, naba 23, 24, 25, 26). Kerei ira na gone me ra wasea na ka era kila era vakaraitaki tiko ena iyaloyalo. Sureti ira mera wasea e dua na gauna era a digitaka kina mera muria na iVakabula, me vakai Taniela kei ira na nona itokani.

Vakavulica na iVunau: Gone Sobu

Taniela 1:1–17

E vinakata na Tamada Vakalomalagi meu taqomaka vinaka na yagoqu.

E ratou a cata o Taniela kei iratou na nona itokani na kakana kei na waini a solia na tui vei iratou baleta ni ratou vinakata me ratou muria na ivakaro ni Kalou ka kakua ni vakacacana na yagodratou. Edai na Vosa ni Vuku ena vukei keda meda levea na veika e laukana ka rawa ni vakacacana na yagoda.

iTaviqaravi e Rawa ni Caka

• Wasea vei ira na gone na “Taniela kei Iratou na Nona iTokani” (ena iTalanoa ni Veiyalayalati Makawa), se vakamacala vakalekalekataka na Taniela 1:1–17. Sureti ira na gone mera matanataka na italanoa. Vukei ira me ra kila vinaka na sala a vakalougatataki Taniela kina na Turaga kei iratou na nona itokani ena nodratou digitaka me ratou talairawarawa Vua (raica na tikina17). Na veivakalougatataki cava eso eda ciqoma mai vua na Kalou ni da digitaka na dodonu?

• Vakaraitaka vei ira na gone na iyaloyalo ni veika e vakavulica vei keda na Vosa ni Vuku meda na kania se vakayagataka kei na veika e tukuna vei keda meda kakua ni kania se vakayagataka (raica na Vunau kei na Veiyalayalati 89). Sureti ira na gone me ra matanataka ni ra kania tiko na veika vinaka ka kaya sega ki na veika ca. Vakadinadinataka ni sa vakalougatataki keda na Turaga ni da qarava vinaka na yagoda. Me lagati vata e dua na sere ni kena qarauni na yagoda, me vaka “Ko ni Solia Mai Vei Au Nomuni Vale” se “Na Vosa ni Vuku” (Nodra iVolanisere na Lalai, 73, 154–55). Na cava e vakavulica vei keda na sere oqo?

Droini kei Taniela kei iratou na nona itokani era cata na kakana ni tui, mai vei Brian Call

Taniela1; 3; 6

Ena vakalougatataki au na Kalou niu digitaka meu muri Jisu Karisito.

Na ivola i Taniela e tiko kina eso na italanoa ni tamata era digitaka me ra muria na ivakaro ni Kalou ena gauna mada ga e dredre kina mera cakava. O na rawa ni vukei ira vakacava na gone mera vuli mai na ivakaraitaki oqo?

iTaviqaravi e Rawa ni Caka

• Raica na iyaloyalo ni italanoa ena Taniela1, 3, kei na6 (raica na tabana ni itaviqaravi ni macawa oqo, na ituvatuva ni macawa oqo ena Lako Mai, Mo Muri Au—Baleti Ira na Tamata Yadua kei na Matavuvale, se iVola ni iYaloyalo Vakosipeli, naba 23, 25, 26). Biuta na iyaloyalo me vakatoboicu ena papa se ena vuloa. Sureta e dua na gone me vukica e dua vei ira na iyaloyalo, ka vukei koya me tukuna na italanoa e matataka tiko. (Mo vukei, raica na “Taniela kei Iratou na Nona iTokani,” “Setareki, Mesaki, kei Apeti-niko,” kei “Taniela kei na Qara ni Laione” ena iTalanoa ena Veiyalayalati Makawa.) Ni oti na italanoa yadua, veivosakitaka na taro vakaoqo: Na cava era cakava na tamata mera muria kina na Turaga? A vakalougatataki ira vakacava na Turaga? Wasea o sa vakalougatataki vakacava ena nomu digitaka mo muri Jisu Karisito. Sureti ira na gone mera wasea na veika era dui sotava tiko.

• Sureti ira na gone me ra matanataka na ituvaki eso e rawa ni ra vakaraitaka kina nodra vakabauta na Kalou ena nodra muria na Nona ivakaro. Oqo e rawa ni okati kina na yalovinaka vua e dua na tacimu, ka tukuna vua e dua me baleta na iVakabula, se masu ena veibogi. Vakaraitaka e dua na iyaloyalo kei Setareki, Mesaki, kei Apeti-niko ena lovo bukawaqa (raica na iVola ni iYaloyalo Vakosipeli, naba 25), ka kerei ira na gone me ra wiliki ira na tamata ena lovo. Wilika na Taniela 3:24–25 mo kila mai kina o cei tale e tiko ena lovo bukawaqa. Wasea na nomu ivakadinadina ni tiko vata kei keda na Turaga ni da muri Koya.

Taniela6

E vinakata na Tamada Vakalomalagi me’u dau masu vakawasoma.

Sa lomasoli o Taniela me solibula me rawa kina vua me masu vua na Tamada Vakalomalagi ena veisiga. O na vukei ira vakacava na gone mera vakatorocaketaka na gagadre ni masu?

iTaviqaravi e Rawa ni Caka

• Talanoataka na italanoa ena Taniela6 (raica na “Taniela kei na Qara ni Laione” ena iTalanoa ni Veiyalayalati Makawa), ka sureti ira na gone me ra droinitaka e dua na iyaloyalo ni italanoa. Tarogi ira mera vakayagataka na nodra iyaloyalo mera talanoa kina vakai ira. Na cava na vuna e vinakata kina na Tamada Vakalomalagi meda masu yani Vua? Wasea na vuna e bibi kina vei iko na masu.

