Kamataata n tamnein ana tembora Terubwabera, iroun Sam Lawlor

Turai 18–24

Etira 1; 3–7; Neemia 2; 4–6; 8

“I Tabe ni Karaoa te Makuri ae Ababaki”

Ngkana ko kaoiia kain am kiraati bwa a na tibwaua te bwai ae kakawaki irouia inanon aia boki Etira ao Neemia, tibwauai naba namakin aika ko karekei n am tai ni kamatebwai.

Korei Am Namakin

Kaunga te Tibwatibwa

N tabetai korean taeka aika kakawaki ke kibu n taeka iaon te burakibooti e kona ni kauringiia kain te kiraati ni bwaai aika a tia n reiakin man koroboki aika tabu ao ni kabebetea riki nakoia ngkana a tibwatibwa. Te katooto, ko kona ni korea Manga kateia, Karaoia, ao Manga Moana Karaoakina iaon te burakibooti ao kaoiia kain te kiraati bwa a na tibwauai kiibu man aia wareware aika a irekereke nakon teuana ke e mwaiti riki n taeka aikai.

Reirei te Reirei

Etira 3:8–13; 6:16–22

A kona tembora ni uota te kimwareirei nakoira.

• Warekan te kimwareirei ae a karekea Iutaia ngke e a manga kateaki aia tembora e kona ni buokiia kain te kiraati n namakina te kakaitau ae korakora ibukin tembora n ara tai. Kam kona ni kaoiia kain te kiraati bwa a na rinanon Etira 3:8–13 ao 6:16–22 ao maroroakin tabeua kawai aika a karaoi Iutaia ni bukamarua manga katean ao katabuan te tembora. Bukin tera katean te tembora e na bukamaruaki? Ko kona ni kaoiia kain te kiraati bwa a na tibwauaia bwa a kanga tembora, ao te mwakuri ae ti karaoia ikekei, ni uota te kimwareirei nakoia. Te rongorongo inanon “Bwaai n Ibuobuoki Riki Tabeua” e kona ni kaungaiia kain te kiraati bwa a na rinanon kakukurein te mwakuri n te tembora.

  

  E kona n riki te tembora bwa te bwai ae kakukurei inanon maiura.

Etira 4–5; Neemia 2; 4; 6

Ti kona ni buoka ana mwakuri te Atua ni kabirimwaka n aki tabe ma te kakaitara.

• Aia boki Etira ao Neemia a kabwarabwaraia aomata ngke a kakoroi nanon aia mwakuri n aki tabe ma kakaitara mai irouia aia kairiribai. Ni moanakin te marooro, ko kona n titirakiniia kain te kiraati bwa tera ana “mwakuri ae ababaki” (Neemia 6:3) Neemia ae kona ni kabotauaki ma maiura aei. Tera mwakuri aika kakawaki ae a tia te Atua n anganiira bwa ti na karaoia? Ngkanne ko kona ni wareka Etira 4:4 ao maroroakinna bwa e kanga Tatan ni kataia ni kakerikaki ara konabwai ao ni karika ara kangaanga man karaoan ana mwakuri te Atua. Tera ae ti reiakinna mairoun Neemia ao raona ni mwakuri inanon Neemia 2:18–20; 4:6–9; ao 6:1–3? Tera ae nanonaki n “iai nanom ni mwakuri” n ana mwakuri te Tia Kamaiu? (Neemia 4:6). Iangoia n tibwaua mwakoron ana rongorongo Beretitenti Dieter F. Uchtdorf “Ti Tabe ni Karaoa te Mwakuri ae Ababaki ao Tiaki Kona n Ruo” (Riaona, Meei 2009, 59–62), ti kabanea ni mwakoro ake uoua.

• Ko kona n namakinna ae ko na kaira te marooro ni kabotaua ana mwakuri Terubabera ni manga katea te tembora ao ni karaoi mwakuri ni kamaiu ikekei. Te katooto, koroi uoua atuun rongorongo iaon te burakibooti: Terubabera ao Ngaira. Iaan Terubabera, kain te kiraati ana korea te bwai ae a karaoia “aiaia tibun Iuta ma Beniamina” (Etira 4:1) ni kataia ni katoka Terubabera ao Iutaia man manga katean te tembora (taraa Etira 4). Iaan Ngaira, a kona membwa ni koroi kawai ae a kataia teuare e buakaka ni katokiira man te nako n te tembora. A kona ngkanne n tibwauaia ma ngaira n tatabemaniira bwa ti na kanga ni karekea ana ibuobuoki te Uea ni kona kaaitarara anne.

Neemia 8:1–12

Ti kakabwaiaaki ngkana ti kamatebwai koroboki aika tabu.

• Tao a kona kain te kiraati n ikotaki ni wareka Neemia 8:1–12 ao ni maroroakinna bwa e kanga Etira ao ana aomata n namakina te Atua ao Ana taeka. Kaungaiia kain te kiraati bwa a na tarai kiibu aika a onoti are e kaota aron aia namakin. Kaoiia kain te kiraati bwa a na kabwarabwara aia namakin n ana taeka te Atua. Ti na kanga ni kanakoraoa ara kekeiaki ni kamatebwai ana taeka te Atua?

Bwaai n Ibuobuoki Riki Tabeua

Taneiai ni kakukurein te tembora.

Beretitenti Russell M. Nelson e anga reirei:

“Ti kona ni kaungaaki ni boong nako ibukin te tembora ao rongorongon te utu are a tia n rinanona tabeman. Ma ti riai ni karaoa te bwai teuana bwa ti na rinanon te kukurei anne i bon iroura. I kan kanakoa te kakaewenako nakoira n tatabemaniira bwa e aonga n reitinako te namakin ibukin te mwakuri aei ao ni karakaaki riki. I kaoi ngkami bwa kam na tataro mwaaka n iangoa te aekaki n anganano—are kam nano riki iai n ami tai n anganano—are kam kona ni karaoia bwa kam aonga ni karaoi mwakuri n te tembora ao rongorongoia ami utu ae mwaiti riki n te ririki aei.

“Ti katabeaki n ana mwakuri te Atua are Moan te Mwaaka. E maiu. Iesu bon te Kristo. Aio Ana Ekaretia. Boni ngaira Natina. E kona n onimakiniira” (Russell M. Nelson ao Wendy W. Nelson, “Open the Heavens through Temple and Family History Work,” Ensign, Okitobwa. 2017, 39).

Kanakoraoan Ara Anga reirei

E raonaki ma aia karo kairake. Ngkana ko reireiniia kairake, tibwaua te bwai are ko reireiniia ma aia karo. A kona ni buokiko n atai kainnanoia kairake ao ana kanga ni buokiia. A kona naba n riki bwa te kawai ae tamaroa ni kaunga te marooro ma utu n te bwai ae a reiakinna utu n te kiraati. (Taraa Reirei n Ana Kawai te Tia Kamaiu, 27.)