“Aokati 15–21. Taian Areru 49–51; 61–66; 69–72; 77–78; 85–86: ‘I a Tuangngkami ae E Karaoia nakon Tamneiu,’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Aokati 15–21. Taian Areru 49–51; 61–66; 69–72; 77–78; 85–86,” Nakomai, Iriirai—Ibukin te Reirei n Tabati: 2022
Saving That Which Was Lost(Kamaiua Are E a Tia ni Bua), iroun Michael T. Malm
Aokati 15–21
Taian Areru 49–51; 61–66; 69–72; 77–78; 85–86
“I a Tuangngkami ae E Karaoia nakon Tamneiu”
Iangoa ana reirei Unimwaane David A. Bednar ngkai ko katauraoi n angareirei:“Te taetae ao te karaki n ti ngaia bon tiaki te angareirei. [Reireia] ana euangkerio te Uea n ana kawai e raona te taratara ao te kakauongo n aron ae aanaki nakon te taetae” (“Becoming a Preach My Gospel Missionary,” New Era, Okitobwa 2013, 6).
Korei Am Namakin
Kaunga te Tibwatibwa
Teuana te kawai ni kaoiia kain te kiraati bwa a na tibwa te bwai are a warekia n te wiiki aei bon koreakina iaon te burakibooti “Ana bati ni kakatonga matanriau” ke “Neweu e na tataekina naba am raoiroi” (Taian Areru 71:23, 24). Kain te kiraati a kona n tibwa te bwai are a kunea are e buokiia “kimwareirei n ae korakora” ke “tataekina ana raoiroi [te Uea].”
Reirei te Reirei
“Ko raoiroi te Uea, ao ko kani kabwarabure.”
-
Taian Areru 51 kabwarabwara te namakin are angiina mai iroura ti karekea ngkai ti rairi nanora ao a kabwaraaki ara bure. Ni buokiia kain te kiraati bwa a na mataata riki n te rairannano ao n namakina te kaungaaki nakon te rairannano n tainako, ko kona tuangiia bwa a na kakaea Taian Areru 51 ma te titiraki aei n aia iango: Tera ae e nanonaki n te rairannano? Ngkanne anganiia bwa a na tibwai kaeka aika a riai. (“Bwaaki n ibuobuoki riki Tabeua” iai inanona iango aika ibuobuoki.) Bukin tera te rairannano n tabetai e taraa n aki kan karaoaki? Tera ae ti karekea man taian areru aei ae karika te rairannano n namakina te kimwareirei?
-
Ti na kanga ni kabwarabwara aekakin te namakin are ti karekea ni kabwaraan te bure rinanon mwaakan ana kamaiu Kristo? Kaoiia kain te kiraati bwa a na tibwa aia iango, ao kaungaia bwa a na kakai rongorongo inanon Taian Areru 51; 85–86 ake a kabwarabwara te bitaki n Ana kaitiaki ni kabwarabure inanon maiura (te katooto, taraa Taian Areru 51:1–2, 7–12; 85:2–9). Iangoia ni katei tamnei ke bwaai ake a na buokiia kain te kiraati ni katamnei kibuntaeka aikai. Kain te kiraati a kona ngkanne n tibwai aia namakin ibukin te Tia Kamaiu Iesu Kristo ao Ana ingaingannano ni mate ibukin ara bure bwa e aonga ni kabwaraaki ara bure. Kona bae naba n ikotaki n anenea te anene n taromauri ibukin ana angakarea ni kamaiu te Tia Kamaiu, n aron “I Stand All Amazed” (Anene n Taromauri, no. 193).
