“12–18 Setema. Isaia 13–14; 24–30; 35: ‘O Se Galuega Tele ma le Ofoofogia,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“12–18 Setema. Isaia 13–14; 24–30; 35,” Sau, Mulimuli Mai ia te A’u—Mo Tagata Taitoatasi ma Aiga: 2022

Ata

Iosefa Samita ua vaai le Tama Faalelagi ma Iesu Keriso i le Vao Paia

Vao Paia, saunia e Brent Borup

12–18 Setema

Isaia 13–14; 24–30;35

“O Se Galuega Tele ma le Ofoofogia”

Na aoao mai Peresitene Bonnie H. Cordon, “O mau e faamalamalamaina ai o tatou mafaufau, fafaga o tatou agaga, tali a tatou fesili, faateleina lo tatou faalagolago i le Alii, ma fesoasoani e faataulai o tatou olaga ia te Ia” (“Ia Faatuatua i le Alii a e Aua le Faalagolago,” Ensign po o le Liahona, Me 2017,7).

Tusifaamaumau Ou Lagona Uunai

O le tasi o mea na fetalai mai le Alii i perofeta e fai o le lapatai atu lea e uiga i taunuuga o le agasala. I le tulaga o perofeta o le Feagaiga Tuai, o lenei mea e masani ona faauiga o le ta’u atu i taitai malolosi o malo malolosi e tatau ona latou salamo a leai o le a faatamaiaina. Sa o se galuega lamatiaina, ae o Isaia sa le fefe, ma o ana lapataiga i malo o ona vaitaimi—e aofia ai Isaraelu, Iutaia, ma malo na latalata atu i ai—sa lotoa (tagai Isaia 13–23).

Ae peitai, o Isaia sa i ai foi sana savali o le faamoemoe. E ui lava ina sa iu lava ina oo atu faatamaiaga na valoiaina i nei malo, ae sa muaivaaia foi e Isaia se avanoa mo le toe fuataiga ma le toe faafouga. O le a valaaulia e le Alii Lona nuu e foi mai ia te Ia. O le a Ia faia “le serapi ma vailepa, … le nuu naumati ma vaipuna” (Isaia 35:7). O le a Ia faia “se galuega tele ma le ofoofogia” (Isaia 29:14), e toefuatai atu ai ia Isaraelu faamanuiaga sa Ia folafolaina atu ia i latou. E leai se isi lava tagata e oo lava foi ia Isaia na soifua i lena taimi na ola e vaai i lenei galuega tele. Ae ua tatou vaaia lona faataunuuga maoae i aso nei. O le mea moni, o i tatou o se vaega o lea faataunuuga!

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Isaia 13:1–11, 19–22; 14:1–20

O malo amioleaga o le lalolagi ma o latou taitai o le a pauu.

O le Isaia 13–14 ua ta’ua “o le avega a” (o se savali faaperofeta e uiga) ia Papelonia (Isaia 13:1). Sa avea i se taimi ma se malo malosi faatasi ma se taitai malosi, ae o Papelonia i le taimi nei ua manatu i ai ua o se talafaasolopito anamua. Aisea e taua ai le savali ia Papelonia ia i tatou i le taimi nei? I tusitusiga paia, o Papelonia o le faatusa o le faamaualuga, faalelalolagi, ma le agasala, ma o aso nei ua siomia ai i tatou i ia mea uma. Mafaufau i lenei faafaatusa ao e faitaua le Isaia 13:1–11, 19–22; 14:1–20. E mafai ona e mafaufau i fesili e pei o nei:

E faapefea ona tutusa lapataiga a Isaia ia Papelonia ma valoaga e uiga i le lalolagi a o lumanai ai le Afio Mai Faalua o le Faaola? (tagai Isaia 13:1–11; Mataupu Faavae ma Feagaiga 45:26–42).
O a ni mea e tutusa ai o e vaaia i le va o le faamaualuga o le tupu o Papelonia ma le faamaualuga o Satani? (tagai Isaia 14:4–20; Mose 4:1–4). O a ni lapataiga ua e maua mo oe lava i lenei fuaiupu?
E faapefea ona tuuina mai e le Faaola le “faafilemuina … i lou tiga, ma lou atuatuvale”? (Isaia 14:3).

Ua Toe Afio Mai o Ia e Pule ma Nofotupu, saunia e MaryR. Sauer

Isaia 24:21–23; 25:6–8; 26:19; 28:16

O tusitusiga a Isaia ua faasino atu ai au ia Iesu Keriso.

O tusitusiga a Isaia e masani ona faasino atu i le misiona a le Faaola, e aofia ai Lana taulaga togiola, Toetu, ma le Afio Mai Faalua. O a ni vaega o Lana misiona e oo mai i le mafaufau ao e faitau i fuaiupu nei: Isaia 24:21–23; 25:6–8; 26:19; 28:16? O a isi fuaitau e te tau i ai e faamanatu mai ai ia te oe le Faaola?

Tagai foi Isaia 22:22–25.

