Iesu o loo uuina se molī

Laveaiina O Lē na Leiloa, saunia e Michael T. Malm

Aokuso 15–21

Salamo 49–51; 61–66; 69–72; 77–78; 85–86

“O le a Ou Folafola Atu Mea na Ia Faia mo Lou Agaga”

Mafaufau i le fautuaga a Elder David A. Bednar ao e saunia e aoao atu: “O le na o le tautala ma tau atu e le o le aoao atu lena. O le [aoao] atu o le talalelei i le ala a le Alii e aofia ai le matauina ma le faalogo ma le iloatino e faamuamua i le tautala” (“Avea ma se Faifeautalai e Talai Lau Talalelei,” Liahona, Oke. 2013, 6).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O le tasi ala e valaaulia ai tagata o le vasega e faasoa mai se mea na latou faitauina i lenei vaiaso o le tusi i le laupapa “E alaga fiafia ou laugutu” po o le “E tautau atu foi lou laulaufaiva i lau amiotonu” (Salamo 71:23, 24). E mafai e tagata o le vasega ona faasoa mai mea na latou maua e fesoasoani ia i latou e “alaga fiafia” po o “tautala atu foi i le amiotonu [a le Alii].”

aikona o le aoao atu

Aoao Atu le Aoaoga Faavae

Salamo 51; 85–86

“Aua e lelei lava o ia, aua e faavavau lava lona alofa.”

• Ua faamatalaina e leSalamo 51 lagona o le toatele o i tatou ao tatou saili e salamo ma ia faamagaloina. Ina ia fesoasoani i tagata o le vasega e malamalama atili i le salamo ma lagona le uunaia ia salamo soo, e mafai ona e fautuaina atu latou te suesue le Salamo 51 ma lenei fesili i le mafaufau: O le a le uiga o le salamo? Ona tuuina atu lea ia i latou e faasoa mai ni tali e maua. (”Punaoa Faaopoopo” o loo i ai ni manatu aoga.) Aisea e foliga mai ai i nisi taimi e le manaomia le salamo? O a mea ua tatou maua i lenei salamo e mafai ona avea ai le salamo o se lagona olioli?

• E faapefea ona tatou faamatalaina lagona o le mauaina o le faamagaloina o agasala e ala i le mana togiola o Iesu Keriso? Valaaulia tagata o le vasega e faasoa mai o latou lagona, ma uunaia i latou e sue fuaitau i le Salamo 51; 85–86 o faamatalaina le aafiaga o Lana faamagaloga faamama i o tatou olaga (mo se faataitaiga, tagai Salamo 51:1–2, 7–12; 85:2–9). Mafaufau e faaali atu ni ata po o meafaitino e fesoasoani i tagata o le vasega e vaaia nei fuaitau. Ona mafai lea e tagata o le vasega ona faasoa mai o latou lagona e uiga i le Faaola o Iesu Keriso ma Lona naunau e togiola mo a tatou agasala ina ia mafai ona faamagaloina i tatou. E mafai foi ona outou usu faatasi se viiga e uiga i le taulaga togiola a le Faaola, e pei o le “Ou Te Tu ma Ofo” (Viiga, nu. 107).

• Ina ia mafai ona salamo, tatou te manaomia le faatuatua e le na o le mafai e Iesu Keriso ona faamama i tatou ae o le a Ia faia. Atonu na maua e tagata o le vasega ni fuaitau i le Salamo 51; 85–86 i lenei vaiaso na faamalosia ai lo latou faatuatua i le naunau o le Alii e faamagalo. Valaaulia i latou e faasoa mai mea na latou maua. E mafai ona e faasino i latou i le Salamo 86:5, 13, 15 ma fesili atu po o a mea ua aoao mai e nei fuaiupu e uiga i le Alii. O le a se uiga faapea o Ia e “tumu i le alofa mutimutivale ma le moni”? (fuaiupu 15). Aisea e taua ai lo tatou iloa o lenei mea?

Salamo 66: 5–20

O la tatou molimau ia Iesu Keriso e mafai ona fesoasoani i isi e o mai ia te Ia.

• O se tasi o faamanuiaga sili o le feiloai faatasi i Aoga Sa o se avanoa e maua ai le malosi mai le faatuatua ma molimau a isi soo o Iesu Keriso. Ina ia maua lenei avanoa mo lau vasega, e mafai ona e fai i tagata o le vasega e faitau le Salamo 66:16 ma mafaufau loloto i lenei fesili: afai e te “folafola atu mea ua faia [e le Alii] mo [lou] agaga,” o le a le mea o le a e folafola atu? Ao latou mafaufau loloto, e mafai ona latou faitau fuaiupu 5–20 mo ni manatu. Tuu atu ia i latou tusi i lalo a latou tali. Ona valaaulia lea o i latou e “folafola” i le tasi—i ni vaega laiti po o le vasega atoa—mea na faia e Iesu Keriso mo latou agaga.

  alii talavou e toalua o loo talanoa ma le tasi

  E mafai ona tatou faasoa ma isi a tatou molimau mo mea na faia e le Alii mo i tatou.

aikona o punaoa faaopoopo

Punaoa Faaopoopo

O le salamo o lona uiga o le suia.

Na faamatala mai e Peresitene Russel M. Nelson le salamo i le ala lea:

“Pe a fetalai mai Iesu ia te oe ma a’u ia “salamo,” o loo Ia valaauliaina i tatou ia sui o tatou mafaufau, lo tatou iloa, o tatou agaga—e oo lava i le auala tatou te mānāva ai. O loo Ia talosagaina i tatou ia sui le ala tatou te alolofa atu ai, mafaufau ai, auauna atu ai, faaalu ai o tatou taimi, taulimaina ai a tatou avā, aoao atu ai a tatou fanau, ma le tausiga o o tatou tino.

“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso. …

“A tatou filifili e salamo, ua tatou filifili e suia! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!“ (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67).

Faaleleia o Lo Tatou Aoao Atu

Fai fesili e pai atu i le loto ma le mafaufau. “Fai atu i tagata aoao e faasoa mai pe o a o latou lagona e uiga i se fuaitau o mau, pe o a ni lagona o tagata i totonu o tusitusiga paia, po o le auala e fesootai ai upumoni i fuaitau i o tatou olaga” (Aoao Atu i le Ala a le Faaola, 31).