e rarama na matai i Jisu ena kadrala ena loma ni rumu butobuto

Madrai ni Bula, mai vei Chris Young

14–20 ni Noveba

Emosi; Opetaia

“Dou Vakasaqarai Jiova, Mo Dou Bula”

Na Yalo Tabu e rawa ni dolava na nomu vakasama kei na yalomu ki na itukutuku ena vosa ni Kalou ka sa baleti iko sara ga. Na cava o nanuma e vinakata na Turaga mo vulica ena macawa oqo?

Vola na Veika o Vakauqeti kina

Sa digitaki ira na kawa i Eparaama na Kalou me ra Nona tamata ni veiyalayalati me rawa ni ra “veivakalougatataki” vei ira na tamata kecega (raica na Ai Vakatekivu 12:2–3). Ia, ena gauna ni nona veiqaravi vakalotu o Emosi, e vuqa vei ira na tamata ni veiyalayalati era a vakalolomataki ira na dravudravua ka vakaweleni ira na parofita, ka vakavuna me ka wale ka sega ni vakaibalebale na nodra sokalou (raica na Emosi 2:6–16). E dina, era sa cala talega na veimatanitu wavoliti ira ena ivalavala ca levu (raica na Emosi 1; 2:1–5), ia e sega ni iulubale oya vei ira na tamata ni Kalou (raica na Emosi 3:2). Sa qai tala mai na Kalou e dua na ivakatawa mai vei Juta na yacana o Emosi me vunautaka na veivutuni ki na Matanitu o Isireli. E muri, a qai tukuna talega na Kalou mai vua na parofita o Opetaia ni dina ga ni sa vakarusai na Matanitu i Juta, ena vakasoqoni ira ka vakalougatataki ira tale na nona tamata na Turaga. Era a lako tani mai vua na Turaga na tamata ni veiyalayalati, e rau vakadinadinataka na parofita, ia era na sega ni biu tani tu me tawamudu. Ni vakatakila na Kalou na Nona veika vuni vei ira na Nona italai o ira na parofita (raica na Emosi 3:7), e rawa ni da kila mai kina ni oya e ivakatakilakila ni sa vinakata tikoga o Koya me vukei keda me da bulataka na veiyalayalati eda a cakava vata kei Koya.

Me baleta na ikuri ni vola i Emosi kei na Opetaia, raica na “Amos” kei na “Obadiah” ena Bible Dictionary.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Emosi 3:1–8; 7:10–15

E dau vakatakila mai na Turaga na dina mai vei ira na Nona parofita.

Ena Emosi 3:3–6, a vakaraitaka kina na parofita o Emosi e vica na ivakaraitaki ni inaki kei na revurevu: baleta ni sa kunea na kena na laione, sa domoilevu na laione; baleta ni sa tudaitaki vakavinaka e dua na dai ni manumanu vuka, sa qai coko kina na manumanu vuka. (Me kilai tiko ni Vakadewa i Josefa Simici baleta na tikina e 6, na vosa “vakayacori” sa veisautaki me “kilai” [ena Emosi 3:6, ivakamacala e rab].) Ena tikina e 7 – 8, e a vakayagataka kina o Emosi na vakasama oqo ki vei ira na parofita. Na cava e vakavuna na nona parofisai e dua na parofita? Na cava tale o vulica me baleti ira na parofita ni o wilika tiko na Emosi 7:10–15? Vakasamataka vakatitobu na vuna o vakavinavinaka kina ni Turaga e sa “vakaraitaka mada ga na nona vosa vuni vei ira na nona italatala na parofita” (Emosi 3:7). Na cava e vakatura vei iko na dina oqo me baleta na Kalou?

Raica talega na Vunau kei na Veiyalayalati 1:38; 21:4–8; 35:13–14.

Emosi 4:5

“Dou vakasaqarai Jiova, mo dou bula.”

Ni o wilika na Emosi 4:6–13, raica na lewa a solia na Turaga vei ira na kai Isireli. Na cava era vakatura na veitikina oqo me baleta na ka a nuitaka na Turaga ni na yaco ni oti na veika oqo? (raica talega na Ilamani 12:3). Vakasamataka mada e dua na veivakatovolei walega oqo o sa sotava. Me vaka ni sega ni dau vakavuna na Kalou na nomu vakatovolei, vakasamataka vakatitobu na kena rawa ni solia vei iko na madigi mo vakasaqarai Koya kina.

Wilika na Emosi 5:4, 14–15, ka vakasamataka vakatitobu na sala sa dau “yalololoma” kina na Turaga “(tikina e 15) vei iko ena nomu a vakasaqarai Koya, ena gauna mada ga ni nomu vakatovolei.

Raica talega na Donald L. Hallstrom, “Gole Vua na Turaga,” Ensign se Liaona, Me 2010, 78–80.

Emosi 8:11–12

Na vosa ni Turaga ena rawa ni vakaceguya na via kana kei na via gunu vakayalo.

