“3–9 ni Okotova. Aisea 58–66: ‘Ena Lako Mai ki Saioni na iVakabula,’” Lako Mai, Mo Muri Au—Me Baleti Ira na Tamata Yadua kei na Matavuvale:Veiyalayalati Makawa 2022 (2021)

“3–9 ni Okotova. Aisea 58–66,” Lako Mai, Mo Muri Au—Me Baleti Ira na Tamata Yadua kei na Matavuvale: 2022

iVakatakilakila

E veivakavulici o Jisu e valenilotu

O Jisu ena valenilotu e Nasareci, mai vei GregK. Olsen

3–9 ni Okotova

Aisea 58–66

“Ena Lako Mai ki Saioni na iVakabula”

Ni o vulica na Aisea 58–66, vakasamataka na vosa i Aisea kei na sala e kauta mai kina vei iko na reki kei na inuinui ni veisiga ni mataka.

Vola na Veika o Vakauqeti kina

Ena gauna taumada ni Nona cakacaka vakalotu e vuravura, a sikova o Jisu Karisito e dua na valenilotu e Nasareci, na koro a susugi cake kina. A tucake o Koya me wilika na ivolanikalou, ka dolava na iVola i Aisea, ka wilika na ka eda kila ena gauna oqo me Aisea 61:1–2. A qai tukuna, “Ena siga oqo sa vakayacori e daligamudou na ivolatabu oqo.” Oqo a dua na nona ivakaro dina na iVakabula ni o Koya e sa Lumuti, ka na “vakabulai ira sa yaloraramusumusu” ka “vunautaka na veisereki vei ira na bobula” (raica na Luke 4:16–21). A vakayacori vakaidina na ivolanikalou oqo ena siga o ya. Ia, me vakataki ira e vuqa tale na parofisai i Aisea, sa yaco tikoga na kena vakavotukanataki ena noda gauna oqo. Sa tomana tikoga na iVakabula na nona veivakabulai vei ira kecega sa ramusu na yalodra ka ra lako mai Vua. Era sa lewe levu sara na bobula me vunautaki kina na veisereki. Ka sa tiko e dua na mataka lagilagi me da vakavakarau tiko kina—na gauna ena “bulia [kina na Turaga] na lomalagi vou kei na vuravura vou” (Aisea 65:17) ka “vakatubura … nai valavala dodonu kei na vakavinavinaka e na matadra na veimatanitu kecega” (Aisea 61:11). Ni da wilika na Aisea ena dolava na matada ki na veika sa vakayacora oti na Turaga, na veika sa cakava tiko o Koya, kei na veika ena cakava vei ira na Nona tamata.

iVakatakilakila

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Aisea 58:3–12

Na lolo e kauta mai na veivakalougatataki.

Vei ira na kai Isireli Makawa, na veitikina oqo e tukuna tiko ni lolo e a dua na icolacola levu ka sega ni ka ni veivakalougatataki. E vuqa vei keda e rawa ni semati ki na vakanananu o ya ena so na gauna. Kevaka o vinakata mo kunea e levu cake na ibalebale kei na inaki ni nomu lolo, wilika na Aisea 58:3–12 mo raica kina na isaunitaro ni Turaga ki na taro “Na cava na vuna eda lolo kina?” Ena veika o sa sotava, ena rawa vakacava ki na lolo me “sereka na ivesu sa sega ni dodonu” ka “musuka kece talega nai vua”? (Aisea 58:6). E kauta mai vakacava vei iko na lolo na veivakalougatataki e vakamacalataki tiko ena Aisea 58:8–12? E mana vakacava na Aisea 58:3–12 ena ivakarau ni nomu nanuma me baleta na lolo?

Ena nona itukutuku, “Sa Sega Li ni Vakaoqo na Lolo Kau sa Vinakata?” (Liaona, Me 2015, 22–25), a wasea o Peresitedi HenryB. Eyring e vica na ivakaraitaki eso era sa vakalougatataki kina na tamata ena lolo kei na isolisoli ni lolo. O sa sotava oti vakacava na veivakalougataki vata qo ena nomu bula?

Raica talega na Ulutaga Vakosipeli, “Na Lolo kei na iSolisoli ni Lolo” (topics.ChurchofJesusChrist.org).

Aisea 59:9–21; 61:1–3; 63:1–9

O Jisu Karisito sa Noqu iVakabula ka Dauveivueti.

Ena Aisea 58–66 o na kunea kina e vuqa na idusidusi eso me baleta tiko na ilesilesi ni veisorovaki i Jisu Karisito. Oqo e vica na kena ivakaraitaki, vata kei na so na taro me vukei iko mo vakasamataka vakatitobu.

Aisea 59:9–21. O na vakalekalekataka beka vakacava na kedra ituvaki vakayalo na tamata era vakamacalataki tiko ena tikina e 9–15? Na cava e vakauqeti iko me baleta na ivakamacala ni “dauveisorovi” ena tikina e 16–21 kei na veiyalayalati e vakayacora o Koya kei ira era gole Vua?
Aisea 61:1–3. Sa vakalougatataki iko vakacava o Jisu Karisito ena veisala e vakamacalataki tiko ena veitikina oqo? Na “itukutuku vinaka” cava e sa kauta mai vei iko o Koya? E sa solia vakacava vei iko o Koya na totoka me isosomi ni dravusa?
Aisea 63: 7–9. Na “yalololoma levu i Jiova” cava e rawa ni o tukuna? Na yalololoma cava vua na iVakabula era vakauqeta na veitikina oqo ki yalomu?

