“19–25 Setema. 19–25 Setema: ‘Ina Faamafanafana Atu ia Outou i Lo’u Nuu,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“19–25 Setema. 19–25 Setema,” Sau, Mulimuli Mai ia te Au—Mo Tagata Taitoatasi ma Aiga: 2022

Ata

Iesu o loo faamalolo se alii tauaso

Faamaloloina o le Tagata Tauaso, saunia e Carl Heinrich Bloch

19–25 Setema

Isaia 40–49

“Ina Faamafanafana Atu ia Outou i Lo’u Nuu”

E masani ona faaaoga e Isaia le gagana faafaatusa. Mataitu ia manatu ma lagona e aumai e nei faailoga i lou mafaufau ma lou loto. O le a fesoasoani lenei mea e te malamalama lelei ai i mea na ia aoao mai.

Tusifaamaumau Ou Lagona Uunai

O le “faamafanafana” le upu muamua a Isaia mataupu 40. Ua faailoa ai le amataga o se leo ese, se faamamafa ese i le savali a le perofeta. O lapataiga tusitusiga na muamua atu a Isaia sa lapataiina ai Isaraelu ma Iuta e uiga i le faatafunaga ma le faatagataotauaina o le a oo mai ona a latou agasala, o nei valoaga mulimuli ane sa faamoemoe e faamafanafana ai Iutaia i le silia ma le 150 tausaga i le lumanai—ina ua uma ona faatamaia Ierusalema, sa faaleagaina le malumalu, ma aveina tagata faatagataotaua e Papelonia. Ae o nei foi valoaga na oo mamao mai i le lumanai, i le au Isaraelu faatoilaloina ma lotovaivai. Ua tautala mai foi ia i tatou, o e i nisi foi taimi e lagona ai le toilalo, lotovaivai ma le le mautonu.

O le savali a Isaia ia i latou ma i tatou e faatauvaa lava: “Aua le fefe” (Isaia 43:1). O loo i ai lava le faamoemoe. E le o faagaloina oe e le Alii. ma o loo ia te Ia le mana i tulaga ia e foliga mai e le mafai ona tatou puleaina. Pe le o le Alii ea “o le na faia le lagi, ma … o le na fofola le lalolagi, ma … o le na foai le manava i nuu o i ai”? (Isaia 42:5). Pe le sili atu ea Lona malosi nai lo Papelonia, nai lo le agasala, nai lo soo se mea o taotaomia faatagataotauaina oe? “Foi mai ia ia te au,” ua Ia augani mai ai, “aua ua ou faatauina oe” (Isaia 44:22). E mafai ona ia faamalolo, toefuatai, faamalosi, ma faamafanafana—soo se mea lava e manaomia mo oe, i lou tulaga, ina ia laveaiina.

Ina ia iloa pe na faapefea ona faatatau e Nifae ma Iakopo le Isaia 48–49 i o la tagata, tagai 1 Nifae 22 ma le 2 Nifae 6.

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Isaia 40–49

E mafai e Iesu Keriso ona faamafanafana ma aumai le faamoemoe ia te a’u.

Atonu sa faavaivailoto, ma lofituina, mo Isaraelu lo latou oo i le faatagataotauaina i Papelonia. Atonu sa mafaufau le toatele pe ua faavavau ona aveesea lo latou tulaga o ni tagata filifilia ma o le feagaiga a le Atua. Ao e faitau i le Isaia 40–49, vaavaai mo fuaitau na ono tuuina atu ai le mafanafana ma le faamoemoe. Mo fuaitau taitasi e te maua, mafaufau loloto ma tusifaamaumau le mea atonu o loo fai mai ai le Alii ia te oe i nei fuaiupu. O ni nai manatu nei atonu e te amata ai.

E mafai faapefea ona e faasoa atu nei savali ma se tasi o manaomia le faamalosiauga po o le faamoemoe? (tagai Isaia 40:1–2).

Tagai foi Jeffrey R. Holland, “O Se Susulu Atoatoa o le Faamoemoe” Ensign po o le Liahona, Me 2020, 81–84.

O le usitai i le Alii, e mafai ai ona tatou pei o se “vaitafe lou manuia” (Isaia 48:18).

Isaia 40:3–8, 15–23; 42:15–16; 47:7–11

O le mana o le Atua e sili mamao atu nai lo le malosi faalelalolagi.

Sa faamanatu soo atu e Isaia i lona nuu ia le mana le mafaatusalia o le Atua, ma faatusaina foi i le mana faasaua faalelalolagi na siomia ai i latou. Vaavaai mo nei savali ao e faitau i le Isaia 40:3–8, 15–23; 42:15–16; ma le 47:7–11 (ia maitau o le mataupu 47 o loo faatūtū atu i le malo na pu’eina Isaraelu, o Papelonia). O a ni mea o loo aoao mai e nei fuaitau ia te oe e uiga i mea faalelalolagi? O a ni mea o latou aoao mai ia te oe e uiga i le Atua? Mafaufau loloto pe aisea atonu na taua ai lenei savali i tagata Iutaia na faatagataotauaina. Aisea e taua tele ai ia te oe?

