Keriso i le ofu talaloa lanumumu o loo siomia e tagata o loo tootutuli

Ia Tootutuli Tulivae Uma, saunia e J. Kirk Richards

22–28 Aokuso.

Salamo 102–103; 110; 116–119; 127–128; 135–139; 146–150

“O e Amiotonu e Vivii Atu i Latou i Lou Suafa”

O fea o aoaoga i le Salamo e te lagona o le a sili ona fesoasoani i tagata o lau vasega? Ao outou suesue i lenei vaiaso, mafaufau loloto pe faapefea ona e fesoasoani i tagata o le vasega e sue uiga o upu i nei salamo.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tagata o le vasega se taimi e iloilo ai salamo latou te faitau i ai i lenei vaiaso, ma valaaulia nisi e faasoa mai se fuaitau e fiafia i ai. Uunaia i latou e faasoa mai mea na aoaoina ai i latou e le Agaga. Ua faapefea ona faamalosia a tatou tapuaiga patino i le Alii e Salamo?

aikona o le aoao atu

Aoao Atu le Aoaoga Faavae

Salamo 102–3; 116

E mafai e le Alii ona faamafanafana i tatou i o tatou puapuaga.

• Pe na lagona e tagata o lau vasega e pei ona lagona e le tusitala o le Salamo 102 ? E faapefea ona tatou liliu atu i le Alii pe a tatou lagona le lotovaivai po o le faanoanoa? A o latou suesue i le Salamo 102, 103, ma le 116 i le fale i lenei vaiaso, e mafai e tagata o le vasega ona maua fuaitau e uunaia i latou e lliliu atu i le Alii i o latou puapuaga. Uunaia i latou e faasoa mai mea na latou maua, pe vaavaai mo nisi fuaitau musuia faatasi o se vasega. E mafai foi e tagata o le vasega ona talanoa e uiga i le ala e lagolagoina ai i latou e le Alii i taimi o puapuaga.

• E mafai e tagata o lau vasega ona olioli i le tusia o a latou lava salamo e uiga i le ala na fesoasoani ai le Alii ia i latou i taimi o o latou faigata. E le manaomia le uumi pe oni salamo faigata—na o le faaleoina faigofie o le faatuatua, lotofaafetai, ma le viiga. E mafai e tagata o le vasega ona galulue taitoatasi pe taitoalua, ma e mafai ona latou iloilo le Salamo 102, 103, ma le 116 mo ni manatu. Valaaulia ni nai tagata e faasoa mai a latou salamo, pe afai latou te naunau i ai. E mafai foi ona outou usuina ni viiga e uiga i le ala e faamafanafana ai i tatou e le Alii, e pei “O Fea Lo’u Filemu?” (Viiga, nu. 68).

  Iesu o loo faamaloloina

  Faamalologa, saunia e J. Kirk Richards

Salamo 119

O le a faatumauina e le afioga a le Atua i tatou i Lona ala.

• Ina ia amata se talanoaga e uiga i le Salamo 119, e mafai ona e valaaulia tagata o le vasega e talanoa e uiga i se taimi na latou mulimuli ai i se ala ia taunuu i se taunuuga (atonu e fesoasoani le faafesootai o se tasi muamua ma fai ia te ia e saunia e talanoa i ai). O a aafiaga na faigata ai ona tumau i le ala? O a mea na fesoasoani ia i latou e tumau ai i le ala? Ona mafai lea ona e tusia se ala i le laupapa ma valaaulia tagata o le vasega e tusi ni fuaitau mai le Salamo 119 o tau mai ai mea na faia e le Alii e fesoasoani ia i tatou e tumau ai i luga o Lana ala o le feagaiga. Mafaufau e faasoa atu le upusii mai ia Peresitene Russel M. Nelson i le “Punaoa Faaopoopo” o se vaega o le tou talanoaga.

• Atonu e aoga i tagata o lau vasega le faatusatusa o mea ua aoao mai e le Salamo 119 e uiga i le tumau i le ala o le Alii ma isi mau ua aoaoina na lava upumoni. Mafaufau e vaevae le vasega i ni vaega ma fai i vaega taitasi e iloilo fuaitau o mau faapenei: Salamo 119:33–40, 105; Faataoto 4:11–19; 1 Nifae 8:20–28; 11:25; 2 Nifae 31:17–21; Alema 7:9, 19–20. Valaaulia vaega taitasi e faasoa mai mea na latou aoaoina. Tuu atu i tagata o le vasega se taimi e mafaufau loloto ai i mea ua uunaia i latou e fai e faavae i mea na latou aoaoina.

Salamo 139

Ua silafiia e le Alii o tatou loto.

• O le malamalama faapea e silafia e le Alii i tatou—o tatou manatu ma faatinoga, malosi ma vaivaiga—ma e alofa o Ia ia i tatou e mafai ona maua ai le faatosinaga mamana i filifiliga tatou te faia. E mafai ona e valaaulia le vasega e vaavaai mo fuaitau i le Salamo 139 o aoaoina lenei upumoni taua. O faapefea ona aafia o tatou olaga e le iloaina o lenei upumoni? E mafai foi e tagata o le vasega ona talanoaina auala e mafai ona tatou valaaulia ai le Alii “ia e suesue mai ia te au, le Atua e, ma ia e silafia lo’u loto” (fuaiupu 23).

aikona o punaoa faaopoopo

Punaoa Faaopoopo

O le ala lauitiiti ma le vaapiapi.

Na saunoa mai Peresitene Russell M. Nelson:

“Afai e tatau ona manuia la tatou malaga i le olaga, e tatau ona tatou mulimuli i le faasinomaga mamana. Sa fetalai le Alii, “Vaai mai ia te a’u i mafaufauga uma; aua le masalosalo, aua le fefefe” [Mataupu Faavae ma Feagaiga 6:36]. Ma na tusia e le Faisalamo, ‘O Lau afioga o le sulu lea i o’u vae, ma le malamalama i lo’u ala’ [Salamo 119:105]. …

“I lau malaga i le olaga, e te fetaiai ma le tele o faigata ma faia ni measese. O le taitaiga a tusitusiga paia e fesoasoani e te iloa ai mea sese ma fai faasa’oga e talafeagai ai. Ia tuu lou alu i le itu sese. E te suesueina ma le faaeteete le faafanua faaletusitusiga paia o le auala. Ona e agai atu lea ma le salamo ma faasa’oga e manaomia e oo atu ai i le ‘ala lauitiiti ma le vaapiapi e tau atu i le ola e faavavau’ [2 Nifae 31:18]” (“Ola i le Taitaiga a Tusitusiga Paia,” Liahona, Nov. 2000, 17).

Faaleleia o Lo Tatou Aoao Atu

Ia aofia ai i latou o loo tauivi. O nisi taimi o tagata o le vasega o loo tauivi e na ona mananao lava ia faaaofia ina ia lagona le alofaina. Mafaufau e fai atu ia i latou e faatino se tala i le isi lesona pe ia mautinoa ua i ai so latou auala i le lotu. Aua le fiu pe a latou le tali mai i au taumafaiga i le taimi muamua. (Tagai Aoao Atu i le Ala a le Faaola, 8–9.)