“5–11 ni Sepiteba. Aisea 1–12: ‘Sa Noqu iVakabula na Kalou’” Lako Mai, Mo Muri Au—Baleta na Matawilivola ni Siga Tabu: Veiyalayalati Makawa 2022 (2021)
“5–11 ni Sepiteba. Aisea 1–12,” Lako Mai, Mo Muri Au—Baleta na Matawilivola ni Siga Tabu: 2022
Tukuna Rawa Mai Liu na Parofita ko Aisea na Nona Sucu na Karisito, mai vei Harry Anderson
5–11 ni Sepiteba
Aisea 1–12
“Sa Noqu iVakabula na Kalou”
Vakasamataka na sala eso mo vakayaloqaqataki ira kina na lewe ni kalasi me ra wasea na veika era vakila kei na kila-ka era ciqoma ena nodra vuli yadua se vata kei na matavuvale.
Vola na Veika o Vakauqeti Kina
Sureta na Veiwasei
Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e solia na vakasama eso me kilai matata kina na volavola nei Aisea. Sa rawa mo sureta na lewe ni kalasi mera wasea e dua vei ira na vakasama oqo, se dua tale na ka, a vukei ira mera vulica na Aisea 1–12.
Vakavulica na iVunau
Ena vakayacori kece sara na vosa nei Aisea.
-
Ena nona vosa baleti Aisea, a vakavulica na iVakabula ni “na ka kecega e a vosataka ko koya, era sa yaco oti se era na qai yaco, me vaka ga na vosa a vosataka” (3Nifai 23:3). Sa rawa mo tekivu veivosakitaki Aisea ena nomu wasea na ivolanikalou oqo kei na itukutuku ena “iKuri ni iVurevure.” Mo qai vola ena papa ni volavola Na gauna i Aisea, Na Veiqaravi ni iVakabula ena bula vakayago, kei Na veisiga e muri oqo. Sa rawa mera raica na lewe ni kalasi na veitikina eso ena Aisea 1–12 e rawa ni vakayagataki ena dua se sivia na malanivosa ena vava ni volavola (me ivakaraitaki, Aisea 2:1–5; 7:1–7; 7:10–14; 9:2–7; 10:20; 11:10; 12:1). Na cava eda kalougata kina ni tu vei keda nikua na vei parofisai oqo?
“Dou kua ni caka ca.”
-
Sa rawa mo kerei ira na lewe ni kalasi mera wasea na veika era sa vulica mai na nodra vuli yadua kei na nodra vulica vakamatavuvale na Aisea 1, 3,5 me baleta na ituvaki vakayalo ni matanitu o Juta ena gauna i Aisea. E rawa beka ni ra raicalesu na wase oqo ka vola e dua na ituvatuva ni veitikina kei na vei ituvaki era vakamacalataka. Na itukutuku cava ni vakanuinui eda kunea ena veiwase oqo? (Kevaka e gadrevi, sa rawa mo vagolei ira na lewe ni kalasi ki na Aisea 1:16–20, 25–27; 3:10.) Ke tiko vei Juta ena gauna makawa e dua nona itukutuku vei keda, nai tukutuku cava beka?
-
Sa rawa vei ira na lewe ni kalasi me ra raitayaloyalotaka ni ra bula tiko mai Jerusalemi ena nona a parofisai o Aisea. E rawa ni o vakataroga e vica, taroga se cava a tukuna o Aisea vata kei na veika era vakila. Me ivakaraitaki, e rawa ni o kerei ira na lewe ni kalasi me ra veivosakitaka na vosa nei Aisea ka tiko ena Aisea 1:16–20; 3:16–26; 5:20–23. Na cava e kaya o Aisea ka vakauqeti keda meda veivutuni?
Ena cakava na Kalou e dua na cakacaka cecere ena veisiga maimuri.