Isaia 24:1–12; 28:7–8; 29:7–10; 30:8–14

O le liliuese o lona uiga o le liliu ese mai le Alii ma Ana perofeta.

Ina ia lapatai mai e uiga i taunuuga o le liliu ese mai le Alii ma le teenaina o Ana perofeta, sa faaaoga ai e Isaia ni talafaatusa eseese. O nei tala e aofia ai se lalolagi gaogao (Isaia 24:1–12), ōnanā (Isaia 28:7–8), fiaai ma le lāina (Isaia 29:7–10), ma se fagu nutililii (Isaia 30:8–14). E faavae i mea sa e faitauina i nei fuaiupu, aisea e taua ai le tausia o a tatou feagaiga? Mafaufau po o a ni mea o e faia e tumau faamaoni ai i le Alii ma Ana auauna.

Taga foi M. Russell Ballard, “Nofo i totonu o le Vaa ma Pipiimau!” Ensign po o le Liahona, Nov. 2014, 89–92; Gospel Topics, “Apostasy,” topics.ChurchofJesusChrist.org.

Isaia 29; 30:18–26;35

E mafai e le Alii ona toe aumai mea e leiloloa pe tae’i.

Pe a liliu ese tagata po o nuu mai le Alii, e manao Satani ia tatou mafaufau o taunuuga e le mafai ona toe suia. Ae peitai, na faamatalaina e Isaia nisi o mea tetele o le a faia e le Alii pe a salamo tagata ma liliu atu ia te Ia. O a ni mea e te aoao mai le Isaia 29:13–24; 30:18–26;35 e uiga i le Alii, Lona alofa, ma Lona mana?

O se tasi o auala na faaalia ai e le Alii Lona mana i o tatou aso, e ala lea i le Toefuataiga o Lana talalelei. O le Isaia 29 o loo i ai ni nai fuaitau e i ai mea e tutusa ai ma mea na tutupu o lena Toefuataiga. Mo se faataitaiga:

Faatusatusa le Isaia 29:11–12 i le 2 Nifae 27:6–26 ma le Iosefa Samita—Talafaasolopito 1:63–65.
Faatusatusa le Isaia 29:13–14 i le Mataupu Faavae ma Feagaiga 4 ma le Iosefa Samita—Talafaasolopito 1:17–19.
Faatusatusa le Isaia 29:18–24 i le itulau autu o le Tusi a Mamona.

O a ni lagona po o ni uunaiga e te maua e uiga i le Toefuataiga o le talalelei ao e faitau i nei fuaitau?

Tagai foi “O Le Toefuata’iga o le Atoatoaga o le Talalelei a Iesu Keriso: O Se Folafolaga ua Lua Seneturi i le Lalolagi” (ChurchofJesusChrist.org).

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Isaia 25:4–9.Pe na maua e lou aiga le faamanuiaga o se apitaga saogalemu i le taimi o se matagi po o le paolo i se aso vevela o le taumafanafana? (tagai fuaiupu 4). Talanoa e uiga i lenei mea ao e faitau i nei fuaiupu ma isi faamatalaga o le Alii o loo maua i le Isaia 25:4–9. O a ni auala e pei ai le Faaola o nei mea?

Isaia 25:8–9; 26:19.O le faaali atu o ata o le Faaola i Ketesemane, i luga o le satauro, ma i le i Lona Toetu, e mafai ona fesoasoani i latou aiga e iloa ai sootaga i le va o nei fuaiupu ma Iesu Keriso (tagai Gospel Art Book, nu. 56, 57, 58,59). Valaaulia lou aiga e faasoa mai pe aisea latou te “olioli i lana faaolataga” (Isaia 25:9).

Isaia 29:11–18.O nei fuaiupu e mafai ona fesoasoani i lou aiga e talanoa ai i le “galuega tele ma le ofoofogia” (fuaiupu 14) o le Toefuataiga o le talalelei ma le oo mai o le Tusi a Mamona. Aisea e taua ma ofoofogia ai nei mea ia i tatou? Valaaulia tagata o le aiga e saili ni mea faitino i le tou fale e fai ma faatusa o faamanuiaga ofoofogia o le Toefuataiga.”

Isaia 35.Atonu o le a fiafia lou aiga e tusi ni ata o faatusa o loo i lenei mataupu e fesoasoani ia i tatou ia malamalama i le ala o loo atinae ai e Iesu Keriso ia Siona i o tatou aso. O le a se mea ua tatou aoao mai i nei ata? O le a se mea e mafai ona tatou faia e fesoasoani ai e atinae Siona?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “I se Taeao Manaia,” Tusipese a Tamaiti,57.

Faaleleia o Lo Tatou Aoao Atu

Tuu le avanoa i tamaiti e faailoa ai lo latou fatufatuai. Pe a fatufatu e fanau se mea e faatatau i se mataupu faavae o le talalelei, e fesoasoani ia latou malamalama lelei ai i le mataupu faavae. Tuu atu ia i latou e fau, tusi ata, valivali, tusitusi, ma fatufatu. (Tagai Aoao Atu i le Ala a le Faaola,25.)