yalewa vakawati kei na tagane vakawati ena lomanibai ni valetabu

7–13 ni Noveba

1–6 ni Osea; 10–14; Joeli

“Au na Lomani Ira Ga”

Sureta na Yalo me tiki ni nomu vulica tiko na Osea kei na Joeli. Vola na itukutuku e veivakauqeti kina na Yalo ki na yalomu kei na nomu vakasama.

Vola na Veika o Vakauqeti kina

Na veiyalayalati i Isireli kei na Turaga sa kena inaki me titobu sara ka vakaibalebale ka sa vakatauvatana kina na Turaga ki na dua na vakamau. Na veiyalayalati, me vaka na vakamau, e oka kina na yalayala tawamudu, wasei na veika e sotavi, tarai cake na bula vata, taucoko ni dina, ka vakabibi duadua, na loloma ena taucoko ni yalo. Na mataqali yalodina vakaoqo e yaco mai ena nanamaki cecere—vakakina na irevurevu ca ni dodomo e tuba. Mai vua na parofita o Osea, a vakamacalataka kina na Kalou eso na revurevu ni nodra a sotava na Isireli na nodra a voroka na nodra veiyalayalati. Ia na Nona itukutuku a sega ni “Au na cati iko me tawamudu ni ko sa sega ni dina.” Ia a vakaoqo “Au na sureti iko lesu” (raica na Osea 2:14–15). “Kau na tauri iko mo noqu e na yalododonu,” a kaya na Turaga (Osea 2:19). “Au na vakabulai ira mai na nodra dauvuki, au na lomani ira ga” (Osea 14:4). Oqo na itukutuku vata ga e solia o Koya vei keda nikua ni da vakasaqara me da bulataka na noda veiyalayalati ena loloma kei na yalodina.

E wasea o Joeli na itukutuku vata ga vakaoya: “Lesu vei Jiova na nomudou Kalou: ni sa dauyalovinaka ka yalololoma, sa berabera ni cudru, ka sa ka levu na nona loloma” (Joeli 2:13). “Ia ko Jiova ena nodra idrodro na nona tamata, kei na nodra kaukauwa na Isireli” (Joeli 3:16). Ni o wilika na Osea kei na Joeli, vakasamataka vakatitobu na nomu veiwekani kei na Turaga. Vakasamataka na sala e vakauqeti iko kina na Nona yalodina mo yalodina Vua.

Me baleta na kena raici vakararaba na ivola nei Osea kei Joeli, raica na “Hosea, se Hoshea” kei na “Joel” ena Bible Dictionary.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

1–3 ni Osea; 14

E dau sureti au na Turaga meu lesu tale Vua.

Na wati Osea, o Komera, a sega ni dina vua, a qai vakaraitaka na Kalou na ka rarawa oqo me vakavulica vei ira na Isireli na veika e dau tara na Yalona baleti ira kei na nodra veiyalayalati kei Koya. Ni o wilika na Osea 1–3, vakasamataka vakatitobu na sala e dau raica matua kina na Turaga na Nona veimaliwai kei ira na Nona tamata ni veiyalayalati. Sa rawa mo vakasamataka vakatitobu na sala eso, me vakataki ira na Isireli, o a rairai sega ni dina kina vua na Turaga kei na sala a dodoliga mai kina o Koya vei iko. Me vakataka, na cava e rau vakavulica na Osea 2:14–23 kei na Osea 14 vei iko me baleta na loloma kei na loloma veivueti ni Turaga? O na vakaraitaka vakacava Vua na nomu loloma kei na yalodina?

Raica talega na DieterF Uchtdorf, “Gauna ni Lesubula Mai,” Liaona, Me 2007, 99–101.

e dabe tiko e ra na yalewa ka taqara tiko na ligana o tagane e buradelana

Na ivalavala ca i Komera, ka matataki Isireli tiko, a yaco vua na veivakabulai mai vua na Turaga. Droini mai vei Deb Minnard, vakalaiseni mai na goodsalt.com

Osea 6:4–7; Joeli 2:12–13

Na yalodina vua na Kalou e dodonu me vakilai e lomada, sega walega ni itovo e tautuba.

A vakaroti ira taumada na nona tamata na Turaga me ra vakacabo isoro manumanu. Ia e dina ga ni ra a talairawarawa na tamata ena siga i Osea ki na lawa o ya, era a voroka tiko na ivakaro a bibi cake sara (raica na Osea 6:4–7). Na cava o nanuma ni ibalebale ni nona kaya na Turaga “na yalololoma ga kau sa vinakata, ka segai na imadrali; kei na kila na Kalou, ka segai na isoro kama”? (Osea 6:6). Na cava o nanuma ni kena ibalebale ni ivalavala dodonu me sa vaka e dua na o se vaka na tegu? Me vakataka beka na cava na noda ivalavala dodonu? (raica na Aisea 48:18; 1Nifai 2:9–10).

E rawa talega ni o wilika na Maciu 9:10–13; 12:1–8 mo raica na sala a vakayagataka kina na iVakabula na Osea 6:6 ena gauna ni Nona veiqaravi. E vukei iko vakacava na veitikina oqo mo kila vinaka kina na vosa nei Osea?

