Madrai ni Bula, mai vei Chris Young

14–20 ni Noveba

Emosi; Opetaia

“Vakasaqara na Turaga, Dou na Bula Kina”

Ni o vakanamata ena vakavulici ni ivunau dina ena sala rawarawa, o na vakarautaka na madigi vua na Yalo Tabu mo vakadinadinataka vei ira na gone. Vakayagataka na itaviqaravi ena ituvatuva oqo—se bulia ga na nomu—me vukei iko mo vakavulica na ivakavuvuli ni kosipeli ena sala rawarawa eso.

Vola na Veika o Vakauqeti Kina

Sureta na Veiwasei

Kerei ira na gone me ra wasea e dua na ka era a vulica walega oqo mai vale se ena lotu. Me ivakaraitaki, taroga kevaka era sa kunea e dua na tiki ni ivolanikalou taleitaki vou se rogoca e dua na itukutuku e rawa ni ra wasea ki na kalasi.

Vakavulica na iVunau: Gone Sobu

Emosi 3:7; 7:14–15

O ira na parofita era sa italai i Jisu Karisito.

E dua na ka bibi duadua e rawa ni kila na gone me baleti ira na parofita sa ikoya ni ra sa italai i Jisu Karisito. Na veivakasama e ra ena vukei iko mo vakavulica vei ira na dina bibi oqo.

iTaviqaravi e Rawa ni Caka

• Vakasolokakanataka vua e dua na gone na itukutuku me baleta na vo ni kalasi (me vaka na nodra kerei na gone mera tucake ena dua na yava se vuki wavoki ena dua na iwirini), ka kerei koya me wasea na itukutuku vei ira na vo ni gone. Tokaruataka na itaviqaravi oqo, ka solia e vica na gone mera italai. Vukei ira me ra kila na sala e vaka kina e dua na parofita na italai ena itaviqaravi oqo, era wasea vei keda na itukutuku ni Kalou. Wasea e vica na ivakaraitaki ni itukutuku sa oti mai vua na parofita bula ka sa vukei iko mo toro voleka vei Jisu Karisito.

• Sureta e dua na gone me mai tucake e liu ka me vaka na parofita o Emosi. Ni o wasea eso na dina me baleti Emosi mai na Emosi 7:14–15, solia na iyaloyalo vei gone se iyaya e salavata ki na dina yadua oqo, me vaka na iyaloyalo ni dua na sipi, dua na vuanikau, kei na Turaga. Vakamacalataka ni o Emosi a dua na ivakatawa ni sipi ka kacivi koya na Turaga me Nona italai. Mo qai vakaraitaka na iyaloyalo ni Turaga kei na parofita bula, ka vakamacalataka ni sa tomana tikoga na Turaga me kacivi ira na italai nikua. Wilika i cake na Emosi 3:7 ka kerei ira na gone me ra dusia na iyaloyalo veiganiti ni ra rogoca na vosa “Turaga” kei na “parofita.” Wasea na nomu ivakadinadina me vaka ga ena gauna nei Emosi, e vosa kina vei keda o Jisu Karisito mai vei ira na Nona parofita.

• Wasea e dua na italanoa mai na dua na mekesini ni Lotu me baleta na parofita bula se na veika era sotava na lewe ni Lotu ena gauna era muria kina na ivakasala ni parofita. (Raica talega “Sotavi Ira na Parofita kei na iApositolo ena Gauna Oqo” ena ChurchofJesusChrist.org.)

• Lagata se vakatagitaka e dua na sere katoni me baleti ira na parofita, me vaka na “Vakamuria na Parofita” (Nodra iVolanisere na Lalai, 58), ni ra cakacakataka na gone na tabana ni itaviqaravi ni macawa oqo. Dusia vei ira na gone na veimalanivosa e tiko ena sere e vakavulica na ivakarau era liutaka na parofita na sala vei Jisu Karisito.

Emosi 5:14

Kevaka au vakasaqara na vinaka, na Turaga ena tiko vata kei au.

A sureti ira na Isireli o Emosi me ra “vakasaqara na ka vinaka, ka segai na ka ca” ka yalataka ni kevaka era na cakava, “na Turaga … ena qai tiko vata kei kemudou.” O na vukei ira vakacava na gone me ra vakaio ki na veisureti oqo ka ciqoma na yalayala oqo?

iTaviqaravi e Rawa ni Caka

• Vakaraitaka e vica na iyaloyalo ni gone era cakava tiko na veika vinaka, me vaka na nodra vukei eso se na tauri ni sakaramede. Mera qai veivukevuke na gone yadua me vakamacalataki e dua na iyaloyalo ni ra tukuna tiko na vo ni gone se iyaloyalo cava e vakamacalataka tiko. Wilika na Emosi 5:14, ka vukei ira na gone me ra vakasamataka na sala eso era na “vakasaqara kina na ka vinaka” ena veisiga.

• Sureti ira na gone me ra droinitaka na kedra iyaloyalo ni ra cakava tiko e dua na ka vinaka. Wilika na Emosi 5:14, ka vakabibitaka na yalayala ni Turaga ni na tiko vata kei keda o Koya ni da vakasaqara na veika vinaka. Sureti ira na gone mera vakuria ki na nodra droini e dua na iyaloyalo kei Jisu ni tu vata kei ira.

Vakavulica na iVunau: Gone Qase Cake

Ena vakatakila na Turaga na dina vei ira na Nona parofita.

Emosi 3:7

O ira na parofita era sa italai i Jisu Karisito.

