Ua Valoia e le Perofeta o Isaia le Soifua Mai o Keriso, saunia e Harry Anderson

5–11 Setema

Isaia 1–12

“O Le Atua O Loʼu Olataga Lea”

Saili le taitaiga faaleagaga ao e suesue. E sili ona malamalama lelei i upu a Isaia pe a “tumu i le agaga o valoaga,” e pei ona aoao mai ai Nifae (2 Nifae 25:4).

Tusifaamaumau Ou Lagona Uunai

E tusa lava pe o lou taimi muamua lenei ua faitau ai le tusi a Isaia, atonu e te tau ai i fuaitau [ua e] masani ai. Ona o la, o perofeta uma o le Feagaiga Tuai, o Isaia le perofeta e pito sili ona ta’ua soo i isi tusi o tusitusiga paia, na faia foi e le Faaola lava Ia. O upu a Isaia e masani ona vaaia i viiga ma isi musika paia. Aisea ua tele ina ta’ua soo ai upu a Isaia?

E mautinoa lava o le vaega o le mafuaaga ona, sa ia Isaia se meaalofa o le faamatalaina o le afioga a le Atua i se gagana manino ma e le faagaloina. Ae, e sili atu nai lo lena. Na musuia e Isaia ia perofeta mo le tele o augatupulaga ona o upumoni sa ia aoaoina atu na oo mamao i tua atu o lana lava augatupulaga—o le fanauga a Isaraelu na ola i le va o le 740 ma le 701TLM. O lana matafaioi o le faapupula lea o o tatou mata i galuega maoae a le Atua o le faaolataga, lea e sili atu le tele nai lo o se malo e tasi po o se periota e tasi. Mai ia Isaia, na iloa ai e Nifae o ia ma lona nuu, e ui ina motuese mai le ia Isaraelu uma, sa avea pea ma se vaega o le nuu o le feagaiga a le Atua. I le Isaia, na maua ai e tusitala o le Feagaiga Fou ia valoaga e uiga i le Mesia ia na faataunuuina i luma tonu lava o o latou mata. Ma i le Isaia, na maua ai e Iosefa Samita ia musumusuga mo le galuega o aso e gata ai o le faapotopotoina o Isaraelu ma le fausia o Siona. A e faitau i le Isaia, o le a se mea o le a e tau i ai?

Mo ni faamatalaga atili e uiga ia Isaia ma ana tusitusiga, tagai i le “Isaia” i le Bible Dictionary. Mo faamatalaga e uiga i le taimi na soifua ai Isaia, tagai i le 2 Tupu 15–20 ma le 2 Nofoaiga Tupu 26–32.

Manatu mo Suesuega Faaletagata Lava Ia o Tusitusiga Paia

Isaia 1–12

E mafai faapefea ona ou malamalama lelei i aoaoga a Isaia?

E uiga i tusitusiga a Isaia, na fetalai mai ai le Faaola, “Suesue ma le filiga i nei mea; ona ua silisili lava upu a Isaia” (tagai 3 Nifae 23:1–3). Peitai i le toatele, o le Isaia e mafai ona faigata ona malamalama i ai. O ni nai motugaafa nei e fesoasoani ia te oe ia maua ai uiga sili atu i upu a Isaia.

• Mafaufau loloto i faailoga ma tala faatusa na faaaoga e Isaia. Mo se faataitaiga, mafaufau loloto pe o le a sou manatu i le mea na manao Isaia e ta’u atu ina ua ia tusi e uiga i se tovine (tagai Isaia 5:1–7), o vai o Seloa (tagai Isaia 8:5–10), se tagavai (tagai Isaia 5:26), ma se tagavai [fu’a] (tagai Isaia 11:10,12).

• Mo mataupu uma e faitauina, fesili ifo ia te oe lava, “O le a se mea o o’u aoao i ai e uiga ia Iesu Keriso?” (tagai 1 Nifae 19:23).

• Vaai mo autu e te lagona e fetaui ma o tatou aso, e pei o le soifuaga ma le misiona a Iesu Keriso, le faataapeapeina ma le faapotopotoina o Isaraelu, o aso amuli, ma le Meleniuma. E mafai foi ona e faia ni lisi o mau faasino mai le Isaia o aoao mai e uiga i nei autu.

• Faaaoga fesoasoani mo suesuega i mea e maua ai, e pei o se lomifefiloi, o vaefaamatalaga o le Tusi Paia, o ulutala o mataupu, ma le Taiala i Tusitusiga Paia.

Tagai foi 2 Nifae 25:1–8.

Isaia 1; 3;5

“Soia tou te fai mea leaga.”

Sa faaauau pea ona lapatai e Isaia le Malo o sa Iuta e uiga i lo latou tulaga faaleagaga. I le uma ai ona faitau o le Isaia 1, 3, ma le5, o le a faapefea ona e faamatalaina le tulaga faaleagaga o le nuu? O a ni lapataiga e te maua e talafeagai ma o tatou aso?

