Ko Jisu ena Valenisoro e Nasareci, mai vei Greg K. Olsen

3–9 ni Okotova

Aisea 58–66

“Ia Ena Lako Mai ki Saioni na iVakabula”

Ni o vulica na ivunau totoka ena vei iwase oqo, sureta na Yalo tabu me dusimaki iko ki na itukutuku ena vakaibalebale sara vakalevu vei ira na lewe ni kalasi.

Vola na Veika o Vakauqeti Kina

Sureta na Veiwasei

Sa rawa mo sureti ira na lewe ni kalasi mera vola ena papa ni volavola na veitikina era a vakauqeti kina ena nodra vulica na ivolanikalou ena macawa oqo. Vaka lewe ni kalasi, sa rawa mo ni qai vakaraica na veitikina oqori ka veivosakitaka na dina e kunei kina. Na raiyawa oqo e rawa me vakavurea na kena veivosakitaki vakatitobu e dua se sivia na ivakavuvuli ka volai koto e ra.

Vakavulica na iVunau

Aisea 58:3–12

Na lolo e kauta mai na veivakalougatataki.

• Me vukei ira na lewe ni kalasi mera veivosakitaka na vuna kei na sala sa vakaroti keda kina na Turaga meda lolo, sa rawa mo cakava e rua na kolomu ena papa ni volavola “Mo Kakua ni Lolo me vaka Dou Kitaka ena Siga Oqo” kei “Na Lolo Au Sa Digitaka.” Mera qai wilika na lewe ni kalasi na Aisea 58:3–7, ka volai ena imatai ni kolomu na sala era a lolo kina na Isireli kei na ikarua ni kolomu ena ivakamacala ni lolo me vaka e vinakata na Turaga. E tara vakacava na sala o raica kina na lolo na ivakamacala oqo? E rawa talega ni ra wasea na lewe ni kalasi na sala, mai na veika era sotava, sa veimuataki kina na lolo ki na veivakalougatataki sa yalataka tu na Turaga ena tikina e 8–12.

• Eso na lewe ni kalasi era a sotava beka ena so na gauna mera vakamacalataka vei ira na tani na vuna eda lolo kina. Sureti ira me ra wasea na veika era a tukuna. E rawa talega ni o sureta e dua na lewe ni matabisopi me vakamacalataka na ivakarau e vakayagataki kina na isolisoli ni lolo. Se e rawa ni o wasea e dua na ivakaraitaki mai na itukutuku nei Peresitedi Henry B. Eyring “Sa Sega Li ni Vaka Oqo na Lolo Kau sa Vinakata?” (Liaona, Me 2015, 22–25). Ena veivuke vakacava na lolo kei na saumi ni isolisoli ni lolo me “luvata nai kaukau bibi” e noda kei na nodra na tani? (Aisea 58:6).

Aisea 61:1–3; 63:7–9

Ko Jisu Karisito sa noda i Vakabula ka Dauveivueti.

• Ena gauna a kacivaka kina o Jisu Karisito vei ira na tamata mai Nasareci ni o koya na Mesaia, a cavuta na Aisea 61:1–3 (raica na Luke 4:16–21); raica talega na vidio “Jesus Declares He Is the Messiah,” ChurchofJesusChrist.org). Sa rawa vei ira na lewe ni kalasi mera wilika na Aisea 61:1–3 ka veivosakitaka na vuna e dua kina na ivakamacala vinaka ni nona ilesilesi na iVakabula na veitikina oqo. Sa rawa mo vola ena papa ni volavola na veika yadua a lumuti kina na iVakabula me kitaka ka veivosakitaka na cava na kena ibalebale. A mai vakayacora vakacava na iVakabula na veitiki ni Nona ilesilesi oqo ena Nona bula vakayago? E sa vakavotukanataka vakacava na Karisito na ilesilesi oqo ki na noda bula?

• Sa rawa talega vei ira na lewe ni kalasi mera wilika na Aisea 63:7–9 ka wasea na sala sa vakalougatataki ira kina ko Jisu Karisito ena vei sala oqo.

• Na Aisea 61:1–3 e vakayagataka na vosa totoka vakaserekali me vakamacalataki kina na kaukauwa nei Jisu Karisito me vakabula na veika sa vaka e vakacacani. Me vukea na kena vakamatatataki na veitikina oqo, sa rawa mo wasea e dua na italanoa me baleta e dua na ka a nanumi ni yali se vakacacani ia a qai vuki me dua na ka totoka cake sara. Me kena ivakaraitaki, raica na vidio “Provo City Center Temple” (ChurchofJesusChrist.org; raica talega na “iKuri ni iVurevure ”) se na talanoa e na tekevu ni nona itukutuku o President DieterF. Uchtdorf “Ena Colati Iko e Tabana ka Kauti Iko i Vale” (Liaona, Me 2016, 101–4). E rawa ni ra veivosakitaka na lewe ni kalasi na sala era raica kina na Turaga ni solia vei ira na tamata e dua na ka totoka ni ra nanuma ga ni sa vakacacani tu na nodra bula.

Aisea 65:17–25

Ena ikarua ni Nona Lako Mai, na Turaga ena “bulia na lomalagi vou kei na vuravura vou.”

• Na Aisea 65:17–25 e vakamacalataka na ituvaki e vuravura ni oti na iKarua ni Lako Mai ni iVakabula. E rawa ni o sureti ira na lewe ni kalasi me ra railesuva na veitikina oqo ena nodra vakasaqara na isau ni taro vakaoqo: Ena duidui vakacava na ituvaki ni bula ena “vuravura vou” mai na kena ka yaco tiko e vuravura ena gauna sara ga oqo? Na cava o raica ena veitikina oqo ka vakavuna mo marau?

iKuri ni iVurevure

Na Turaga “e sega ni laivi keda tu ga ena dravusa.”

Ni oti na nona talanoataka na kena voleka ni vakarusai ena kama na Valecavu e Provo, ka qai mai vakavoutaki tale e muri me qai mai vakatokai me Provo City Center Temple, o Sister Linda S. Reeves e kaya: “E dau vakatara na Turaga me da yavalati ka vakatovolei, ena so na gauna ena kena ivakatagedegede duadua e cake. Eda sa dau raica na kena vaka me kamayavu vakadua na nona bula e dua eda lomana—ka vakatale mada ga kina na noda sara ga vakaikeda—ka vakataroga se cava na vuna e vakatara kina na Tamada Vakalomalagi sa dauloloma ka dauveikaroni me yaco na veika oqo. Ia e sega ni laivi keda tu ga ena dravusa; e tucake tu o Koya ka dodoka tu mai na ligana, ka sureti keda tiko me da lako mai Vua. Sa tara tiko o koya na noda bula me valetabu vakasakiti me tiko kina na Yalona me tawamudu” (“Ciqoma na Veivakalougatataki ni Nomu Veiyalayalati,” Liaona, Nove. 2013,119).

Vakatoroicaketaki na Noda Veivakavulici

Mo na kilai ira o vakavulica tiko. Na tamata yadua o vakatavulica e tiko nodra itukutuku ni bula ka baleti ira vakatabakidua, nona ivakarau ni rai, kei na nona taledi eso. Vakasamataka na veiduidui oqo ena nomu vakasaqara mo vukei ira taucoko na vuli ena sala e vakaibalebale ka guiguilecavi dredre. (Raica na Veivakavulici ena iVakarau ni iVakabula, 7.)