Na Vakalialiai i Karisito, mai vei Carl Heinrich Bloch

26 ni Sepiteba–2 ni Okotova

Aisea 50–57

“Sa Colata Ko Koya Na Noda Rarawa, ka sa Colata na Rarawa Ni Lomada”

Na sala bibi duadua ni vakavakarau ena veivakavulici o ya meda wilika ka vakasamataka vakatitobu na ivolanikalou. Na cava o vakila ka vulica ni o wilika na Aisea 50–57?

Vola na Veika o Vakauqeti Kina

Sureta na Veiwasei

Me uqeti ira na lewe ni kalasi me ra wasea na veika era sotava ena nodra wilika na Aisea 50–57, e rawa ni o vola ena papa e dua na iyatuvosa me vaka Na noqu vakabauti Jisu Karisito a vaqaqacotaki ena noqu wilika… Sureti ira na lewe ni kalasi mera wasea na sala mera na vakacavara kina na iyatuvosa.

Vakavulica na iVunau

Aisea 50–52

Sa ramase na veisiga ni mataka kivei ira na tamata ni Turaga.

• Oi keda kece sa dau tiko na gauna eda dau malumalumu kina. Me vukei ira na lewe ni kalasi mera vakararavi ki na kaukauwa ni Turaga, sa rawa mo lesi ira yadua mera wilika e vica na tikina mai na Aisea 51–52 ka wasea e dua na ka era sa kunea ka na vaqaqacotaka e dua e malumalumu se yalolailai. E rawa talega ni o dusia ni iVakabula ka tucaketale a tokaruataka eso na vosa nei Aisea vei ira na tamata e Amerika (raica na 3Nifai 20:32–45). Na cava e cavuta na iVakabula ena 3Nifai 20:30–34 ka vakuria meda kila vinaka na gauna ena yaco kina na vei parofisai oqo?

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatututaka na volai ni veika kece ena Aisea 50–52 ka sureta na Turaga vei ira na Nona tamata me ra cakava. Sa rawa vei ira na lewe ni kalasi mera wasea na veika era sa kunea ka veivosakitaka na ibalebale ni veisureti oqo. O na gadreva beka mo vakanamata ena veisureti ena Aisea 51:1–2, 6–8; 52:1–3, 9–11. E rawa vakacava meda cakacakataka na veisureti oqo? Sa rawa mo dusia ni Vunau kei na Veiyalayalati 113:7–10 e vakarautaka e dua na ivakamacala veivakauqeti ni Aisea 52:1–2. Na cava e vakaikuritaka ki na noda kila-ka na veivosa oqo?

Ena Vuku ni Loloma, mai vei dausivisivi Angela Johnson

Aisea 52:13–15; 53

Ko Jisu Karisito sa taura vei Koya na noda ivalavala ca kei na rarawa.

• Me vukei ira na lewe ni kalasi mera raitayaloyalotaka na vosa nei Aisea ena Isaiah53, e rawa ni o vakaraitaka e vica na iyaloyalo ni veika a yaco vakavolivolita na Veisorovaki i Jisu Karisito (raica na Gospel Art Book, nos. 56–60). Sa rawa mo qai kerei ira na lewe ni kalasi mera raica na veimalanivosa ena Aisea53 ka vakamacalataka na veika e yaco ena iyaloyalo. Na cava e vakavulica na vosa nei Aisea me baleta na nona vakararawataki ena vukuda na iVakabula? Na cava era vakatututaka me baleta na vuna a vakararawataki kina o Koya ena vukuda? Na cava era vakauqeta vei keda meda cakava na vei ivakavuvuli oqo?

• Me sureti na Yalo Tabu me vakadinadinataka na dina e vakavulici ena Aisea 52:13–15; 53, sa rawa mo kerei ira na lewe ni kalasi mera wilika lo na veitikina oqo ni ko vakatagitaka e dua na sere ni Lotu me baleta na Veisorovaki i Jisu Karisito. Sureti ira na lewe ni kalasi mera vakaraica na vosa se malanivosa era tiko ena ivolanikalou ka nanumi ni bibi sara. Mera qai wasea na veika era sa kunea kei na nodra nanuma baleta na iVakabula. Vakasamataka mo sureti ira talega na lewe ni kalasi me ra wilika na Mosaia 15:10–12, ena vanua e vakamacalataka kina o Apinatai na cava na ibalebale ni malanivosa na “nona kawa.” E vukei keda vakacava meda kila vinaka na Aisea 53:10?

Isaiah 54

Sa vinakata ko Jisu Karisito meda lesu tale yani ki Vua.

• Na vulici ni Aisea 54 ena rawa ni vakauqeti ira na lewe ni kalasi era dau yalolailai ena vuku ni nodra ivalavala ca se malumalumu. Sa rawa mo sureti ira na lewe ni kalasi mera vakasaqara ena wase 54 na veimalanivosa se veitikina e vakaraitaka na ivakarau ni yalo ni iVakabula me baleti keda. E vinakata vakacava o Koya meda vakila na noda ivalavala ca kei na malumalumu sa caka oti? E vinakata vakacava o Koya meda vakila me baleti Koya? Vakayaloqaqataki ira na lewe ni kalasi mera wasea na veika era vulica me baleti Jisu Karisito mai na iwase oqo. Na itukutuku nei Peresitedi Dieter F. Uchtdorf ena “iKuri ni iVurevure” ena rawa ni vakuria na nomuni veivosaki.

iKuri ni iVurevure

Ena vuku i Jisu Karisito sa rawa kina me noda na inuinui.

O Peresitedi Dieter F. Uchtdorf e vakavulica:

“Se mani vakacava sara na ituvaki ni kena vakacacani vakadua na noda bula. Se mani vakacava sara na damu vakula ni noda ivalavala ca, se noda yaloca titobu, noda galili, guilecavi, se kavoro ni yaloda. Wili kina o ira mada ga sa sega nodra inuinui, bula veilecayaki, ira era sa veicavilaki, vakayalia nodra dodonu, se vukitani mai vua na Kalou sa rawa mera tara vou tale.…

Oqo na itukutuku rekitaki ni kosipeli: ena vuku ni ituvatuva tawamudu ni bula marau e vakarautaka na Tamada Vakalomalagi kei na solibula tawamudu i Jisu Karisito, sa rawa meda sega walega ni vakabulai mai na keda ituvaki ni lutu ka vakalesui me savasava, ia sa rawa meda ulabaleta na vakasama ni tamata ka taukena talega na bula tawamudu ka vakaivotavota ena lagilagi ni Kalou e sega ni tukuni rawa.(“Ena Colati Iko e Tabana ka Kauti Iko i Vale,” Liaona, Me 2016,102).

Vakatorocaketaki ni Noda Veivakavulici

Mo bula kilikili ki na veidusimaki ni Yalo. Ni ko bulataka tiko na kosipeli, sa kilikili kina me nomu itokani na Yalo, o koya na qasenivuli vinaka duadua. Ni ko vakasaqara na veidusimaki ni Yalo Tabu, ena solia vei iko o Koya na vakasama, kei na vakananau, ka vakavure vakasama ena kena sotavi na nodra gagadre o vakavulici ira. (Raica na Veivakavulici ena iVakarau ni iVakabula, 5.)