“Aokati 1–7. Iobi 1–3; 12–14; 19; 21–24; 38–40; 42: ‘Ao I a bon Kantanigaia Naba,’” Nakomai, Iriirai—Ibukin te Reirei n Taabati:: Te O Tetemanti 2022 (2021)
“Aokati 1–7. Iobi 1–3; 12–14; 19; 21–24; 38–40; 42,” Nakomai, Iriirai—Ibukin te Reirei n Taabati: 2022
The Judgments of Job(Ana motikitaeka Iobi), iroun Joseph Brickey
Aokati 1–7
Iobi 1–3; 12–14; 19; 21–24; 38–40; 42
“Ao I a bon Kantanigaia Naba”
Tera taian koaua aika a buokiira iai te Tamnei ae Raoiroi n reiakin ngkai ko kamatebwaia ana boki Iobi? Tera ae ko tangiria n tibwaia ma am kiraati?
Korei Am Namakin
Kaunga te Tibwatibwa
Kain te kiraati ake a kamatebwaia Iobi n te wiiki aei a kona ni kunei taian koaua ake a kakaawaki irouia. Ni kaungaiia bwa a na tibwaia, ko kona ni koreia iaon te burakibooti I reiakinna mairoun Iobi … ao tuangiia kain te kiraaki bwa a na kanga ni kabwanina te tiententi aei.
Reirei te Reirei
Ara onimaki iroun Tamara are i Karawa ao Iesu Kristo e kona ni buokiira n teimatoa ni kakaonimaki n arona ni kabane.
-
N moan mwakoro n ana boki Iobi, are e kabwarabwara ana titiraki Tatan bukin ana kakaonimaki Iobi, e kona ni buokiia kain te kiraati ni katinei aroia ni kakaonimaki nakon Tamara are i Karawa ao Iesu Kristo. Kain te kiraati a kona ni waaki man karinanakin tabeua bukina ngkai te aomata e kona n rineia n ongotaeka nakon ana tua te Atua. A kona ngkanne ni kakae n Iobi 1:6–12; 2:1–6 ni kakaea te bwai are e taekinna Tatan ibukin ana kakaonimaki Iobi. Bukin tera e kakamaku te ongotaeka nakon te Uea ti ibukin are e taekinna Tatan? Tera ana kaeka Iobi n Iobi 1:20–22; 2:9–10 ae kaotia ibukin Iobi? Kain te kiraati a kona n taetae bwa tera bukina ngkai a rineia n teimatoa ni kakaonimaki nakon te Atua.
Job (Iobi), iroun Gary L. Kapp
-
Ngkai Iobi iai taai ake e ikakorakora iai ma te nanokokoraki ao te bwarannano, n tokina ana onimaki iroun te Uea e kateimatoa inanon korakaina. N reiakinaki man ana mwakuri Iobi, kain te kiraati a na kona ni kakaai tabeua kiibu ake a kaotaki n ana kaeka aika a raraoi Iobi inanon kataakina: Iobi 1:21; 2:10; 12:9–10, 16; 13:15–16; 19:23–27. Tera ae ti kona n reiakinaki man kaeka aikai are e kona ni buokiira bwa ti na korakora n te maiu n tamnei ngkana ti kaitara ma kataakira? Bukin tera e kakamaku bwa kona iangoia bwa te kataaki bon te karawawataaki ibukin te bure?
-
Ana taeka Iobi inanon Iobi 19:23–27 e kona ni kaungai nanoia kain te kiraati n iangoi ao n tibwai aia atatai bwa te tia Kabooira, Iesu Kristo, e maiu. Ko kona ni waaki man kaoakiia kain te kiraati bwa a na iangoia ma te karaurau ana taeka Iobi inanon kiibu aikai. A kona ngkanne ni maroroakin titiraki n aron aikai: Bukin tera kakoaua iroun te Tia Kabooira e rang kakaawaki n tain kataakira n ai aron Iobi ni korakai? E kanga ara kakoaua ni kateimatoaira inanon kataakira? Aneneakin ao warekan taekan te kuna n taromauri n taekan Iesu Kristo, n aron “I Ataia E Maiu Iesu” (Anene n Taromauri, nambwa. 136), e kona n raoni iango ao mwaaka n te maiu n tamnei nakon am marooro.
