Jeremaia, mai vei Walter Rane

10–16 ni Okotova

Jeremaia 1–3; 7; 16–18; 20

“Ni’u A Bera ni Buli Iko ena Kete Ka’u Sa Kilai Iko”

Ni o vuli, vakasamataki ira na lewe ni nomu kalasi, ka vakasaqara na veidusimaki ni Yalo tabu mo kila na itukutuku cava soti ena bibi duadua vei ira.

Vola na Veika o Vakauqeti Kina

Sureta na Veiwasei

E dua na sala e rawa ni o vakauqeta kina na veiwasei o ya mo sureti ira na lewe ni kalasi me ra vola ena dua na tiki ni pepa e dua na dina ni kosipeli era a vulica ena nodra vulica na Jeremaia ena macawa oqo. Mo qai soqona vata na tiki ni pepa ka digitaka e vica na dina me veivosakitaki vakalasi. E vukei keda vakacava na volavola nei Jeremaia meda kila vakavinaka kina na vei dina oqo?

Vakavulica na iVunau

Jeremaia 1:4–19

Era sa kacivi na parofita me ra vosataka na vosa ni Turaga.

• E rawa ni o tekivuna e dua na veivosaki me baleta na nona kacivi o Jeremaia me parofita ena kena vakaraitaki e dua na iyaloyalo ni parofita bula ka kerei ira na lewe ni kalasi me ra wasea na sala era a kila kina ni sa kacivi o koya mai vua na Kalou. E rawa talega ni o kerei ira mera wasea na sala era sa vukei ira kina na tani me ra kila na dina bibi oqo. Ena vakalougatataka vakacava na noda bula na kilai ni veika oqo? Sa rawa mera vola na lewe ni kalasi ena vava ni volavola na veika era sa vulica baleti ira na parofita mai na Jeremaia 1:4–19. Na cava era “cavuta laivi” se “basuraka” na parofita ena noda gauna”? Na cava era “tara” ka “tea”? (tikina10).

• Sureta na lewe ni kalasi mera wasea na veika a vulica o Jeremaia me baleti koya ena Jeremaia 1:5. Ena tara vakacava na nona veiqaravi voli na kila-ka oqo? Sa rawa mera wilika na lewe ni kalasi na itukutuku ena “iKuri ni iVurevure” kei na ivolanikalou eso oqo ka tokona na dina oqo: Alama 13:1–4; Vunau kei na Veiyalayalati 138:53–56; Eparaama 3:22–23. E veivakauqeti vakacava na dina baleta na bula taumada ki na noda bulataka na noda bula vakayago?

Era vakayagataka na tamata e Isireli ena gauna makawa nai keli–ni wai me ra maroroya kina na wai vakamareqeti.

Jeremaia 2; 7

“Era sa biuti au na mata–ni–wai bula.”

• Me tekivutaki e dua na veivosaki me baleta na Jeremaia 2:13, e rawa ni o droinitaka ena papa ni volavola e dua nai keli-ni wai (e dua na ivakato ni wai levu e lomaniqele) kei na dua na mata-ni-wai (e dua na ivurevure ni wai mai lomaniqele). E qai rawa ni ra wilika na lewe ni kalasi na Jeremaia 2:13 ka veivosakitaka na vuna e vinaka cake kina me da kauta mai na wai mai na dua na mata–ni–wai ka sega ena noda kelia e dua nai keli-ni-wai. Na cava beka nai vakatautauvata vakayalo ni caka i keli-ni wai ka sa lu tikotikoga? Sa rawa mo sureti ira na lewe ni kalasi mera wilika na veitikina eso mai na Jeremaia 2 kei na7 ka wasea eso na sala era biuta kina na Isireli na “mata-ni-wai bula” (raica, me kena ivakaraitaki, na Jeremaia 2:26–28; 7:2–11). Na cava e ivakatakarakara vinaka kina na “wai bula” ena vuku ni veika sa solia vei keda na iVakabula?