-
N te aro bwa ti na rairi nanora, ti riai n onimaki tiaki ti ibukina bwa Iesu Kristo e kona ni kaitiakiira ma ibukina naba bwa E kona. Kain te kiraati a na bae n tia ni kunei kiibu inanon Taian Areru 51; 85–86 n te wiiki aei are e kakorakora aia onimaki n ana ingaingannano te Uea ni kabwarabure. Kaungaiia bwa a na tibwaua te bwai are a kunei. Ko kona naba ni kairiia nakon Taian Areru 86:5, 13, 15 ao titiraki bwa tera ae reirei iai kiibu aikai ibukin te Uea. Tera ae e kona n nanonaki bwa Ngaia te “bati n nanoanga ao n akoi”? (kibu 15). Bukin tera e kakaawaki iroura bwa ti na ataa aei?
Ara kakoaua ibukin Iesu Kristo e kona ni buokiia tabeman bwa a na nakoIna.
-
Teuana te kakabwaia ae korakora n te bootaki n ikotaki n te Reirei n Taabati bon te tai ni karekea te korakora man aia onimaki ao aia kakoaua tabeman taan iriira Iesu Kristo. Ni katauraoan te tibwanga aei ibukin am kiraati, ko kona n tuangiia kain te kiraati bwa a na wareka Taian Areru 66:16 ao iangoa te titiraki aei: Ngkana ko na “taetaekina te bwai are e a tia ni karaoia [te Uea] ibukin tamne [im],” tera ae kona taekinna? Ngkai a iango, a kona ni wareka te kibu 5–20 ibukin iango. Anganiia bwa a na korei aia kaeka. Ngkanne kaoiia bwa a na “tataekinna” imarenaia—inanon kurubu aika uarereke ke nakon te kiraati ae bwanin—tera ae e a tia ni karaoia Iesu Kristo ibukin tamneia.
Ti kona n tibwaia imarenara ara kakoaua n te bwai are e a tia ni karaoia te Uea ibukira.
Bwaai n Ibuobuoki Riki Tabeua
Te rairannano nanona te bitaki.
Beretitenti Russell M. Nelson e kabwarabwara te rairannano n te aro aei:
“Ngkana e butiiko Iesu ao ngai bwa ti na ‘rairi nanora,’ E kaoira bwa ti na bitii ara iango, ara ataibwai, tamneira—riki arora n ikeike. E butiira bwa ti ia bitaki n arora n tangira, iango, beku, kabongana ara tai, akoiia buura aine, reireiniia natira, ao riki n tararuai marurungin rabwatara.
Akea kainaomatakin riki, te bwai teuana are e kamoamoa riki, ke te bwai teuana are e kakaawaki riki nakon rikirakera n tatabemaniira nako n tainako, ni katoa bong ae boboto iaon te rairannano. Te rairannano bon tiaki te bwai teuana are e riki n tii te taina, bon te bwai ae rinanon mwakuriana. Bon te bwai teuana are e bon riai nakon te kukurei ao namakinan te kamanoaki ao n rau, n aki mweeuti ibukin te bwai teuana. Ngkana e reitaki ma te onimaki, te rairannano e kona ni kangaraoa karekean mwaakan ana Mwakuri ni Kamaiu Iesu Kristo. …
Ngkana ti rineia bwa ti na rairi nanora, ti rineia bwa ti na bitaki! Ti kariaia te Tia Kamaiu bwa e na bitiira nakon te kabanea n tamaroa. Ti rineia bwa ti na rikirake n te maiu n tamnei ao ni karekea te kimwareirei—ni kimwareirei ibukin te kamaiuaki Irouna. Ngkana ti rineia bwa ti na rairi nanora, ti rineia bwa ti na riki n ai aron raoi Iesu Kristo!” (“Ti Kona ni Karaoa ae Tamaroa Riki ao ni Katamaroa Riki,” Riaona, Meei 2019, 67).
Kanakoraoan Ara Anga reirei
Anga titiraki aika a riinga te nano ao te iango. “Tuangiia taan reiakinaki bwa a na tibwaia bwa e kanga aia namakina ibukin rongorongo man koroboki aika a tabu, a kanga aomata ake n koroboki aika a tabu ae a namakinna, ke e kanga koaua inanon kibuntaeka n irekereke ma maiura” (Teaching in the Savior’s Way, 31).