Madrai ni Bula, mai vei Chris Young

14–20 ni Noveba

Emosi; Opetaia

“Dou Golevi Jiova, Mo Dou Bula”

Ni o vulica na Emosi kei na Opetaia, mo na waraka tu na veivakayarayarataki ena veika mo vakavulica vei ira na nomu lewe ni kalasi. Vola na veivakasama oqo, ka vakasaqara na madigi eso mo wasea ena nomu kalasi ena Sigatabu.

Vola na Veika o Vakauqeti Kina

Sureta na Veiwasei

Me vaka ga na nodrau soli ivakasala vei ira na tamata ena nodra gauna o Emosi kei na Opetaia, sa veivakaroti talega na nodrau vosa vei keda nikua. Sa rawa mo sureta na lewe ni kalasi mera wasea na ivakavuvuli mai vei Emosi kei na Opetaia e baleti keda.

Vakavulica na iVunau

Emosi 3:7–8; 7:10–15

E dau vakatakila na Turaga na dina mai vei ira na Nona parofita.

• Sureti ira na lewe ni kalasi mera wasea na dina baleti ira na parofita era sa kunea ena nodra vulica yadua se vakamatavuvale na Emosi3 kei na Emosi7. E rawa ni o cakava e dua na lisi ni nodra nanuma ena papa ni volavola. Na dina cava tale me baleti ira na parofita eda kila? (Me baleta eso na vakasama, raica na itukutuku ni iUlutaga Vakosipeli “Parofita” [veiulutaga. ChurchofJesusChrist.org].) Vakayaloqaqataka e vica na lewe ni kalasi me ra wasea na sala era rawata kina na nodra ivakadinadina me baleta na bibi ni nodra itavi na parofita me ra qarava na ituvatuva ni Kalou.

• Eda na wasea vakacava vua e dua na itokani na vuna e bibi kina me dua tiko na noda parofita ena noda gauna oqo? E rawa ni o vola ena papa ni volavola na taro eso e rawa ni taroga e dua e sega ni lewe ni Lotu me baleti ira na parofita. E rawa vakacava ni da sauma eso na taro oqo ena kena vakayagataki na Emosi 3:7–8 kei na 7:10–15?

• Me tiki ni nomu veivosaki me baleti ira na parofita, e rawa ni o wasea e dua vei ira na vidio oqo: “Eda Gadrevi Ira na Parofita Bula” se “Nodra Vosa na Parofita” (ChurchofJesusChrist.org). Era sa vukei keda vakacava na parofita edaidai meda toro voleka vei Jisu Karisito?

Emosi5; 8:11–12

Na Vukitani e vaka e dua na lauqa ni rogoci na vosa ni Turaga.

• Me tekivutaki e dua na veivosaki me baleta na lauqa e vakamacalataka o Emosi ena Emosi 8:11–12, o na raica beka ni na veivuke na kena railesuvi vakalekaleka na ituvaki vakayalo ni tamata e vunau tiko vei ira. Era gole tani beka vakacava na Isireli mai vua na Turaga? (raica, me ivakaraitaki, Emosi 2:6–8; 5:11–12). Na cava na vuna e veivuke kina meda kila baleta na nodra lutu? Sa rawa vei ira na lewe ni kalasi mera qai wilika na Emosi 8:11–12 ka veivosakitaka na vuna e vosa vinaka kina na “lauqa” kei na “viagunu” me vakamacalataki kina na kedra ituvaki o ira era gole tani mai vua na Turaga. Sa rawa talega vei ira na lewe ni kalasi mera vakasaqara na Emosi5 na veitikina e rawa ni vukei keda meda levea na vukitani ena noda bula (raica, me ivakaraitaki, tikina e 4, 11–12, 14–15, 25–26).