Jeremaia 3:14–18; 16:14–15

Na Turaga ena vakasoqoni ira vata na Nona tamata.

• Ena vuku ni nona vakatauvatana o Jeremaia na vakasoqoni vata nei Isireli ena gauna emuri oqo kei na nona sereki ira na Isireli mai Ijipita o Mosese, sa rawa mo na vakaraitaka e dua na iyaloyalo ni Lako Yani (raica na ituvatuva ni Epereli 4–10 ena Lako Mai, Mo Muri Au—Baleta na Tamata Yadua kei na Matavuvale). Sureti ira na lewe ni kalasi mera veivosakitaka na kena vakaibalebale vei ira na Isireli na Lako Yani ena veitabatamata. Sa rawa vei ira na lewe ni kalasi mera qai wilika na Jeremaia 16:14–15 ka veivosakitaka na sala e bibi cake kina vei ira na tamata ni Kalou na vakasoqoni vata nei Isireli ena gauna oqo (raica talega na Jeremaia 3:14–18). O ira na lewe ni kalasi kara a raicalesu na “Inuinui nei Isireli” me tiki ni nodra vuli yadua sa rawa me ra wasea na veika era sa vulica me baleta na bibi ni kena vakasoqoni vata o Isireli (raica na Russell M. Nelson kei Wendy W. Nelson, “Inuinui nei Isireli” [lotu e vuravura raraba ni itabagone, June 3, 2018], ikuri ki na New Era kei na Ensign, Okosi. 2018, 2–17, ChurchofJesusChrist.org). Se, e rawa mo ni wilika vata vaka kalasi e vica na tiki ni itukutuku oya . E sa vakasoqonivatataki tiko vakacava o Isireli ena noda vanua?

iKuri ni iVurevure

E kilai kemuni na Tamada Vakalomalagi.

O Peresitedi Russell M. Nelson e vakatavulica:

“Na yalomu e ka-bula tawamudu. E kaya vakaoqo na Turaga vua na Nona parofita o Eparaama: ‘Ko a digitaki ni bera ni ko sucu mai.’ [Eparaama 3:23]. Na Turaga e a cavuta e dua na ka e tautauvata baleti Jeremaia [raica na Jeremaia 1:5] kei na vuqa tale [raica na Alama 13:2–3]. A tukuna talega o koya me baleti iko [raica na Vunau kei na Veiyalayalati 138:55–56].

Sa kilai iko oti tu mai vakabalavu sara na Tamada Vakalomalagi. O iko, me vaka ni o Luvena tagane se yalewa, o a digitaki mai Vua mo lako mai ki vuravura ena gauna sara ga oqo, mo veiliutaki ena Nona cakacaka cecere e vuravura. O ni a digitaki sega ni baleta na ituvaki ni yagomuni ia me baleta na ituvaki ni yalomuni me vaka na yaloqaqa, yalodei, yalodina, dau karamacataka na dina, vakasaqara na vuku, kei na gagadre me veiqaravi vei ira na tani.

O ni a se tara cake eso na ivakarau ni bula vakaoqori ena bula taumada. Eso tale e rawa ni o tara cake ena vuravura oqo ni o vakasaqarai ira vagumatua” (“Vakatulewa me baleta na Tawamudu,” Liaona, Nove. 2013,107).

Vakatorocaketaki Noda Veivakavulici

Bulataka na kosipeli ena nomu igu taucoko. O na yaco mo dua na qasenivuli va-Karisito ni ko karona na kosipeli ka bulataka ena veisiga yadua ni nomu bula. Na veivakavulici va-Karisito e sega ni gadrevi kina mo vinaka sara—mo tovolea ga ka tovolea tikoga. Ni ko sa cakava na nomu vinaka taucoko ka vakasaqara na veivosoti ni o lutu, sa na rawa ni o yaco mo tisaipeli i Karisito me vaka na ka e gadreva vei iko o Koya. (Raica na Veivakavulici ena iVakarau ni iVakabula, 13–14.)