na yalewa vakawati kei na tagane vakawati ena lomanibai ni valetabu

7–13 ni Noveba

1–6 ni Osea; 10–14; Joeli

“Au Na Lomani Ira Ga”

Ni o vulica tiko na ivolanikalou ka vakavakarau mo veivakavulici, vakasaqara na veivakauqeti ni Yalo Tabu. Na cava o vakila o vakauqeti kina mo vakanamata ki na gauna ni kalasi ena macawa oqo?

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vakaraitaka e dua na iyaloyalo ni iVakabula, ka sureti ira na gone me ra wasea e dua na ka era kila se sa vulica ena macawa oqo me baleti Koya. Me ra veivukevuke ena kena tauri tiko na iyaloyalo ni ra veiwasei tiko.

ivakatakilakila ni veivakavulici

Vakavulica na iVunau: Gone Sobu

Osea 10:12

Au rawa ni vakasaqara na Turaga.

NaOsea 10:12 e vakayagataka na iyaloyalo ni kakaburaki, tatamusuki, gauna, kei na uca me sureti keda meda vakasaqara na Turaga. Ni o wilika na tikina oqo, na vakasama vivinaka cava e rawa ni yaco mai ena vakauqeti ira na gone mera vakasaqarai Koya?

iTaviqaravi e Rawa ni Caka

• Wilika na Osea 10:12 vei ira na gone, ka sureti ira me ra cakava eso na ivakaraitaki rawarawa me vukei ira me ra kila vinaka na tikina, me vaka nodra sa teivaka tiko na sorenikau, beti kakana draudrau, se tucake tu ena tau ni uca. Se vakaraitaka na iyaloyalo ni sorenikau, kau, vata kei na uca. Vukei ira na gone me ra vakatauvatana na teivaki ni dua na sorenikau ka tamusuka na kakana vinaka ki na bula dodonu ka ciqoma na veivakalougatataki ni Turaga. Vakadinadinataka na tau mai ni uca ni veivakalougatataki ni Turaga vei iko ena nomu tovolea tiko mo vakasaqarai Koya.

• Droinitaka e dua na kaloko ena papa, ka kerei ira na gone mera wasea na sala eso e rawa ni vakasaqarai kina na Turaga ena veigauna duidui ena dua na siga. Sureti ira na gone me ra cavuta vata tale kei iko na malanivosa “sa kena gauna oqo me da qarai Jiova kina” (Osea 10:12). Vukei ira me ra kila vinaka ni sa gauna kecega meda vakasaqara kina na Turaga. Wasea na ka o cakava mo nanumi Koya kina ena veigauna kece.

O Jisu e dabe vata kei ira na gonelalai

Sa noda i Vakabula ka Dauveivueti o Jisu Karisito.

Osea 13:4,14

Sa noqu iVakabula o Jisu Karisito.

Ni o vakavulica na veika me baleta na iVakabula kei na nona Veisorovaki, wasea na ivakadinadina ni Nona loloma vei ira yadua na gone.

iTaviqaravi e Rawa ni Caka

• Vakaraitaka na kedra iyaloyalo e vica na tamata, oka kina o Jisu, ka kerei ira na gone mera raica se o cei vei ira oqo na noda iVakabula. Wilika na Osea 13:4, ka vakamatatataka ni sega ni dua na iVakabula vakavo ga o Jisu Karisito. Vakadinadinataka ena vuku ga ni Veisorovaki i Jisu Karisito, sa rawa kina meda lesu ka laki bula tawamudu vata tale kei na Tamada Vakalomalagi.

