29 Aokuso–4 Setema

Faataoto 1–4; 15–16; 22; 31; Failauga 1–3; 11–12

“O le Mata’u ia Ieova o le Amataga lea o le Poto”

E ono mafai faapefea e sāvali i le Faataoto ma le Failauga ona faamanuiaina olaga o i latou o loo e aoaoina? Mulimuli i uunaiga ma musumusuga e te maua ao e suesue ma saunia e aoao atu.

Tusi Faamaumau Ou Lagona Uunaia

Valaaulia le Fefaasoaa’i

E tele sāvali matagofie ma mamana i le Faataoto ma le Failauga. Ae le’i talanoaina ni sāvali faapitoa, e pei o na o loo fautuaina i lalo, valaaulia tagata o le vasega e faasoa mai nisi o a latou sāvali e fiafia ai mai a latou suesuega o tusitusiga paia patino ma faaleāiga.

Aoao Atu le Aoaoga Faavae

Faataoto 1–4; 15–16; Failauga 1–3; 11–12

“E ua’i atu ai ou taliga i le poto.”

• O le valaaulia e saili le poto ma le malamalama ua ta’ua soo lava i le Faataoto atoa. E mafai faapefea ona e fesoasoani i tagata o le vasega e faasoa mai mea na latou aoaoina e uiga i le poto ia latou suesuega? O le tasi ala e mafai ona tusi le poto i le laupapa ma valaaulia tagata o le vasega e faaopoopo numera o fuaiupu po o fuaitau mai le Faataoto po o le Failauga latou te lagona e maua ai ni vaaiga i le poto. (Afai o le a fesoasaoni, e mafai ona e fautuaina tagata o le vasega e suesue le Faataoto 1–4; 15–16; Failauga 1–3; 11–12.) O le a se mea ua tatou aoao ai e uiga i le poto mai nei mau? E faapefea ona faamanuiaina i tatou pe a tatou saili le poto mai le Atua?

Faataoto 1:7; 2:5; 3:7; 8:13; 15:33; 16:6; 31:30; Failauga 12:13

“Aua e te faafiapoto: ia e mata’u ia Ieova.”

• O le isi autu o loo maua i le Faataoto ma le Failauga atoa lava o le “mata’u ia Ieova” (Faataoto 1:7; tagai foi Faataoto 2:5; 3:7; 8:13; 15:33; 16:6; 31:30; Failauga 12:13). Atonu e mafai e tagata o le vasega ona faitau nisi o nei fuaiupu ma faasoa mai o latou lagona i le uiga o le mata’u ia Ieova. E faapefea ona ese le mata’u ia Ieova mai isi ituaiga o mata’u? E mafai foi ona e faasoa atu manatu mai le faamatalaga a Elder David A. Bednar i le “Punaoa Faaopoopo.”

Aoao e Faalagolago i le Alii, saunia e Kathleen Peterson

Faataoto 3:5–7

“Ia e faatuatua ia Ieova ma lou loto atoa.”

• E ono fiafia tagata o le vasega i se lesona faatino e fesoasoani ia i latou e malamalama ai i le uiga o le “faatuatua ia Ieova” ma “aua le faalagolago i [lo latou] lava atamai” (Faataoto 3:5). Mo se faataitaiga, e mafai ona e valaaulia se tagata o le vasega e faalagolago agai i se mea malosi ma mautu, e pei o se puipui. Ona taumafai lea o le tagata e faalagolago i se mea e le malosi, e pei o se pulumu. E faapefea ona fesoasoani lenei faataitaiga ia i tatou e malamalama ai i le Faataoto 3:5? O le a le mea ua aoao mai e le Faataoto 3:5–7 i le uiga o le faalagolago ia Ieova? Aisea e le tatau ai ona tatou faalagolago i lo tatou lava atamai? Na faapefea ona tatou lagonaina le taialaina e le Alii o o tatou ala a o tatou faalagolago ia te Ia?

Faataoto 15:1–2, 4, 18,28; 16:24–32

“O le tali filemu e liliueseina ai le ita.”

• Ina ia fesoasoani i tagata o le vasega e talanoaina le ala e mafai ai ona latou maua atili ai le filemu ma itiiti le finau i o latou olaga, e mafai ona e valaaulia i latou e faitau le Faataoto 15:1–2,18; 16:32. Ona mafai lea ona latou faasoa mai ni aafiaga na latou oo i ai e faaalia ai upumoni i nei fuaiupu. Mo se faataitaiga, o anafea na fesoasaoni ai le faaaogaina o “le tali filemu” e “[liliu] ese ai le ita”? (Faataoto 15:1). Pe mafai foi ona latou mafaufau i ni taimi na faataitai ai e le Faaola le mea o loo aoaoina i nei fuaiupu (tagai Ioane 8:1–11; 18:1–11). E mafai faapefea ona tatou mulimuli i Lana faataitaiga a o tatou fegalegalea’i ma isi tagata?

• A o le’i iloaina e tusitala o le Faataoto le tele o ala o fesootaiga ua i ai nei i o tatou aso, e mafai ona aogā le fautuaga i le Faataoto15 ma le16 i ituaiga uma o fesootaiga. Ina ia fesoasoani i tagata o le vasega e malamalama i lenei mea, e mafai ona e valaaulia tagata taitoatasi e filifili se tasi o mau nei e faitau: Faataoto 15:1–2, 4, 18,28; 16:24, 27–30. Ona mafai lea e tagata o le vasega ona toe faaupu la latou faataoto i se fautuaga e uiga i le fegalegalea’i ma isi i luga o aga fesoota’i, e ala i tesi, po o le initoneti. E mafai ona latou maua se fautuaga aogā faaopoopo i le “Gagana” i le Mo Le Malosi o le Autalavou (2011), 20–21.

Punaoa Faaopoopo

“O le mata’u i le Atua o le alofa lea ma le faatuatuaina o Ia.”

Na faamatalaina e Elder DavidA. Bednar:

O le mata’u i le Atua e tupu mai i se malamalamaaga sa’o o le natura paia ma le misiona a le Alii o Iesu Keriso, se naunautaiga e gauai atu o tatou loto i Lona finagalo, ma se malamalama o le a tali atu lava alii ma tamaitai uma mo a latou lava agasala i le Aso o le Faamasinoga.…

“O le mata’u i le Atua o le alofa lea ma le faatuatuaina o Ia. A tatou matata’u atoa i le Atua, tatou te alolofa atoatoa ia te Ia. Ma “e lafo ese i fafo e le alofa ua atoatoa le fefe uma”(Moronae 8:16). Ou te folafola atu le malamalama susulu o le mata’u i le Atua o le a lafo ese ai i fafo le pogisa o le mata’u faaletagata (tagai i le Mataupu Faavae ma Feagaiga 50:25)pe a tatou tepa atu i le Faaola, atia’e i luga ia te Ia e fai ma o tatou faavae, ma fetaomi atu i luma i luga o Lana ala o le feagaiga faatasi ai ma se tautinoga faapaiaina” (“O Lea Na Latou Faafilemu Ai Lo Latou Matata’u,” Liahona, Me 2015, 48–49).

Faaleleia o Lo Tatou Aoao Atu

Taulai ia Iesu Keriso. E leai se isi auala sili ona lelei e faateleina ai le faatuatua o i latou o loo e aoaoina nai lo le faaogatotonuina o lau lesona i le Faaola. E ala atu i lau aoaoga, valaaulia tagata o le vasega ia fausia i “luga lava o le papa o lo tatou Togiola, o le Keriso lea, le Alo o le Atua” (Helamana 5:12).