“Turai 25–31. Etita: “Koa roko … Ibukin te Tai ae ai Aron Aei’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Turai 25–31. Etita,” Nakomai, Iriirai—Ibukin te Reirei n Tabati: 2022
Esther(Etita), iroun James Johnson
Turai 25–31
Etita
“Koa roko … Ibukin te Tai ae ai Aron Aei”
E uara aron kinakiia kain am kiraati? Kataia bwa ko na kina raoi temanna kain am kiraati n te wiiki koraki. Aio e na buokiko n iangoa kainnanoia ngkai ko katauraoi n anga reirei (taraa Teaching in the Savior’s Way, 7).
Korei Am Namakin
Kaunga te Tibwatibwa
Kain te kiraati a kona n tibwaia ma temanna are e tekateka ni kaan te bwai teuana are te Tamnei e a tia n reireiniia, te bwai are a tibwa mataata riki iai, ke te bwai ae a tangiria nakon maiuia ngkai a wareka ana boki Etita. Ngkanne tabeman mai ibuakoia a kona n tibwatibwa nakoia kain te kiraati ni kabane.
Reirei te Reirei
Te Uea e a katikuira n te aro ake ti kona iai ni kakabwaiaiia tabeman.
-
Kain te kiraati a kona n taratarai kawai are e karaoi te Uea bwa e na kona iai Etita ni kamaiuia Iutaia, n aron are e kaotaki n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Kaoiia bwa a na tibwaua te bwai are a kunei. Ke ko kona n taratarai tabeua katooto n ikotaki (taraa Etita 2:21–23; 3:10–14; 4:14–16). Tera ae ti kona ni karaoia bwa ti na kina ana kakairi te Atua inanon maiura? Te marooro mairoun Unimwaane Neil L. Andersen n “Bwaai ni Ibuobuoki riki Tabeua” iai inanona te kaeka nakon te titiraki aei.
-
Ni buokiia kain am kiraati n iangoia bwa e kanga te Uea n tia ni katauraoia “ibukin te tai ae ai aron aei” (Etita 4:14), kaoiia bwa a na wareka Etita 4:10–17. E kanga ana taeka Moretekai nakon Etita ni buokia ni karaoa ana babaire ibukin katanaia ana aomata? N ai aron te Atua ngke e katuka Etita n te tabo are e kona iai ni kamaiuia Iutaia, tera aro tabeua ake E katikuira inanona bwa ti na kona iai ni buokiia tabeman? Tina kanga ni kona n riki bwa bwaai ni mwakuri inanon Baina? Warekan te marooro mairoun Titita Virginia U. Jensen inanon “Bwaai ni Ibuobuoki riki Tabeua” e kona ni kaungaia kain te kiraati n iangoi taai ngke a namakinna bwa ngaiia bwaai ni mwakuri ibukin te Uea. Tuangiia bwa a na tibwa te bwai are a tia n rinanona, are e kairaki iroun te Tamnei.
Te aki mamatam e kaota arora ni katan iaon te Uea.
-
Ko kona ni kabongana Etita 4 ni maroroakini kakabwaia ake a roko man te aki mamatam. Kona bae ni karekeia kain te kiraati bwa a na rinanon te bwai are e kaira Etita ao Iutaia ake tabeman bwa a na aki mamatam. Bukin tera ngkai a rineia bwa a na aki mamatam? Bukin tera ti rineia bwa ti na aki mamatam? Kona bae n tangiria ni ikotaki n rinanon tabeua riki kiibu iaon te aki mamatam, n aron Itaia 58:6–12 ao Mataio 4:1–4; 17:14–21 (taraa naba Bwai ni Kairi nakon Koroboki aika Tabu, “Aki Mamatam, Te Aki Mamatam,” scriptures.ChurchofJesusChrist.org). Tao ngkoe ke tabeman kain te kiraati a kona n tibwa aia taneiai are e kabwarabwara aron te aki mamatam ni uota mwaakan te Uea nakon maiura.
Karaoan te bwai ae eti n angiin te tai e kainnanoa te ninikoria ae korakora.
-
Rongorongon aia ninikoria Moretekai ao Etita n tei ibukin katooto n te raoiroi e kona ni kaungaiia kain te kiraati bwa a na karekea te ninikoria ni karaoa te bwai ae eti. Ko kona ni kaoiia iteran te kiraati bwa a na wareka taekan Moretekai (taraa Etita 3:1–11) ao are iterana bwa a na wareka taekan Etita (taraa Etita 4:10–17; 5:1–4). Ngke arona bwa a mena ikai n te bong aei, tera ae e na kona Moretekai ao Etita n taekinna ni kaungaira ngkana e matoatoa karaoan te bwai ae eti? Kain te kiraati a kona naba n tibwai aro are a tia iai ni mwakuri ma te ninikoria. Ko kona ni kaota te witeo “Courage” (ChurchofJesusChrist.org) ke kaoa te kiraati bwa a na anenea ke a na wareka taekan te kuna iaon teei ibukin te koaua, n aron ae “Do What Is Right” (Anene n Taromauri, nambwa 237). Imwiina maroroakinna bwa tera te witeo ke te kuna are e reirei iaona ibukin karekean te ninikoria.
Esther before the King(Etita imatan te Uea), iroun Minerva K. Teichert
Bwaai n Ibuobuoki Riki Tabeua
Bain te Atua.
E reirei Unimwaane Neil L. Andersen:
“N tabetai ti kona n noora bitakira iroun te Uea inanon maiura ao ni maiuia tabeman ma ti mimi, ‘N na kanga riki n noora ana bitaki te Uea n ae matata inanon maiu?’ …
“Ngkai ko kawakin tua ao ko tataro inanon te onimaki n noora ana bitaki te Uea inanon maium, I berita nakoim bwa E na kauka matam n te maiu n tamnei ni kawarebwea riki, ao kona kona n nooria riki n ae mataata bwa ko aki maroa.” (“Thy Kingdom Come,” Riaona, Meei 2015, 121–22).
“Ibukin te tai ae ai aron aei.”
Titita Virginia U. Jensen e reirei: “I aki kakoaua bwa ngkoe ao ngai ti mena ikai n te tai ae onoti bwa e maninnanti. I kakoaua bwa, n aron Etita te aomata man taai akekei ti a ‘roko nakon te abanuea ibukin te tai ae ai aron aei’ [Etita 4:14], ngkana ara kakairi, ara katooto, korakorara, ao ara onimaki e kona n tei bwa te otanga ni kaitaraan rikiraken korakoran teuare e buakaka ni kakamaku n uruani mweengara, ara utu ao naake ti tangiriia” (“Creating Places of Security,” Ensign, Nov. 1997, 89).
Kanakoraoan Ara Anga reirei
Nakon moa Booki aika Tabu. A na riki koroboki aika tabu bwa ngaia oin bwaai n ibuobuoki n am kamatebwai ao am katauraoi. Tai mwaninga bwa aia taeka burabeti n taai aikai a kamoamoai taian kanibaire n te mwakuri ao koroboki aika tabu naba. (Taraa Teaching in the Savior’s Way, 17–18.)