E faaopoopo i lapataiga, atonu e te tusia foi ni faamatalaga e uiga i savali o le faamoemoe mo Isaraelu agasala (tagai, mo se faataitaiga, Isaia 1:16–20, 25–27; 3:10). O a ni mea ua e aoaoina e uiga i le Alii, mai nei savali?

Isaia 2; 4; 11–12

O le a faia e le Atua se galuega tele i aso e gata ai.

O le tele o tusitusiga a Isaia o valoaga ua i ai ni uiga e fitoitonu mo o tatou aso. O le fea o faamatalaga a Isaia o aso e gata ai i mataupu 2; 4; 11–12 e faapitoa ona musuia ia te oe? (Ua tuuina mai e le Mataupu Faavae ma Feagaiga 113:1–6 ni manatu aoga e uiga i le Isaia 11.) O a mea ua e aoaoina mai e uiga i le faapotopotoina o Isaraelu ma le laveaiga o Siona? O le a se mea ua musuia oe e fai i le uma ai ona faitauina o nei mataupu?

Tagai foi i le Isaia 5:26; 10:20.

Isaia 6

O perofeta ua valaauina e le Atua.

I le mataupu 6, na faamatala ai e Isaia lona valaauga e avea ma se perofeta. Ao e faitau i lenei mataupu, o a ni mea e faagaeetia ai oe e uiga i le aafiaga o Isaia? E faapefea ona faatosina e lenei mataupu le ala e te mafaufau ai e uiga i le Alii, Ana perofeta, ma le galuega ua valaauina i latou e fai?

“Aua ua fanau mai mo i tatou le tama, ua foaiina mai mo i tatou le atalii” (Isaia 9:6).

Isaia 7–9

Sa vavalo Isaia e uiga ia Iesu Keriso.

I le popofou o le auaunaga a Isaia, na faia ai e le Malo o Isaraelu (lea na ta’ua foi o Efaraima) se vaega tuufaatasi ma Suria e puipui ai o ia e faasaga ia Asuria. Sa mananao Isaraelu ma Suria e faamalosi ia Aasa, le tupu o sa Iuta, ia auai atu i le la vaega. Ae sa valoia e Isaia o le toilalo lea vaega tuufaatasi ma fautuaina Aasa ia faatuatua i le Alii (tagai Isaia 7–9, ae maise le Isaia 7:7–9; 8:12–13).

Ao fautuaina e Isaia ia Aasa, sa ia faia ni valoaga lauiloa, e pei o na o loo maua i le Isaia 7:14; 8:13–14; 9:2, 6–7. E ui e le o manino atoatoa le uiga o nei valoaga i le vaitaimi o Aasa, ae ua manino le faatatau ia Iesu Keriso (tagai foi Mataio 1:21–23; 4:16; 21:44; Luka 1:31–33). O le a se mea e te aoaoina e uiga i le Faaola mai nei fuaiupu?

Manatu mo Suesuega Faaleaiga o Tusitusiga Paia ma Afiafi Faaleaiga

Isaia 1:16–18.Ina ia fesoasoani i tagata o le aiga ia malamalama i nei fuaiupu, e mafai ona tou faitau i le vaega “O Nisi o i Tatou Ua Lagona e Le Mafai Ona Lava lo Tatou Lelei” mai le savali a Sister Sharon Eubank “O Keriso: O Le Malamalama e Susulu i le Pogisa” (Ensign po o le Liahona, Me 2019,75). Pe e mafai ona faaali atu le ala e mafai ona aveese ai pisia mai lavalava. E faapefea ona ese le savali a le Alii o loo i nei fuaiupu mai le mea o loo manao Satani ia tatou talitonu i ai?

Isaia 2:1–5.E mafai e tagata o le aiga ona filifili se tasi o nei fuaiupu ma tusi ata o mea o loo faamatala mai ai. O le a se mea ua aoao mai ia i tatou e le malumalu e uiga i ala o le Alii? E faapefea ona faamanuiaina i tatou pe a tatou “savavali i le malamalama o Ieova”? (Isaia 2:5).

Isaia 4:5–6.O le a le mea ua folafola mai e le Alii ia i tatou i nei fuaiupu? Mata o le a le uiga o nei folafolaga? O faapefea ona Ia faataunuuina [ia folafolaga]? Tagai foi i le Esoto 13:21–22.)

Isaia 7:14; 9:1–7.I le faaaoga ai o ata tusi po o ata mai mekasini a le Ekalesia, e mafai ona tou faia se pepa lautele o i ai se savali e faaali ai nisi o mea tatou te aoao ai e uiga ia Iesu Keriso mai i nei fuaiupu.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “I Luga o Mauga,” Viiga, nu.4.

Faaleleia o Suesuega Faaletagata Lava Ia

Ole atu i le Alii mo le fesoasoani. Ina ia malamalama i tusitusiga paia, tatou te manaomia faaaliga faaletagata lava ia. Ua folafola mai le Alii, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7).

Sa aoao mai Isaia o le fale apitaga o le a avea ma “mea e malu ai” ma “mea e ulu ai i le timuga ma le uaga” (Isaia 4:6).Malumalu o Idaho Falls Idaho