Lako Mai, Mo Muri Au, mai vei Scott Sumner

24–30 ni Okotova

Isikeli 1–3; 33–34; 36–37; 47

“Kau na Vakacuruma ki na Lomamudou na Yalo Vou”

Na vosa i Isikeli e sa tu maroroya na Turaga ena dua nai naki vuku ka rawa ni veivakalougatataki kivei ira na lewe ni nomu kalasi. Vakasamataka vakavinaka na veika oqo ni o vulica tiko na volavola nei Isikeli ena macawa oqo.

Vola na Veika o Vakauqeti Kina

Sureta na Veiwasei

O ira na tamata era a rogoci Isikeli era nanuma ni nona vosa e “totoka” ka “talei,” “Ia [era] a sega ni cakava” (raica na Isikeli 33:30–33). E rawa ni ra wasea na lewe ni kalasi e dua na tikina era raica ena volavola nei Isikeli ka vakauqeti ira mera cakava e dua na ka.

Vakavulica na iVunau

Isikeli 34

Sa sureti keda na iVakabula meda vakania na Nona sipi.

Me vukei ira na lewe ni kalasi me vakaibalebale vakayadua vei ira na Isikeli 34, e rawa ni o vola ena papa ni volavola na ituvaki eso e rawa ni ra sotava, me vaka na vakavakarau ki na kaulotu, susugi ira na gone, se ciqomi ni dua na ilesilesi ni veiqaravi. Sa rawa vei ira na lewe ni kalasi mera digitaka e dua mera vakasamataka vakatitobu ni ra wilika lo na Isikeli 34:1–10. Sureti ira me ra wasea na ivakasala eso ka yavutaki ena veitikina oqo e rawa ni ra solia vua e dua ena ituvaki era a digitaka. Na cava na kena ibalebale meda vakani keda ka sega na nona qele ni sipi na Turaga? E rawa vakacava me da ivakatawa ni sipi me vakataka na iVakabula? (raica na tikina e 11–16).

O na rairai vakauqeti mo taroga na taro ena vukei ira na lewe ni kalasi mera vakasamataka vakatitobu na ivakatakarakara ena Isikeli 34:11–31. Me ivakaraitaki, na cava e rawa ni matataka na “veico vinaka” kei na “lomanibai vinaka” ena tikina e 14? Na cava na kedrau duidui na sipi e sa “yali” kei na dua e sa “vakasevi tani”? (tikina e 16). E dau vueti ira vakacava na mataqali sipi ruarua vakaoqo na iVakabula? Sa rawa vei ira na lewe ni kalasi mera wasea na ivakatakarakara tale eso era kunea ena veitikina oqo ka veivosakitaka na veika e vakavulica vei ira na vei ivakatakarakara oqo baleti Jisu Karisito.

Isikeli 37

Na Turaga sa vakasoqoni ira tiko na Nona tamata ka solia vei ira na bula vou.

• Na wiliki ni Isikeli 37 kei na vakasamataki ni yalayala ni Turaga me vakasoqoni ira vata mai na Isireli, e rawa ni solia vei keda na rai titobu me baleta na ibalebale ni vakasoqoni vata kei na noda vakaitavi kina. Me vukei ira na lewe ni kalasi me ra kunea na raititobu vakaoqo, e rawa ni o vola ena papa ni volavola na taro me vaka Na cava e saga tiko na Turaga me rawata ena nodra vakasoqoni vata mai na Isireli? Na sala cava e sa vakayacora tiko kina o Koya? Mo qai kerea na veimama ni kalasi mera wilika na Isikeli 37:1–14 kei na ikarua ni veimama mera wilika na Isikeli 37:15–28 ni ra vakasaqara tiko na raititobu e rawa ni rau vakarautaka na tikina e rua oqo ki na taro ena papa ni volavola. E rawa ni veivuke me vakamacalataka ni ititoko nei Josefa kei Juta e tukuni tiko ena tikina e 16–19 e matataka tiko na iVola i Momani kei na iVolatabu. Ni ra veiwasei na lewe ni kalasi ena nodra isau ni taro, vakayaloqaqataki ira mera veivosakitaka na nodra itavi ena nodra vakasoqoni vata mai na Isireli ena gauna oqo.

