Vakaibalebaletaka ko Taniela na Tadra nei Nepukanesa, mai vei Grant Romney Clawson

31 ni Okotova–6 ni Noveba

Taniela 1–6

“Ni Sa Sega Tale Na Kalou Sa Rawata Me Ia Na Veivakabulai”

E vuqa na lewe ni kalasi era na kila vakavinaka na italanoa ena ivola i Taniela. Ni ko vulica ka vakavakarau mo veivakavulici, vakasaqara na veidusimaki ni Yalo me baleta na sala mo vukei ira kina na lewe ni kalasi mera kunea na veika e yaga ki vei ira yadua mai na vei iwase oqo.

Vola na Veika o Vakauqeti Kina

Sureta na Veiwasei

E rawa ni veivuke mo sureti ira na lewe ni kalasi me ra wasea se sa vakacava tiko na nodra vulica tiko vakai ira yadua se vakamatavuvale na ivolanikalou. Ni ra wasea na lewe ni kalasi e dua na raititobu me baleta e dua na ka a vakavulica vei ira na Yalo ena macawa oqo, sa rawa mo tarogi ira se cava era a cakava tiko ka veimuataki ki na veivakararamataki oqori.

Vakavulica na iVunau

Taniela 1; 3; 6

E rawa ni da vakararavi vua na Turaga ni vakatovolei na noda vakabauta.

• Me tekivutaki e dua na veivosaki baleta na sala a vakaraitaka kina o Taniela, Setareki, Mesaki, kei Apetiniko na vakabauta na Turaga, e rawa ni o kerea e vica na lewe ni kalasi mera vakalekalekataka na bolebole eratou a sotava na cauravou oqo, e vakamacalataki tiko ena Taniela 1, 3, kei na6. Na cava na vuna e dredre kina me da na yalodina ena ituvaki vakaoqo? Na ituvaki cava soti eda sotava ka dau bolei kina na noda vakabauta? E rawa ni ra vakasaqaqara na kalasi ena Taniela 1:10–13; 3:15–18; 6:10, me vaqarai na sala eratou a sotava kina na nodratou bolebole na va na turaga oqo. Ena vukei keda vakacava na nodratou ivakaraitaki ena noda sasaga meda tisaipeli yalodina i Jisu Karisito?

• E vuqa vei keda, me vakataki Taniela kei iratou na nona itokani, era vakila ni ra sa vakasaurarataki me ra ciqoma e dua na ivakatagedegede e lolovira sobu. Na cava so na ivurevure ni veivakasaurarataki vakaoqo ena noda bula? Me vukei ira na lewe ni kalasi mera vuli mai na ivakaraitaki nei Taniela kei iratou na nona itokani, sa rawa mo wasea na kalasi ki na tolu na ilawalawa ka lesia na ilawalawa yadua mera raicalesu e dua vei iratou na wase oqo: Taniela 1, 3, se6. A vakalougatataki Taniela, Setareki, Mesaki, kei Apetiniko vakacava na Turaga ena gauna eratou a digitaka kina me ratou yalodina, dina ga ni ratou a sotava na veivakasaurarataki? Mera na qai wasea na ilawalawa yadua ki na kalasi na veika era sa kunea. Sa rawa vei ira na lewe ni kalasi mera veivakasalataki vata ena sala mera yalodina tikoga kina se cava ga na veivakasaurarataki ni bula veimaliwai se so tale na mataqali veivakayarayarataki. E rawa talega ni ra veivosakitaka na bibi ni nodra vakasaqarai na itokani vinaka ka na tokoni keda ena noda ivakatagedegede.

Taniela 2

Na Lotu i Jisu Karisito ni Yalododonu Edaidai e matanitu ni Kalou e vuravura.

