Veikau Tabu, mai vei Brent Borup

12–18 ni Sepiteba

Aisea 13–14; 24–30;35

“Na Cakacaka Vakurabui Dina Sara”

Ni bera ni ko vukea eso mera kila na dina e tiko ena ivola i Aisea, e gadrevi mo na kila taumada vakai iko na dina. Ni o sa wilivola ena macawa oqo, vakasamataka na dina o vakila ni vakauqeti iko mo vakabibitaka ena kalasi.

Vola na Veika o Vakauqeti Kina

Sureta na Veiwasei

Ni gadrevi mera vakayaloqaqataki na lewe ni kalasi mera wasea na veika era sa vulica mai vei Aisea, e rawa ni o tarogi ira ena nodra sauma vakacava e dua ka kaya, “Na ivola i Aisea e sa rui dredre sara me kilai.” Na cava e sa vukei keda meda raica na ibalebale ni ivakavuvuli nei Aisea? Na tiki ni ivolanikalou cava e sa vakauqeti keda?

Vakavulica na iVunau

Aisea 24:21–23; 25:6–8; 26:19; 28:16

Na volavola i Aisea e dusimaki keda vei Jisu Karisito.

• Me vakataki Nifai ga, sa rawa vei ira na lewe ni nomu kalasi mera rekitaka na ivakadinadina i Aisea baleti Jisu Karisito (raica na 2Nifai 11:2). E rawa ni o kerei ira mera wasea e dua na tikina era a raica ena macawa oqo ka a vakavulica vei ira me baleta na iVakabula. Se e rawa ni o sureti ira na lewe ni kalasi me ra wasea na veika era vulica me baleti Jisu Karisito mai na Aisea 24:21–23; 25:6–8; 26:19; 28:16 se tikina tale eso o a kunea ena nomu vuli. Na cava e yaga bibi kina vei keda na dina oqo?

  

  E Lako Tale Mai me Lewa ka Veiliutaki, mai vei MaryR. Sauer

Aisea 24:1–5; 28:1–8; 29:7–10; 30:8–14

Na Vukitani e kena ibalebale na gole tani mai vua na Turaga kei ira na Nona parofita.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura me ra vakasamataka vakatitobu eso na vosa vakaibalebale e dau vakayagataka o Aisea me vakamacalataka kina na isau ni gole tani mai vua na Turaga kei na cakitaki ira na Nona parofita. Kerei ira na lewe ni kalasi me ra wasea na veika era sa vulica. Se e rawa ni o sureti ira me ra railesuva e dua vei ira na tikina oqo: Aisea 24:1–5; 28:7–8; 29:7–10; 30:8–14. Mai na veika era sa wilika, sa rawa me ra vakacavara na iyatuvosa oqo: “Kevaka eda sa vuki tani mai vua na Turaga, eda sa tautauvata…” Na cava eda rawa ni cakava meda yalodina tikoga kina vua na Turaga ka levea na vukitani? (Raica na “iKuri ni iVurevure” ena so na vakatutu.) E vakalougatataki ira vakacava na Turaga o ira era yalodina tiko Vua?

• Me tekivuna e dua na veivosaki me baleta na ivakarau kei na itovo e rawa ni muataki keda ki na vukitani, sa rawa mo sureta na lewe ni kalasi mera vakasaqaqara ena Aisea 24:1–5; 28:1–8; 29:7–10; 30:8–14. Kerei ira mera vakasaqara na veika era dau vakasamataka ka cakava na tamata ena gauna i Aisea. Cakava e dua na ivakatakilakila ni ivakasala ena vava ni volavola ka tukuna tiko iVakasala: Na ivakarau ni vakasama kei na itovo oqo ena rawa ni veimuataki ki na vukitani. Sa rawa ki na lewe ni kalasi mera vola ena papa ni volavola na veika era sa kunea ena veitikina oqori. Solia vei ira e dua na madigi me ra wasea na sala era taqomaki ira kina se na nodra matavuvale mai na vukitani.

Aisea 29:13–24; 30:18–26;35

Na Turaga sa rawa ni vakalesuya mai na veika e yali se kavoro.

• Oqo e dua na taro mo vola ena vava ni volavola ka na rawa ni vukei ira na lewe ni kalasi mera vakasamataka vakatitobu na Aisea 29: Na sala cava e veiwekani kina na volavola nei Aisea ki na Vakalesui mai ni kosipeli ena noda gauna oqo? Vakayaloqaqataki ira me ra vakasamataka na taro oqo ni ra wilika ena vakadirorogo na Aisea 29:13–24. Kevaka era gadreva na veivuke, e rawa talega me ra railesuva na veitikina oqo: 2Nifai 27:6–26; Josefa Simici—Ai Tukutuku 1:17–19, 63–65. Ni oti na nodra veivosakitaka na taro ena vava ni volavola, e rawa ni ra veivosakitaka na vuna na “veivakurabuitaki” kei na “dina sara” (Aisea 29:14) era vosa vinaka me vakamacalataka na Vakalesuimai ni kosipeli. Na cava eda vulica me baleta na Veivakalesuimai mai ena “Na Vakalesuimai ni Taucoko ni Kosipeli i Jisu Karisito: A iVakaro ni Ruanadrau na Yabaki ki Vuravura”? (ChurchofJesusChrist.org).

• Wase 30 kei na35 ni Aisea e tu kina eso na malanivosa ka rawa ni vakauqeta na vakabauta e cecere cake ena kaukauwa ni Turaga me vakalougatataki ira era gole Vua. Me vukei ira na lewe ni kalasi mera kila na veimalanivosa oqo, sa rawa mo sureti ira mera vulica talega na Aisea 30:18–26 se Aisea 35. Kerei ira mera wasea na vosa se malanivosa era sa raica ka rawa ni vukea e dua me gole vua na Turaga me vueti.

iKuri ni iVurevure

Yalodina tiko vua na Turaga kei na Nona Lotu.

E solia o Peresitedi M. Russell Ballard na ivakasala oqo me vukei keda me da yalodina tikoga kivua na Turaga kei na nona Lotu:

Eda gadreva me yaco tikoga na saumaki mai ena noda vakalevutaka cake na noda vakabauti Jisu Karisito kei na noda yalodina ki na Nona kosipeli ena noda bula taucoko—sega ni vakadua ga ia me veigauna [raica na Alama 5:26].…

“…Na vosa ni Turaga e kune ena ivolanikalou kei na nodra ivakavuvuli na iapositolo kei na parofita. Era vakarautaka vei keda na ivakasala kei na idusidusi, kevaka e muri, era na vaka na iqaloqalo vakayalo ka na vukei keda me da kila na ivakarau ni tautauri ena ligamu ruarua.…

Me ikuri ni kena tarai cake na ivakarau ni wili ivolanikalou yadua, eda na gadreva me da vakataki iratou na luvei Mosaia ka soli keda ‘vagumatua sara ena masumasu, kei na lolo’ [Alama 17:3]” (“Tikoga ena Loma ni Boto ka Tautauri Toka!” Liaona, Nove. 2014, 90–91).

Vakatorocaketaki Noda Veivakavulici

Vakaraitaka na yalodei ena kaukauwa ni nodra vuli. Eso ena nomu kalasi era dau sega ni lomadei ena nodra sasaga me ra vulica na kosipeli. Vakadeitaka vei ira ni ra saga mera vuli, ena vakavulici ira na Yalo Tabu. (Raica na Veivakavulici ena iVakarau ni iVakabula, 29–30.)