Ana taratara te Atua e korakora riki nakon ara taratara.
-
E angii n ana boki Iobi (mwakoro 3–37) karekerekea Iobi ao raraona n aia ikakorakora ma titiraki “Bukin tera bwaai aika a buakaka a riki nakoia aomata aika raoiroi?” Ngkai te Uea e aki kaeka te titiraki aei n ae bwanin n ana boki Iobi, E katauraoa te rongorongo ae kakaawaki. Ko kona ni buokiia kain te kiraati ni kunea te rongorongo aei man kaoakiia bwa a na wareka te titiraki are e titiraki iai Iobi inanon Iobi 38:1–7, 18–24. Tera ae ti reiakinna man titiraki aikai?
-
Ana euangkerio Iesu Kristo ae kaokaki e katauraoi rakan atatai ake a kona ni buokiira n ota n tabeua bukina ngkai ti korakai n te aonaaba. Kain te kiraati a kona n tibwai koaua ake a atai ibukin Kaokan Bwaai n te euangkerio are e a tia n anganiia te kantaninga ao te atatai ibukin te korakai. A kona ni kunei tabeua koaua man koroboki aika a tabu ao taetae ake a reke n “Bwaai ni Ibuobuoki riki Tabeua.”
Bwaai n Ibuobuoki Riki Tabeua
Iango ni bong aika kaitira iaon oin te kantaninga iaon te korakai.
Kiibu aikai a karekea te iango iaon oin te kantaninga n te korakai:
Spencer W. Kimball e reirei:
“Ngkana ti iangoia bwa te aki mamate bon tii te maiu are ti karekea, ngkanne te maraki, rawawata, kabwaka, ao te maiu ae kimototo a na riki bwa te kangaanga. Ma ngkana ti iangoa te maiu n riki bwa te bwai ae akea tokina n reitinako n riinanon te maiu imwain te maiu aei ao n te maiu imwiin te mate, ngkanne bwaai ni kabane aika a na riki a na kona n tiku n te taratara ae riai.
“Iai raoi te wanawana iroun te [Atua] n anganiira kataaki bwa ti aonga n tokanikai iaoia, tabera aika ti na karekei, mwakuri ni kakorakorai ara mwatireti, nanokawakira ni kataakin tamneira? Ti aki irekereke ma te kaririaki ni ukera korakorara, aorakira bwa ti aonga n reiakina te taotaonakin n nano, te mate bwa ti aonga ni kona ni bukamaruaaki ao ni kamimitongaki? …
“Ngkana te kimwareirei ao te rau ao kaniwanga a waekoa n anganaki taan karaoa ae raoiroi, a na akea te buakaka—ni kabane a na karaoa ae raoiroi ma tiaki ibukin etin raoi karaoan ae raoiroi. A na akea ukeran te korakora, ake te rikirake n anua, akea te rikirake n te mwaaka, akea te inaomata n rinerine” (Teachings of Presidents of the Church: Spencer W. Kimball [2006], 15).
Kanakoraoan Ara Anga reirei
Iriira te Tamnei. Ko aki kona n ata aron nakoraoin reirei nako, ma ana wirikiriki te Tamnei e na kairiko. Ngkana ko tauraoi n te maiu n tamnei, te Uea e na anganiko “n te tai anne, are ko riai n taekinna” (Reirei ao Berita aika Tabu 100:6), bwa tera are e anganiko te Uea bwa ko na taekinna tao bon ngaia te bwai are a kannanoia ni kan ongo kain te kiraati. (Taraa Teaching in the Savior’s Way, 10.)