-
Me vukei ira na lewe ni kalasi me ra vakasamataka vakatitobu na kena sa mai yaco na parofisai nei Aisea me baleta na iotioti ni gauna, sa rawa mo digitaka eso na tikina mai na Aisea 2; 4; 11–12 (me vaka na Aisea 2:2–3; 4:5–6). Qai kerei ira na lewe ni kalasi mera raica na vu ni vosa ka se bera ni yaco ena veitikina oqo (me vaka na “ni na” se “ni na lako yani”). Sureti ira mera sosomitaka eso na veitikina oqo kei na vu ni vosa ka sa yaco tiko (me vaka na “ni sa” se “ni sa lako yani”). Sa mai vakayacori vakacava ena noda bula na vei parofisai oqo? Na cava na vuna bibi meda kila kina na vei parofisai oqo?
-
E rawa ni o vakamacalataka ni gauna a sikovi Josefa Simici kina o Moronai ena 1823, a cavuta o koya na Aisea 11 ka kaya ni sa voleka ni vakayacori (raica na Josefa Simici—Ai Tukutuku 1:40; raica talega na Vunau kei na Veiyalayalati 113:1–6). Sa rawa vei ira na lewe ni kalasi mera wilika e vica na tikina mai na Aisea 11 (me vaka na tikina e 6–12) ka vakalekalekataka ena nodra vosa ni veika a raica o Aisea. Na cava na noda itavi ena kena vakavotukanataki na parofisai oqo?
“Ni sa sucu mai e dua na gone me noda, sa soli mai vei keda edua na gonetagane” (Aisea 9:6).
O Aisea e a parofisaitaki Jisu Karisito.
-
Sa rawa mo tarogi ira na lewe ni kalasi ena veika era sa vulica baleti Jisu Karisito mai na malanivosa me vaka na Aisea 7:14; 8:13–14; 9:2, 6–7. Me kena ivakaraitaki, na cava e itutu vinaka kina ni iVakabula na Imanueli? (raica na Maciu 1:23). E sa mai i “Vakavuvuli” se “Tui ni Sautu” vakacava vei keda o Jisu Karisito? Sa rawa talega vei ira na lewe ni kalasi mera wasea na veimalanivosa tale eso era raica ena Aisea 1–12 ka vakananumi Jisu Karisito vei ira. Na cava e vakavulica vei keda na veimalanivosa eso oqo me baleti Koya?
-
Ni bera na kalasi, sa rawa mo sureti ira na lewe ni kalasi mera kauta mai e dua na iyaloyalo kei Karisito era nanuma ni matataka e dua na ivakamacala ni iVakabula ka tiko ena Aisea 7–9. Ena gauna ni kalasi, solia na gauna mera vakaraitaka kina na iyaloyalo era kauta mai ka vakamacalataka na kena isema ki na vosa i Aisea.
iKuri ni iVurevure
Na parofisai nei Aisea e rawa ni levu na sala ni kena vakayacori.
O Peresitedi Dallin H. Oaks e vakavulica: “Na iVola i Aisea e tu kina e vuqa na parofisai ka vaka me levu na sala ni kena vakayacori. E dua e vaka me ra okati kina na tamata ena gauna i Aisea se na vei ituvaki ena i itabatamata ka tarava. E dua tale na kena ibalebale, vakavuqa e ivakatakarakara, ka dusia tiko na veika a yaco ena ituvuka ni gauna, ena nona a vakarusai o Jerusalemi kei na nodra duiveiseyaki na kena tamata ni oti na nona vakamatei na Luve ni Kalou. E dua tale na ibalebale se na vakayacori ni parofisai vata oqori e vaka me semati ki na veika ena yaco ena Lesu Vakarua Mai ni iVakabula. Na dina ni levu vei ira na parofisai oqo e rawa ni vuqa tu na kedra ibalebale sa vakadeitaka na bibi ni noda vakasaqara na ivakatakila mai vua na Yalo Tabu me vukei keda ena noda vakadewataki ira” (“Scripture Reading and Revelation,” Ensign, Jan. 1995,8).
Vakatorocaketaki ni Noda Veivakavulici
Sureta na Yalo Tabu. “Na sere ivakatagi vakalou, na ivolanikalou, nodra vosa na parofita edaidai, na vakaraitaki ni loloma kei na ivakadinadina, kei na veigauna ni vakanananu vakatitobu sa rawa kece me sureta mai na Yalotabu” (Veivakavulici ena iVakarau ni iVakabula,10).