Tamnei ni kabwarabwara Eritai ngke e kaotia nakon ana toro te kaa ae te ai, © Review & Herald Publishing/licensed from goodsalt.com

Turai 4–10

2 Uea 2–7

“Iai te Burabeti ibuakoia Iteraera”

Ngkai ko katauraoi n angareirei, wareka 2 Uea 2–7 ukoukora te kairiiri inanon maiu. Ngkanne kakauongo nakon wirikiriki ibukin rongorongo ake a na kakabwaiaiia kain am kiraati.

Korei Am Namakin

Kaunga te Tibwatibwa

N tabetai kain te kiraati a kainnanoa te tai n tii rinanon te mwakoro are a warekia mai imwaina bwa a na kona n tibwa te iango man aia kamatebwai i bon irouia ni koroboki aika a tabu. Kataia karekea tabeua te miniti ibukin aei ni moan waakin te kiraati, ngkanne kaoiia kain te kiraati bwa a na tibwa te bwai are a tia n reiakinna.

Reirei te Reirei

2 Uea 2–6

Te Atua e kona ni karaoi kakai inanon maiura.

• Ngkai kam maroroakin kakai n 2 Uea 2–6, e na kona n ibuobuoki ngkana ko tuangiia kain te kiraati bwa a na kabwarabwara te taeka ae miracle. Kona bae n tibwa te iango aei mairoun Beretitenti Howard W. Hunter: “[Miracles] bon kaotan mwaakan te [Atua] are ti aki kona ni buokia ni kabwarabwara n ae bwanin te atatai iaona. … Kanikina ao kamiimi aikai a bon kaotaki ni maiun ao n ana mwakuri n ibuobuoki Iesu Kristo, are bon Natin te Atua ngaia. Ma a kamiimi ao a kaonaki ni kakai, ana kakai aika a mwaiti Kristo a bon tii kaotaki ibukin kamiimi aika a korakora ake iroun Tamana ake e karaoi imwaina ao e na reitinako ni karaoi ni kabane irarikira. … E na mwaiti n tainako kakai ngkana iai matara n nori ao taningara n ongo” (“The God That Doest Wonders,” Ensign, Meei 1989, 15–16). A kanga taratara aikai ni buokiia n noora bain te Atua inanon maiuira?

• Iangoia n tuangiia kain te kiraati bwa a na karinani tabeua kakai ake a kabwaraabwaki n 2 Uea 2–6. Tera ae ti reiakinna ibukin te Uea man kakai aikai? Kain te kiraati a kona naba n ingainga ni marooro iaon kakai—a bubura ke a uarereke—are ngaiia ke aia utu a tia n rinanona. Ti na kanga ni kinai riki ana kakai te Atua inanon maiura—n ikotaki ma naake a kaokoro ma are ti kantaningaia?

• Kain te kiraati a kona ni kunea bwa e anainano ni kabotaua ma kakai ake e karaoi Eritai ma tabeua ake e karaoi Iesu Kristo (taraa 2 Uea 4:8–37 ao Ruka 7:11–16; 2 Uea 4:42–44 ao Ioane 6:1–13; 2 Uea 5:1–15 ao Ruka 17:11–19). Tera ae a reireiniira kakai aikai ibukin te Tia Kamaiu ao Ana burabeti?

2 Uea 5:1–19

Ngkana ti nanorinano ao ao ti ongotaeka, Iesu Kristo e kona ni kamarurungiira.

• Teuana te reirei are ti reiakinna man kamaoan reberan Naaman bon kakaawakin te nanorinano. Ni waakinan te marooro, ko kona ni koreia iaon te burakibooti Ana kainikatonga Naaman ao Ana nanorinano Naaman. Kain te kiraati a kona n kakaea n 2 Uea 5:1–19 ao ni korei iaon te burakibooti kibu ake a kabwarabwara ana kainikatonga ao ana nanorinano Naman. Ti kangaa n taai tabetai ni katootonga Naaman? Ti kangaa n taai tabetai ae ti katotongiia ana toro? Ti na kanga n ataa te bwai are e a ataia Naaman?

• Te reirei riki teuana are ti kona n reiakinna man te karaki aei bon kakaawakin te ongotaeka ni bwaai aika uarereke. Kona bae ni waaki man warekan 2 Uea 5:9–12 ao n tuangiia kain te kiraati aia iango bwa tera bukina ngkai Naaman “e nako ngke e bono nanona” (kibu 12). Bukin tera ti kan karaoia n tabetai “tabeua bwaai aika korakora” are e tuangiira te Atua, nakon bwaai aika beebete? (kibu 13). Tera kakaawakin kararoan bwaai aikai?

2 Uea 6:8–23

“A mwaiti riki aika a mena iroura nakon ake a mena irouia.”

• Ti bane n iai ara tai are ti na namakina iai te maroaa ke te maaku. Iangoa aron maroroakinan te rongorongo n 2 Uea 6:8–23 ni kona ni buokiia kain te kiraati ake a namakina te aro aei. Ko kona ni waaki man tii anganiia kain te kiraati tera ae e anaaki iai nanoia man kiibu aikai. A kona naba n tibwa te bwai ae a rinanona ngke “te Uea e kaurei mata [ia]” (kibu 17) ao ni buokiia n nooria bwa aki maroaa (taraa naba “Bwaai ni Ibuobuoki riki Tabeua”). Ti na kanga n ibuobuoki imarenara bwa tina “aki maaku”? (kibu 16).

Bwaai n Ibuobuoki Riki Tabeua

“Kauki matara n tamnei.”

Ni kananona nakon te rongorongo inanon 2 Uea 6:8–23, e taku Unimwaane Ronald A. Rasband:

“Ti kona n akea ara kaa-ni-buaka n te ai ae kanakokaki bwa e na kabeebetea makura ao ana kariiri te riaboro, ma te reirei e mataata. Te Uea e tabe ibukira, e atai arora ao e kakabwaiaira n aro nako are bon ti ngaia ae E kona ni karaoi. Te tataro e kona ni karuoa te korakora ao te kaotioti are ti kainnanoia ni kabotoa ara iango iaon Iesu Kristo ao Ana angakarea ni kamaiu n Ana mwakuri ni kamaiu. Te Uea e ataia bwa iai taai aika ti na namakina iai te maaku. I a tia ni maaku ao ngkoe naba. … Inanon te Ekaretia aei ti bon bae ni karako mwaitira n aron ana wareware te aonaaba, ma ngkana ti kauki matara n tamnei, ‘bwa a mwaiti riki aika a mena iroura nakoia ake a mena irouia’ [2 Uea 6:16]” (“Tai Maaku,” Riaona, Nobembwa 2018, 18–19).

Kanakoraoan Ara Anga reirei

Kaotaia taan reiakinaki nakon koroboki aika a tabu. Ngkana ko kona, kaungaiia kain te kiraati bwa a na rairaki nakon koroboki aika a tabu ao aia taeka burabeti ibukin kairaia, kaeka nakon titiraki, ao boutoka. Ana taeka te Atua bon moan riki te koaua ae korakora. (Taraa Teaching in the Savior’s Way, 21.)