• Me ra veivukevuke na gone nodra taura e dua na iyaloyalo kei Jisu ena kauveilatai se ena ibulubulu kei na iyaloyalo kei Jisu ena taudaku ni ibulubulu sa lala. Sureti ira na gone mera veivosakitaka na veika e vakaraitaka tiko na iyaloyalo. Wilika mai na Osea 13:14 na malanivosa “Kau na sereki ira mai na kaukauwa ni ibulubulu; kau na vakabulai ira mai na mate.” Vakadinadinataka ni sa vakabulai keda mai na mate o Jisu Karisito ka rawa ni da tucaketale. Me lagati vata e dua na sere me baleta na Tucaketale, me vaka na “Ko Jisu Ni Sa Bula Tu” (iVolanisere ni Gonelalai,45). Vukei ira na gone me ra vakila na Yalotabu ni ra lagasere tiko.

Joeli 2:28

E rawa ni dusimaki au na Yalo Tabu.

Ni o vakavulica na parofisai nei Joeli ena Joeli 2:28, vakasamataka na sala o rawa ni vukei ira kina na gone me ra vakavakarau me ra ciqoma na isolisoli ni Yalo Tabu ni ra sa papitaiso oti.

iTaviqaravi e Rawa ni Caka

• Wilika na Joeli 2:28 vei ira na gone, ka vakamacalataka ni vosa “tamata kecega” e kena ibalebale na tamata yadua, oka kina o ira na “gonetagane” kei na “goneyalewa” me vakataki ira. Sureti ira na gone me ra droinitaka na kedra iyaloyalo na tamata era tukuni tiko ena tikina oqo (gonetagane kei na goneyalewa, turaga kei na cauravou, marama kei na yalewagone), oka kina o ira. Vakamacalataka ni dua na sala e sovaraka mai kina na Yalona na Tamada Vakalomalagi oya ena nona solia vei keda na isolisoli ni Yalo Tabu ena gauna eda papitaiso kina.

• Sureti ira na gone me ra wasea na ka era kila baleta na Yalo Tabu. Vukei ira mera kila vakavinaka ni Yalo Tabu e rawa ni vakavulica vei keda na veika baleta na Tamada Vakalomalagi kei Jisu Karisito ka rawa ni vukei keda meda kila na ka dina (raica na Joni 14:26; Vunau kei na Veiyalayalati 42:17). Wasea na veika o sa sotava me vukei ira na gone me ra kila vinaka na sala e rawa ni vukei keda kina na Yalotabu.

ivakatakilakila ni veivakavulici

Vakavulica na iVunau: Gone Qase Cake

Osea 2:19–20

Au rawa ni yalodina meu maroroya na noqu veiyalayalati.

Ena ivola i Osea, e vakatauvatana na Turaga na Nona veiyalayalati kei ira na Isireli ki na dua na vakamau. Dina ga ni ra sega ni yalodina na Isireli, e se lomani ira tikoga o Koya ka vinakata me ra lesu mai. Na veivakatauvatani oqo e rawa ni vukei iko mo vakavulici ira na gone na bibi ni noda maroroya na noda veiyalayalati kei na Turaga.

iTaviqaravi e Rawa ni Caka

• Tukuna vei ira na gone ni ena ivola i Osea, e vakatauvatana na Turaga na Nona veiyalayalati kei Isireli ki na dua na vakamau. Vakaraitaka vei ira na gone e dua na iyaloyalo ni dua na yalewa kei na tagane sa vakawati. Na sala cava e vinakata kina na Tamada Vakalomalagi me ra dau veimaliwai kina vakai ira na tagane kei na yalewa vakawati? Eda na vakaraitaka vakacava vua na Turaga ni da lomani Koya ka na yalodina tiko Vua?

• Vukei ira na gone me ra kila vinaka ni veiyalayalati eda cakava vata kei na Turaga e kena inaki me tawamudu. Sureta e dua na gone me wilika na Osea 2:19–20, ka vakaraica na vosa era vakamacalataka na nona nanuma na Turaga me baleta na Nona veiyalayalati kei keda. Na cava eda veiyalayalati kina meda kitaka ena gauna eda papitaisotaki kina? E rawa vakacava meda maroroya na veiyalayalati oqo eda sa cakava vata kei na Turaga?