A raica ena raivotu o Isikeli e dua na uciwai e drodro mai na valetabu ka vakabula na Waitui Mate.

Isikeli 47:1–12

Na valetabu e kauta mai na veivakabulai vakayalo.

• Na iyaloyalo, e rawa ni vukei ira na lewe ni kalasi me ra kila na raivotu e vakamacalataki ena Isikeli 47:1–12. Me ivakaraitaki, e rawa ni o vakaraitaka e dua na iyaloyalo ni valetabu, e dua na uciwai, dua na vanua dravuisiga, kei na Waitui Mate (raica na ivakatakarakara ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale kei na itaba ni iVola Tabu, naba 3, “Lekutu e Jiutia”). Ena rawa ni veivuke me vakamacalataki ni Waitui Mate e sa rui tuituina ka na sega ni rawa ni bula kina na ika kei na kau. Sa rawa ki na kalasi mera wilika na tikina e 1–12 ka wasea na veika era vakauqeti kina me baleta na wai e vakamacalataki tiko ena raivotu (raica talega na Vakatakila 22:1 kei na itukutuku ena “iKuri ni iVurevure”). E rawa talega ni ra droinitaka na iyaloyalo ni raivotu nei Isikeli. Na cava e rawa ni vakatakarakarataka na wai? Na cava e rawa ni matataka na vunikau e vakamacalataki tiko ena tikina e 12? Sa rawa vei ira na lewe ni kalasi mera wasea na sala sa kauta mai kina vei ira na bula vakayalo kei na veivakabulai na valetabu kei na kena veivakalougatataki.

iKuri ni iVurevure

Na veivakalougatataki ni valetabu e rawa ni vakabulai keda.

Ni tukuni tiko na wai sa drodro mai na valetabu ena raivotu nei Isikeli (raica na Isikeli 47:1–12), O Elder Dale G. Renlund e kaya:

“E rua na ivakarau ni wai oqo e dodonu meda kila tiko. iMatai, ena dina ga ni sega tale ni dua na uciwai veisemati kei na mata ni wai lailai oqo, e tubu me yaco me dua na uciwai levu, e tubu cake tikoga na kena raba kei na kena titobu ni drodro tikoga yani. E dua na ka vakaoqori e yaco ki na veivakalougatataki e drodro mai na valetabu ni ra sa vauci na tamata yadua ki na nodra matavuvale. E vakaibalebale vakalevu cake na tubu ni goleva lesu na veitabatamata sa liu ka drodrova talega yani na veitabatamata na cakacaka vakalotu ni veivauci ni dregata vata na matavuvale.

“iKarua, e vakavouia na uciwai na veika kece e tara. Na veivakalougatataki ni valetabu e tiko kina na kaukauwa me veivakabulai. Na veivakalougatataki ni valetabu e rawa ni vakabula na yaloda kei na bula kei na matavuvale” (“Valetabu kei na Tuva Kawa: Veivauci kei na Veivakabulai,” Liaona, Me 2018, 47–48; raica talega na vidio “And the River Will Grow,” ChurchofJesusChrist.org).

Vakatorocaketaki ni Noda Veivakavulici

Vukei ira na tani me ra ciqoma na Yalo tabu. “Ena so na gauna era na temaki na qasenivuli mera nanuma ni sa nodra kila-ka se iwalewale se nodra itovo e vakauqeti ira era vakavulica. … “Na nomu inaki vaka-qasenivuli e sega ni kena caka tu e dua na veivakavulici vakasakiti ia na nodra vukei ga eso tale mera ciqoma na veivakayarayarataki ni Yalo Tabu” (Veivakavulici ena iVakarau ni iVakabula, 10).