Na Tagi nei Jeremaia na Parofita, dua na ceuceu mai na Koronivuli ni Nasareci

17–23 ni Okotova

Jeremaia 30–33; 36; Lele I Jeremaia 1; 3

“Ia Kau na Vukica Na Nodra Tagi mera Reki”

Vakasamataka vakatitobu na veivakauqeti o ciqoma ena nomu vulica vakai iko na Jeremaia kei na Lele I Jeremaia. Na veitikina cava e so mai na veiwase oqo o nanuma ni na vakaibalebale vakalevu sara vei ira o vakavulica?

Vola na Veika o Vakauqeti Kina

Sureta na Veiwasei

Me vukei ira na lewe ni kalasi me ra wasea na veika era vulica mai na nodra vulica na ivolanikalou, e rawa ni o vola ena papa ni volavola na malanivosa me vaka Au sa vulica ni…, Sa dua na noqu ivakadinadina me baleti na… se Au sa sotava… Sa rawa mera wasea na lewe ni kalasi e dua na ka mai na Jeremaia se Lele I Jeremaia me vakacavari kina na veiyatuvosa oqo.

Vakavulica na iVunau

Jeremaia 30–31; 33; Lele I Jeremaia 1:1–7; 3:1–5

Na Turaga ena kauti ira tani na Isireli mai na veivakabobulataki ka vakasoqoni ira vata.

• Na itukutuku ni inuinui ena parofisai nei Jeremaia e rawa ni solia vei ira na lewe ni kalasi na inuinui ena veika era dui sotava tiko. De na rawa ni veivosakitaka na nomu kalasi na ituvaki eso ka rawa ni vakavuna vei ira na tamata ena noda gauna oqo me ra vakila ni sega na nodra inuinui me vakataki ira na tamata ena gauna nei Jeremaia (raica Jeremaia 30:5; 31:15; Lele I Jeremaia 1:1–7; 3:1–5; kei na vosacavuti ena “iKuri ni iVurevure”). Mo qai wasei ira na lewe ni kalasi ki na tolu na ilawalawa ka sureta na ilawalawa yadua mera railesuva na Jeremiah 30; 31; kei na 33 me baleta na itukutuku e rawa ni kauta mai na inuinui vei ira na tamata nikua. Sa vukei keda vakacava na noda vakanuinui vua na Turaga ni na vukei keda meda vosota na veivakatovolei?

Jeremaia 31:31–34; 32:37–42

“A ra yaco me ra noqu tamata, ia, ka’u na yaco me’u nodra Kalou.”

• Na railesuvi ni Jeremaia 31:31–34; 32:37–42 e rawa ni vukea na nomu kalasi me vakasamataka vakatitobu na veiyalayalati era sa cakava. Dua na sala me vakauqeta na veivosaki me baleta na veitikina oqo, o ya me soli vei ira na lewe ni kalasi e vica na miniti mera wilika na veitikina oqo ka vola ena dua na tikinipepa e dua na taro era na via taroga ki na kalasi baleta na veika era sa wilika. Me kena ivakaraitaki, era na vinakata beka me ra veivosakitaka na ibalebale ni kena volai e yaloda na lawa ni Kalou (raica na Jeremaia 31:33) se na sala e vukei keda kina na veiyalayalati meda mai kila kina na Turaga (raica na Jeremaia 31:34). Sa rawa mo soqona vata na taro ka digitaka e vica me veivosakitaki vata. Na cava eda vulica mai na veitikina oqo ka vakauqeti keda meda gugumatua ena vakayacora na noda veiyalayalati?

Na ivolanikalou e rawa ni vakauqeti keda meda veivutuni ka gole vua na Turaga.

Jeremaia 36

Na ivolanikalou e tu kina na kaukauwa me vagolei keda tani mai na ca.

• E rawa mera sa rawata eso na raititobu na lewe ni nomu kalasi baleta na ivolanikalou ni ra vulica na Jeremaia 36 mai vale. Sureti ira mera wasea na ka era sa vulica. Sa rawa talega mo lesia vei ira na lewe ni kalasi na yaca ni dua na tamata ena wase oqo ka sureti ira mera wilika na ka a cakava na tamata o ya baleta na vosa ni Kalou. Sa rawa vei ira na lewe ni kalasi mera vulica na vosa kei na cakacaka ni Turaga (raica na tikina e 1–3, 27–31); Jeremaia (raica na tikina e 4–7,32); Peruki (raica na tikina 4, 8–10, 14–18); Jiutai kei Tui Jioiakimi (raica na tikina e 20–26); kei Elinecani, Tilaia, kei Kimaraia (raica na tikina e 25). E vakaraitaka vakacava na noda ivosavosa kei na ivalavala na veika e tara na vuniyaloda me baleta na ivolanikalou?

iKuri ni iVurevure

Ena rawa ni dau tu ga vei iko na inuinui.

E tukuna o Peresitedi M. Russell Ballard eso na ituvaki ka rawa ni vakavuna vei ira eso me yali nodra inuinui, ka solia na ivakasala me baleta na vanua me kunei kina na inuinui:

“Eso vei keda eda na kunea na noda bula ni sinai tu ena cudru, yalolailai, kei na rarawa. E vuqa era vakila nira malumalumu mera sotava vakacava na veilecayaki ni bula ka vaka me sa solega tu na vuravura. Eso tale era rarawa me baleti ira na lewe ni matavuvale ka ra sa vakayacora na itovo ka veisaqasaqa kei na itovo ni bula savasava baleta ni ciqomi ka vakacaucautaki e vuravura. … E vuqa era sa vakasukai ira mai ka ciqoma na valavalaca kei na veivakalolomataki ni vuravura ena nodra nanuma ni sa na sega ni wali rawa. Sa mai oti na nodra vakanuinui…

“…Eso vei keda era sa mai yali na nodra inuinui taucoko ena vuku ni ivalavala ca kei na caka cala. E rawa ni yaco me dua na tamata e sa dromuci tu ena veivakasama vakavuravura ka sa sega ni drotani rawa mai kina, ka yali kina na inuinui kecega. Na noqu vakatakekere kivei ira kece era sa sikalutu ena viridai ni vu ni ca sai koya mera kakua ni soro! Se vakacava sara na levu ni veika e dau yaco se na levu ni ka era na sotava, yalovinaka vakabauti au, e rawa ni na tu ga vei iko na inuinui. Ena veigauna kece” (“The Joy of Hope Fulfilled,” Ensign, Nov. 1992, 31–32).

“Me kena ilutua, na noda inuinui duaduaga meda taqomaki vakayalo ena veigauna voravora oqo, o ya meda vagolea na noda vakasama kei na yaloda vei Jisu Karisito. … Na vakabauta na Kalou kei na Luvena, o Jisu Karisito, sa yaga sara vakalevu vei keda meda maroroya na rai yalomatua ena gauna ni veivakatovolei kei na dredre” (“The Joy of Hope Fulfilled,”32).

Vakatorocaketaki ni Noda Veivakavulici

Muria na Yalo tabu. O na sega ni rawa ni tukuna rawa mailiu na ituvaki ni lesoni yadua, ia ni o rogoca na veivakauqeti ni Yalo tabu, ena tuberi iko ko Koya. Ni ko sa vakarau tu vakayalo, ena solia vei iko na Turaga “ena gauna sara ga ko ya, na veika mo tukuna” (Vunau kei na Veiyalayalati 100:6; raica talega na Veivakavulici ena iVakarau ni iVakabula, 10).