Osea 13:4,14

O Jisu Karisito sa noqu iVakabula ka Dauveivueti

O na vakayagataka vakacava na vosa nei Osea me vaqaqacotaka na nodra ivakadinadina na gone me baleta na nodra iVakabula ka Dauveivueti? Ni o veivakavulici, vukei ira na gone mera vakila na reki kei na loloma ni Veisorovaki i Jisu Karisito.

iTaviqaravi e Rawa ni Caka

• Sureti ira na gone me ra wilika na Osea 13:4,14, mera raica kina na vosa kei na malanivosa era vakamacalataki Jisu Karisito. Na cava e vakavulica vei keda na veivosa eso oqo me baleti Koya? Sureti ira na gone me ra vakayagataka na iDusidusi Vakaiulutaga se iDusidusi ki na iVolanikalou me ra raica ka wasea na ivolanikalou tale eso e vakavuvulitaka na veika baleti Jisu Karisito na iVakabula ka Dauveivueti. Wasea na nomu ivakadinadina baleta na iVakabula, ka solia vei ira na gone na madigi mera cakava talega.

• Me vukei ira na gone me ra kila vinaka na sala sa voli se vueti keda kina mai na mate, vakaraitaka na vidio “Handel’s Messiah: Debtor’s Prison” (ChurchofJesusChrist.org). Na cava eda vulica mai na vidio oqo e vukei keda meda kila vinaka na veika sa cakava na iVakabula kivei keda?

Joeli 2:28–29.

E rawa ni dusimaki au na Yalo Tabu.

E vuqa vei ira na gone o vakavulica era sa rairai papitaiso ka ciqoma na isolisoli ni Yalo Tabu. O na vakayagataka vakacava na ivolanikalou oqo me vukei ira me ra kila vinaka kina na kaukauwa kei na veivakalougatataki e yaco mai ni da rogoca na domo ni Yalotabu?

iTaviqaravi e Rawa ni Caka

• Sureti ira na gone me ra wilika vata na Joeli 2:28–29, ka mera vakacuruma na dui yacadra ena malanivosa “luvemu tagane” kei na “luvemuni yalewa.” Vola ena vava ni volavola e dua na iyatuvosa me vaka Na Yalo Tabu e rawa ni … ka sureti ira na gone me ra veivukevuke ena vakacavari ni iyatuvosa. Vakayaloqaqataki ira me ra okata na veika era vulica mai na Joni 14:16; Moronai 10:5; Vunau kei na Veiyalayalati 42:17, kei na ivolanikalou tale eso.

• Biuta e dua na iyaya ena bilo, ka me ra veivukevuke na gone ena sova kina na wai. Vakamacalataka ni iyaya e matataki keda, kei na wai e matataka Yalo Tabu. Ni da sa papitaiso, eda sa ciqoma na isolisoli ni Yalo Tabu, ka sa ikoya e dua na sala sa vakayacora tiko kina na Turaga na Nona yalayala me “sovaraka na [Yalona].” Na cava e rawa ni da cakava meda ciqoma kina na Yalo Tabu? Sureti ira na gone me ra wasea na veigauna eso era a vakila kina na veivakauqeti ni Yalotabu.

ivakatakilakila ni vuli

Vakauqeta na Vuli e Vale

Vukei ira na gone me ra vakatakila nikua ena kalasi e dua na ka era vulica me baleta na Tamada Vakalomalagi, o Jisu Karisito, se na Yalo Tabu. Vakayaloqaqataki ira me ra wasea oqo ki na nodra matavuvale.

Vakatorocaketaki Noda Veivakavulici

Vakasaqara na ivakatakila e veisiga Ni ko sa vakarau mo veivakavulici, masulaka ka vakasamataka vakatitobu na ivolanikalou ena loma ni macawa. Na vakasama kei na veivakauqeti eso me baleta na sala ni veivakavulici e rawa ni yaco mai vei iko ena veigauna eso kei na vanua cava ga. (Raica na Veivakavulici ena iVakarau ni iVakabula, 12.)

tabana ni itaviqaravi: E rawa ni dusimaki au na Yalo Tabu.