Eda dau sotava kece na gauna ni via kana kei na via gunu vakayalo, ia e sega ni gadrevi vei keda me da “veiseyaki mai na wasawasa e dua ki na wasawasa tani” (Emosi 8:12) me da vakasaqara kina e dua na ka me vakacegui keda. Eda sa kila tu na ka ena vakaceguya na via kana vakayalo oqo, ka da sa vakalougatataki ena vosa ni Turaga ena vuqa na gauna. Ni o wilika na Emosi 8:11–12, vakasamataka na vuna e vakatauvatani vinaka kina na lauqa ni bula ki na bula e sega kina na vosa ni Kalou. Na ikuri ni veivakararamataki cava o raica ena Maciu 5:6; Joni 6:26–35; 2 Nifai 9:50–51; 32:3; Inosi 1:4–8?

Raica talega na Jeffrey R. Holland, “Sa Vakasinaiti Ira na Via Kana ena Veika Vinaka,” Ensign, Nove. 1997, 64–66; Ulutaga Vakosipeli, “Apostasy,” topics. ChurchofJesusChrist.org.

era tucake na ilawalawa itabagone ena mata ni valetabu

Sa rawa me da ivakabula ena Ulunivanua o Saioni ena noda vakayacora na cakacaka ni valetabu kei na tuva kawa.

Opetaia 1:21

O cei era sa “ivakabula … ena ulunivanua o Saioni”?

A solia o Peresitedi Gordon B. Hinckley e dua na ivakadewa ni malanivosa “ivakabula in ulunivanua o Saioni,” ka semata na malanivosa oya ki na cakacaka ni valetabu kei na tuva kawa: “[Ena valetabu] eda sa ivakabula dina ena Ulunivanua o Saioni. Na cava na kena ibalebale oqo? Me vaka ga na nona a solia na Nona bula na noda Dauveivueti me isoro veisosomitaki vei ira na tamata kecega, ia ni sa cakava oqo sa yaco kina me noda iVakabula, sa vakakina vei keda, ena dua na ivakarataki lailai, ni da vakaitavi ena cakacaka veisosomitaki ena valetabu, eda sa ivakabula vei ira era tiko ena yasana kadua ka sega ni dua na sala me ra toso kina vakavo ga kevaka e dua na ka e caka ena vukudra mai vei ira era tiko e vuravura” (“iOtioti ni Vosa, “ Ensign se Liaona, Nove. 2004,105).

ivakatakilakila ni vuli vakamatavuvale

Na Vei Vakasama Me Baleta na Vuli iVolanikalou Vakamatavuvale kei na Lotu Vakamatavuvale

Emosi 3:7Sa rawa mo railesuva e vica na itukutuku sa oti mai vua na Peresitedi ni Lotu ka veitalanoataka na veika sa vakatakila tiko na Turaga ki na nomu matavuvale mai vua. Na cava e bibi kina me tiko e dua na parofita me liutaka tiko na Lotu? Eda sa mai kila vakacava ni sa parofita dina o koya? Na cava eda sa cakava tiko me da muria kina na nona ivakasala?

Emosi 5:4.Sa rawa ki na nomu matavuvale me bulia e dua na ivolakabi ka volai toka kina na tikina oqo ka me vakaliligi toka ena nomudou itikotiko. Na cava na ibalebale ni me da vakasaqara na Turaga”? Eda na vakasaqarai Koya vakacava? Na veivakalougatataki cava soti eda na ciqoma ni da cakava oqo? Sa rawa mo sureti ira na lewe ni matavuvale me ra wasea ka veitalanoataka eso tale na malanivosa e vakavulica na vakasaqara na Turaga, me vaka na Maciu 7:7–8; Ica 12:41; kei na Vunau kei na Veiyalayalati 88:63.

Emosi 8:11–12.Era na rairai taleitaka beka na gone me ra matanataka na malanivosa ena vei tikina oqo. Ni sa walokai se karamaca na yagoda, na cava beka eda na cakava? Ni sa walokai se karamaca na yaloda, na cava beka eda na cakava? Sa rawa talega mo sarava na vidio “The Great Apostasy” (ChurchofJesusChrist.org) ka veitalanoataka na sala e vakaceguya kina na noda via kana vakayalo na Vakalesuimai ni kosipeli.

Opetaia 1:21.Na cava e rawa ni ibalebale ni “ivakabula … ena ulunivanua o Saioni”? (Me baleta e dua na kena ivakamacala, raica na itukutuku mai vei Peresitedi Gordon B. Hinckley ena “Vakasama ni Vuli iVolanikalou ni Tamata Yadua.”) O cei vei ira na noda qase e liu ena na gadreva na cakacaka vakalotu ni veivakabulai? Na cava eda na rawa ni cakava me da vukei koya kina?

Me baleta na ikuri ni tukutuku ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Turaga Keitou Vuabale,” Sere ni Lotu, naba 10.

Vakavinakataki ni Vuli ni Tamata Yadua

Vakayagataka na sere ivakatagi me sureta na Yalo ka vulica na ivunau. Na rogoci kei na wiliki ni dua na serenilotu ena vukei iko mo vulica na ivakavuvuli ni kosipeli. Me kena ivakaraitaki, e rawa ni o rogoca se wilika na “Turaga Keitou Vuabale” (Sere ni Lotu, naba 10) me vakauqeta na nodra vakabauti cecere na parofita bula. (Raica na Veivakavulici ena iVakarau ni iVakabula, 22.)

Valetabu e Santo Domingo Dominican Republic

Valetabu e Santo Domingo Dominican Republic