• Veivosaki vata kei ira na gone baleta na gauna e rawa ni ra masu kina, me vaka ni ra rere, ni ra caka cala, se ena gauna era gadreva kina na veivuke e koronivuli. Na cava na vuna e vinaka kina meda masu ena veigauna vakaoqo? Vakavulica vei ira na gone se vanua cava ga era tiko kina, sa rawa mera na masu ga e lomadra.

• Lagata vata e dua na sere baleta na masu, me vaka na “Keimami Cuva Masu No” (Nodra iVolanisere na Lalai,18b). Veivosakitaka vata kei ira na gone na veika e rawa ni da masulaka.

Vakavulica na iVunau: Gone Qase Cake

Taniela1; 3; 6

Au rawa ni kitaka na ka dodonu ena gauna madaga e dredre kina.

Na italanoa era tiko ena Taniela1, 3, kei na6 e rawa ni solia vei ira na gone o vakavulica na yaloqaqa kei na vakabauta mera digidigi vinaka kina, ena gauna mada ga era galili kina.

iTaviqaravi e Rawa ni Caka

• Droinitaka ena papa ni volavola e vica vata na icoga era dusi kece ki na dua ga na vanua me qai dua e dusi ki na yasana veibasai. E tautauvata vakacava o Taniela kei ira na nona itokani me vaka na icoga oqo? Sureti ira na gone me ra solia mai na ivakaraitaki mai na italanoa ena Taniela1, 3, kei na6 (raica na “Taniela kei Iratou na Nona iTokani,” “Setareki, Mesaki, kei Apeti-niko,” kei ““Taniela kei na Qara ni Laione” ena iTalanoa ena Veiyalayalati Makawa). Tarogi ira na gone na cava na vuna era nanuma kina ni a rairai dredre vei Taniela kei ira na nona itokani me ratou digidigi vinaka. A vakalougatataki iratou vakacava na Turaga ni ratou a digitaka na dodonu?

• Vukei ira na gone mera vakasamataka eso na ituvaki ka ra a rairai rawa ni vakasaurarataki kina mera cakava e dua na digidigi cala. Sureti ira mera wasea na veika era sotava ena gauna era a vakalougatataki kina ena nodra digitaka na dodonu ena gauna madaga e dredre kina. Lagata vata e dua na sere e semati ki na ulutaga oqo, me vaka na “Digitaka na Dodonu” (Sere ni Lotu, naba 142).

Taniela2

Na Lotu i Jisu Karisito ni Yalododonu Edaidai e matanitu ni Kalou e vuravura.

Ena gauna a solia kina o Taniela na nona vakavakadewa ni tadra o Nepukanesa, a raica e dua na vatu “sa kavida mai na ulunivanua ka sega ni ta ena liga” (Taniela 2:45). Na vatu oqo e matataka Na Lotu i Jisu Karisito ni Yalododonu Edaidai, sa ikoya na kena sa lesi tu me vakasinaita na vuravura.

iTaviqaravi e Rawa ni Caka

• Wilika na Taniela 2:31–35, 44–45 vei ira na gone, ka sureti ira mera droinitaka e dua na iyaloyalo ni veika a raica o Nepukanesa ena nona tadra. Tarogi ira na gone na cava era vulica mai na veitikina oqo me baleta na vatu ena tadra. Vakamacalataka ni vatu oqo e matataka na Lotu i Jisu Karisito ni Yalododonu Edaidai. Kerei ira na gone me ra tukuna eso na ka a cakava na Tamada Vakalomalagi me tauyavutaka kina na Nona Lotu ena iotioti ni gauna oqo. Me soli vei ira na vakasama, vakaraitaka na iyaloyalo ni veika a yaco ena Veivakalesui mai ni Lotu (raica na iVola ni iYaloyalo Vakosipeli, naba 90–95).

• Solia vei ira yadua na gone e dua na pepa kakalobilobi me matataka na vatu ena tadra nei Nepukanesa. Kerei ira yadua na gone mera wasea na sala e kila kina ni sa vakalesuya mai na Kalou na Lotu. Ni ra veiwasei na gone, sureti ira me ra solia na nodra “vatu” vei iko. Ologa vata na vatu ena dua na tepi se wa me dua kina na vatu levu. Vakadinadinataka ni gauna eda vaqaqacotaka kina na noda ivakadinadina ka wasea na kosipeli vei ira tale eso, eda duavata ena noda vakabauta me vukea na matanitu ni Kalou me “[vakasinaita] na vuravura taucoko” (Taniela 2:35).

Vakauqeta na Vuli e Vale

Sureti ira na gone me ra cakava e dua na ka ena macawa oqo e vakaraitaka na nodra vakabauti Jisu Karisito.

Vakatoroicaketaki na Noda Veivakavulici

Vukei ira na gone me ra kila ni sa tiko na Yalo. Ni o sotava na veika vakayalo vata kei ira na gone, vukei ira mera kila na veivakauqeti ni Yalo Tabu.