NaEmosi 3:7 e dua na malanivosa cecere ni ivolanikalou me vukei ira na gone me ra kila ni gauna eda vakarorogo kina vua na parofita, eda sa vakarorogo tiko ki na dua na italai i Jisu Karisito.

iTaviqaravi e Rawa ni Caka

• Vukei ira na gone me ra cavuqaqataka taucoko se vakatikina na Emosi 3:7. Me vakataka, mo solia vei ira e vica na miniti mera wilika na tikina ena vica na gauna ni o vola na vosa tale eso ni tikina yadua ena papa ni volavola. Sureti ira na gone me ra sogota na nodra ivolanikalou ka cavuta vata e cake na tikina, ni ra vakayagataka na ivakatakilakila ena papa ni volavola. Qai bokoca e vica na vosa ena kena gauna yadua me yacova ni ra sa rawa ni tokaruataka na gone na tikina taucoko ka sega ni dua na ivakatakilakila. Na cava e vakatavulica vei keda na tikina oqo me baleti ira na parofita? Sa vukei keda vakacava na noda parofita bula meda kila na ka e vinakata na iVakabula meda kitaka?

• Vola e vica na taro baleti ira na parofita ena veitiki ni pepa, me vaka na kena oqo: na Na cava na vuna mera tiko kina na parofita? Na cava era dau cakava na parofita? Na cava na vuna mo muria kina na parofita? Na cava era vakavulica na parofita? Kerei ira na gone me ra veisasa, ka me dua na gone mai na veisa yadua me tomika e dua na taro ka kerea na nona itokani me sauma. Kevaka era gadreva na gone mera vukei mera sauma na taro, sa rawa mera raica na “Parofita” ena iDusidusi ki na iVolanikalou (scriptures.ChurchofJesusChrist.org). Ni sa saumi taro oti na nona itokani, sa rawa vei ira na gonelalai mera veisautaka na nodra itavi ka digitaka e dua tale na taro.

• Wasea vei ira na gone e vica na dina me baleta e dua na parofita ni Veiyalayalati Makawa era sa vulica ena yabaki oqo (me vakataki Noa, Mosese, se Aisea). Tarogi ira mera vakilakila se parofita cava o vakamacalataka tiko. Tokaruataka qo kivei ira eso tale na parofita.

Emosi 5:4–15

Kevaka au vakasaqara na veika vinaka, ena tiko vata kei au na Turaga.

E levu tu na nodra madigi na gone me ra digitaka kina na dodonu se na cala. Vakasamataka na sala mo vakauqeti ira kina mera “vakasaqara na ka vinaka, ka segai na ka ca” (tikina e14).

iTaviqaravi e Rawa ni Caka

• Sureti ira na gone me ra vakasaqaqara ena Emosi 5:4–15, mera raica na vosa “vakasaqara.” Na cava e vinakata na Turaga meda vakasaqara, kei na yalayala cava e cakava o Koya kivei ira era vakayacora? Eda vakasaqara vakacava na Turaga?

• Vukei ira na gone mera cavuqaqataka na iotioti ni yatuvosa ni ika tinikatolu ni yavu ni vakabauta. Eda na “vakasaqara vakacava na veika vakaoqo”?

Emosi 8:11–12

Na Vakalesui mai ni kosipeli sa mai vakaotia na lauqa ni vukitani.

Na kena kilai vinaka na ka e vakavulica o Emosi me baleta na vukitani e rawa ni vukei ira na gone me ra vakavinavinakataka na Vakalesui mai ni kosipeli.

iTaviqaravi e Rawa ni Caka

• Sureti ira na gone me ra wilika na Emosi 8:11–12, ka veivosakitaka na veika ena yaco ni sega ni tu vei keda na tamata na vosa ni Turaga. Vukei ira na gone me ra vakamacalataka na vosa vukitani kei na lauqa, ena nodra vakayagataka na iDusidusi ki na iVolanikalou (scriptures.ChurchofJesusChrist.org) se dua na dikisenari. Na sala cava e vaka kina na lauqa na vukitani?

• Me vukei ira na gone me ra kila vinaka na Vukitani Levu, railesuva vata kei ira “Ni Oti na Veiyalayalati Vou” (ena iTalanoa ni Veiyalayalati Vou, 167–70). Mo ni qai veivosakitaki na taro vakaoqo: Na cava na vuna a yaco kina na Vukitani? Na cava a qai yaco ena vuku ni Vukitani? Na cava na vuna e vakalesuya mai kina na Turaga na Nona kosipeli? (raica talega na “Na Vakalesuimai ni Taucoko ni Kosipeli i Jisu Karisito: Ai Vakaro ni Ika 200 ni iVakananumi ki Vuravura,” ChurchofJesusChrist.org). Vakayaloqaqataki ira na gone me ra vola na veitaro oqo kei na kedra isaunitaro ka wasea vei ira na nodra matavuvale mai vale.

Vakauqeta na Vuli e Vale

Solia e dua na gauna vei ira na gone me ra vakasamataka e dua na ka era sa vulica nikua era vinakata me ra wasea vua e dua na lewe ni matavuvale. Vakayaloqaqataki ira mera vakatulewataka se o cei era na wasea kina ka mera na wasea vakacava.

Vakatorocaketaki Noda Veivakavulici

Cakava na veisureti e rokova na galala ni digidigi. Taroga ena vukei ira na gone mera vakasamataka na sala mera vakayagataka kina na veika era sa vulica. Me vakaoqo, e rawa ni o taroga, “Na cava e dua na ka o nanuma ni dodonu mo cakava e yavutaki ena veika eda sa veivosakitaka oti nikua?”