O loo faamalōlō e Iesu se tagata tauaso

Faamaloloina o le Tagata Tauaso, saunia e Carl Heinrich Bloch

19–25 Setema

Isaia 40-49

“I nā Faamafanafana Atu ia Outou i Lo’u Nuu”

Atonu e faigata i nisi tagata ona faasoa atu o latou lagona i le vasega ona latou te lagona latou te le iloa lelei tusitusiga paia. E mafai faapefea ona e fesoasoani i tagata uma o le vasega ia lagona o o latou manatu faaleagaga e tāua?

Tusi Faamaumau Ou Lagona Uunaia

aikona o le fefaasoaai

Valaaulia le Fefaasoaai

Mafaufau e tusi se fesili faapenei i le laupapa: O le a le mea na aoaoina ai oe e le Agaga a o e suesueina le Isaia 40-49? E mafai e tagata o le vasega ona mafaufau i lenei fesili ma tusi i lalo ni tali, ma e mafai e nisi ona faasoa mai o latou manatu.

aikona o le aoao atu

Aoao Atu le Aoaoga Faavae

Isaia 40-49

E mafai e Iesu Keriso ona faamafanafanaina i tatou ma tuuina mai ia i tatou le faamoemoe.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ua fautuaina le vaavaai mo sāvali o le faamafanafanaga ma le faamoemoe i le Isaia 40–49 ma lisi ni sāvali e amata ai. E mafai ona e fai i tagata o le vasega e faasoa mai ni sāvali na latou maua. Uunaia i latou e talanoa pe aisea na ono fesoasoani ai nei sāvali i tagata Iutaia na ave faatagata o taua ma le ala e mafai ai ona fesoasoani ia i tatou i le asō. E mafai foi ona e faasino i latou i sāvali na e maua i au suesuega patino. O le a se mea o finagalo le Alii tatou te iloa e uiga ia te Ia? E faapefea ona Ia faamafanafanaina i tatou? E mafai ona e faamanatu i tagata o le vasega faapea “o le Alii” i le Feagaiga Tuai e faatatau ia Ieova, po o Iesu Keriso.

• O le viiga “Le Faavae Malosi” (Viiga, nu.45) e faavae i upu a Isaia i le Isaia 41:10; 43:2–5; 46:4. A uma ona faitauina nei mau ma usuina fuaiupu talafeagai o le viiga, e mafai ona talanoa tagata o le vasega e uiga i taimi na latou lagona ai le faatasi o le Alii ma i latou ma pe na faapefea ona fesoasoani o latou aafiaga ia i latou ia “aua le fefe.”

Iesu o loo saofai ma aoao atu tagata

“Na te leoleoina lona lafu e pei o le leoleo mamoe” (Isaia 40:11).

Isaia 40:1–3, 9–11; 43:8–13; 48:20–21; 49:1–9

“O outou o a’u molimau.”

• O le a le uiga o le avea ma “molimau” a le Alii? E mafai e tagata o le vasega ona mafaufau i lenei fesili a o latou faitau i se tasi pe sili atu o nei sāvali: Isaia 40:1–3, 9–11; 48:20–21; 49:1–9. O le fuaitau i le “Punaoa Faaopoopo” e mafai ona maua ai nisi tali. O a “tala lelei” e tatau ona tatou faasoa atu o ni molimau a le Alii? O a mea i nei fuaiupu e fesoasoani ia i tatou ia “aua le fefe” e faasoa atu la tatou molimau? (Isaia 40:9). E mafai e tagata o le vasega ona talanoa i avanoa latou te maua e avea ai o ni molimau ma pe faapefea e a latou molimau ona faamanuiaina isi.

• Ina ia fesoasoani i tagata o le vasega e faaaoga aoaoga i le Isaia 43:8–13, e mafai ona e valaaulia i latou e vaai faalemafaufau faapea ua valaauina i latou e tutū o ni molimau i se faamasinoga. I lenei faamasinoga, ua molia Iesu Keriso ona o faamatalaga o loo faamaumauina i le Isaia 43:11. Afai e valaaulia i tatou o ni molimau e lagolago i le faamatalaga ia Iesu (tagai fuaiupu10), o le a le molimau tatou te ofoina atu? O a faamaoniga mai o tatou olaga o le a tatou tuuina atu?

Isaia 48:10; 49:13–16

E mafai e le Alii ona faamamāina i tatou e ala mai i o tatou puapuaga.

• Atonu e mafai e tagata o le vasega ona talanoaina le ala e fesoasoani ai nei upu mai ia Elder Quentin L. Cook ia i tatou ia malamalama i le Isaia 48:10: “Le tulaga lelei o uiga faaalia ma le amiotonu ia e tutupu mai e ala i mafatiaga e faaatoatoa ai i tatou” (“O Pese E le Mafai Ona Latou Usuina,”,” Liahona, Nov. 2011,106). E mafai foi ona latou talanoa i le ala na fesoasoani ai o latou lava “afi o mafatiaga” e faamamāina i latou faaleagaga. E faapefea ona fesoasoani le Isaia 49:13–16 ia i tatou pe a tatou mafatia? Tagai foi i le vitio “The Refiner’s Fire” (ChurchofJesusChrist.org).

aikona o punaoa faaopoopo

Punaoa Faaopoopo

Tu atu o se molimau.

Na faamatala e Peresitene Margaret D. Nadauld le uiga o le “tutū o ni molimau a le Atua i taimi uma ma i mea uma, ma i nofoaga uma” (Mosaea 18:9):

“I le tu ai o se molimau i taimi uma, ua tatou folafola atu e alolofa i le Alii, e faamamaluina o Ia i taimi uma—ao ma le po, tau mafanafana ma le tau malulu, taimi o le lelei ma taimi o le leaga—alofa i le Alii ma faaali atu lena alofa i le ala tatou te ola ai.…

“O le tu atu o se molimau i mea uma o lona uiga o mea uma —mea tetele, mea laiti, i talanoaga uma, i tausuaga, i taaloga e taaalo ai ma tusi e faitau ai ma musika e faalogologo i ai, i mea e lagolagoina, i auaunaga e tuuina atu, i ofu e laei ai, i uo e faia.…

“Mulimuli lava, tatou te faapea atu o le a tatou tutu o se molimau i nofoaga uma. O lona uiga e le gata i nofoaga lautele ae i nofoaga patino, i le faalilolilo, i nofoaga pogisa pe malamalama; i le lotu, a’oga, aiga po o taavale; i nofoaga o mauga po o nofoaga matafaga; i le auala po o totonu o le paka.…

“Pe a tatou mafaufau i le tāua o le meaalofa [a le Faaola] ia i tatou, o le a se mea laitiiti e mafai ona tatou faia mo Ia ma mo lo tatou Tama Faalelagi na auina mai o Ia? E mafai ona tatou tutū atu o ni molimau o lo La alofa ma aoaoga i taimi uma, i mea uma, ma nofoaga uma” (“Tu Atu o se Molimau,” Ensign, Me 2000, 93,95).

Faaleleia o Lo Tatou Aoao Atu

Valaaulia le aoao ma le filiga. “O tagata a’oga o lo latou tiutetauave lo latou lava aoaoina. Mafaufau pe faapefea ona e fesoasoani i tagata aoga e talia ma faataunuu lenei tiutetauave” (Aoao Atu i le Ala a le Faaola,29).