• Na veivosakitaki ni Taniela 2 e rawa ni vukea na nomu kalasi mera kila vakavinaka na sala e mai vakataucokotaka tiko kina Na Lotu i Jisu Karisito ni Yalododonu Edaidai na nona ilesilesi ni o koya na vatu parofisaitaki ka a “kavida mai na ulunivanua” (tikina e 45). Mo tekivu, e rawa ni o railesuva vakalasi na ivakamacala kei na vakadewa nei Taniela baleta na tadra nei Nepukanesa, ka kune ena Taniela 2:31–45. Sa rawa mo vakaraitaka e dua na irairai ni vatu (se droinitaka e dua ena papa ni volavola). Sureta na lewe ni kalasi mera wasea na veika era sa vulica baleta na matanitu ni Kalou ena kena vakatauvatani ki na ivakamacala ni vatu ena Taniela 2:34–35, 44–45. Ena rawa beka ni ra kila na lewe ni kalasi eso na itukutuku makawa ni Lotu ena nomuni vanua ka rawa ni ra wasea. Eda sa raica oti vakacava na parofisai nei Taniela ni vakayacori ena noda dui bula yadua?

Taniela 2:1–30

Na ciqomi ni ivakatakila e gadrevi kina na vakavakarau ni bula vakayalo.

• Ena yaga beka vei ira na lewe ni kalasi mera vulica na sala a vakarautaki koya kina o Taniela me ciqoma na ivakatakila e gadrevi me vakamacalataka ka vakaibalebaletaka kina na tadra nei Nepukanesa. Sa rawa mo tekivu ena nomu kerei ira na lewe ni kalasi mera raicalesu na Taniela 2:1–15 ka qai wasea na itovo ni yalodra ke ra kunei ira ena itutu nei Taniela. Sureti ira me ra vakasaqaqara ena Taniela 2:16–18 me ra vulica kina na ka a cakava o Taniela. Na cava eda vulica mai na Taniela 1:17 me baleta na sala e vakarautaki Taniela kina na Kalou? Na cava eda rawa ni vulica mai vei Taniela ka rawa ni vukei keda ni da vakasaqara na ivakatakila me noda yadua? Na cava eda rawa ni vulica mai na vosa kei na cakacaka nei Taniela ni oti na nona ciqoma na veivuke ni Turaga? (raica na Taniela 2:20–30).

Droini kei Taniela kei iratou na nona itokani eratou cata na kakana ni tui, mai vei Brian Call

Taniela 3

Ni tawamacala na kena icavacava, sa rawa ni da digitaka ga na vakabauta.

• Na veika a sotava o Setareki, Mesaki, kei na Apetiniko e kune ena Taniela 3 e rawa ni vukei ira na lewe ni kalasi mera kila vakavinaka na ibalebale ni vakabauti Jisu Karisito. Sa rawa mo sureti ira na lewe ni kalasi mera vakalekalekataka na bolebole eratou a sotava o Setareki, Mesaki, kei Apetiniko (raica na Taniela 3:1–12) ka qai veivosakitaka na veika eratou a cakava (raica na Taniela 3:13–18). Na cava eda vulica me baleta na vakabauta mai na nodratou ivalavala na turaga oqo? E rawa mo vola ena vava ni volavola na malanivosa Sa rawata na neitou Kalou me… kei na Kevaka e sega… mai na tikina e 17–18. Sa rawa mera vakatura na lewe ni kalasi na sala mera tawana kina na vanua lala ena ivakarau ni bula cava ga era sotakaya. Me kena ivakaraitaki, e rawa ni ra vakatura mai “Na noda Kalou e rawa me sauma na noqu taro kecega” kei na “Kevaka e sega, au na vakararavi tikoga Vua ena yalovosota.” Ni ra wasea na lewe ni kalasi na ivakaraitaki eso, vakayaloqaqataki ira me ra veivosakitaka na sala e tokona ka vakaukauwataki keda kina na iVakabula ena gauna mada ga eda sega ni kila kina na cava ena qai yaco.

Vakatorocaketaki ni Noda Veivakavulici

Vakayagataka na veivuke ni iyaloyalo. “Na cakacaka ni liga, okati kina na iyaloyalo, vidio, kei na drama, e rawa ni veivuke ena nodra vagolei na vuli voli—vakabibi o ira era vuli voli ena sarasara—ka cakava me guilecavi dredre na itukutuku vakaivolanikalou” (Veivakavulici ena iVakarau ni iVakabula, 22).