Na itukutuku cava soti tale me baleta na iVakabula o raica ena Aisea 58–66?

Raica talega na Mosaia 3:7; Vunau kei na Veiyalayalati 133:46–53.

Aisea60; 62

“Ko Jiova ga ena nomu rarama ka sega ni mudu.”

NaAisea 60 kei na 62 e tukuna tiko na rarama kei na butobuto, na mata kei na rai, me vakavulica na sala ena vakalougatataki vuravura kina na kosipeli i Jisu Karisito ena veisiga mai muri. Vakaraica vakatabakidua na ivakavuvuli oqo ena Aisea 60:1–5, 19–20; 62:1–2. Ni o wilika na vei wase oqo, vakasamataka vakatitobu na sala sa vakasokomuni ira tiko kina na Luvena na Kalou mai na butobuto ki na Nona rarama. Na cava na nomu ilesilesi ena cakacaka oqo?

Raica talega na 1Nifai 22:3–12; 3Nifai 18:24; Vunau kei na Veiyalayalati 14:9; BonnieH. Cordon, “Me Ra Raica,” Liaona, Me 2020, 78–80.

Aisea 64:1–5; 65:17–25; 66

Na Karisito ena lewai vuravura ena gauna ni Mileniumi.

A vosa o Aisea me baleta na siga “sa guileca [kina] na ka rarawa e liu” (Aisea 65:16). Me vaka ni sa vakavotukanataki vakavica na parofisai oqo, ena kena vakasama taucoko, ena yaco ga mai na siga o ya—ena lesu mai o Jisu Karisito ki vuravura ka tauyavutaka e dua na gauna ni vakacegu kei na ivalavala dodonu e vakatokai na Mileniumi. E vakamacalataka o Aisea na siga mai muri oqo ena Aisea 64:1–5; 65:17–25; 66. Raica na vakawasoma ni nona vakayagataka na vosa me vaka na “reki” kei na “marau.” Vakasamataka vakatitobu na vuna e na siga ni reki kina vei iko na lesu mai ni iVakabula. Na cava o rawa ni na vakayacora mo vakavakarau kina ki na Nona lako mai?

Raica talega na Yavu ni Vakabauta 1:10; Russell M Nelson, “Na Vunilagi ni Lotu: Vakarautaki na Vuravura me Baleta na iKarua ni Nona Lako Mai na iVakabula,” Ensign, Epe. 2020, 13–17.

iVakatakilakila

ivakatakilakila ni vuli vakamatavuvale

Vei Vakasama me baleta na Vuli iVolanikalou Vakamatavuvale kei na Lotu Vakamatavuvale

Aisea 58: 3–11.Sa rawa vei ira na lewe ni matavuvale me ra kila vakavinaka cake na itukutuku nei Aisea me baleta na lolo kevaka era matanataka na mataqali lolo e vakamacalataki ena Aisea 58:3–5 kei na mataqali lolo e vakamacalataki ena Aisea 58:6–8. E rawa vakacava ni da cakava na noda lolo me vaka “na lolo … sa vinakata [na Kalou]”? Na veivakalougatataki cava soti eda sa raica mai na lolo?

Aisea 58:13–14.Na cava na kedrau duidui na “muria … na ka ko sa vinakata” kei na kunea na “rekitaki Jiova” ena siga ni Vakacecegu? E rawa vakacava ni da cakava na siga ni Vakacecegu me “ka e rekitaki”?

Aisea 60:1–5.Ni o wilika na Aisea 60:1–3, sa rawa ki na lewe ni matavuvale me ra waqaca e dua na cina ni sa tukuni mai na tikina me baleta na rarama ka bokoca laivi ni sa tukuni mai na tikina me baleta na butobuto. E yaco vakacava me vu ni rarama vei keda na kosipeli i Jisu Karisito? Na cava e sa raica oti tu mai o Aisea ni na yaco ni ra wasea na tamata na rarama ni kosipeli? (raica na Aisea 60:3–5).

Aisea 61:1–3.E sa vakavotukanataka vakacava na iVakabula na parofisai nei Aisea ena vei tikina oqo? Sa rawa mo sureti ira na lewe ni matavuvale me ra vakasaqara na iyaloyalo ni iVakabula era nanuma ni ra vakaraitaka tiko na ivakarau eso oqo ni Nona kaulotu (na iyaloyalo e rawa ni kune ena mekasini ni Lotu se na iVola ni iYaloyalo Vakosipeli). E rawa talega ni o lagata na sere me baleta na ivakarau e vakalougatataki keda kina na iVakabula, me vaka na “Au Vakilai Koya” (iVolanisere ni Gonelalai, 42).

Me ikuri ni vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Me Baleta na Lalai.

Sere e vakaturi: “Ena Lesu Tale Beka Mai,” iVolanisere ni Gonelalai, 46.

Vakavinakataki ni Vuli ni Tamata Yadua

Vakarautaka na vanua e vakavolivoliti iko. Na veika e vakavolivoliti keda e rawa ni tara na noda ivakarau ni vuli. Vaqara e dua na vanua mo vulica kina na ivolanikalou mo rawa ni vakila na veivakauqeti ni Yalo. (Raica na Veivakavulici ena iVakarau ni iVakabula, 15.)