Tagai foi “Afio Mai!” Viiga, nu. 92.

Isaia 41:8–13; 42:1–7; 43:9–12; 44:21–28; 45:1–4; 48:10; 49:1–9

“O oe o laʼu auauna.”

I le Isaia 40–49 atoa o loo fetalai mai ai le Alii e uiga i Lana “auauna” ma Lana “molimau.” I nisi o fuaitau o nei upu e foliga mai e faasino atu ia Iesu Keriso (tagai Isaia 42:1–7), o isi e faasino i le aiga o Isaraelu (tagai Isaia 45:4), ae peitai o isi e faasino i le Tupu o Kuresa, o le na faatagaina tagata Iutaia e toe foi atu i Ierusalema ma toe fausia le malumalu (tagai 44:26–45:4). I ia la tulaga taitasi, atonu e te mafaufau foi i le ala e faatatau ai nei fuaitau ia te oe o se auauna ma se molimau o le Alii. Mo se faataitaiga, mafaufau i fesili e pei o nei:

Isaia 41:8–13; 42:6; 44:21. O le a se mea ua valaauina oe e le Alii e fai? Mafaufau i valaauga aloaia o le Ekalesia faapea ma isi tiutetauave ua osifeagaiga ai e auauna atu ia te Ia. O faapefea ona Ia lagolagoina oe ma “taofimauina [lou] lima” (Isaia 42:6) ao e auauna atu? O faapefea ona Ia “filifilia” oe e avea ma Ana auauna? (tagai foi Isaia 48:10).

Isaia 43:9–12. O le a se tulaga o avea ai oe o se molimau a Iesu Keriso? O a ni aafiaga i lou olaga ua faaali atu ai ia te oe o Ia o le Faaola?

Isaia 49:1–9. O a ni savali e te maua i nei fuaitau e mafai ona fesoasoani pe a foliga mai au taumafaiga ma auaunaga ua “tigaina fua, ma iu vale”? (fuaiupu 4).

Tagai foi Mosaea 18:9; Henry B. Eyring, “O Se Tamaitiiti ma se Soo,” Ensign po o le Liahona, Me 2003, 29–32.

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Isaia 40:3–4.Ina ia suesue i le uiga o le “teuteu ia … le ala o le Alii,” e mafai e lou aiga ona faasa’o se mea e pi’o, tapena le gasu o le foloa, ma fai se auala faalaulelei i le eleele gaoā. E mafai foi ona outou faaali atu ni ata o Ioane le Papatiso ma Iosefa Samita, (tagai Gospel Art Book, nu. 35,87). Na faapefea ona la teuteuina le ala mo le afio mai o le Alii? (tagai Luka 3:2–18; Mataupu Faavae ma Feagaiga 135:3). E faapefea ona tatou fesoasoani e teuteu le ala mo Ia? (mo se faataitaiga, tagai Mataupu Faavae ma Feagaiga 33:10).

Isaia 40:28; 43:14–15; 44:6.O a suafa po o faalaniga o Iesu Keriso tatou te maua i nei fuaiupu? O le a se mea o aoao mai ia i tatou e nei suafa taitasi e uiga ia te Ia?

Isaia 41:10; 43:2–5; 46:4.O nei fuaiupu o loo atagia mai i le viiga “Le Faavae Malosi” (Viiga, nu.45). Atonu e fiafia le tou aiga e usu faatasi le viiga ma sue fuaitau o loo i ai e talitutusa ma fuaitau o loo i nei fuaiupu. O a ni mea o loo aoao mai e nei fuaitau ia i tatou e uiga ia Iesu Keriso?

Isaia 44:3–4; 45:8.A uma ona faitau nei fuaiupu, e mafai e le tou aiga ona fui se laautoto a o tou talanoa e uiga i faamanuiaga ua liligi mai e le Alii ia i latou. O le a le mea e tupu i se laautoto pe a tatou fuiina? O le a le mea ua faamoemoeina e le Alii mai ia i tatou ao Ia faamanuia mai ia i tatou?

Isaia 48:17–18.Mafaufau e faaali atu ata po o vitio o vaitafe ma galu o le sami. E mafai faapefea ona avea le filemu faapei o se vaitafe? E mafai faapefea ona avea le amiotonu e pei o galu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Le Fa’avae Malosi” Viiga, nu. 45.

Faaleleia o Suesuega Faaletagata Lava Ia

Faauiga upu. Taumafai e sue uiga o upu i mau e te le malamalama i ai—e faapena foi i upu ua e manatu e te malamalama i ai. O nisi taimi e mafai ona fesoasoani ai le faauigaga e ese ai lau faitau i se fuaiupu ma maua ai se manatu fou faaleagaga.