• Na noda kila na viakana vakayalo ka salavata kei na vukitani e vukei keda me da kila na magiti vakayalo eda marautaka ena vuku ni Veivakalesui mai. E rawa ni o vola e vica na taro me baleta na Vukitani kei na Veivakalesuimai ena papa ni volavola, me vaka na Vuna e yaco kina e dua na Vukitani? Na cava na revurevu ni Vukitani vei ira na luve ni Kalou? Na revurevu cava e tu ena Veivakalesui mai? Vakayaloqaqataki ira na lewe ni kalasi mera kunea na isau ni veitaro oqo kei na taro tale eso ni ra vakayagataka na ivurevure vakaoqo: “Na iTukutuku ni kena Vakalesui mai na Kosipeli i Jisu Karisito” ena Wase3 ni Vunautaka na Noqu Kosipeli ([2019], 36–39); na itukutuku ni Ulutaga Vakosipeli “Vukitani” (ulutaga. ChurchofJesusChrist.org); na vidio “Na Vukitani Levu” (ChurchofJesusChrist.org); kei na vosacavuti ena “iKuri ni iVurevure.” Sureti ira na lewe ni kalasi me ra veivosakitaka na dina e vakalesui mai ena noda gauna e vakaibalebale vakalevu cake vei ira.

E rawa ni da ivakabula ena Ulunivanua o Saioni ena noda cakava na cakacaka ni valetabu kei na tuva kawa.

Opetaia 1:21

“Ena lako cake mai na iVakabula ena Ulunivanua ko Saioni.”

• Na cava na vuna e ivakamacala vinaka na vosa “ivakabula … ena Ulunivanua ko Saioni ”(Opetaia 1:21) baleti keda ni da cakava na cakacaka ni valetabu kei na tuva kawa? E vukei keda vakacava na cakacaka eda cakava vei ira na wekada ena valetabu me da vakila na noda voleka vua na iVakabula o Jisu Karisito? Sa rawa mera wasea na lewe ni kalasi na veika era sa sotava oti ena nodra cakava na cakacaka ni valetabu kei na tuva kawa.

iKuri ni iVurevure

Lesoni mai na gauna sa oti.

E vakavulica o Peresitedi M.Russell Ballard:

“Ena gauna lekaleka sara ni veiyabaki e tukuna na Veiyalayalati Vou, … o ira na tamata era saqati Karisito kei iratou na nona iApositolo. Na kasura e ka vakaitamera ka da sa mai kila me Vukitani Levu, ka basika ki na veisenijiuri ni matemate vakayalo kei na lecaika ka vakatokai na Veiyabaki Butobuto.

“… E lomani ira kece na luvena na Tamada Vakalomalagi, ka vinakata o Koya mera rawata taucoko na veivakalougatataki ni kosipeli ena nodra bula. E sega ni yali na rarama vakayalo baleta ni Kalou sa dau vakanadakui ira na Luvena. Ia, na butobuto vakayalo e yaco ni ra sa vakanadakui Koya na Luvena. Oqo e dua na isau ni digidigi ca era cakava na tamata yadua, itikotiko, matanitu, kei na gauna nibula taucoko. Na ka oqo sa vakadinadinataki tale vakawasoma ena itosotoso taucoko ni veiyabaki. E dua vei ira na lesoni cecere ni ivakarau makawa oqo sai koya na noda digidigi, vakayadudua kei na vakalewelevu, ena yaco kina na kena revurevu vakayalo vei keda kei ira na noda kawa “(”Vulici ni Lesoni ni Gauna sa Oti,” Liaona, Me 2009,32).

Vakatorocaketaki ni Noda Veivakavulici

Vukei ira na vuli mera kidava na Yalo Tabu “Ni ra vakauqeti mai na Yalo Tabu, mo tarogi ira na vuli na cava era vakila tiko kei na veika era vakila ni ra vakauqeti mera cakava. Vukei ira mera semata na nodra vakila vakayalo ena veivakauqeti ni Yalo Tabu” (Veivakavulici ena iVakarau ni iVakabula, 11).