Ni wiliki na Joeli 2:12–13, e rawa ni veivuke me kilai ni dua e basuraka se dresulaka na nona isulu sa ivakarau vakavanua ni vakatakilakila vakayago ni vakaloloku se veivutuni levu (me kena ivakaraitaki, raica na 2 Veigauna 34:14–21, 27). E duidui vakacava na basuraka na yaloda mai na noda basuraka na noda isulu?

Raica talega na Aisea 1:11–17; Maciu 23:23; 1Joni 3:17–18.

Joeli2

“Kau na sovaraka na yaloqu kivei ira na tamata kecega.”

Ena gauna a parofisaitaka kina o Joeli na “siga ni Turaga,” e vakamacalataka ni na “siga butobuto ka loaloa,” “levu ka rerevaki sara” (Joeli 2:1–2, 11). Sa sotava oti o Isireli e vuqa na veisiga levu ka rerevaki ena kena itukutuku ni veigauna, ka ra na sotava na tamata ni veiyalayalati ni Kalou e vuqa tale ena veisiga ni mataka. Na cava e vakauqeti iko me baleta na ivakasala e solia na Turaga ena Joeli 2:12–17? Raica talega na veivakalougatataki a yalataka o Koya ena Joeli 2:18–32. Era sa iyau levu beka vakacava na veivakalougatataki era tiko ena tikina e 27–32 ena veisiga me vakataka na kena e vakamacalataki tiko ena Joeli 2, oka kina na noda gauna oqo?

Na cava o nanuma e kena ibalebale ni Turaga ena “sovaraka na [Yalona] kivei ira na tamata kecega”? (Joeli 2:28). Era vakavotukana vakacava na parofisai ena Joeli 2:28–29 ? (Raica na Cakacaka 2:1–21; Josefa Simici—Ai Tukutuku 1:41.)

Sa rawa mo vakasamataka vakatitobu na vosa oqo nei Peresitedi RussellM. Nelson: “Ia ena veisiga ka lako mai, ena sega ni rawa na bula tiko vakayalo, ke sega na cakacaka veituberi, veidusimaki, ka veivakacegui ni Yalo Tabu” (“Na iVakatakila ki na Lotu, na iVakatakila ki na Noda Bula,” Liaona, Me 2018,96). Na cava na vuna sa rui bibi kina na ivakatakila ki na noda bula tiko vakayalo? O na rawata vakalevu vakacava mo ciqoma kina na nomu ivakatakila?

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Osea 2:19–20.A vakayagataka na Turaga na vosa vakaibalebale ni vakamau me vakamacalataka na Nona veiwekani vakaveiyalayalati kei Isireli (raica talega na iDusidusi ki na iVolanikalou, “Tagane sa Qai Vakawati,” scriptures.ChurchofJesusChrist.org). Sa rawa ni veivosakitaka na nomu matavuvale na vuna e rawa ni vosa vakaibalebale vinaka kina na vakamau me baleta na noda veiyalayalati kei na Kalou. E vukei keda vakacava na Osea 2:19–20 meda kila vinaka kina na loma ni Kalou me baleti keda? E rawa vakacava me da yalodina tiko ki na noda veiyalayalati kei Koya?

Osea 10:12.E rawa ni ra taleitaka na gone me ra droinitaka e dua na kaloko ka tuvanaka na sala eso e rawa ni ra vakasaqara kina na Turaga ena veigauna duidui eso ena loma ni siga.

Joeli 2:12–13.Me vukea nomudou veivosakitaka vakamatavuvale na Joeli 2:12–13, sa rawa mo biuta e dua na iyaloyalo ni iVakabula ena dua na yasa ni rumu kei na vosa ivalavala ca ena yasana veibasai. Sureti ira na lewe ni matavuvale me ra veivukevuketaka nodra raica yani na ivakatakilakila oti mera qai rai yani vua na iVakabula ni ra wasea na veika e rawa ni vukei keda me da gole Vua “ena [yalodra].taucoko.” Vakayaloqaqataki ira na lewe ni matavuvale me ra vakasamataka na ituvaki kece ni nodra bula, oka kina na itaviqaravi, cakacaka, na vuli, kei na veimaliwai.

Joeli 2:28–29.Na cava e rawa ni ibalebale me “sovaraki mai” vei keda na Yalotabu? Sa rawa mo vakaraitaka oqo ena nomu sova e dua na bilo wai ka qai veidutaitaka ena dua na turu se me drodro.

Me baleta na ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Bau Mai Vei Jisu,” Sere ni Lotu, naba 64.

Vakatorocaketaki ni Noda Veivakavulici

Vakavulica na ivunau. “Kua ni calata e dua na madigi mo soqoni ira vata na gone mera vulica na ivakavuvuli i Jisu Karisito. E kunekune dredre na ka oqori ni vakatauvatataki kei na sasaga ni vunica” (HenryB. Eyring, “Na Kaukauwa ni Kena Vakavulici na iVunau,” Ensign, Me 1999, 74).

Sa tucake tu o Jisu e katuba

Lako mai Vei Au, mai vei Kelly Pugh